شكراً كارين على الموضوع المهم جداً ..

اقتباس المشاركة الأصلية كتبت بواسطة برباره مشاهدة المشاركة
رأس الحكمة مخافة الله (أم 10:9)
هون الترجمة ممكن تلعب دور .. لأنو النص عندي : بدء الحكمة مخافة الرب ( أم 9 : 10 )

و كلمة ( بدء ) معناها اللاهوتي ادقّ بكتير .. لأنو الشخص بيبدأ يصير حكيم لما بيخاف ربو .. أما ((( رأس ))) الحكمة .. فينا نقرا :

لا خوف في المحبة بل المحبة الكاملة تطرد الخوف إلى خارج لأن الخوف له عذاب و أما من خاف فلم يتكمل في المحبة ( يوحنا 4 : 18 )

بيصير المعنى : بداية الحكمة مخافة الرب + رأس الحكمة محبة الرب ..

*********************************

بالنسبة لموضوع الخجل .. رح إتوسع شوي لأنو أنا كنت من الخجولين جداً لغاية البكالوريا ..

أول شي : من وين بيجي الخجل ؟؟؟؟ و ليش الواحد بيخجل ؟؟؟

الخجل بيجي من الطموح .. ما حدا يستغرب ..

الانسان الخجول هوّي الانسان اللي بيحب - قدام الآخرين - يكون 100% .. و لما بيلاقي حالو أقل من هيك بيخجل .. و الخجل هون هوّي ردة فعل تجاه الفشل .. لأنو هالانسان معتبر حالو فشل بإنو يكون الشيء المطلوب ( أي الشخص ذو المواصفات المطلوبة ..

بأغلب الحالات _ مشان ما قول كل الحالات - الخجول إنسان محب للآخرين .. و هالمحبة بتخليه يشوف إنو هنّي كتيييييييييير تمام .. و كأنو هنّي كمان ما عندهم هالفارق بين الشيء اللي بيحبو يكونوه و بين واقعهم .. مشان هيك بيتخيّل إنو هنّي أفضل منو ..


*-------*-------*-------*

بعض الشغلات اللي تغلبت فيها على الخجل :

1- أكتر شغلة لعبت دور هيي الغضب من خجلي .. لأنو لاحظت شو هيي الإشيا اللي خسرتها و عم إخسرها كوني خجول ..
2- ملاحظة إنو هالآخرين اللي حاسبهم ( تمام ) و مشان هيك رافعين أنوفهم و ماشيين .. هنّي كمان عندهم ثغراتهم .. و اللي منها أكبر بكتير من ثغراتي ..
3- الخجل من الجنس الآخر تغلبت عليه ( بالبداية ) عن طريق تناسي إنو هالشخص من الجنس الآخر .. يعني إتعاطى و إحكي مع هالشخص كــَـــ (( شخص )) و كــَــ (( ذهن )) .. يعني بشكل طبيعي و مُجرَّد من الجنس اللي بينتمي إلو .. يعني قلت : أنا بحكي مع رفقاتي ( الشباب ) بجرأة .. طيب شو اللي بيختلف إذا كان هالشخص بنت مو شب ؟؟
4- تعلمت عبارتين من فلم لليافعين : Be tou + Talk hard
بي يو .. يعني : كون إنتا .. متل ما إنتا .. مو متل ما بتحب تكون .. أو متل ما بتتوقع الآخرين ينتظروا إنك تكون .. .. يعني : هادا الموجود .. اللي عجبوا أهلا و سهلا .. و اللي ما عجبو أللـه مع دواليبو .. و باختصار : هادا أنا .. يو تيكيت أور ليف اِت .. ( بالعربي لأنو لغتي فرنسي و انكليزيتي سمع + قراءة .. بس مو شاطر بالاملاء )
و التانية : توك هارد .. احكي بقوة .. عبّر عن نفسك متل ما هيي نفسك .. و هيّ الشغلة بدها شوية تواضع .. لأنو وقت تقول رأيك متل ما هوّي بتجرّد .. يمكن تضطر تعتذر إذا كان هالرأي غلط ..
أما التغلب على الخجل من الاعتذار : أنا غلطت .. و كل انسان بيغلط .. و شو صار يعني ؟؟ و شو المطلوب ؟؟ شو يعني بنتحر إذا غلطت ؟؟
يعني باختصار التعامل مع الغلط كأمر تم و صار واقع و صار بالماضي .. و هون بيعجبني بيت شعر :
ما فات مات و انقضى - - - - - فلا ندم على ما مضى
و هادا من باب ( الواقعية ) ..
و طبعاً الشطر التاني : ( فلا ندم على ما مضى ) بيختص بالعلاقة مع الانسان .. و ما بيوصل للعلاقة مع الرب .. و اللي بيضمن إنو ما يوصل للعلاقة مع الرب هوّي إنو قارن بين أنا شو عملت أمام الرب .. و هوّي شو عمل و عم يعمل معي ..

و عن الثقة بالنفس .. في أغنية عم تطلع لأحمد مكي أسلوبها الموسيقي غربي ( راب ) بس كلماتها و لا أروع .. بيقول مطلعها ( باللهجة المصرية ) :

دوَّر بنفسك جوّا نفسك
حَ تلاقي حاجة .. ما حدّش فيها ينافسك

و بيقول فيها : ممكن تكون ميزتك فِ كذا ... أو كذا .. أو كذا .. الخ


*-------*-------*-------*

هيّ - باختصار - تجربتي مع الخجل .. بشكل سريع و ( مقتضب ) (( ههههه عجبتني مقتضب .. حاسس حالي طالع فصيح فيها هههه ))

بتمنى يكون في منها فائدة للكل و بالأخص اللي عم يعاني من الخجل ..


صلواتكم