ج 3 الكرسي الأنطاكي الأرثوذكسي وجماعة أبو غسان

دمشق 24 ـ 9 ـ 2011

ج 3 ـ الكرسي الأنطاكي الأرثوذكـــسي وجماعة أبو غسان
تحت هذا العنوان نشرت مقالاً بجزأين، بتاريخ 15 و 19/ 8 / 2011 ، إلا أنه وأمام التعليقات التي وردت في بعض المواقع الإلكترونية ، ناهيك عن الاتصالات الهاتفية ، والمحادثات الشفهية ،والتي طالبتني بإلحاح بنشر الحديث الكامل وليس الجزء الذي قمت بنشره ، لأحد الكهنة الأرثوذكـــسـيـين ، والذي يعمل مع زملائه حتى اليوم في الدار البطريركية والكنائس الأرثوذكـسية الدمشقية !!! ( وأشدد هنا على كلمة يعمل التي لا علاقة لها بالرعاية ) .
وهذا الحديث مسجل من قبل آنسة , والتي قامت مشكورة بتسليمه لأحد المراجع في البطريركية الأرثوذكـسية منذ عام 2009 ،وجدت من واجبي والتزامي بعقيدتي وإيماني بأن أقوم اليوم بنشر هذا الحديث المتداول بين بعض الأيادي على سي دي ، راجيا وآملاًً من المرجع الكنسي الذي بيده النسخة الأصلية لهذا الحديث أن يقوم بتقديمها للمجمع الأنطاكي الأرثوذكـــسي المقدس ، للحفاظ على العقيدة المسيحية والأرثوذكـــسية،وليقوم هذا المجمع بمثل ما قام به مجمع البطريركية الكاثوليكية.
ومن الجدير بالذكر بأن العناوين والتعليق الوارد في الخاتمة ليسوا من أصل الحديث المسجل ، كما يرجى المطالعة باللهجة العامية ، واستميح القارئ العذر بعدم ذكر اسم الكاهن لأنه حتى اليوم يعتبر من كهنة البطريركية الأرثوذكـسية ، وأود لفت الانتباه إلى المستوى اللاهوتي والأخلاقي الذي يتمتع به مع زملائه، إلا أن حديثه المسجل هنا يكشف خلفيته ونفسيته اللاهوتية والأخلاقية :
/" احترزوا من الأنبياء الكذبة الذين يأتونكم بثياب الحملان ولكنهم من داخل ذئاب خاطفة "/ ( متى 7 : 15 ) ، /"لأني أعلم هذا أنه بعد ذهابي سيدخل بينكم ذئاب خاطفة لا تشفق على الرعية "/ ( أعمال الرسل 20 : 29 ).
والسؤال الذي يطرح نفسه هو : ما داموا لا يعترفوا بإنجيلنا المقدس ، ولا بمسيحنا ، ولا بديننا حسب قوله ، فلماذا ما زالوا حتى اليوم يتشحون برداء الأرثوذكـــسية .
اليان جرجي خباز

ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــــــــــــ

جماعة أبو غسان
تعاليم واعترافات ...
مقاطع من تسجيلات 2008-2009
البطريرك
أحسن من البقايا. بس لأ مانو ملاك. لو ملاك ما كان بيحط واحد متل ابراهيم ومتل هادا ومتل هادا. بس هو بالمقابل بيحط هيك وبيحط هيك. بس هي صارلو 30 سنة ما حط غير... بس المشكلة بيطلع الواحد أسوأ من التاني. بس منيح. واقع شرير مؤلم عم يتعامل مع هالواقع بحالة دبلوماسية سياسية. فيه صفة منيحة وقت فيه إنسان منيح بيدافع عنو. بيخلي الأشرار موجودين بس بيخلي المنيح موجود فيه هالصفة. يعني مثلاً إنت آدمية إذا قامت البطركية كلها عليك ما بيتركك. في عندو هيك مبادئ حلوه. عرفت كيف. عم قلك قلتلك مو ملاك بس ما قلتلك سيء. مثلاً انا منيح. ما تقوم الدنيي ما بقيمني... شخصيتو صعبة التحليل صعبة التحليل جداً. وبيخفي بشخصيتو... يعني اللي عايش معو ليل نهار ما بيعرفو. يعني بيخدعن لأبعد درجات الخديعة. بيمرِّق فكرو من دون ما حدا يعرف فكرو... يعني عمل أعمال منيحة بحياتو. مشَّى أمور غيرو. بس كان عندو كم غلطة. كم غلطة...
