حبيبنا بندلايمون على كرسي الاعتراف ..

صديقي جراسيموس

اقتباس:

---

كيف ترى من مكانك خارج أنطاكية, وضع كنيسة أنطاكية وخاصةً إذا كان يوجد شيء ما حولها في الأوساط والصحف والمجلات الكنسية اليونانية؟

---

إذا بدي أعمل مقارنة بين كنيسة اليونان وكنيسة أنطاكية فأكييييييييييد كنيسة أنطاكية أفضل من كل النواحي.
الكنيسة اليونانية كتير بيحبونا طبعا مع وجود قلة من من يلي بيعتربونا محتلين البطركية من اليونان، بس هي قلة قليلة بهالوقت.
أنا ما صرت أعرف قيمة الوضع عنا إلا بعد ما شفت هون، بس يلي بيخوف يا باشا هوي المشاكل والتجاوزات يلي عم تصيبنا.

بالنسبة للصحافة فمعظم المقالات عبارة عن أخبار. وإذا وللبد حدا بدو يكتب مقالة بتكون لنشر الغسيل.
أحد الأشخاص كتب مقالة عن أمور صارت داخل المجمع وأنا استغربت كيف وصليتو هيك أخبار بعدين فكرت أنو بتكون مو مظبوطة. وقت زارني مطراني بالبيت قلتلو هيك هيك قريت وسألتو أنو كيف هيك معلومة بتتهرب؟؟؟ بعدين طلب مني يقرا المقالة فا عطيتو ياها، ببساطة ما أنكر الموضوع.

بس أنا صار عندي قناعة أنو معظم المطارنة عنا بدهون خير الكنيسة وإن اختلفت الأساليب وإن كان موجود بعض التجاوزات (يلي أنا ضدا). بس يمكن لازم نحط حالنا محل صاحب المسؤولية حتى نقدر نفهم ليش هيك صار. منشان هيك أخي الحبيب أنا ما وقعت عالعريضة تبع التماثيل مع إني وبقوة وبشدة ضد وجود التماثيل حتى ولو خارج الكنائس.

أهلا وسهلا إخت شيم

اقتباس:

---

لو صرت كاهناً ما هي الأمور التي ستهتم بها في رعيتك؟
الواضح أن مدارس الأحد تعني لك الكثير، هل أنت مع أن يكون هناك كاهن مخصص لمدارس الأحد؟

---

أكيد أي شخص إذا بيصير كاهن رح يشوف شو الأمور المغيبة والفيها تقصير (من وجهة نظرو) ويحاول يشتغل عليها.
بعدين الله عطانا مواهب وكل شخص بيقدر يشتغل ويخدم حسب موهبتو.
مبدئيا الحكي بهالموضوع مو سهل وما بيحقلي إحكي فيه، بس بتخيل أنو الاهتمام بالطفولة بيكون كتير منيح منشان يطلع جيل ابن كنيسة عن جد وهالاهتمام ما يكون بس بمدارس الأحد لا وكمان بالبيوت. لأنو برأيي شخص كبير بالعمر خلص ما عاد قادر يغير أفكارو. وكلامي أبدا ما بقصد فيه عدم الاهتمام بالكبار لا بس بقصد التركيز أكتر عالشريحة الصغيرة بالعمر.

بالنسبة للسؤال التاني:
مدراس الأحد بتعنيلي كتير بس يمكن خيبلك أملك إذا قلتلك مو يلي بأيامنا. شو في مدراس الأحد وقت تأسست على يد شباب واعي جدا، وشوفي أهدافها ومبادئها، وقتها بتلاحظي أنو هلق ما عاد في مدراس أحد. إذا بدك فينا نسميها نادي اجتماعي تحت لواء الكنيسة.
وجود كاهن مخصص لمدارس الأحد مفيد بس مو كتير ضروري. الكتير ضروري برأيي يكون الكاهن مرجعية دائمة لأنو رح يكون الشخص الأفضل رعائياً بحكم الخبرة.
بعتقد إعداد كادر بمدارس الأحد يكون جدي هوي الأهم. ببساطة إعداد كادر هوي مؤمن بالشي يلي عم يعملو.


