لوط

[فيرينا]

الحقيقه شخصيه لوط من الشخصيات اللى كتير بنشوفها فى حياتنا مش بس بنشوفها لكن كتير بنلاقى نفسنا مكانه وبنعمل زيه .... لفت نظرى فى شخصيته 3 نقط

1 - غير واضح الرؤيه ::

" فذهب أبرأم كما قال له الرب وذهب معه لوط " ( تك 12 : 4 )

ابراهيم كان ماشى حسب وصيه ربنا ليه وعارف هو عايز ايه وبيعمل كدا ليه لكن لوط لاء لوط بس كان ماشى مع ابراهيم وفى مكان تانى بيتقال عنه

" ولوط السائر مع أبرام " ( تك 13 : 5 )

يعنى كان ماشى حسب الجو والموجه زينا .... يتقال تخدم فى المنطقه الفلانيه ومالو مفيش مشاكل اهو برضوا هتعرف على ناس جديده تهاجر ايه المشكله أهى تجربه .....
المشكله الحقيقه لما ميكنش فى هدف او لما تعمل حاجه وانت مش عارف ابعادها فى أول محك هتقابله هتتصدم فى قراراتك وأنت عارف لوط عمل ايه فى اول مشكله حصلتله مع ابراهيم وهى

2 - أختيارات خاطئه ::

" فرفع لوط عينيه ورأى كل دائره الاردن أن جميعها سقى ........... ونقل خيامه الى سدوم , وكان أهل سدوم أشرارا وخطاه لدى الرب جدا " ( تك 13 : 10 - 13 )

لوط لانه من الاول مكنش ربنا هو الهدف عنده فكان سهل عليه انه يختار المدينه الشريره المهم فيها ربح بالنسبه ليه ومحسبش النتيجه
كمان لما الملاكين جم علشان يخربوا سدوم قالوله اهرب للجبل لكنه رفض واختار صوغر ولما ربنا استجاب طلبته ومحرقش صوغر هو قرر يسيب صوغر ويعيش فى الجبل
يعنى ديما بينقل حياته فى اماكن مش عارف فيها فين الصح أو فين الخير لحياته مع انه لو ركز فى صوت ربنا هيعرف الخير من الشر
اعتقد انى بشوف لوط كتير فى اى شخص ربنا يقوله يمين وهو يقوله حاضر فهمت انا هروح شمال
ربنا بيقولك اختيارك دا غلط مش دا المناسب ليك وانت حاضر يا رب انا هتمسك بالحاجه دى
سهل قوى نقول لوط وحش بس يا ترى بنقول احنا ايه ؟؟؟؟!!!!!!!!!!!!!!

3- عدم وضوح الشخصيه ::
اعتقد ان دى أسواء عيوب لوط على الاطلاق
انه كان بين الناس مش باين هو تبع انهى فريق هو للرب ولا لأبليس علشان كدا اول ما راح ينصح أصهاره

" فخرج لوط وكلم أصهاره ألآخذين بناته وقال قوموا اخرجوا من هذا المكان لأن الرب مهلك المدينه . فكان كمازح فى أعين أصهاره " ( تك 19 : 14 )

كان كمازح فى أعين أصهاره يا ترى ليه هل المشكله فى الأصهار ولا في لوط نفسه يعنى قارنت بيه وبين موقف يوحنا المعمدان اللى كان هيرودس بيهابه وبيحترمه جدا مع ان يوحنا بالنسبه لهيرودس واحد من رعيته
..... وكمان فيلكس الوالى لما اترعب من بولس الأسير
.................... يبقى المشكله مش فى الناس المشكله كانت فى لوط نفسه يمكن كان عامل زى مابيقولوا ساعه لقلبك وساعه لربك ... يعنى مع أصهاره بيجاريهم في أي كلام فاضي وبينه وبين ربنا في عشره وعلاقه بنوه
بس هنا لتساهل لوط وأسلوبه الغير واضح مقدرش يوصل ربنا لغير المؤمنين مش بس يوصلهم ربنا طول فتره أقامته معاهم لاء دا كمان وقت الخطر مقدرش يحذرهم لأنهم ببساطه مصدقوش كلامه مقدروش يقتنعوا ان اللي بيهرج معاهم وعايش حياته ممكن ربنا يكلمه أزاى !!!!!!!!!!!!!!
نرجع ليك أنت بتعمل أيه مع أصحابك وجيرانك غير المؤمنين و ألأمميين ......
هل بيشوفوا فيك صوره المسيح ؟؟؟؟؟
هل لما بتتكلم عن ربنا بيصدقوا كلامك ولا بيحسوا أنك بتتكلم على الفاضي ؟؟؟؟؟
ولو دا بيحصل يبقى المشكله عندك مش عند الناس .......
هفترض أنك بتجارى الناس فى سلوكهم وكلامهم علشان محدش يقول عليك عقد او دقه قديمه او عايش فى كهف وراكن الجمل برا ........ بس مش برضوا أيمن كفرونى ربنا يبارك حياته قال عن أختبار حقيقى

(((( شو همي لو قالوا عني أنى جاهل أو متخلف فكرون يعنى بيخجلنى أني بصف ولادك وقف ... راح أوقف قدامن كلن بالصوت العالي راح قلن يسوع بيملك على قلبي وبيرفع راسى وبيشرف )))

في موقف تانى للوط غريب برضوا

* " وقبلما اضطجعا أحاط بالبيت رجال المدينه رجال سدوم من الحدث الي الشيخ . كل الشعب من أقصاها , فنادوا لوطا وقالوا له أين الرجلان اللذان دخلا اليك الليله . أخرجهما الينا لنعرفهما " ( تك 19 : 4 – 5 )

متغاظه جدا من الموقف دا ازاى اهل البلد أتجرؤا وبكل بجاحه يقولوا الكلام الغريب دا ازاى حتى الاحداث يعنى المراهقين .... يعنى واحد عنده نقول 13 سنه يخبط على واحد عنده 50 سنه تقريبا ويقوله كدا . أعتقد برضوا انه الغلط كان عند لوط
هو أى نعم مكنش بيشترك معاهم فى الشر بس وجوده بينهم فى حد ذاته هو موافقه ضمنيه على اللى بيحصل
.................. هو لو رافض الوضع دا يبقى كان مستنى ايه علشان يسيب البلد ويمشي .. مكنش خايف على زوجته وعلى بناته وحتى على نفسه
لو أنت مكان لوط وقابل فى معارفك وأصدقائك انه سلوكهم يكون وحش اسمحلى الفت نظرك لحاجه صعبه شويه
اللى بينظر نظره شريره لأي بنت هل من المفترض انه من وراك مش هينظر كدا لأختك هل من المنتظر أنه هيتعامل معاها بطهاره ؟؟؟ !!!!!!! ((( أسفه أن سؤالي صعب بس هو واقعي )))
ـــــــــــــــــــــــــ ـــــــــــــــــــــــــ ـــــــــــــــــــــــــ ـــــــــــــــ
لو عندك أي عيب من عيوب لوط فكر في نهايه لوط وحاول تتخيل نفسك بداله فكر انه في الاخر خسر كل فلوسه وكل ممتلكاته وخسر زوجته ارضيا وابديا خسر اصحابه للأبد خسر بناته اللى ماتوا وفقد طهاره اللى عاشو زعلان
أيه الميزه انك تكون أبن ربنا وكل اللى حواليك ضايعين وسبب ضياعهم للأسف أنت !!!!!