اختنا Shieam على كرسي الاعتراف

[Mayda]

ضيفنا الثامن على


http://www.orthodoxonline.org/forum/img-content/imgcache/2009/11/32.jpg


هي اختنا المحبوبة
Shieam


شيم من الأخوات المحبوبات، لديها مشاركات خجولة ولكنها بناءة ومفيدة جداً


أتمنى لك دوام المشاركة معنا يا شيم وأن يكون هذا الاسبوع مريح لك مع أسئلة الأخوات والأخوة


http://www.orthodoxonline.org/forum/img-content/imgcache/notfound.gif


مع أول سؤال:


ماذا تعني لك المشاعر التالية؟؟
- بكاء طفل
- أنين أم
- دموع رجل
- شقاوة أطفال
- حديقة زهور
- نار مشتعله
- الشاطئ وقت الغروب
- موسيقى هادئة

[شيم]

بصراحة تفاجأت ما كنت متوقعة بنوب

:sm-ool-21::sm-ool-21::sm-ool-21:
وعلى قولة مين قال (استعنا عالشقا بالله)


دموع طفل بحس اني رح ابكي معو وانو ما حدا عم يفهم عليه وانو انا لازم افهم عليه لحتى يرجع يضحك لاني بحس انو الولاد ما خلقو ليبكو حاجي الكبار عم يبكو كمان الصغار.. لاحقين عالبكي والوجع اصلا انا بكره البكي لانو بيوجع ولا مرة بكيت وارتحت دايما بتوجع اكتر بعد ما خلص بكي..

أنين أمّ صبر ووجع من المحبة وانو(قلبي على ابني وقلب ابني عالحجر) وبتذكر امي مرة تطلعت بواحد من اخواتي بعد ما كان مزعلها كتير وما حكت شي بس عيونا كانو عم يقولو (الله يهديك لو كنت اوعى من هيك ما كنت بتحكيني بهالطريقة.. مصيرك تكبر وتفهم عليي مزبوط)..

دموع رجل تعني لي الكثير الحنان والشجاعة والثقة بالنفس والصدق لأن الرجل لا يبكي الا اذا كان صادقا جدا جدا..

شقاوة اطفال تعني لي الفرح والحيوية والحرية وانو الدنيا كلها ما فرقانة معون وبضحك عليون حتى لو دايقتني شقاوتن وبتمنى ساوي متلون...

بحب الورد كتير وبكره شوفو بالمزهرية وبحس انوجنينة الورد هيي مملكة للورد وما بيصير حدا يقتحمها وياخد شي منها بدون اذن الورد..

نار مشتعلة بتعنيلي الدفا.. والاحمر الناري لوني المفضل..

اما الشاطئ وقت الغروب فهوي منظري المفضل لأني بحب البحر كتير ومو للسباحة للفرجة وغروب الشمس هونيك بيعنيلي الامل لانو حتى لو الشمس غابت اكيد رح ترجع بكرا..

الموسيقى الهادئة تعني لي الطبيعة والهدوء وتذكرني بالله لا تسألوني كيف هيك رواق على رواق...

آسفة طولت عليكن بس الأسئلة روعة شكرا اخت مايدا...

صلواتكم

[Alexius - The old account]

اهلين اخت شيم
ع السريع، وبدون مقدمات:
1. شيم في سطور
2. شو رأيك بالموقع؟ ولا اتكلم عن المنتدى...
3. ليش بتعتقدي أن الموقع مهضوم حقو على حساب المنتدى؟
4. في عندك حلاوة حمصية؟ :)

[Abu Rober]

اخت شيم بتمنالك اسبوع مريح
1- ماذا استفدتي من اسئلة واجوبة الأخوة السبعة الذين جلسوا على الكرسي من قبللك؟
2- ماذا يعنيلك الموقع بشكل عام؟

[شيم]

بالمأهل أخ ألكسيوس وبدون مقدمات رح جاوب عالاسئلة..


شيم في سطور


خريجة ادب انكليزي وأعمل في جمعية أهلية تعتني بشؤون المغتربين وترحب بهم بطريقة أهلية عند عودتهم (بقوا عملولنا زيارة بس ترجعو مشان نقوم بالواجب)...


أحب الهدوء لأنني عصبية وأحب الفرح وأغنيتي المفضلة هي (عيش حياتك للفنان زين العمر) مشكلتي أنني غير مستقرة وأتردد كثيراً لدرجة أحجم فيها عن اتخاذ أي قرار (صلولنا لنخلص من هالقصة)..
اعتبر نفسي واضحة وبسيطة وهذه مشكلتي مع من حولي واكثر ما يثير غضبي هو النفاق لا سيما الديني..
هاد كل شي بذهني هلأ.. إذا انتو بتسألوني أسهل..


ما رأيك بالموقع ولا أتكلم عن المنتدى؟


الحقيقة ولا أجامل أن الموقع رائع جداً وشامل جداً وغني بمواضيع كثيرة وجديرة بالاهتمام لا سيما المواضيع التي تطرح جدلاً كبيراً.. على مين بس يحطون ويقعد يقرأ ولكن المشكلة تكمن في أنه لا صبر لي على القراءة على الشاشة وكل ما أقرأه أطبعه على أوراق وأقرأه.. إيه من وين وكل هالكم من المواضيع..