صلواتك

المجد لله في الاعالي و على الارض السلام و في الناس المسرة .
ميلاد مجيد و عام سعيد
و كل عام وأنت بألف خير أخي بندلايمون و ينعادى عليك بالصحة و المحبة و السلام
سؤالي كونك باليونان هل وجدت فرق في التعامل بين الكنائس الارثودكسية ( الانطاكية , اليونانية , الروسية )
و هل تعتقد أن الكنيسة اليونانية تتعامل مع الكنيسة الروسية و الانطاكية بنفس المقدار من المحبة و الاحترام
أم هناك فروقات في التعامل بين اليونان و الروس و الانطاكيين.( كنيسة أدنى من الاخرى) .
و خصوصا من الشعب اليوناني الذي يعتبر نفسه أحسن من الشعوب الاخرى المذكورة . أم العكس.

ميلاد مجيد اخي بندلايمون
كل سنه وانت سالم

اسئلتي بسيطة :
1-لقد احتفلت بالميلاد في اليونان وسوريا وكل من هذه الدولتين لها بهجتها الخاصه في الميلاد برأيك من يعطي عيد الميلاد بهجته الحقيقية

2-اكثر شي لا تحب ان تسمعه او تراه
3-ما هو الشي الذي تحب ان تقوم به يومياً

تتوقف اللعبة حتى بداية شهر شباط / فبراير بسبب التزام الأخوة والاخوات بالاعياد والامتحانات..
فأرجو أن يختار الاخ بندلايمون الاسم الذي يليه حتى يلجس على الكرسي..
صلواتكم

أهلا إخت بربارة

اقتباس:

---

سؤالي كونك باليونان هل وجدت فرق في التعامل بين الكنائس الارثودكسية ( الانطاكية , اليونانية , الروسية )
و هل تعتقد أن الكنيسة اليونانية تتعامل مع الكنيسة الروسية و الانطاكية بنفس المقدار من المحبة و الاحترام
أم هناك فروقات في التعامل بين اليونان و الروس و الانطاكيين.( كنيسة أدنى من الاخرى) .
و خصوصا من الشعب اليوناني الذي يعتبر نفسه أحسن من الشعوب الاخرى المذكورة . أم العكس.

---

بتمنى كون فهمت السؤال صح
كل كنيسة عندا تقليد شويييييييييي مختلف عن باقي الكنائس، بالنسبة للكنيسة الأنطاكية واليونانية فهني كتييييير قراب لبعضن مع اختلافات طفيفة.
بالنسبة لإلي بشوف أنو التعامل بكنيسة أنطاكية أفضل بكتير من اليونان.
الكنيسة اليونانية بتحبنا كتير وأكبر دليل أنو في كتير أنطاكيين هون باليونان، وإكراما لوجودن خصصتلن كنيسة ناطقة باللغة العربية في أثينا والكنيسة تابعة لرئيس الأساقفة في اليونان (يعني مو أنطاكية).
منشان الواحد يحكي الحق أنا ما شفت منهن أي نوع من العنصرية بالعكس دايما بيمدحونا وبيضربو المثل بإيمان شعبنا.
بالنسبة لتعاملن مع الكنيسة الروسية للأسف ما فيني فيدك لأنو ما عندي معلومات.
طبعا أنا كنت عم إحكي عن الرئاسات الروحية باليونان. أما بالنسبة للشعب في شوية فوقية بالتعامل معنا (مو من قبل الكل) بسبب جهل البعض بواقع بلادنا. يعني في ناس مفكرين عربي= بدوي. وبيفكرو أنو تيابي مشتريها من اليونان (هي قلة قليلة)
وكمان في نسبة كبيرة ما بتعرف أنو في مسيحيين ببلادنا وبس قلون أنو مسيحي ما بيصدقو. بس إجمالاً الشخص إذا شويييييي كان عندو اطلاع عالموضوع بيعرف تماما نحنا مين ومن أيمت موجودين ببلادنا.
وعلى قولة سيدنا باسيليوس وقت رد على أحد الشيوخ في طرطوس "نحنا هون قبل سنة 630"
الحق يقال أنو الشعب هون طيب وخدوم.
معظم أساتذتي بالجامعة (شريحة المثقفين) بيقولو أنو نحنا الوحيدين يلي حافظنا على اسمنا صح (روم أرثوذكس) وليس يونان أرثوذكس.

