ولدتُ وهي معي ...

[basilyos]

أعذروني لعدم معرفتي أين أضع موضوعي، لا أعلم إن كان القسم صحيح
------------------------------------------


ولدتُ وهي معي، كالظل تسير في دربي لقد كانت ترافقني أينما ذهبت. لكن مع الأسف الشديد لم أكن أعلم بوجودها فلم يكن أحد من الذين حولي يسعى لأن يعرّفني بها.

بعد أن أصبح عمري حوالي الخمس سنوات أصبحت أتعلم عنها شيئاً فشيئاً إلى أن وصلت لمرحلة ويقال أنها مرحلة المراهقة حيث ابتعدت بالإتجاه المعاكس لها ويا لتعاستي فقد كانت طريقي وعرّة ودربي مظلمة لأنني كنت أجهل رغم الذي تعلمته أنها الطريق الوحيد للوصول إلى أعظم ما يمكن الوصول إليه.

رغم أن باب طريق العودة كان مفتوح أمامي إلاّ أنني لم أنتبه له إلاّ بعد مضيّ حوالي السبع سنوات لأجدها بانتظاري لتوصلني إلى الهدف الذي هي موجودة من أجله.

نعم لقد كانت الأرثوذكسية بانتظاري لتعطيني كل التعاليم والصلوات والمبادىء لتوصلني إلى ربنا يسوع المسيح له المجد

صلواتكم

[لما]

الطريق الوحيد للوصول إلى أعظم ما يمكن الوصول إليه.

ليوطد الرب ايمانك ويمنحك نعمه لتكون كما يشاء ملح ونور

صلواتك

[Nahla Nicolas]

الرب يباركك
ويبارك حياتك
بالمحبة والبركة
رائع جدا

[basilyos]

أشكر مروركم إخوتي بالربّ

صلواتكم

[Salwa]

الرب يباركك
قصتك فيها عنصر التشويق، بس أكيد النتيجة كانت كتير حلوة
الرب يباركك

[basilyos]

قصتك فيها عنصر التشويق، بس أكيد النتيجة كانت كتير حلوة

إخت سلوى ما رح فوت بتفاصيل بس رح قلك شغلي وحدة

تخايلي إنك قاعدة بغرفة كلها مجوهرات وإلماس بس ...... للأسف ما في ضو لتقشعي وكل فشخة بتوقعي لحتى بالآخر صارت الغرفة كلها فوضى ومش معروف شي من شي

فجأة هالغرفة صار فيي ضو دايم سمحلك تبلشي توقفي على إجريك وترتبي الغرفة شوي شوي كرمال تسير أحسن من قبل

النتيجة غرفة نظيفة وكلها نور والمجوهرات يلي بقلبها صاروا إلك


وهيك كل واحد بنظف حياتو وبيهمل الإشيا السوداء والتصرفات السيئة وبيمشي على خطى الرب بضل عايش بالنور والمجوهرات (النية الطيبة - الصبر - المحبة - التواضع - الطاعة - الصلاة ..... ) كل هيدول بسيرو ملكك يعني بسيرو مدموجين بالداخل


هيدي قصتي يا إخت سلوى

رغم إنه أنا بعدني واقف على الحد الفاصل بين العتمة والنور ولكن بإرادة الله وبصلواتكم رح إتحدى العتمة ويصيروا إجريي التنان بالنور لأنه هلق أنا واقف إجر بالعتمة وإجر بالنور



"ربي يسوع المسيح إرحمني أنا عبدك الخاطىء"

صلواتكم إخوتي

[Georgette Serhan]

أخي باسيليوس سلام المسيح
قصتك كتير حلوة وهي بتبين انو دايما'' في قلبك كان في محل زغير لنور كبير
بلش يكبر لما انت سمحت لهيدا النور انو يكبر
يعني كل واحد منا أخي لما بيمشي بالظلمة دايما'' ربنا الو المجد بيمشي حدو
ودايما'' بيبعتلو رسايل وبيبعتلو ناس بطريقو ينبهوه عالغلط اللي هوي فيه
بس الانسان بالنتيجة هوي مسؤول عن اختيارو وربنا دايما'' ناطرنا تا نقبل نعمتو
مبروك أخي باسيليوس انك شفت نور الرب وما تأخرت وربنا يثبت خطواتك عا دربو وينور طريقك
ويا رب كل الشباب يمشو عا هيدا الطريق المنير وما يقوى عليهم الشرير سيد الظلام
صلواتك أخي باسيليوس سلام المسيح

[basilyos]

مشكور أختي جورجيت على ردك

صلوات القديسين تحفظك

[Salwa]

أخي باسيليوس

أنا كنت متلك متلك تقريبا، كانت الأرثوذكسية ضايعة، بس اللي فهمته إنو الأرثوذكسية منكتسبا مع الوقت وما منولد فيها.

من أجل المسيحيين الحسني العبادرة الأرثوذكسيين إلى الرب نطلب، يا رب ارحم

[basilyos]

منكتسبا مع الوقت وما منولد فيها.

إخت سلوى أنا لما كتبت هيدا الموضوع قصدت بكلمة ولدت وهي معي (وأنا كل يلي كاتبه مش موضوع عقائدي)

إنه العائلة يلي خلقت فيها أرثوذكسية فمن هالمنطلق كتبت يلي كتبته


"ولدتُ وهي معي، كالظل تسير في دربي لقد كانت ترافقني أينما ذهبت. لكن مع الأسف الشديد لم أكن أعلم بوجودها فلم يكن أحد من الذين حولي يسعى لأن يعرّفني بها"

يعني أنا كنت بعائلة أرثوذكسية فبالتالي أنا صرت أرثوذكسي بس بالإسم مش بالفعل

بعد أن أصبح عمري حوالي الخمس سنوات أصبحت أتعلم عنها شيئاً فشيئاً ....
وعلى الخمس سنين بلشت إكتسب شيئاً فشيئاً

هيدا كل ما في الأمر نشالله تكون وضحت الصورة


صلواتك أختي سلوى