ليش بتعتقدي انو الموقع مهضوم حقو على حساب المنتدى؟


مع أن الموقع شامل جداً وغني بالمواضيع المفيدة التي لا توجد في المنتدى إلى أن المنتديات بشكل عام محبوبة من الناس أكثر من المواقع العادية بسبب الحركة التي تخلقها من خلال النقاشات التي تدور بين الأعضاء والتي تؤدي إلى تبادل الخبرات..
ميزة المنتديات أخي العزيز انها تسمح لك بأن تطرح سؤالاً محدداً لطالما حاولت البحث عنه في كثير من المقالات العادية ولم تجد له جواباً وربما طرحته على أناس حولك ولكن احداً منهم لم يجبك بالتحديد عن سؤالك فتطرح سؤالك في المنتدى وتأتيك الإجابات من كل الأماكن (والا ما تلاقي الجواب يللي بدك ياه)..
ومن ميزات المنتديات أيضاً أنها تمنح للأعضاء فرصة التعرف بأناس جدد قد تنشأ بينهم علاقات ودية خارج المنتدى فيما بعد..
وربما - البعض منهم - يهتم للجدال فقط أكثر من الاهتمام بالاستفادة مما يطرح أمامه لذلك تراهم مندفعين للنقاش دون هدف واضح ولكنهم قلائل جداً في هكذا منتديات..
بالنسبة لي وكوني مرشدة يهمني أن يطرح أمامي أي تساؤل في موضوع معين لأنني قد أتعرض لسؤال من أحد أبناء فرقتي أو حتى من الناس حولي (بما انون حاسبيني عالإيمان لأني بروح عالكنيسة يعني) فماذا سأفعل عندها؟؟؟؟؟؟؟


عندك حلاوة حمصية:


لعيونك أحلى حلاوة حمصية تخدم شواربك وشوارب الكل انتو شرفونا بزيارة وشوف شلون الحلاوة بدا تنزل عالطاولات...


اخت

شيم بتمنالك اسبوع مريح

شكرا الك كتير ما بتتصور انا كمان اديش عم اتمنى يكون اسبوع مريح والله يستر..


1- ماذا استفدتي من اسئلة واجوبة الأخوة السبعة الذين جلسوا على الكرسي من قبللك؟
الحقيقة لم أستفد كثيراً لأنني لم أتابع الجميع ويمكنني القول أن كل ما استفدته ممن تابعتهم هو أنني تعرفت عليهم أكثر إلا عندما تابعت الاخ الكسيوس على الكرسي فقد استفدت من الأسئلة التي طرحت عليه وأتمنى من الباقين أن يعذروني لأنني لم أتابع الجميع.


2- ماذا يعني لك الموقع بشكل عام؟
في البداية كان يعني لي مصدراً موثوقاً للمعلومات يفيدني في الإرشاد ولم أكن ادخله إلا لأستفيد من بعض المواضيع التي أحتاجها وسأصدقكم القول أنني لم أقصده لدعم حياتي الروحية ولكن الآن صار جزءاً مهماً بالنسبة لي وصرت أشعر بأنني يجب أن أعطي لهذا الموقع كما اعطاني ويعطيني لأن له فضلاً كبيراً علي..

[رافي]

أخت شيم:
مرحبا،،،
أول ما شفت اسم عالكرسي، فوراً قلت بدي أسألك كيف بكون اسمك بالعربي لأني كنت شاكك أنو اسمك هوي شيم، ما عرفت كتير اقرأه متل مومكتوب بالمنتدى، حبيت اسمك، مين سمّاكي هيك؟ وليش؟ وحبيت شغلك كتير، الحقيقة شي حلو يكون عنا هيك شي بسوريا. ممكن تحكيلنا بتفصيل عن شغلك!!! إقامة هادئة ومريحة!!! صلواتك

[نبيل]

اخت شيم
انا شخصيا كنت مسرور أنو صار دورك لحتى نسألك وهلأ انا عندي سؤال شو رأيك بمسلسل مرايا اكيد ما هاد السؤال بس السؤال
انو بهالمسلسل الكوميدي شفت واحد كان عم يغش الزيت ويخلطو بزيت الزيتون بس راح عالحج عقبال العايزين ورجع وصار يبيع زيت زيتون نظامي بس العالم ما عجبا الزيت الجديد قام رجع عالقديم فشو رأيك هو بيتحاسب على هالشي وللا لاء

[نبيل]

اخت شيم اسمي انا يعني نبيل شو بيعنيلك

[شيم]

أول ما شفت اسم عالكرسي، فوراً قلت بدي أسألك كيف بكون اسمك بالعربيلأني كنت شاكك أنو اسمك هوي شيم، ما عرفت كتير اقرأه متل مومكتوب بالمنتدى،

مزبوط اسمي شيم وهوي جمع شيمة يعني الاخلاق الحميدة

حبيتاسمك، مين سمّاكي هيك؟ وليش؟
قصة اسمي هيي كالتالي الوالد بيشتغل بمؤسسة الكهرباء بقسم التنفيذ وبيطلعو بيعملوابراج الكهرباء برات حمص ومن جملة المحلات اللي سافرو عليها كانو بمنطقة اسمها (تل أبيض) وشاف هونيك بدوية حلوة كتير اسمها شيم قام قرر انو يسميني على اسمها مشان اطلع حلوة متلها لا ما تصدق بس لانو حب الاسم قامن سماني هيك..

وحبيت شغلك كتير، الحقيقة شي حلو يكون عنا هيك شيبسوريا. ممكن تحكيلنا بتفصيل عن شغلك!!!
نحنا بشغلنا منتعامل مع مغتربين أكتر شي بأميركا الجنوبية منتواصل معون واذا في حدا عم يسأل عن اهلو هون أو هونيك منقدر نساعدو من خلال علاقتنا بالسفارات ووزارة الخارجية بس هيي طابعها اهلي اكتر منو رسمي واذا اجا حدا من المغتربين يللي بيعرفوهن بيعملولن عزيمة غدا او عشا او يمكن يطلعو رحلة..
مشكلة الرابطة - محل ما بشتغل يعني - انو نطاقها ضيق كتير واكتر شي بيهتمو بالمغتربين الللي اصولون حمصية يعني قليل ما تتعرف على مغتربين جدد وفي تقصير بالاغتراب الحديث لانو اكتر اهتمامون بالمغتربين القدماء ايام الاتراك والفرنسيين بس منتابع مشاكل الاغتراب الحديث ومنزلها بمجلتنا اسمها السنونو فيها كتير مواضيع عن الاغتراب بس هدفها تربط المغتربين مع اهاليون انو هون في إلكون بلد لا تنسوه ونحنا مو نسيانينكن........

