الظهورات المريمية

[benny]

أخي العزيز مينا,

برأيي الشخصي, عندما يأتي أي شخص ويقول أنه رأى ظهورا ما, يكون هناك 3 احتمالات

1. أنه يكذب طمعا بالشهرة
2. يتخيل ذلك ولسبب ما يجعله يصدق أنه حقيقة
3. أو أنه في رأى ظهورا حقيقيا. في هذه الحالة هناك احتمالان
أ. الظهور خدعة شيطانية
ب. أو أنه فعلا ظهور الهي

الظهورات في هذا المقال الرائع معظمها في الكنيسة الكاثوليكية. وبما أنها تعي هذه الاحتمالات فهي تحاول جاهدة أن تضع الظهور في مكانه الصحيح. ولو أرادت الكنيسة الكاثوليكية أن تقبل هذه الظهورات دون مسائلة فسوف تجد ان هناك المئات أو حتى الالاف منها. فهي ترفض معظمها.أما معرفة ان كان الظهور خدعة شيطانية أو أنه ظهور الهي, فالمسألة تصبح معقدة. لهذا تلجأ الكنيسة الكاثوليكية الى فحص الظهور من جهات متعددة قبل اصدار رأيها. لهذا فانا أعتقد أن كل الظهورات المشهورة هي فعلا حقيقية (احتمال 3 أ او ب) خصوصا اذا تم تبنيها من قبل الكنيسة الكاثوليكية.

أما بالنسبة لنا نحن الأرثوذكس, فاننا أشد صرامة وأكثر خبرة بما لا يقاس في هذه الأمور خصوصا عند أبائنا الرهبان, فانهم في صراع وجها لوجه ومواجهة دائمة مع الشياطين وخداعاهاتها, يعرفون ألاعيبها ويدركون خطورتها, عند خبرتهم تقف الكنيسة الكاثوليكية عاجزة كالطفل الساذج أمام شيخ حكيم. وبما أن الحقيقة كاملة دون نقص هي في الكنيسة الأرثوذكسية, فان أي ظهور يخالف التقليد الكنسي والأباء ولو كان بمقدار شعرة فانه يعتبر باطلا, حتى ولو تلفح بمئات المعجزات.

لا تنسى ما قاله المسيح في انجيل مرقص 21:13-23
حينئذ إن قال لكم أحد : هوذا المسيح هنا أو : هوذا هناك فلا تصدقوا
لأنه سيقوم مسحاء كذبة وأنبياء كذبة ، ويعطون آيات وعجائب ، لكي يضلوا لو أمكن المختارين أيضا
فانظروا أنتم . ها أنا قد سبقت وأخبرتكم بكل شيء

أو القديس بولس في رسالته الثانية لكورنثوس 14:11
ولا عجب . لأن الشيطان نفسه يغير شكله إلى شبه ملاك نور

أو ما قاله في غلاطية 8:1-9
ولكن إن بشرناكم نحن أو ملاك من السماء بغير ما بشرناكم ، فليكن أناثيما
كما سبقنا فقلنا أقول الآن أيضا : إن كان أحد يبشركم بغير ما قبلتم ، فليكن أناثيما

لهذا فلا أتعجب اذا قال أحد الأباء صراحة ودون محاباة أن هذه الظهورات لهي ألاعيب وخدع مدروسة ومنقحة خصيصا للكنيسة الكاثوليكية معدة بخبرة شيطانية تقدر بألاف السنين.

يا رب ارحم (40 مرة)

اذا أخطأت في أي نقطة فأرجو المعذرة والتصحيح.

وأما الحقيقة فيجب أن تعرف حتى وان كانت أمر من العلقم.

