الأخ الحبيب Maximos في كرسي الاعتراف

كالعادة لازم شارك يا باشا بشوية أسئلة

1- شو بيمثل المنتدى بالنسبة لألك (شو استفدت منو أكتر شي)
2- رح أسأل سؤال سألتو لجراسيموس بطريقة أخرى
هل تتأثر بآراء بعض الناس لأنهم (فلان) دون اقتناع؟


صلواتك يا حبيب

رافي ..

اقتباس:

---

إذا أتي أحدهم إليك بعرض هو التالي: إقامة في دولة خارج بلدك الحالي(سوريا)بغرض العمل، راتب مغري مع سكن لك ولعائلتك، وكل متطلبات متوفرة لك؟ هل تقبل؟ ولماذا؟ هل ترفض؟ ولماذا؟
ما هي نظرتك بالتالي للغربة؟ وللمغتربين؟
دور الكنيسة الأم في حياة المغتربين؟

---

بشكل عام أنا مو مع الغربة .. بس هادا أمر شخصي .. يعني أنا عن نفسي مو مفكر ( مبدئيا ً ) بالغربة بهدف الربح ..
بيجوز بيساعدني إنو ماديا ً ماشي حالي .. بس في غير شباب غير بالغربة ما بيقدروا يأسسوا لوضع مادي مريح أو مقبول ..
من شي أكتر من عشر سنين .. قدم أخي طلب هجرة على كندا .. و هللأ هوّي هونيك ..
و أنا رحت بوقتها و جبت طلب مشان عبّيه و قدّمو .. و كان عندي إحساس إنو إذا قدمتو رح إنقبل .. مع هيك شقيت الطلب بعد ما جبتو ..
كان السبب الرئيسي إنو أهلي ( أبي و إمي ) كبار بالعمر .. و تخيلت إنو يصرلهم شي أنا و بالغربة .. بهيك حالة شو بعمل بحالي .. ؟؟ .. هدول اللي فنو عمرهم و هنّي عم يعتنو فينا .. و حبّونا كل هالمحبة .. يجي وقت يحتاجوني و ما كون هون .. ما زبطت معي ..
و اللي زاد الطين بللة .. إنو وقتا سمعت لوديع الصافي : ليش يابني ليش طوّلت الغياب ..
إي هيي الغنيّة من غير شي بتبكي .. كيف وقت الواحد عم يفكر هيك ..

برأي الواحد مو غلط إنو يسافر و يشتغل مشان يحسّن وضعو .. بس من ناحية لازم يكون كمان عندو قناعة .. و ما ينجر بالطمع .. يعني بس إنو يشتغل فترة ليأمن راسمال يعمل فيه بيت و مصلحة يشتغل فيها ..
لأنو في كتير ناس لما راحوا .. و عجبتهم عيشة الفلت هونيك ما عاد حبّوا يرجعوا ..

أما نحنا بالمسيحية .. المسطرة و المقياس عنّا هيي المحبة .. مشان هيك لما بيكون هالسفر و هالغربة مشان مساعدة الأهل أو مشان تأمين وضع مناسب للعيلة المستقبلية ( يعني بدافع المحبة ) .. بيكون هالسفر شيء جيد ..
أما إذا كان الهدف إنو الواحد يجمع مصاري مشان ينفش و يشوف حالو على غيرو .. بيكون الدافع هوّي الأنانية و هادا بيتعارض مع المحبة .. و بالتالي بيكون غلط ..

أما عن دور الكنيسة ..
كمية المسافرين و المهاجرين كبيرة .. و هدول بالنهاية من أبناء الكنيسة .. و بالتالي واجب إنو يتم الاهتمام فيهم .. بس اللي عم يصير إنو أغلب هالأشخاص ما عم يكون من اهتماماتهم الكنيسة و الحياة الروحية .. مشان هيك اللي منهم عندو هالاهتمام بالحياة الروحية عم يعاني بالغربة من هالأمر .. لأنو عم تكون العناية أقل بسبب هالإهمال من قبل الأغلبية .. لأنو بالنهاية الكنيسة مو بس هيي الخوري .. هيي نحنا ..