صلواتك

[شيم]

بالنسبة للأخ الحبيب نبيل انا عرفت الحلقة وبالنسبة لألي اذا عم تسألني اذا بيتحاسب او ما بيتحاسب فهي مو شغلتي احكم.. في ربنا هوي يللي بيقرر بس انا بشوف انو هيك عم تضحك على الله او باتلاحرى عم تضحك على حالك يعني حتى لو الناس حبو الغش انت مسؤول تكون صادق وبس حتى لو الناس ما عاجبون اما نحط راسنا بين الروس ونقول يا قطاع الروس ما بتوقع انو هيك صح..

وبالنسبة لاسمك فأنا أرقى صفة ممكن اوصف فيها الشخص هيي انو نبيل لانو هالكلمة بتعني كل شي انساني..

صلواتك.

[نبيل]

اشكرك من كل قلبي اختي شيم وعليك ان تعرفي انه مجبر على ذلك لأنه يود ان يعيش لأنه بالنسبة اليّ هذا افضل من ان يسرق

[Alexius - The old account]

اكتر شي بيهتمو بالمغتربين الللي اصولون حمصية

اذا اجا حدا من المغتربين يللي بيعرفوهن بيعملولن عزيمة غدا او عشا او يمكن يطلعو رحلة..
هي أمنا عزيمة ورحلة كمان.. صارت النزلة محرزة :)

أخت شيم عملك يجعلك على احتكاك بامور المغتربين... ماهي نسبة المغتربين المسيحيين من حمص؟
والسؤال الثاني قدرتي تكوني فكرة ولو بسيطة عن أهم سبب يدفع الناس للاغتراب؟

والسؤال الثالث شو بتعنيلك الكنيسة؟ وهل لكِ نشاط كنسي اجتماعي؟
صلواتك

[شيم]

أخي الحبيب نبيل الحاجة لا تبرر الخطيئة وإلا ما من داع لنسمي أنفسنا مسيحيين لأن هذا البائع لو قصد لوجد أكثر من حل ليعيش سواء من بيع الزيت أو غيره وأرجو أن تنقل مناقشتك بهذا الموضع إلى المكان المناسب له في المنتدى ويسعدني أن أكمل النقاش معك هناك..

+صلواتك+

[شيم]

اهلا وسهلا فيكن واحلى عزيمة ورحلة كمان لعيونك..

أخت شيم عملك يجعلك على احتكاك بامور المغتربين... ماهي نسبة المغتربين المسيحيين من حمص
نسبة المغتربين المسيحيين في حمص كبيرة بس بكرا بتأكدلك من النسبة الدقيقة لاني ما بعرفها بالضبط بس بعرف انو نسبتون منيحة خاصة اللي سافروا بفترة العثمانيين لانو كانو يهينوهن كتير لانهن مسيحية ومن جملة ما كانو يساوو ما كانو يخلوون يمشو عالرصيف لانو هنين طبقة دون وما بيحقلون يمشو عالرصيف..

والسؤال الثاني قدرتي تكوني فكرة ولو بسيطة عن أهم سبب يدفع الناس للاغتراب؟
أكيد كونت فكرة عن أسباب الاغتراب ومن قبل ما أشتغل وتثبتت عندي بعد ما اشتغلت والأسباب كتيرة عد لقلك:
الفساد وضيق الحال والغلا والبطالة والعادات البالية وعدم شعور الشخص بأنو بني آدم لانو كل شي هون أهم من الإنسان إذا بدك تعمل معاملة بدائرة من دوائر الدولة بدك عشر سنين لتخلصها وكل واحد بيعاملك بطريقة يا لطيف (إذا بدك أخي العزيز عدل المشاركة مشان ما تعملك مشاكل للموقع) وغيرو وغيرو..
يللي بيسافرو بيضل بقلبن حنية وأحلام وافكار حلوة كتير عن بلدن وبيضل حلم حلو كتير عم يعيشوه من بعيد بس بيقولولك ليش بدنا نرجع شوفي هون والمسؤولة عن الرابطة قالت مرة (بيقولو للشباب لا تسافرو بس ما بيشجعوون يبقو بالعكس تماماً بيطفشوهن)
بس أهم الأسباب برأيي الشخصي هوي الفساد والبطالة..

(وبتسألني ليش مغرب وعايش وحيد بأرض بلادي عشت معذب وشو طالع بالإيد
هي أغنية لنجوى كرم يمكن بتعرفها)


والسؤال الثالث شو بتعنيلك الكنيسة؟
الكنيسة هيي عالمي الأول وبيتي الأول كمان وببدي نشاطاتي فيها على كل شي واحيانا ببديها عالشغل بس ما دايما بحاول أد ما فيي نظم وقتي بس محسوبتك بتفكر كتير وبتطلع معها كومة أفكار ولما بتجي عالتنفيذ ما بتنفذ غير شي ربعون يمكن..


وهل لكِ نشاط كنسي اجتماعي؟
اجتماعي بالمعنى البعيد لا.. أنا مرشدة لاولاد بالصف الثامن وعلاقتي بأهاليهن نشكر الله كتير منيحة ومشاركة بمجلة بيعملها التعليم الديني لأعمار من 9 إلى 13 وبلشنا نشاط اجتماعي جديد وهوي لجنة بتعمل زيارات لناس بأوضاع معينة لتفرحهن معنوياً أولاً.. لانو في حدا يهتم مادياً وطبياً ودراسياً..
ما بحكي عن الكنيسة بأي مجتمع بدون سبب لاني ما بحس حالي عندي القدرة لأحكي بس إذا حدا حكى عليها قدامي ما بقدر بدي احكي ما فيني ودايما ربنا بيبعتلي الجواب المناسب والمقنع..
هاد كل نشاطي الاجتماعي الكنسي..


