القصة تؤكد على فكرة العطاء والأهتمام بالآخر .فالمعطى المسرور يحبه الرب . سعادة العطاء أروع وأثبت بكثير من سعادة الآخذ
وليس مطلوب منا العطاء فوق الطاقة ولكن بحسب طاقتنا وإمكانيتنا نحاول مساعدة غيرنا وعندما نعطى نفتح الباب لبركات أكثر من قبل الرب فنعطى أكثر ونفرح أكثر
زيارة المسيح
بقلم الأب/ سيمون عساف
راح الغني بالهيكل يزور المسيح وقلّو يا عربون المحبة والفدا
جارك أنــــا وساكن بهالقصر الفسيح بدّي يا يسوع المسيح تزورني
وتقبل عزيمة عالعشا أو عا الغدا
قلّو المسيح بزورك وعندي ثقـة إنّك إنت إنسان من أهل التقى
حضّر شموخ القصر للملقى الكبير لــكن ما فيّي قلّك بأيّا نهار
وأيّــــا دقيقة ممكن يتمّ اللقا
وعــاد الغني بنيّة سليمة وطيّبه يحضّر بقلب القصر أكبر مأدبه
وحتى بمباهج هالدني يرضي المسيح وصّى عا لقمة طيبة وكنفش وقال
حلوة الحياة تكون لقمة طيّبـــه
وتــاني نهار بمطلع الفجر المنير معتّر فقير بيقصد القصر الــكبير
قلّو دخيلك يــا غني العندك ضمير اطعمني سقيني تشفّع بعمري القصير
غضب إلــــه المال وتنمرد كتير ومتل القذيفة انفجر بــــوجّ الفقير
قّلو مـــــا فيّي اليوم استقبل حدا
جايي المسيح اليوم عندي عـــا الغدا
وتالت نهار بينفتح بالقصر بـــاب وبيفوت طفل زغير مش لابس تياب
قــلّو غمرني بحضنك الدافي شويّ محتاج إمّ تحبني محتاج بـــــيّ
بيتي زوايــا الشارع وتختي الرصيف افرشلـي بقلبك تخت ضيّفني رغيف
قلّو مـــا فيّي اليوم استقبل حدا
جايي المسيح اليوم عندي عا الغدا
ورابع نهاربعجقة صحون العشا بتدقّ باب القصر بنت بفرد إيـــد
قالت يا مؤمن من رضا الله عليك سلّم عليّ بحسنتك تسلم إيديـــــك
بــدّي غني عن كل درب يلمّني ومتل الحنونــــه بالحنان يضمّني
قلاّ ما فيّي اليوم استقبل حدا
جايي المسيح اليوم عندي عا الغدا
وخامس نهار بينفتح بـــاب الغنا عا جار تحت الدين قوّس وانحنى
قلّو يــا جاري إنت بتحب المسيح مشهور بالأخـلاق وبتعمل مليح
دعمني برصيدك مــا لقيت مؤسّسة تدفع عن ولادي القسط بالمدرسي
قلّو ما فيّي اليوم استقبل حدا
جايي المسيح اليوم عندي عا الغدا
وسادس نهار تسرسب كتير الغني ليش بعدو مـــا إجا فادي الدني
إلا وبيدقّ الباب كـاهن محترم بـــاع الغنى بالفقر وبالله انغرم
قلّو مدينتنا يــــا خير رجالنا بحاجة لمستوصف يداوي عيالــنا
ردّ الغني عـا الكاهن الحرّ التقي وقلّو يا بونـــا غير مرّة منلتقي
اعذرني ما فيّي اليوم استقبل حدا
جايي المسيح اليوم عندي عا الغدا
الأسبوع فلّ وبعد مـــا طلّ المسيح راح الأكل ضيعان ضيعان المليـــح
يــــوم الأحد من بعد قداس الصلا قــــــال الغني يا ابن الله بالعلا
خسّرتني ومـا زرتني بقصري الجميل عبدك أنـــا ما بتربح لعبدك جميل؟
تبسّم وجّ يسوع من بين الجروح وقلّو مـــا بدّي لعندك ولا نهار روح
زرتك بطفلة معذّبة ومشوّهـــــة ما حنّ قلبك عا الجمال وعــــا ألبها
زرتك بطفل زغير عـاري من التياب لبّستني إكليل تــانـــــي للعذاب
زرتك وأنـــا جوعان بالجار القريب بهدلتني وعلّقتني فــــوق الصليب
زرتك وأنــا عطشان دغري حرقتني حتى سفنجة خلّ مــــــا دوّقتني
خلّيتني أوقف علــــى بوابك ذليل مـا قدرت تقشع صورتي بكاهن جليل
مـــا عبدت الله بذاتك عبدت الصنم ومـــا كنت راعي كنت جزّار الغنم
كرّمت نفسك بالدني وحقّرتنــــي وحتى تعوّم خزنتك فقّرتنــــــي
وغطّيت فيّي مـــــالك وكدّستني وقدّست حالك قبل مــــا قدّستني
وهلّق إذا بتريد تولد مـــــن جديد لازم حضورك بين أهـــلك تستعيد
حوّل بوابك بالعطا دقّة قــــــلوب وعن انشغالــك بالدهب والمال توب
قــــــدّم صلاتك بالشعور وبالعمل شيل اليأس من شعبك وحطّ الأمـــل
خلّيك حاضر لا رحيل ولا غيــــاب صوتــــك محبّة للشيوخ وللشباب
ومـــا زال داعيني عا قصرك بالوعي إلاّ مـــــا كل الناس تتغدّا معي
مش رح تلاقي بقصرك الفاضي حدا
ومش راح تشوف الرب عندك عا الغدا
www.mjoa.org
