زمان كنت انسان خاطئ

زمان كنت انسان خاطي مقدرش ادخل الكنيسة
ولما ادخل اشعر اني انسان مش مستحق . اذاي اقعد وسط القديسين واتكلم معاهم
دلوقتي القديسين اخدوني علشان اخدم , وبقيدت اخدم وسط القديسين , وبقالي فصل , وبقيت استاذ في مدارس الاحد .
ناس من القديسين يقلولي صليلنا يافلان , ناس تانية تسمع كلامي , اللي يقلي يافلان فسرلي الاية دي , يافلان صليلي , يافلان كلمة منفعة , ونعمة ربنا اشتغلت معاك وناس على يديك خلصت , وبقيت لك مسئوليات وواجبات واختصاصات ..
نسيت ايام زمان والانسحاق بتاع زمان راح ,
دلوقتي انت الخادم الكبير اللي كل الناس لما تشوفك تقلك اهلا واللي يقلك سهلا , ياستاذ فلان الاية دي , المشكلة دي
والحكاية هاصت , وفي وسط الهيصة دي ضاع الانسحاق وكبر القلب من جوة احس او لم يحس .
زمان كنت تقف تصلي وتجاهد من اجل نفسك ..... دلوقتي بتجاهد من اجل الاخرين ..
يارب الخدمة يارب العيال يارب مش عارف ايه .
بتجاهد علشان تبقي قدوة ومثال , درس للاخرين , وابتدت الاهداف تتغير
في الخدمة اتعلمت تشخط وتزعق بس ياولد , تعالي يافلان , وروح يافلان , ونفسك راحت والانسحاق راح .
زمان كنت بتدين نفسك . دلوقتي من اجل الخدمة تدين الاخرين , وتحكم عليهم
كمان دخلت في سياسات الخدمة وليك كلمة, وكلمتك لازم تمشي , (مش خادم وكبير ولازم يكون ليك كلمة )
زمان كنت بتصلي من اجل نفسك ... دلوقتي من اجل الاخرين من اجل الناس .. يارب الخدمة يارب العيال وانت نسيت روحك
زمان كنت بتجاهد علشان تحارب الخطية ,,,
دلوقتي لما بقيت خادم تغير المفهوم بقيت الخطية جناية يرتكبها الاخرون وليس ما نرتكبها
نحن صرخت مع الفريسي الهم اشكرك اني لست مثل باقي الناس
زمان كان الواحد بيتاخر سهرة او سنيما او اي حاجة بره .....
دلوقتي الواحد بيتاخر في الخدمة حكاوي وحواديت عن الخدمة ومدرسين ومدرسات مدارس الاحد راييحين جايين في حكايات في كلام لا ودة ولا جيه .... وبعدين مشغولين في الخدمة ومش فاضيين نقعد مع ربنا .... (اصلي يابونا الخدمة واخدة كل وقتي )
زمان كنت بجاهد ضد خطايا اللسان مفيش كلمة غلط تطلع مني ...
لكن دلوقتي من اجل الخدمة اغلط كتيير ازعق واشخط وانتهر .
من اجل الخدمة ادين وأهو مشغول بالخدمة وكله بتاع ربنا .
بسبب الخدمة دخلت حاجات كتيير مكنتش موجودة .......
زمان كان ربنا لوحده دلوقتي ربنا والناس والخدمة والعيال والذات وكتيير كتيير

امتي تفضي لربنا امتي تقوله محدش يبعدني عنك لا صاحب ولا صديق ولا خادم

طوبي للانسان الذي لا ينسي ضعفه ولم ينسي نقصه ولم ينسي سقطاته القديمة
طوبي للانسان الذي يخدم ليس بغرض الوصول للمناصب ولا بغرض التباهي
بل طوبي لمن يخدم ولا احد يعلم انه يخدم
طوبي لرجل يهرب من سياسات الكنيسة وانا مالي خليني في حالي انا حتة خادم لا راح ولا جيه
يانفسي امتي هتتعلمي ..

مش كده ولا ايه