وآخر شي صلوات القديسين..

صلواتك+

[حــلا]

مرحبا خيتوو (بالحومصي الدارج):sm-ool-29:

شو مشان انه انا وانتي منشتغل سوا باكتر من شي بس منتواصل ع النت أكتر ما نتواصل عن قرب
وللا بس لأنه مافي اجتماعات هالكم يوم...!!!!!:sm-ool-17:

ههههه بس شي بيضحك ها أنه مااتعرفت عليكي منيح بالواقع لهيك هي أنسب طريقة .... اتعرف عليكي بالمنتدى:sm-ool-09::sm-ool-09::sm-ool-09:

ع كل حال إلي رجعة أكيد
بتمنالك أجازة مريحة ولطيفة على الكرسي:sm-ool-05:
وانشالله بشوفك عن قريب

صلواتك

[شيم]

اسه طولي بالك يا حلا بعد شي كم سنة الام بدا تصير تعيط لابنها ليجي عالمطبخ مشان يتغدى عالانترنت طلعت بمرايا مرة بما انو عم نحكي على مرايا..

ناطرة رجعتك..

صلواتك

[Elie Hazeem]

مرحبا
كيف تمام كيف الصحة كيفا القعدة عل كرسي
أول شي بتشجعي الكرامة ولا الوثبة ؟؟؟
المهم
شو هيي محطة التلفزيون المفضلة لديك ؟؟؟ شو أنواع البرامج يلي بتحبي تشوفيها ؟؟

[شيم]

مرحبا





أهلين وسهلين ومرحبتين كمان..






كيف تمام كيف الصحة كيفا القعدة عل كرسي





الصحة عال العال.. والقعدة شغلة وانا كتير سعيدة بهالقعدة مع انها بتخوف شوي..





أول شي بتشجعي الكرامة ولا الوثبة ؟؟؟





الحقيقة لا هي ولا هي لأني ما بعتبرون فرق رياضية بعتبرون فرق للقتال والمسبات وبس..



بحب تابع بطولة الأندية الأوروبية أكتر.. بس صرلي كتير ما تابعتون كان فريقي المفضل مانشيستر يونايتد هلأ ما بعرف كيف صار وضعو..







شو هيي محطة التلفزيون المفضلة لديك ؟؟؟





الحقيقة انا ماني صحبة مع التلفزيون أبداً وما إلي مراق فيه بس إجمالاً بحب المحطات يللي بتحط شي انكليزي غير مترجم..






شو أنواع البرامج يلي بتحبي تشوفيها ؟؟



برامج آخر تطورات الطب والمكتشفات العلمية والأثرية الجديدة بس اكتر شي بحب تابعو شي عن الفضاء..


صلواتك

[نبيل]

كيف صحتك اخت شيم مرتاحة وللا لاء

[نبيل]

اخت شيم شو اكتر شي بنحبيه بالعالم

[Mayda]

يالله اختي شيم فكري معي وجاوبي

http://www.orthodoxonline.org/forum/img-content/imgcache/2009/11/9.jpg


- باقة ورد لمن تهديها؟؟

- شخص لاترفضين له طلباً؟؟

- حمامة زاجل استقرت على نافذتك تحمل رسالة من مجهول، فممن تتمني أن تكون؟؟

- هل ملابس الشخص أمامك تؤثر فيك لتأخذي عنه انطباع؟؟

- ماهو أجمل اسم ولد وأجمل اسم بنت من وجهة نظرك؟؟


- لو صار وطلبنا منك الإشراف في المنتدى، فأي قسم تختاري؟؟


:sm-ool-30:

[شيم]

شو أكتر شي بتحبيه بالعالم:

المحبة والحنان وأن أحترم الآخر بسبب محبتي له لا بسبب خوفي منه



باقة ورد لمن تهديها؟؟

إلى أمي..



شخص لا ترفضين له طلباً؟؟

أبي الروحي فقط..



حمامة زاجل استقرت على نافذتك تحمل رسالة من مجهول، فممن تتمني أن تكون؟؟

من شخص عزيز غائب عني كائناً من كان..

هل ملابس الشخص أمامك تؤثر فيك لتأخذي عنه انطباع؟؟

طبعاً فأنا أحب الترتيب والأناقة ولكنني لا أعطي حكماً نهائياً وأول ما أنتبه إليه في ملابس الرجل هو تناسب ربطة العنق مع لون الملابس إن كان مرتدياً بزة رسمية طبعاً

ماهو أجمل اسم ولد وأجمل اسم بنت من وجهة نظرك؟؟
أجمل اسم ولد نبيل وأجمل اسم بنت جوى (ومعناه شدة الوجد من عشق أو حزن والوجد هو الحب الشديد)

على فكرة أختي اسمها وجد..

لو صار وطلبنا منك الإشراف في المنتدى، فأي قسم تختاري؟؟

هلأ إذا بدي قلك بدن يقولو عينها عالكرسي..

عم أمزح..

أصلاً انا ما بحس إني قدرانة أشرف على أي قسم بسبب ضعفي بالمعلومات بس بقدر قلك أي قسم بحب هوي قسم الأخلاق المسيحية (الفضائل بالذات) والمشاكل الاجتماعية..

[Mayda]

أصلاً انا ما بحس إني قدرانة أشرف على أي قسم بسبب ضعفي بالمعلومات بس بقدر قلك أي قسم بحب هوي قسم الأخلاق المسيحية (الفضائل بالذات) والمشاكل الاجتماعية..