جماعة أبوغسان
فهيك نحنا هالجماعة. إنسان بار عاش بهالجزء من بلاد العالم اللي هيي دمشق. وعاش الأمان. وعاش برارتو حباً بالرب. لأنو الرب بار وهوي طاع. نحنا هيك. إنتماءنا ليس مبادئ. إنتماءنا إيمان ورجاء بالقيامة ومحبةً بالمسيح. ومن خلال شخص مرشد. عبارة عن إنسان وصفينا أولاد هالإنسان إذا منمشي عخطاه. واذا منمشي على خطاه منسمي حالنا اولادو. كل واحد بيقول أنا أبي فلان. اللي بدو يكون ابوه فلان بدو يكون أعمالو...
مكان اجتماع الجماعة ( سابقاً )
إنت وطالعة من باب توما. كنيسة اللاتين عاليسار. قبل ما توصليلها دغري الدخلة على اليسار. بتفوتي بتمشي متل هون والمطبخ. الكنيسة كبيرة مو إنو بيت. فيها تماثيل. كل يوم الساعة 6. شو اليوم؟ بتكون هيي [إم غسان] وبنتها وبيكونو مجموعة من اولادها الروحيين. روحي بتكسبي الصلاة. روحي صلي مرة ومرتين وتلاتة بس مو ضروري تشوفيها. الموضوع عيشي إنت مع هالجماعة...
يوحنا بولس الثاني
كل مين يعيش بالمسيح يضطهد وكل مين لايضطهد لا يعيش بالمسيح. جيبي مليون قديس. جيبيلي واحد ما اضطهد بشراسة وبوحشية وبألم. مِنْ يوحنا بولس التاني. تخيلي بابا يُطلَق عليه النار. اضطُهد ومو بس هوي بابا وهوي بابا رئيس العالم اضطُهد وكيف لما كان خوري ومطران...
الكل خونة للفضيلة ما عدا جماعة ابو غسان
نحنا متمردين عالعالم. وين فيه كاهن يعيش الأمانة لبتوليته. ما في. نحنا نعيشها. عايشين أمانة حتى مادية. وين فيه كاهن بيقدر يحافظ على نظافتو تجاه المصاري. كل هالشباب ما بيملكو شي من دون استثناء. وين فيه راهبة محافظة على نظافتها...
كل الكهنة ذئاب مفترسة
ذئاب ذئاب ذئاب مفترسة. كل الموجودين هون وغير هون. فيه حدا مو ذئب. مرق معك واحد مانو ذئب. فيه خوري ما نو ذئب. كلن ذئاب. شفتيلي خوري ما نو ذئب...
لكن البطريرك وبولس بندلي وجورج خضر الوحيدون نظاف
فيه هوي واللي مات بولس بندلي وفيه جورج خضر. هالتلاتة نظاف. ما تبقى ولا واحد نظيف يعني منقول بالجيل اللي قبل. لا نفس الشي كمان الجيل الحالي جيل ذئاب...
تصنيف هتلري لرجال الدين
ولمَّا هتلر صنَّف طبقات العالم صنَّف طبقة 17 يهود وطبقة 16 رجال دين. عن خبرة!...