بتمنى يكون الجواب وافي ..


صلواتك

جورجيت

اقتباس:

---

1 ما رءيك بالأعذار المعطاة للطلاق وا لفسخ الزواج في الكنيسة؟
ونحن كمؤمنين كيف لنا ان نصدق ان ما جمعه ألله لا يفرقه انسان؟ ومن جهة ما جمعه ألله يفرقه انسان لديه صفة كنسية معينة بحجة الضعف البشري أو ما شابه؟
برأيك الصريح جدا'' والذي لا يحابي هل القوانين الكنسية الموضوعة هي لخدمة كلمة ألله وتعاليمه كما يفترض؟
أم لخدمة الاءنسان ومعاصيه؟ وذلك من خلال ايجاد تبريرات معينة؟
واخيرا'' بهالايام الميلآدية المجيدة شو بيتمنى مكسيموس للكنيسة الاورتودوكسية؟وشو هيي القوانين اللي بيتمنى تتغير فيها وذلك لخدمة مجد ألله؟

---

رايي إنو سر الزواج بيتم مرة وحدة و بس .. إلا في حال وفاة أحد الزوجين بيكون الرب هوّي اللي فرق بيناتهم و وقتا ممكن لياللي بقي عايش يرتبط ..
و على حد علمي إنو ما بتكون خدمة الزواج التاني متل الزواج الأول ..
و بكل الأحوال ممنوع الزواج الرابع على حد علمي .. حتى عند وفاة الزوجات التلاتة ..
هادا اللي بشوفو من خلال قراءة سير القديسين من خلال روح معيشتهم .. و طبعا ً الرب بيطالبنا إنو نكون قديسين ..
اما هالإيام ما عم يتم هالأمر .. و السبب برأيي إنو صار الإنسان محور الحياة و التشريع .. مو الرب ..

متل ما ذكرت هادا ( رأيي ) .. و هوّي غير ملزم ..
أما تعليم ثابت بهالموضوع ما مرق معي ..

بالميلاد بتمنى إنو يكون في توعية أكتر عن المعنى الحقيقي للعيد و تقليص لحجم ظهور بابانويل ..
و إنو يكون في قرار ( يُعلن على الملأ ) إنو التماثيل مو مقبولة و هيي مخالفة لتعليم كنيستنا ..



صلواتك

بندلايمون ..

اقتباس:

---

1- شو بيمثل المنتدى بالنسبة لألك (شو استفدت منو أكتر شي)
2- رح أسأل سؤال سألتو لجراسيموس بطريقة أخرى
هل تتأثر بآراء بعض الناس لأنهم (فلان) دون اقتناع؟

---

1- المنتدى وسيلة بشارية جيدة .. و إن كان مو الكل عم يفوتو عالنت .. و اللي عم يفوتو مو كللهم عم يفوتو عليه .. بس بالنسبة لـِ ( ملتمسي وجه الرب ) عم يكون جيد جدا ً ..
و خصوصا ً بظل الغياب الإعلامي ( الفاحش ) لكنيستنا ..
أما عن شو استفدت .. في كتير شغلات كانت أول مرة بعرفها هون بالمنتدى ..
و تعلمت منو أكتر إنو طوّر أسلوبي بالمناقشة ( و لسا بدو تطوير ) ..
و عشت هالجو الحلو بمحبة الأخوة ..
ما بعرف عبّر أكتر ..

2- إذا القضية مو مقتنع فيها بالمرة .. مو ممكن .. ما بقبلها جوّاتي ..
أما إذا في شبه قناعة = ما في رفض .. ممكن آخدها و إقبلها ( نوعا ً ما = مو متل لما كون مقتنع ) إذا كانت من مصدر موثوق متل أبي الروحي .. أو الأشخاص اللي عندي ثقة عاااااااااااالية بتعليمهم ..
بس أكيد حتى بهالحالة ما رح بتكون متل لما كون انا مقتنع ..


صلواتك

عدنا والعود أحمد..

طمني كيف هالكرسي معك

سؤالي التالي...