أختي كيف يعني ضعفك بالمعلومات؟ من أي نايحة؟
وكيف بتشوفي أو بتتصوري مهام الإشراف بتكون؟

[لما]

سلامات اخت شيم
يارب تكوني مرتاحة معنا :sm-ool-02:

طمنيني عنك جارتنا الغالية :sm-ool-05:

انا كمان بدي اسألك بس اشالله تكون اسئلتي خفيفة عليكي :sm-ool-20:

اولا:شو بيعنيلك كل من : الكتاب المقدس . الارثوذكسية. الاب الروحي.

ثانيا: شو هو أكتر موقف اثر فيكي وخلاكي تعيدي حساباتك بالحياة.:sm-ool-17:

ثالثا: في حال حسيتي بالفتور الروحي شو بتعملي .

حاح اليوم ؟؟؟ :sm-ool-26:

صلواتك

[شيم]

أختي كيف يعني ضعفك بالمعلومات؟ من أي نايحة؟


ضعفي بالمعلومات يعني أنني لا أعرف الكثير إلا معلومات قليلة عن أي موضوع تكفيني أنا لوحدي ولست قادرة على أن أناقشس في جميع المواضيع..


وكيف بتشوفي أو بتتصوري مهام الإشراف بتكون؟


سأجيبك أختي الغالية ولكن يجب أن تعرفي أولاً أن إجابتي هذه جاءت من معرفتي بهذا الموقع فقط فأنا لا أدخل إلى أية منتديات بالمرة وماني صحبة مع مواقع الانترنت إلا عند الضرورة فليس الانترنت بمصدر أساسي للمعلومات بالنسبة لي، لأنني أفضل قراءة عشرة كتب على تصفح صفحة انترنت واحدة إلا هالموقع سبحان الله ما بعرف ليش تعلقت فيه فاعذريني يا أختي لأنني لا أعرف شيئاً عن المنتديات أما بالنسبة لمهام الإشراف وكما فهمتها من هذا المنتدى فألخصها بأمرين أولهما هو متابعة المشاركات الجديدة وتصحيحها وتوضيحها والتأكد إن كانت موافقة لقوانين المنتدى أم لا وثانيهما ضبط النقاشات لئلا يتخطى أحد حدود الاحترام والأدب.. ولكن يهمني أن أفهم بالضبط ما هي مهمة الإشراف لئلا أبقى جاهلة بهذه الأمور..


أما بالنسبة إلك يا أخت لما فإلي رجعة لأسئلتك لانها بدها تفكير


+ صلواتكم +

[شيم]

سلامات اخت شيم يارب تكوني مرتاحة معنا طمنيني عنك جارتنا الغالية

أهلا بـ لموش الغالية وجارتنا الحلوة على قولتك..
القعدة عالكرسي غير شكل وانا منيحة يا جارتنا..

اولا:شو بيعنيلك كل من : الكتاب المقدس . الارثوذكسية. الاب الروحي.


الكتاب المقدس
اختي الغالية الكتاب المقدس يعني لي قصة التدبيرالخلاصي أي خطة الله من أجل خلاص البشر. كما يعني لي قصة كشف الله عن ذاته للبشر في إطار تاريخي ليس هو الهدف بحد ذاته..

الأرثوذكسية
صعبتيها عليي يا اخت لما..
فكرت كثيراً في هذا السؤال ولم أجد جواباً سوى أن الإيمان الأرثوذكسي هو الصخرة التي يبني عليها المسيح كنيسته والتي لن تقوَ عليها أبواب الجحيم..

الأب الروحي:
لن أجيبك بكلماتي أختي العزيزة بل بكلمات بعض الآباء..
+ " الأب الروحي هو أيقونة المسيح على الأرض وصلاته تقدر كثيراً فالله يحفظنا بصلوات أبينا الروحي"

الميتروبوليت إفرام كرياكوس - عن كتابه أحاديث روحية

+ "تباحث القديس سلوان الآثوسي مرة حول معرفة المشيئة الإلهية مع الأرشمندريت ميصائيل رئيس ديره سائلاً:
- كيف يمكن للراهب أن يعرف المشيئة الإلهية؟
أجابه الرئيس:
- عليه أن يتقبل كلمتي الأولى وكأنها التعبير عن المشيئة الإلهية.."

عن كتاب القديس سلوان الآثوسي - الأرشمندريت صفروني سخاروف

أعتقد بأنني قد أجبتك أختي العزيزة..

ثانيا: شو هو أكتر موقف اثر فيكي وخلاكي تعيدي حساباتك بالحياة.


مرة كان عنا حلقة بحث صعبة كتير وكنا شلة من ست بنات وكنا عأساس متفقين نعملها كلنا سوا أو عالقليلة كل تنتين أو تلاتة سوا وكنت ناطرة يردولي خبر عالموعد حسب اتفاقنا وفجأة بعرف أنن عملوها سوا وولا وحدة منهن تذكرتني وقتها فكرت ليش على طول أنا مندفعة للخير وما حدا بيقدملي ولا أبسط الأمور، لأني دايماً كنت أنا اللي بادر بعلاقتي معهن. ومن وقتا عنجد عدت حساباتي كلها وقررت أني ما بقا بادر غير مرة أو مرتين وبس ما أكتر وإذا ما لقيت نتيجة ببعد. ما عاد ضل طيبة مع حدا لهالدرجة لأنو قلال اللي بيقدّرو وإذا الواحد ما عمل قيمة لحالو ما حدا بيعملو ياها..

ثالثا: في حال حسيتي بالفتور الروحي شو بتعملي .