أبو غسان
طبعاً هوي أعظم وهوي أطهر وهوي أنقى. كان الكلمة اللي يحكيها تصير. قلتلك الشي اللي كان يحكيه يصير. بس ما قال هيك إنت بدك تصير بطرك هون إنت مطران هون... هيدي أمور داخلية. من زمان من أكتر من 15 سنة وبشعر فيها. مثلاً في شغلات مميزة. قللي إنت بدك تكون مرشد ممتاز بترشد وبدك تساعد ناس وبدهن يسمعولك الكلمة. من زمان قللي هي الكلمة... خلص الكلمة اللي بقولها ستتحقق... مثلاً لو قالي بدك تعيش 100 سنة... بدي عيش 100 سنة... ما في كلمة حكاها غير صارت. ما إجا قعد يحكي نبوة لكن قال هالنتيجة هيك بتأدي. بكره بتشوفو فلان هيك عمل بكرا شوفو شو بيصير فيه...
نحن باقون إلى أبد الآبدين لأننا أذكياء
نحنا منا ضد حدا. نحنا غير سياسة وغير توجه. ولا لنا بكل هالأمور... وبيعرفوا نحنا مركزنا قوي لأنو من الرب وليس من بشر... نحن باقون إلى أبد الآبدين. رايحين جايي بعدنا ورانا. مو هيك اللعبة. عارفين شو عم نشتغل. وأذكى منن من السما للأرض. هيدا الواقع... هني سياستهم... نحنا مو هيك ديانتنا مو هيك مسيحنا ومو هيك إنجيلنا...
بس وسخين من لوقا لغطاس لموسى وسخين شو بدي قلك نَوَر، بجم. هذا مستواهم...
ابو غسان مجدد كنيسة المسيح
نحنا أكتر ما هيي أبو غسان إجا ليجدد كنيسة المسيح...
ابينا ابو غسان
ونحنا وقت تعرفنا بأبينا ابو غسان كنا تايهين بهالعالم مو عارفين الخير بس بداخلنا فينا خير. بس ما فيه مين يوجهنا...
يوحنا بولس الثاني الخَيِّر الأول في العالم
يعني كل أصحاب المبادئ ما بتلاقي حدا طلع منو خير عالمي متل يوحنا بولس الثاني...
ابو غسان ويوحنا بولس الثاني مختارا الله
هذا هيي بالكنيسة لو ما بيلتقى اشخاص متل ابو غسان يعني متل البابا يوحنا بولس الثاني... بأيامه كان فيه كام قديس كام خوري بيخافو الله عملو حركة وطلّعو هيك بابا... يوحنا بولس الثاني ولد ببلد نجس بس كان فيه كم واحد بيخافو الله وحافظ على ضميرو واخلاقو وهو بباباويتو. فألله بيعِد من خلال هيك اشخاص قادة للعالم... ببولونيا كان فيه جو روحي فيه كم واحد بيخافو الله ومنن طلع يوحنا بولس الثاني. بالمقابل في 100 كاردينال ماسوني وغيرو الله مشّى هالإنسان ليكون فوق الكل. والله هيك بيعِد احياناً قادة الدول. كيف الله بيدير العالم ما حدا بيعرف... اقلية نادرة بتقدر تفهم عمل الله. الله عم يرتب من هلق لخمسين سنة مين يكون رئيس اميركا. خدي بلدنا كيف كان عم يرتب كيف رح يكون بشار رئيس سوريا وما كان عارف انو رح يكون رئيس لسوريا كان خيو مفروض يكون...
سامي خوري كشكول
ابونا سامي بيعمل مع الفقراء بكشكول... اهم من بطرك وهو عبارة عن خوري بس بتلاقيه آخد دور كبير. هوي عمل الدور... كنيستو كانت اسوأ كنيسة. سوّى كنيستو أهم كنيسة وأغنى كنيسة وصار إلو أكبر إسم... اللي بدو يحاربنا عم بيحارب الله بكل ما تعني الكلمة...