أصلي مع أخي الغيور الى الرب يسوع المسيح طالبا غفرانه ان كنت اعثر أحد أخوتي .. وراجياً ان يلهمنا ويعزينا بروحه القدوس . امين

صلوا من أجلي أنا الذي لا يستحق أن يدعى مسيحيا

[إيليا الغيور]

أخي وحبيبنا benny شكرا لك على هذا الاسلوب المبسط والغني الرب معك
[gdwl]
يا رب ارحم (40 مرة)
[/gdwl]
ورد خطأ في مشاركتي السابقة اود التصحيح

القديس شربل

(القديس) شربل

الرسائل وما حاجتها لنا؟

الرسائل وما حاجتنا لها؟

[مارى]

لهذا فلا أتعجب اذا قال أحد الأباء صراحة ودون محاباة أن هذه الظهورات لهي ألاعيب وخدع مدروسة ومنقحة خصيصا للكنيسة الكاثوليكية معدة بخبرة شيطانية تقدر بألاف السنين.

حضرتك تقصد الظهورات كلها .... كلها يعنى .... أم التى تحمل عقائد غلط و بس ؟

[Minas]

حضرتك تقصد الظهورات كلها .... كلها يعنى .... أم التى تحمل عقائد غلط و بس ؟

و ما فائدتها إن كانت تحمل عقائد سليمة ؟ يعني أضافت إيه غير تشويش و تحقير لمصادر التعليم و الوحي ؟
هذا ما قلته لثناسيس أحد أتباع فاسولا ، قلت له كيف لك أن تعرف إن كان ما يظهر لفاسولا حقيقي أم لا حتى لو كان تعليمه سليم؟ يعني أنا لو قلت دلوقتي إن المسيح ظهر لي و قال لي يجب أن تؤمن يا مينا بالثالوث ( عقيدة سليمة ) هل هذا يعني إنه فعلاً ظهر لي ؟


أنا أرى إن مجرد إضاعة الوقت في مثل تلك الأمور هو خطية في حد ذاتها

[مارى]

ما فائدتها إن كانت تحمل عقائد سليمة ؟ يعني أضافت إيه غير تشويش و تحقير لمصادر التعليم و الوحي ؟

التى تحمل عقائد غلط مش اكتر من ظهورات شيطانية ..... مش محتاجة تفكير يعنى

لكن منقدرش ننكر ان ممكن يكون فى ظهورات حقيقية لأشخاص غير أرثوذكس .... انا عايزة اقول حاجة مش عارفة ممكن تقبلوها منى و لالأ .. ممكن ناس تكون بتنتمى لكنائس غير ارثوذكسية بحكم النشأة و العماد .... لكن يكونوا مستقيمى الفكر (أرثوذكسى الفكر) بحسب الطبيعة التى خلقنا عليها ..... يعنى ممكن انسان كاتوليكى النشأة مثلا" فكره يكون مستقيم و قادر على تمييز ما هو خطأ فى عقيدته ... ايه يمنع ان العدرا تظهر له .

أنا أرى إن مجرد إضاعة الوقت في مثل تلك الأمور هو خطية في حد ذاتها

لا أبدا" ليه .... الظهورات الحقيقة بتأتى بالفرح للناس ..... مين ميحبش يشوف العدرا ..... انما إعتماد الإيمان على تلك الظهورات من قبل البعض هو اللى يعتبر خطية

[Minas]

ايه يمنع ان العدرا تظهر له .

و إيه الفايدة اللي عادت عليا أنا لما الشخص الحلو دا يدور في الشوارع يقول إن العدرا ظهرت له؟ هو لو كان شخص كويس كان سكت و كتّم عالموضوع لأن دا أمر بينه و بين الله فقط . لكن ليه تنزل كتب و مجلات و صور و إعلانات و تبرعات و مليون مصدر لسرقة جيوب البسطاء ؟ و بالمناسبة مفيش ظهور لم يتبعه مثل هذه العمليات الإحتيالية . سواء بقى كان حقيقي أو مش حقيقي ، مجرد علمنا بيه يبقى دا نصب علني.

العذراء و المسيح ظهروا و بيظهروا و هيظهروا لقديسين كثيرين و نساك ، شفتي حد منهم دار في الشارع يقول أنا العدرا ظهرت لي؟ أنا استفدت إيه لما ظهرت له؟ و لا أي حاجة ... هناك حقائق تاريخية تثبت كل رواية الإنجيل ، أحسن مليون مرة من الظهورات.