أقرأ شيئاً عن الصلاة لأتشجع كي أصلي لأنني أثق بأنني إن بدأت أصلي بصدق وانسحاق قلب حقيقي كل أموري ستتحسن وقد جربت هذا من قبل لذلك انا أثق بالنتيجة بس ما بدك مين يبلش (إذا كنت لا تدري فتلك مصيبة وإن كنت تدري فالمصيبة أعظم)..

حاح اليوم ؟؟؟


فعلاً حاج اليوم لأنو أسئلتك صعبة بس حبيتون

صلواتك


صلوات القديسين وخلينا نبقى نشوفك..بما انو محسوبة علينا اننا جيران



نسيت قلكن أنو الأخ نبيل اللي مشارك بهالموضوع هوي أخي الحقيقي مشان هيك آخد راحتو بالأسئلة كتير..


+ صلواتكم +

[Seham Haddad]

سلام اخت شيم
كيف الكرسي معك
انشاله مرتاحه




1-ما هو اكثر شي تعطيه اهتمام كتير في حياتك
2-هل احسست مره بصعوبه ما اعطاك اياه اباك الروحي من قوانين ولم تقدري ان تقومي بما طلبه منك
3-ما رأيك بشباب وشابات هالايام
4-هل تعتقدين ان هناك اهمال وتسيب من قبل اهل طلاب مدارس الاحد واقصد هنا (الرعايه , والتربيه )

اسئلتي صعبه شوي
ما هيك
تحملينا
:sm-ool-30:

[شيم]

سلام اخت شيم


أهلين وسهلين بالاخت سهام


كيف الكرسي معك:غير شكل


انشاله مرتاحه: هيك وهيك





1-ما هو اكثر شي تعطيه اهتمام كتير في حياتك





بعد أن أنهيت دراستي صار العمل في مدارس الأحد هو ما يأخذ معظم اهتمامي بلا منازع





2-هل احسست مره بصعوبه ما اعطاك اياه اباك الروحي من قوانين ولمتقدري ان تقومي بما طلبه منك





طبعاً. ودوماً وفي كل مرة كنت أقرر ألا أفعل ما طلبه مني أعود وأغير رأيي وأنفذ ما يقوله لأنني أثق بأنه يعرف ما يلزمني أكثر مني واكرر لنفسي دوماً أن الابن الروحي يحاسب على طاعته لأبيه لا على قداسة أبيه. إلا في موضوع واحد فقط وحتى الآن أشعر بالضيق لأنني لا أقدر على تنفيذه ولكنني أصلي إلى الله ليساعدني على الطاعة بصدق..




3-ما رأيك بشباب وشابات هالايام





اتكاليين ولا يريدون أن يتعبوا وغير جديرين بتحمل المسؤولية ولا يعرفون ماذا يريدون ويتجهون نحو السخافة شيئاً فشيئاً..




4-هل تعتقدين انهناك اهمال وتسيب من قبل اهل طلاب مدارس الاحد واقصد هنا (الرعايه , والتربيه)




بالتأكيد أختي العزيزة فالأهالي لا يرسلون أولادهم إلى مدارس الأحد ليتعلموا بل ليبعدوهم عن وجههم ويرتاحوا من ضجيجهم لم يعد لأحد لا صبر ولا وقت للتربية فتراهم يتركون أولادهم (ليحيوا على كيفن) دون متابعة ما يقرأون او ما يشاهدون أو مع من يخرجون يرون الاهتمام في صرف النقود فقط دون أن يهتموا بنفسية وروح الطفل وهذا ما يؤدي بالأولاد إلى عدم طاعة والديهم لأنهم لا يرونهم في حياتهم فضمنياً يفكرون "أنه لا يحق لهؤلاء الذين يدعون أهالينا ان يتدخلوا بنا وهم لا يشعروننا بوجودهم.."



ثم إن الأهالي أختي العزيزة مشغولون جداً عن أولادهم إما بمشاكلهم الخاصة أو بسعيهم وراء عمل أو مال بحجة أنهم يريدون أن يبنوا عيشةمرتاحة لأولادهم..



الناس لم تعد تشبع يا أختي وليست صعوبات الحياة هي السبب لان الناس لم يعودوا يكتفون بالضروريات بل صاروا يحرقون أوقاتهم وأعصابهم وأيامهم على أمور كمالية وعندما يعودون إلى المنزل لم يعد لهم صبر على سماع كلمة واحدة من أولادهم وبهذا تراهم يغضبون عند اول كلمة من أبنائهم مما يجعل الطفل يشعر بأنه لا يريد أن يفتح أي موضوع مع أهله بعد (وهالولاد شو بيصير فيون بيربيون الشارع ورفاق السوء)




اسئلتي صعبه شوي
ما هيك








إيه شوي بس أنا كتير سعيدة فيون..




تحملينا





ولو أختي العزيزة أهلا وسهلا بالكل انت كمان معزومة عالرابطة لعنا على شي رحلة أو شي عشا مع ألكسيوس ومايدا..





+ صلواتكم ++

[نبيل]

بمناسبة هالموضوع برأيك هل مدارس الأحد تكفي لتربية وتنشأة الأولاد تنشئة صحيحة ام انه لا بد في التعاون مع المدرسة ولأهل وبرأيك ما هو الحل الأنسب لينشأ اولادنا واخوتنا في مدارس احد نشأة صحيحة

صلواتك
بس يا رب ما تكون اسئلتي مزعجي لألك:sm-ool-18::sm-ool-18::sm-ool-18:
[you]

[الأب نقولا]

بعد إذنك يا نبيل
إسمي ليش موجود هون...
صلواتك

[John of the Ladder]

بمناسبة هالموضوع برأيك هل مدارس الأحد تكفي لتربية وتنشأة الأولاد تنشئة صحيحة ام انه لا بد في التعاون مع المدرسة ولأهل وبرأيك ما هو الحل الأنسب لينشأ اولادنا واخوتنا في مدارس احد نشأة صحيحة

