البَيّ الحَنونْ
يا بَيّي كِبْرِتْ الأَحْلامْ فَيِّي تِعِبْتْ مْنِ الشِّغِلْ وِ التَّعَبْ كَسَّرْ
طُموحي الكَانْ عَمْ يِنْدَهْ عَلَيّي أنا طِفْلَكْ أنا إِبْنَكْ الأَصْغَرْ
إِنِتْ دَلَّلِتْني صُبْحْ وْ عَشِيِّة عْطيني حِصّْتي تَا رُوحْ إِسْهَرْ
مَعْ النَّجْماتْ سَهْرَة مُخْمَلِيِّة عْطيني حِصّْتي، وْ مَا طْلَبِتْ أَكْتَرْ،
بِفَرْزْ المَالْ بَيني وْ بَينْ خَيّي... وْ هَيكْ الإِبِنْ خَلاّ الحِزِن يِسْكَرْ
عَلى دَمْعَاتْ هَالبَيّ السَّخِيِّة وْ قَبِلْ ما يِشْطُرْ المَال المُقَدَّرْ
شَطَرْ قَلْبْ الأُبُوِّة بْعَنْجَهِيِّة...
********
وْ بَعِدْ ما قَالْ يا فَرْحَة نْدَهيلي الإِبِنْ سَافَرْ عَلى مَوْجِة طَويلِة
وْ رِسِي بِبْلادْ شِهْرِتْها الخَلاعَة وْ لَيالي السِّكِرْ عَ غْنَاني جَميلِة
وْ صَرَفْ مَالو عَ حَالو بِالبَشَاعَة وْ فِني دْنَانيرْ بَيّو بْلا جْميلِة
تَ هَاكْ الأَرِضْ ضَرْبِتْها مَجَاعَة وْ تَ صَارْ الخِبِزْ لِقْمِة مُسْتَحيلِة
غَريبْ وْ مَا انْقَبَلْ بَينْ الجَماعَة وْ لَجَأْ تَا يِحْتِمي بْعيشِة ذَليلِة
رِعي خْنَازيرْ بِمْهَانِة وْ فَظَاعَة اشْتَهَى الخَرُّوبْ يَاكُلْ بِالقَليلِة
وَ لا وَاحَدْ ظُروفْ الشَبّْ رَاعى بَعِدْ ما كانْ عَايِشْ بِالفَضيلِة
********
وْ عَادْ الإِبِنْ وِ تْشَاوَرْ لَحَالو بَعِدْ ما شَافْ شُو صَفَّى بِحَالو
عِنِدْ بَيّي إِذا العِمَّال إِكْلوا بْيَاكُلْ هَالبَلَدْ بَعْدُنْ بِحَالو
أَنا رَحْ إِرْجَعْ لْبَيّي تَ قِلّو يا بَيّي خْطِيتْ مَعْ رَبّي وْ كَمَالو
يا بَيّي خْطِيتْ قِدَّامَكْ يَا دِلّو البِيخَاصِمْ بَيّْ وْ بْيِجْحَدْ دَلالو
شْلَحْني بِالحَقِلْ هَالعُمُرْ كِلّو مِتِلْ عِمَّالَكْ وْ إِجْمَعْ غْلالو
وْ مِشي وْ بِالصَّعِبْ دَرْبو يِسِتْدِلّو تَ هَاكْ البَيتْ عَ التَّلِّة بَدَالو
********
البَيّْ الوَزَّعْ المَالْ المُخَمَّنْ مَسَحْ دَمْعْ الفَرَحْ وِ انْزَاحْ قَهْرو
وْ دَعَاهُنْ يِدْبَحوا العِجْلْ المُسَمَّنْ وْ طَرَحْ لِعْرَاسْ بِسِرّو وْ بِجَهْرو
وْ لَإِبْنو اللي بِقي بِالبَيتْ طَمَّنْ: ـ رِجِعْ خَيَّكْ فَدَى المَالْ اللي هَدْرو
خَيَّكْ كانْ ضايِعْ رِجِعْ بَيَّنْ خَيَّكْ كان جِتِّة بِقَلِبْ مَدْفَنْ
وْ قَامْ مْنِ الفَنَا زَنْبَقْ بِعِطْرو
المحامي كابي دعبول