أبو غسان مرشد
منتعلم كل النهار ومنجي آخر شي منصلح افكارنا عندو يعني هالطالب بيدرس كتير والإستاذ بيصلح. مرشد هوي. إذا كنا عم نضل بأفكارنا هوي بيقلنا هالفكرة غلط. نحنا منتعلم لحالنا. هوي منو قاعد 24 ساعة يعلمنا. نحنا منقرا منتعلم منفهم ووقت اللي منغلط هوي بيصلحنا الفكرة لأنو عندو خبرة اكتر منا...
أبو غسان
موته خلاص للعالم...
أولاد أبو غسان انجازه الأعظم
بس العمل الأعظم إنو أنشأ جيل للرب. ولد ولاد للرب. ان شاء الله نستاهل انو نكون ولاد للرب اللي انا واحد منن. اذا كنت بشوف حالي بهالدنيا بشغله هيي انو كنت ابن ابو غسان. ما بشوف حالي بولا شغلة لا بأعمالي ولا بأقوالي مع اني حاولت ساعد. الله انعم عليي اني التقيت بإنسان بار. بتشرف اني كون ابنو. بتشرف كون خادم عندو. خادم وصعلوك. بس هوي سماني إبنو..
الصراع مع الكهنة والمطارنة
فنحنا صارعنا كتير. من 15 سنة نحنا وعم نصارع من وقت ما كنا طلاب. صارعنا مطارنة. وهدا خامس جيل. كل شي صارعونا راحو. الياس حبيب وينو. نقولا بعلبكي وينو. جورج بو زخم وينو. جوزيف زحلاوي وينو. اغناطيوس لطفي تبع البرازيل وينو. اسحق بركات بتعرفيه هدا اللي كان بدو يصير مطران. هدا إجا من سبع سنين عالصليب وكل الآمال انحطت فيه. دعموه المطارنة التلاتة وبيلعب عمليون حبل. زكي. محنّك. مصاري ما بياخد. غني. ما فيكي تكشفي عليه غلطة. وابتلع الدنيا كلها. اربع سنين كان في حال سبيله. سنتين ثلاثة ما حكينا معو. لما حسينا بلشت البوادر آخر سنة أرجيناه نجوم الضهر...
أبو غسان علم الجماعة أمور بذكاء
نحنا نشكر الله كان عنا اب ذكي. علمنا امور يمكن يفهموها بعد كام سنة. نحنا اذكى من الشي اللي عم بيفكرو فيه. مخنا اكبر. تصرفاتنا محسوبة ومنعرف هالأمور ومانا خفيين عنا. وانا وقت بدهن يلفقوا عليّ قصة معينة انا داخل بمية قصة من هالنوع ومنعرف يعني حساباتا. ما في قديس ما تألفت عليه قصة. الحلو انو بكل هالقصة ولا تألفت على واحد قصة -حتى كذب- لجميع الجماعة بالروم والكاثوليك وبالسريان...
المخاضات الداخلية في البطركية سببها الجماعة
يعني بلش البطرك خطوة حلوة. وقَّفون وتراجع عنا. الوضع ما بريح بس إلى حين. بدها مخاض اكتر. إسا متفائل ترجع تصير مخاضة جديدة مو عن طريقي...
ابن أبوغسان فيه يجيب مصاري وسيارة ما في مشكلة
شو بدي بالمصاري. اللي بدي ياه بجيبو. هلق بدي مليون ليرة مَنِّي عاجز جيبا. اللي بدي ياه بجيبو. بدي سيارة بجيب سيارة. ما عندي مشكلة. اللي بدي ياه بجيبو...
الصلاة والمناولة آخر هم
ما خدمتي هيي الصلاة والمناولة. هدا آخر همي. انا همي انو مثلاً كانت عندي بنت بدها تتجوز جازة غلط... خلصتها من هالجازة. هدا هوي المخلص. ابنك بدو ينتحر. هدا المخلص. مو اجي علمو الصلاة. حلو نعلمو الصلاة بس بيهمنا الانسان يعيش انسانيتو. طالب معقد فاشل...