أخت سهام

اقتباس:

---

1-لقد احتفلت بالميلاد في اليونان وسوريا وكل من هذه الدولتين لها بهجتها الخاصه في الميلاد برأيك من يعطي عيد الميلاد بهجته الحقيقية

---

كنسياً باليونان الاحتفال يقتصر على الصلوات المقامة في الكنائس سواء من بدء الصوم (قداس إلهي يومياً كل أيام الصوم وبكل الكنائس)
أما شعبياً فبتشوفي كل الطرقات مزينة وبكل ساحة عامة في شجرة وأسواق وما إلى هنالك، طبعا مع نسيان سبب العيد الرئيسي، وبيتصدر القديس باسيليوس على قولن (بابا نويل) كللل هالاحتفالات.
عندي أستاذ بيسمي بابا نويل "الزلمة الناصح يلي اخترعيتو كوكاكولا"
كنسيا حبيت الاحتفال باليونان أكتر أما شعبياً عنا فوق كل التجاوزات يلي عم تصير بيضل الوضع أحسن على الأقل لأنو الجهة يلي عم ترعا هالاحتفالات بتبقى تحت لواء الكنيسة "مدراس الأحد"

اقتباس:

---

2-اكثر شي لا تحب ان تسمعه او تراه

---

ما بحب أفقد حدا عزيز عليي ولا إسمع هيك خبر. بس أكيد حكمة الله تفوق الجميع.

اقتباس:

---

3-ما هو الشي الذي تحب ان تقوم به يومياً

---

عندي حب كبير لضلاة الغروب أكتر من باقي الصلوات (من أنا وبصف السابع) ولهلق بحاول إني كون موجود بصلوات الغروب عقد ما بقدر (حسب جامعتي).
كمان يوميا بحب إقرا أخبار يعني شو عم يصير بالعالم سياسيا اقتصاديا إلخ.

اقتباس:

---

تتوقف اللعبة حتى بداية شهر شباط / فبراير بسبب التزام الأخوة والاخوات بالاعياد والامتحانات..
فأرجو أن يختار الاخ بندلايمون الاسم الذي يليه حتى يلجس على الكرسي..
صلواتكم

---

بعتلك رسالة بالتفاصيل
صلواتك

أخي العزيز بندلايمن
أريد أن أطرح عليك سؤال ديني طرح علي سابقاً وتلبكت في الإجابة عليه وهو:
لقد أعلمنا يسوع بأنه يدين بما يسمع أي هو الديان العادل والذي نحن مؤمنون به ولا بت فيه
ولما أعطى الرب يسوع مفاتيح ملكوت السموات لبطرس أعطاه سلطان حل وربط الخطايا أي بمعنى آخر يمكنه أن يدين بالخطايا على أحد أو ينزعها كالديان العادل
أي بطرس كما فهمت يمكنه أن يدين كما الرب يسوع الديان العادل

معظم أساتذتي بالجامعة (شريحة المثقفين) بيقولو أنو نحنا الوحيدين يلي حافظنا على اسمنا صح (روم أرثوذكس) وليس يونان أرثوذكس.

ياريت أخي بندلايمون تعطيني فكرة عن الفرق في التسمية ( لماذا سمينا بأسم الروم الارثوذكس = هل بالتبعية لقسطنطين الذي اتى من روما و أسس حضارته البيزنطية عندنا أم للروم معنى اخر ) و لماذا لم نسمى اليونان الارثوذكس علما بأن كنيستنا تابعة للكنيسة اليونانية ( كنيسة حلب ) .و لماذا نحن صح في تسميتنا .
بتمنالك سنة سعيدة و ايامك كلها فرح و محبة .
صلواتك .