صلواتك
بس يا رب ما تكون اسئلتي مزعجي لألك:sm-ool-18::sm-ool-18::sm-ool-18:
john of the ladder


لماذا تضع اسمي هنا؟

[Michael-old]

بس يا رب ما تكون اسئلتي مزعجي لألكhttp://www.orthodoxonline.org/forum/images/smilies/sm-ool-18.gifhttp://www.orthodoxonline.org/forum/images/smilies/sm-ool-18.gifhttp://www.orthodoxonline.org/forum/images/smilies/sm-ool-18.gif
Michael-m



واسمي كمان
؟؟؟؟

[مارى]

بس يا رب ما تكون اسئلتي مزعجي لألكhttp://www.orthodoxonline.org/forum/images/smilies/sm-ool-18.gifhttp://www.orthodoxonline.org/forum/images/smilies/sm-ool-18.gifhttp://www.orthodoxonline.org/forum/images/smilies/sm-ool-18.gif
مارى

و اسمى كمان .... فى لخبطة .... انا لم اوجه أى اسئلة للأخت شيم و اسمى محطوط عند سؤال الأخ نبيل

[John of the Ladder]

يا إخوان يبدو أن كل شخص يرى اسمه في المشاركة، ولكن كيف هذا؟ أرجو النظر في الموضوع من قبل الإدارة

[Alexius - The old account]

:sm-ool-04::sm-ool-04::sm-ool-04:
ضحكتني يا اخي نبيل
وقفت المنتدى على رجليه..
مافي شي غلط يا أخوة.. كل ما في الموضوع انو الأخ نبيل استخدم ميزة موجودة بصندوق الكتابة وهي ادراج آلي لاسم قارئ الموضوع. بحيث يشعر الشخص بأن هذا الموضوع موجه له شخصياً.
متل هي الصورة

http://www.orthodoxonline.org/forum/attachment.php?attachmentid=1524&stc=1&d=1259356302


ملعوبة منك اخي نبيل.. :sm-ool-30:
صلواتكم

[Alexius - The old account]

ع السيرة لكن اخت شيم شو رأيك بالفيلم اللي عملو الاخ نبيل بباقي الاخوة؟
ضحكني بوقت ماكنت قادر اضحك فيه:sm-ool-29:

[شيم]

ع السيرة لكن اخت شيم شو رأيك بالفيلم اللي عملو الاخ نبيل بباقي الاخوة؟

والله وانا كمان فتت الحيط لو ما انت توضح أخي ألكسيوس


ضحكني بوقت ماكنت قادر اضحك فيه

هي زعلتني يا أخ ألكسيوس انشالله ما يكون صاير معك شي يخليك زعلان..

[شيم]

منرجع للأسئلة

هل مدارس الأحد تكفي لتربية وتنشأة الأولاد تنشئة صحيحة

إلى حد ما أخي العزيز ولكن ليس كثيراً فنحن كمرشدين نرى الأولاد لبضع ساعات فقط فيما هم بالمقابل يقضون وقتاً أطول خارج مدارس الأحد طبعا هذا لا يلغي مسؤوليتنا بمتابعتهم شكل مستمر حتى خارج أوقات الاجتماعات يمكننا ان نتعاون مع الأهالي فقط أما مع المدراس فهذا صعب لأن المدارس بشكل عام في منطقتنا هذه لا ترى التعليم إلا وظيفة لا تربية فلا فائدة من التجربة مع المدارس


وبرأيك ما هو الحل الأنسب لينشأ اولادنا واخوتنا في مدارس احد نشأة صحيحة

توجد مقومات عدة واهميتها نوعية المربين أي المرشدين وإلى أي درجة هم يحيون حياة روحية صحيحة لانك إن لم تكن مقتنعاً بشيء ما كيف ستقنع الآخرين به يضاف إلى نوعيتهم مدى التزامهم وتحملهم المسؤولية في بناء هؤلاء الأولاد إلى جانب النشاطات الهادفة التي تدفعهم إلى محبة المكان الذي يأتون إليه لكي يقدموا أكثر وأكثر وآخر شيء هو التعاون مع الأهالي لنصل إلى تربية صحيحة..


وأسئلتك ما عم تزعجني أخي العزيز مع أنك بتقدر تسألني ياها بشكل مباشر بس هيك أحسن مشان الكل يستفيد

وشكراً على هالمزحة مع انها فوتتنا بالحيط

صلواتك

[نبيل]

[size=4]
بعتذر يا أخوة عالفصل اللي صار هو مو مقصود كل ما هنالك حبيت جرب هالميزة وما كنت متوقع توصل لهون بس معليش هيك أحسن ترطيبة جو احسن من الجدية الدائمة لأني انا شخص بحب المزح والفكاهة بس انا كمان صار فيي هيك لمن اريت مشاركتي لقيت اسمي فتوقعت الكل يطلع عندو نفس الشي شكرا الكم وبعتذر مرة تاني وبشكرك اخت شيم على ردك لأنك وضحتيلي اشياء مهمة الي شخصيا
صلواتكم

[برباره]

الأخ الحبيب بالرب نبيل :

أولا بقلك أعتذارك مقبول .
المحتوى من الإناء يفيض و بتمنى تبقى فعلا أسم على مسمى نبيل
و إذا كانت هاي أخر نكتة حمصية .................. كمان ...ههههههههههههههههههههههه� �ههههه مقبولة .
بس بتمنى تكون مهضومة ........... حتى تنبلع .