بما انك موظف طلعلك مازوت ولا لاء بما انو طلع الصيت عالموظفين انو هنين بس يللي بيطلعلون
ههههههههههههههههههههههههه ههه

عم بمزح لا تروح تجاوب على هالسؤال هلأ منعملو مشكلة لأخونا ألكسيوس

نستأنف..

اقتباس:

---

أخخخخخخخخخخخخخخخخخ
كتييييييييييييييييييييييي ييير شغلات ..

---

1- من يقرأ هذه العبارة يعتقد بأنك كنت ترغب أن تكون كاهناً ولم تنجح فهل هذا صحيح؟ وإن كان صحيحاً فلماذا لم تفعل؟
2- كيف تتصرف تجاه موقف محزن؟
3- ما أكثر شيء يجرحك؟
4- ما الذي يثير غضبك؟
5- ألا ترى بأن طريقة دفاعك عن قناعاتك قاسية قليلاً إلى حد الإزعاج؟ (فينك ما تجاوب اذا ما بدك)

وهي مرقمتلك الأسئلة كمان مشان تسهيل الأمور

الأخ الحبيب بالرب مكسيموس : :sm-ool-30:
-ربنا يخليلك سوزي و سيرافيم
سؤالي قديش بتشوف الفرق بحياتك قبل وجود سيرافيم و بعد ولادته
و شو انطباعك لما بيضحك الضحكة من كل قلبه و شو بتعمل لما بتشوفه عم يبكي و الدموع نازلة على خدوده . و أحلى موقف تعرضتله معه و خلاك تضحك من كل قلبك .
- قديش بتشوف دور سوزي كبير بحياتك و شو قدرت برأيك تغير شي فيك للأحسن و لو حبيت توصف سوزي بأرق وصف شو بتخبرنا عنها .
- و بعد خبرتك بالزواج و الاولاد شو بتنصح الشباب العزابي .
-بتمنالك أسبوع سعيد و أحلى الاوقات
و كل عام و أنت و سوزي و سيرافيم بألف ألف خير .

رح تكون اول مشاركة الي بالفرع 555 المسمى "كرسي الاعتراف" معك.
- لمّا السيد سيرافيم الله يخليلك ياه بيصير بعمرك حاليا ، شو بتتصور-على ضوء الظروف الحالية-رح يكون الوضع بالكرسي الأنطاكي من ناحية الرهبنة ، التعليم ، النشر و الاعلام الأرثوذكسي الالكتروني؟؟؟.
تمنياتي لك باقامة مريحة وهانئة على دولاب الاعتراف.

شيم ..
نشكر أللـه .. ماشي الحال ..
مازوت لسا ما طلعلنا .. بهاليومين ع أساس .. جايينا الدفا .. هههه ..
يسلموووو عالترقيم ..

اقتباس:

---

1- من يقرأ هذه العبارة يعتقد بأنك كنت ترغب أن تكون كاهناً ولم تنجح فهل هذا صحيح؟ وإن كان صحيحاً فلماذا لم تفعل؟
2- كيف تتصرف تجاه موقف محزن؟
3- ما أكثر شيء يجرحك؟
4- ما الذي يثير غضبك؟
5- ألا ترى بأن طريقة دفاعك عن قناعاتك قاسية قليلاً إلى حد الإزعاج؟ (فينك ما تجاوب اذا ما بدك)