المهم كنيسة ما في فرق
اول ما بتروحي عألمانيا دوري عكنيسة فيها جسد ودم المسيح...
إنطلاقاً مما يقوله المتكلم، في تعليمه:
الجماعة تنظيم. مرشدها ابو غسان. مؤسسها يوحنا بولس الثاني. تعيش على الطريقة الكاثوليكية الانضمامية: نصلي اينما كان. لا ذكر لمطالعة الآباء واللاهوت والتقليد. لا ذكر للصوم. لا ذكر للتأله. المناولة فعل اجتماعي شعبي. الله عامل على الطريقة القدرية الجنسينية ضد اليسوعية. ابن ابو غسان عامل خير ومساعد اجتماعي ليس إلا [وحش الرؤيا: الظاهر مغر لكن الباطن أي التعليم قاتل]. ليس من لاهوت ارثوذكسي. تعليم اخلاقي كاثوليكي غير يسوعي. فريسية من الطراز الرفيع عندما يدين الآخرين كهنة ومطارنة. التشديد على الذكاء يأتي من الكاثوليكية. الله ينير الذهن البسيط. خطأ في الحكم. العودة إلى الكنيسة الأولى تشبه البروتستانتية واللاخلقيدونيين الذين يشددون على السلوك وحسب دون التأله... جماعة ابو غسان آلات مبرمجة لكره الإكليروس ولجعل الناس يكرهون الإكليروس. إن حقدهم على الإكليروس أكبر من حقد هتلر على اليهود وهذا آت من عقدة نفسية عند ابو غسان من الطفولة لم يقدر على تجاوزها وهو أورثها بمهارة لأولاده الروحيين. لا يعني لهم الإكليروس شيئاً. دخلوه كي يأذوا الكهنة من داخل لذلك تقوم سياستهم على التقرب من الزعيم البطريرك كي يحميهم أو الرئيس. ابو غسان هو الأب والعذراء هي الست. استبدلوا يسوع بأبو غسان: "موت ابو غسان خلاص للعالم"... إبن أبو غسان يقدر أن يشتري سيارة في أي وقت ويحصل على المال في أي وقت... ابو غسان علم أبناءه أموراً سرية كي يعرفوا كيف يكونون أداة تدمير وانتقام...

!!!!!!!!!!!!!!!!

بصراحة أنا مصدوم جداً مما قرأت,,,,
مش معقول هذا كلام كاهن ووين بالكنيسة الأرثوذكسية؟!
شو هالتجديف وهالكره للإكليروس ؟!
ومين هذا أبو غسان حتى يضحك على عقول هؤلاء السذّج ويسيطر عليهم بهذه الطريقة؟!
اذا المجمع المقدس ما اتخذ قرار سريع بحق هذا الهرطوقي اللي متستر بزي الكهنوت فمعناها علينا العوض. هذا الشخص عمره ما قرأ للآباء وخاصة لاغناطيوس الأنطاكي الذي أكد برسالته ضرورة احترام الاسقف وتوقيره, فهو لا يعطي للاكليروس اي قيمة, والمشكلة الكبرى هو اعجابه بالبابا يوحنا بولس الثاني !!! ويتغزّل به وبأبو غسان وكأنهم هم من خلّصوه وليس يسوع!! ترك بنوّته لله وأخد ينادي ببنوّته لأبو غسان!! فأي كاهن هذا وأي كارثة حلّت على الكنيسة بوجود ذئاب بداخلها يحملون هذه الأفكار؟!
أصلي الى الرب الإله أن ينقي كنيسته من مثل هؤلاء حتى لا تهلك النفوس بتعاليمهم الشيطانية, وأخي اليان شاكر جداً لك لنشرك لهذه الملفات بانتظار المزيد ومعرفة مصير هؤلاء وربنا يباركك.
صلواتك