بحب أشكر ( شكر خاص لكل برباره مع إحترامي و محبتي و تقديري الخالص) لأنني فعلا حسيت بكلمة أخ الطالعة من القلب شو بتعني مع قبلاتي الحارة
_قداسة الاب نقولا
_ الأخ John of the ladder
_ الأخ Michaell-m
_ الأخت ماري
أخي الكسيوس أعذرني لم أستطيع أن أفهم هذه المشكلة هل ممكن شرحها بإيمل على ايميلي الخاص لانه بينقطع النت باستمرار و لا أستطيع مشاهدة الصورة الموضوعة و أنا بأمور الكومبيوتر مثل ما بتعرف مستجدة
و ياريت لو بتشرحلي كيف بقدر أدخل معكم محادثة صوتية .

[Alexius - The old account]

اختي العزيزة بربارة القصة ومافيه أنه يوجد في صندوق الكتابة (http://www.orthodoxonline.org/forum/newreply.php?do=newreply&noquote=1&p=51363)ميزة تقوم بادراج اسم من يقرأ الموضوع فيشعر أن الكلام موجه له بالاسم. وهذا ما حصل في هذا الموضوع.
وبالنسبة للمحادثة الصوتية فلا يوجد الأن محادثة صوتية للموقع، وإن كانت هي ضمن ما سيكون ولكن هذا يتوقف على عدة أمور أهمها تفاعل الاخوة بشكل اكبر مما يحمسنا لتقديم ما هو أكثر..
صلواتك

[شيم]

أحلى أسبوع مر عليي وكنت كتير سعيدة لأني حسيت بمحبتكن يللي ما كنت متوقعة انها هيك
ناطرينكن بالرابطة عنا واستروا ما شفتو منا

+ صلواتكم +

[اوريجانوس المصري]

سلام ونعمه أختي شيم

أولا : أتمني تكون إجاباتك باللهجة المصرية حتى افهم ماذا تقولي لان في كثير من الكلمات لم افهمها

ثانيا : أسجل إعجابي بإجاباتك علي الأسئلة لان إجابات كثير حكيمة وبها فكر وتدل علي شخصيه قوية وحساسة

ثالثا : أنا منذ زمان أحب أتعرف علي شخصيات من الوطن العربي المسيحي والتعارف علي ثقافتهم ولغتهم وحياتهم واشكر ربنا علي المنتدى الجميل التي ارتاح لي هذه الفرصة

رابعا : أحب أن اطرح عليكي بعض الأسئلة

1- من أنتي في كلمتيـــن فقـــط..!؟
2- ما هي أجمل صفه تميز شيم ؟
3- ما هي أكثر عبارة تؤلمك ؟
4- ما هو الشي التي كنتي تتوقعي تجديه في المنتدى ولم تجديه ؟
5- ما أول شي تحبي ان تعترفي به على كرسي الاعتراف ؟
6- أمام من تكوني ضعيفة ؟
7- كم مرة تنازلت عن مبادئك من اجل شخص ؟
8- من تتمنـى إن تكــون من الشخصيات المعروفة ؟!؟
9- تاريخ لن تنسيه ؟
10- وسؤال تتمنى أن تطرحه عليكي ولم اطرحه ؟
11- اخيرا ما رائك في العلامه اوريجانوس في نظرك ؟



صلواتكم

[شيم]

صحيح اني سلمت مكاني لشخص آخر ولكنني سأجيبك أخي العزيز

أولاً: سأحاول أن أجيبك باللهجة المصرية ولكن إن لم أستطع ستكون إجاباتي باللغة الفصحى

ثانياً: أشكر شهادتك أخي العزيز فإنها ترفع لي معنوياتي

ثالثاً: في هذه معك حق أخي العزيز والجميل أننا نتعرف على بعضنا في مكان ذو فائدة لا في ممكان للتسلية فقط

رابعاً: سأجيبك:

1- أنا شيم وأرجو ان أستحق أن احمل اسمي لما له من معنى راقٍ
2- لا أستطيع ان اتكلم عن نفسي ولكنني يمكنني أن اقول لك أنني أحب في نفسي بساطتي مع انها تجلب لي المشاكل الكثيرة
3- (كفاية تمثيل) وخاصة عندما اكون صادقة ولا أحد يصدقني هذه أكثر عبارة تجرحني
4- لا شيء حتى الآن..
5- محبتي لهذا الموقع ومن فيه
6- لا أشعر بالضعف أمام أحد لأنني أؤمن بأن لكل شخص كيانه وصفاته التي تميزه عن الكثيرين وفيما هو يحسد أحداً على شيء ربما هناك الكثيرين يحسدونه على أشياء كثيرة ولكن أشعر بالضعف أمام شيء وهو المشاكل العائلية
7- ولا مرة تنازلت عن مبادئي ولا من أجل أي شخص وهذا ما جعل الكثيرين يتهمونني بأنني مثالية زيادة عن اللزوم
8- في الحقيقة لا أتمنى أن اكون أي شخصية معروفة مع أنني أقدّر الكثير من الشخصيات المعروفة ولكنني أتمى أن أحمل كل شيء جميل في أي شخصية معروفة
9- 30/11/2006
10- لا يوجد سؤال تمنيت ان يطرحه أحد علي ولم يفعل فجميع الأسئلة أحببتها واستطعت أن اعبر فيها عن كل شيء جوهري بالنسبة لي

[Paraskivy]

أخوتي الآن مع اخ نيكولاوس في كرسي الاعتراف وهذا الموضوع مغلق

[شيم]

بالنسبة لسؤالك الأخير أخي العزيز فاعذرني لأنني لا أعرف شيئاً عن العلامة أوريجانس سوى أن مرشدي يستشهد بأقواله فقط ومن خلال ما يقوله أظن بأنه فعلاً ذو آراء جميلة بغض النظر عن أي توجه آخر..

[اوريجانوس المصري]

اشكرك كتير علي اجاباتك الجميله ربنا يباركك

اسف لم اكن اعرف ان فترتك انتهت

صلواتكم