---

1- اللي كنت حابب كونو و فشلت هوّي راهب .. و حتى كان يخطرلي رهبنة بدون كهنوت .. يعني بس تفرّغ للرب ..
أما موضوع (الأخخخخخخخخخخخخ ) هادا إلو قصة تانية .. على سبيل المثال .. لما بحضر بعض الكليبات بيجلطني المخرج لما بيكون لازم يعمل إشيا و ما بيعملها .. أو بيعمل بدلها إشيا غلط ..
و نفس الشي بموضوع الكهنوت .. في كتير أفكار ممكن تنعمل .. و ما عم تنعمل .. أو عم يكون بدلها تصرفات أقل جودة .. أو هيك يعني ..
و خصوصا ً بالوضع الحالي لشعبنا .. إذا ما الخوري شحطو و دفشو عالكنيسة دفش ..ما عم يمشي الحال ..
أما موضوع الكهنوت .. صاحب القرار فيه هوي أبي الروحي .. لما بيلاقي إنو لازم إخدم بهالمجال هوّي بيقرر .. لأنو مين أنا لحتى قرر إنو ممكن إتحمل هيك مسؤولية .. !!
إذا انتبهتي .. بالرسامة المطران بيعطي جسد المسيح للكاهن و بيقللو : خذ هذه الأمانة و كن حريصا ً عليها من الآن و حتى يوم الدينونة .. .. .. .. مسؤولية مرعبة .. !!

2- على حسب ما فهمت السؤال .. تصرفي بيكون الصبر و التحمل .. عموما ً ماني من النوع اللي بينهار أو بيستسلم لليأس .. بيجوز لأنو بحس بحضور الرب معي بكتير مواقف .. و هادا بيخليني متطمن .. و من ناحية تانية أنا من النوع الواقعي .. يعني على سبيل المثال .. انكسر الصحن .. ما بنزعج نهاااااائيا ً و إنو ليش انكسر و يا لطيف و ما كان لازم و الخ الخ ..
خلص .. انكسر و راح .. بيصير تفكيري إنو كيف لازم أعمل و شيل الكسارة ..

3- أكثر شيء يجرحني .. !! .. بعد عملية البحث بالغوووغل الداخلي لقيت أكتر شي بيجرحني :
شعبي عصاني معصيتين ، تركوني أنا نبع الماء الحي ، و احتفروا لأنفسهم آباراً مشققة لا تضبط المياه ( إرميا 2 : 13 ) ..
مشان هيك بتأثر كتير لما بقرا أو بتذكر للقديس سلوان الآثوسي :
أركع و أسجد امامكم أيها الأخوة الأحباء ، و أقول لكم : آمنوا بالرب .. .. .. .. الخ

4- أكتر شي بيثير غضبي هوّي الغباء ..


4- رح جاوب .. ( و شكرا ً على التخيير بالإجابة ) ..
الشغلات اللي بدافع عنها بقوة ( أو فيكي تقولي بعنف ) هيي الشغلات اللي بكون متأكد منها .. إذا مو متأكد تمام بفوت بموقف أقل ضراوة ..

في البعض عم ينزعج من هالضراوة ( أو العنف ) .. بركع قدامهم بمطانية كبيرة و بطلب منهم السماح .. و بحب قللهم إنو السبب ورا هالموضوع هوّي المحبة .. ما حدا يستغرب .. !!
محبتي للكل بتخليني إنو بحب وصّل الصح للكل ..
بتخلليني إطلب إنو الكل يكونو صح أكتر .. و يكونو أفضل ما يمكن ..
لدرجة إنو مستعد كرمال هالأمر إنو ضحي و إتحمل شي .. أو إنو إطلع قدامهم كا ( مشكلجي ) أو شو ما بدك كرمال يتحقق هالأمر ..
و في كتير أخوة تحملوا مني كتير كلمات لأنو ( يمكن ) حسّوا بهالمحبة اللي من وراها ..
لأنو على أرض الواقع الواحد ممكن يرضى إذا انجرح بالغلط إذا حسّ إنو هالشخص اللي جرحوا بيحبو و ما بيريد أذاه .. بالوقت اللي إذا انقرص ( أو حتى بدون تصرف مادي ) عن كره أو إنو بس حسّ بكره شخص إلو .. .. .. يعني بالمختصر الشي الأهم من اللي صار .. هوّي الدافع ..
ما بعرف إذا الكل هيك بيفكروا .. أنا هيك بفكر ..
ممكن حدا يأذيني بدون قصد .. أو يكون قصدوا خير بس ما زبطت معو .. إذا كنت عرفان إنو نيتو المحبة بتحمل اللي صار و ما بنزعج ..
أما إذا حدا ( خلينا نقول قدّملي باقة زهر ) و بعرف إنو عندو كره إلي .. هادا بيزعجني أكتر ..


