زجل الابن الضال

[مدحت الصياد]

الابن الضال

________________________


حكايتى ....حكاية كل أنسان بيهرب

حكاية كل أنسان....بيقع ويتعب

كانت البدايه ...فى بيت أبويا

كان الجو فى البيت ....متكهرب

وليه لا !!؟؟ ما أنا طلبت مراثى

ولا فكرت فى أخرتى....ولا فكرت فى خلاصى

كان كل همى ....أكون أنا وبس

والانا .....فتحت الف باب

باب ورا باب

باب من الضياع....والضباب

باب من شلة أصحاب

أصحاب ...بس مهماش أحباب

طفت .....مع الاصحاب وشفت

صرفت....كل ما أملك وشطبت

وأنتهيت ....بعد ما رميت

رميت ورا ضهرى

كل أفكار أهلى

رميت حتى برءتى

وبس خلاص

الفلوس ....ودعتنى وخلصت

والصحاب ....رمتنى و هربت

والدنيا دارت على...ولفت

والندم ...آه من الندم

والجوع ....آه من الجوع

أصبحوا أصحابى

أعمل أيه ؟؟؟....أتصرف أزاى

وفى أخر المطاف

بعد الغنى والاصراف

بقيت أنا راعى خنازير

ونسيت عيشة العز

ونسيت حتي لبس الحرير

أكيد عرفتم ...أنا مين

أنا ...أنا ...الابن الضال

أنا اللى خدت نصيبى من البيت

واللى فى دماغى أنا مشيت

وفى بلاد بعيد رحت وجيت

وعلى أصاحب شر أنا أتلميت

أنا ...اللى كنت فى بيتنا أمير

بقيت أنا ...راعى خنازير

وفى لحظة صدق وندم

فتحت عيونى

ماشفت الا الذل

ماشفت الا العدم

وبعدى عن بيتى

كان كله عذاب

عذاب ودموع والم

فين الحبايب؟؟؟.....فين ضحكة أخويا؟؟؟

فين القرايب.؟؟؟؟...فين حضن أبويا؟؟؟

أنا ...لبيتى ولحضن أبويا....أرجع

وعند رجليه ...أبكى بدموع الندم وأركع

ولمداسه........ بشعرى ودمى أمسح

ياريت يقبلنى...ولو حتى خدام

خدام من زمرة الخدام

بس ....هو هيسامح؟؟

هينسى ....فعلى الجارح؟؟

هيرفعنى من سقطتى

وممكن يغفرلى ...فظاعة غلطتى؟؟؟

ورجعت ...وأنا فى الطريق

كانت أفكارى

شبه فى نفسى ذى الحريق

ومن بعيد لمحت أبويا واقف

خطوه أتقدمها...والتانيه أرجعها

أرجعها ...وأنا خايف

متردد....محتار

أرجع ....والا أقرب

أيه العمل ...مش قادر

مش عارف ....أيه أختار؟؟

وفجاءة ...لقيت أبويا بيجرى على

وأيديه مفروده...وبسمته شفتها عيني

أنا دلوقتى مش مرعوب ولا خايف

خدنى أبويا...وأبو الكل

خدنى من ذنوبى...رفعنى من الذل

خدنى من شكى ...وقسوة حروبى

دي قصتى....وحكايتى

وتوهانى فى دروبى

قصه كل يوم بتتحكى

وكل يوم الابن الضال

وأحد جديد بيشتكى

بس النهايه مش كل مره

بتكون نهايه سعيده

مش كل مره

بتكون نهايه سعيده


تحياتى

الصياد

[Nahla Nicolas]

ليس المهم ان اخطأنا او ابتعدنا عن الرب ، لكن الاهم هو ان نعود اليه من جديد، متذكرين رحمة ومحبة الآب لنا، وغفرانه الدائم والمستمر، فمهما كبرت خطايانا فالله يغفرها كلها ويبدأ معنا من جديد، صفحة حب جديدة.
أعطانا الله حياة التوبة وقوة التقوى وملئ المحبة التي بالروح القدس ( رو5: 5 )
الزجل كتير الحلو
نعمة الرب معك كل حين آمين

[مدحت الصياد]

أشكرك أختي الغالية

Nahla Nicolas

على مرورك و مشاركتك في هذا الموضوع بكلماتك الجميلة و فعلاً كما قلتي يا أختي الغالية

< ليس المهم ان اخطأنا او ابتعدنا عن الرب ، لكن الاهم هو ان نعود اليه من جديد>

و دائماً تشرفيني بردودك في موضيعي المتواضعة هنا

محبتي

الصياد