ما بعرف إذا قدرت عبّر عن حالي .. أو متل كتير أوقات خانتني الكلمات ..


صلواتك

بربارة ..

شكرا ً لمحبتك أختي العزيزة بربارة .. بطلب منك معها الصلوات لضعفي ..

اقتباس:

---

1- سؤالي قديش بتشوف الفرق بحياتك قبل وجود سيرافيم و بعد ولادته
و شو انطباعك لما بيضحك الضحكة من كل قلبه و شو بتعمل لما بتشوفه عم يبكي و الدموع نازلة على خدوده . و أحلى موقف تعرضتله معه و خلاك تضحك من كل قلبك .
2- قديش بتشوف دور سوزي كبير بحياتك و شو قدرت برأيك تغير شي فيك للأحسن و لو حبيت توصف سوزي بأرق وصف شو بتخبرنا عنها .
3- و بعد خبرتك بالزواج و الاولاد شو بتنصح الشباب العزابي .

---

1- الفرق كبييييييير .. صار ما فينا ننام من صوت البكي .... هههههههههههه عم إمزح ..
بالحقيقة (الزلمي ) مانو من النوع المزعج .. بيفيق مرة وحدة شي الساعة خمسة الصبح بيرضع و بيرجع يكفي نوموا .. مو متل كتير اولاد ..
الفرق فعلا ً كبيييييييييير .. بالأول كانت حياتي حياتي .. هللأ صارت حياتي حياتو ..
يعني صرت عم حسّ إنو عن طريق تربيتو كأني عم إبني حياتي اللي رح يعيشها هوّي ..
مشان هيك كانت أجمل عبارة تهنئة بالمولود كتبها حبيب قلبي إيليا الغيور بمنتدى القديس سيرافيم (بما معناه) الرب قال لداوود إنو : مو إنتا اللي رح يبنيلي بيت ( الهيكل ) ، بل إبنك .. .

على سيرة الحبايب .. إيليا الغيور و ألكسيوس تنيناتهم غايبين هالفترة .. انشاللـه يكون المانع خير ...
هللأ أنا بالفترة الماضية كان غيابي عن الكتابة .. بس متابع على طول ...
أما غياب هالجوز الحبايب عم يكون غياب تام .. انشاللـه خير ..

منكفي ... ضحكة سيرافيم فرحة من جووووووووووااااااات القلب ..
و لما بيبكي بحس الدنيا ضييييييييييقة .. بحاول كل شي فيني إنو يكون مبسوط .. و بعصّب ..
و أحلى شي هللأ عم يحاول يحكي ... تعلم الـ ( اغغغغغغي ) و الـ ( بففففففففففففف ) .. و ناطرين البقية ..

2- ضروري هالسؤاااال ؟؟ .. !! المخلوقة متابعة الموضوع ..
بس مع هالشي رح كون صريح .. و ما بيشيل هالراس غير اللي حطو .. ههههههههههههههههههه مزحة ..
بالحقيقة .. في كلمة قلتها لسوزي أكتر من مرة : لو إنو أللـه قللي تعا لفصّللك وحدة ع زوقك .. ما رح يطلع معي هيك ..

باختصار إنسانة راااااااااائعة جدا ً .. و وين ما كانت عم تكون الجانب الحلو بالموضوع .. مشان هيك بالأخوية = بالفرقة ( باللادقية ) كانو مسمايينها : ملاك الفرقة ..
في بأحد المواضيع اللي انكتبت هون بالمنتدى لتهنئتنا ( بالخطبة أو بالزواج ما بذكر ) بتلاقي صورنا .. و من صورتها رح تعرفي شو افشيا اللي ما اسعفتني الكتابة بالتعبير عنها ..

و من أهم الإشيا إنو بنت كنيسة عالأصلي .. يعني هيي بتشحطني عالصلا .. مو أنا بشحطها ..

بستغل هالفرصة لأهديها الأغنية اللي على طول بهديها ياها .. أغنية عازار حبيب : يا أحلى السيدات ..
و كمان أغنية فيروز : عروستنا الحلوة ..

3- أول شغلة إنو نحنا بالمسيحية ما في شي إسمو عزابي على طووووووول .. من أهم الإشيا إنو الواحد يعيش جو المحبة .. و المحبة المضحية .. إما مع زوجة ( و اولاد ) .. يا إما بأخوية رهبانية ..
مشان هيك يا إما يتزوجو .. يا إما الرهبنة بشي دير ..
أكيد الرهبنة هيي الأفضل ( لياللي بيقدر عليها ) و الحياة الملائكية أسمى بكتير .. متل ما بيقول القديس بولس ..
و الزواج أمر رائع .. و كمان ميدان لخدمة الرب و عيش المحبة ..
و بنصح الشباب العزابي إنو ما يتأخروا كتير بالجازة .. يعني برأيي أنسب عمر للشب بين 25 – 30 ..
و ما كتير يهكلوا هموم المادة و يتكلوا عالرب ..
و الصبايا كمان ما يتخنوها .. لأنو التأخير بالزواج عم يكون بالقسم الأعععععععظم منو بسبب الصبايا ..
هيّ ما بتسكن مع حماية .. و هيّ بدها كذا و كذا .. و هيّ ما بعرف شو ..
يعني بدها كللللللللللشي عالجاهز .. طيب .. وين الحياة المشتركة .. و إنو يبنوا إيد بإيد .. ؟؟ !!!!!!
يعني إذا ما كان كلشي مأمن شو فيها يعني ... مو مستعدة تتحمل أي شي مع شريكها .. ؟؟ .. !!!
شو هوّي رح ينام بقصر و ينيّمها عالسطح .. ؟؟ !!!
هادا الموضوع الحق عالصبايا بالدرجة الأولى و الرئيسية ..

كمان هون بتذكر قول رائع : الغني مو هوّي اللي عندو كتير ... الغني هوّي اللي بيحتاج قليل ..
مشان هيك بنصح الشباب و الصبايا إنو ما يدققوا كتير على الكماليات ..
و إلا بيختيروا و ما بيتجوّزوا ..

لأنو عنا – بكلللللللللللل أسف – المجتمع من غباؤوا الشديييييييييييد : لازم كذا .. و لازم يكون كذا ... و لازم يجيبوا كذا ...
علما ً إنو هنّي بغنى عن هالإشيا ...
شو يعني عرس بدون تصوير و زهور و طنة و رنة .. ما بيكون فيه بركة ... بيطلعوا الأولاد قرعان ؟؟ ..!!!!!!
أو إنو إذا سكنوا ببيت ( إن كان ملك أو أجار ) و ما كان فيه غرفة نوم ديلوكس .. و ناموا على فرشات أو اسفنجات بالأرض .. ما بتزبط الخميرة .. ؟؟ و بيطلعوا الولاد .. مجعلكين .. ؟؟؟ ... !!!!!!!

يعني حلللللللها العالم تفهم شويّ و تعتق غيرها من كلامها و تعليقاتها .. و ما ينسوا إنو جاييهم الدور و وقتا ما حدا رح يرحمهم .. .. و بيقولوا المجتمع العربي ليش متخلف .. ! ! ! ! ! ! ! ! ! ! ! ! ! ! ! ! ! !

حاجة هللأ ... شي بيورّم القلب ..

أللـــــــــــــــــــه يرحمنا ..



صلواتك

بشارة ..

اقتباس:

---

- لمّا السيد سيرافيم الله يخليلك ياه بيصير بعمرك حاليا ، شو بتتصور-على ضوء الظروف الحالية-رح يكون الوضع بالكرسي الأنطاكي من ناحية الرهبنة ، التعليم ، النشر و الاعلام الأرثوذكسي الالكتروني؟؟؟.

---

بالحقيقة ما بقدر إتخيل أو إتوقع شي ...

نحنا علينا نحاول نربيه و نجهّزو بأمثل شكل ... و الباقي على أللـه ..

أنا مو كتير شاطر بالأسئلة الافتراضية ..



صلواتك