لا أبدا" ليه .... الظهورات الحقيقة بتأتى بالفرح للناس

أنهي ناس بالظبط ؟ الناس اللي ظهر لها و للا اللي أصلاً مش مؤمنين و بيتصنعوا الإيمان و صاروا كما قال المسيح جيل فاسد يطلب آية و لا تُعطى له ؟ ينتظرون هذه الحكايات و الظهورات العديمة النفع التي تحقر من رسالة الإنجيل و رسالة الكنيسة و تحول مصدر الوحي الإلهي من الكنيسة و التقليد لأفراد حتى لو كان تعليمهم صح؟
سؤال : أنا استفدت إيه لما تظهر العذراء لفلان من الناس؟ و لا أييييييييييييييييييييييي حاجة غير التشويش فقط. و إلهنا ليس إله تشويش زي ما بولس الرسول بيقول.

[مارى]

مش كل الناس بتكون سيئة النية لما تقول العذرا ظهرت لى أو عملت معايا معجزة ... ساعات بيفتكروا ان دا تبجيل و تكريم للعدرا ... زى بالظبط ما انسان يعمل معاك فعل خير و تتكلم انت عنه قدام ناس تانية .... مش دايما" النوايا بتبقى سيئة بالصورة دى

ده غير ان فى فعلا" ناس بسطاء جدا" .... ظهرو العدرا لهم بيدعم ارتباطهم بالكنيسة .... الله له طرقه مع الناس دى ... فى أحيان بتبقى دى طريقة منها ... منقدرش نحكم .... مش كل الناس عقولها مستنيرة و مثقفة و بتتكلم بمنطقك .

[Minas]

انتي بتتكلمي في نقطة اللي العدرا ظهرت لهم .. و طب و اللي العدرا مظهرتلهمش ، يستفيدوا بإيه من ظهورها لشخص آخر؟ و لا حاجة غير صغر النفس و التشويش و ترك مصدر الإيمان و كمان بلا أدنى شك ( طالما بقى إنه مش مستنير و مش مثقف) هيقع في أخطاء عقائدية ، و أديكي شفتي فيه ناس و انتي منهم - و مع كامل احترامي ، و كلنا بنقع - كنتي بتصدقي في ميرنا سنفور و للا زنور دي.

بالطريقة دي احنا أمام مأزق شديد
إذا تجاوزنا سؤال عبثية فائدة الظهور ، و تجاوزنا أيضاً مضار هذا الظهور في تشويش الناس بسبب " حسن نية الناس " .
يأتي السؤال اللي سألته لثناسيس ، هل أنا ظهرت لي العدرا أو المسيح لو قلتلك إن المسيح ظهر لي و قال لي عقيدة سليمة زي مثلاً الثالوث؟
الإجابة أحد اثنين :
1- نعم : ساعتها هقولك : هي هي هي ، ضحكت عليكي و مظهرليش
2- لأ : هقولك اشمعنا انا يعني اللي مصدقتنيش و صدقتي واحد تاني ؟

أما بالنسبة للفرح ، فالروح القدس بملئه حال في الكنيسة و كفيل بإسعاد الناس ، و كل ما علينا فعله هو أن نصير أدواته من خلال تلك المؤسسة الإلهية التي أسسها ابن الله على الأرض ، و التي أراها قوية بما يكفي لجعل الناس حالها أفضل...

[مارى]

انتي بتتكلمي في نقطة اللي العدرا ظهرت لهم .. و طب و اللي العدرا مظهرتلهمش ، يستفيدوا بإيه من ظهورها لشخص آخر؟ و لا حاجة غير صغر النفس و التشويش و ترك مصدر الإيمان و كمان بلا أدنى شك ( طالما بقى إنه مش مستنير و مش مثقف) هيقع في أخطاء عقائدية ، و أديكي شفتي فيه ناس و انتي منهم - و مع كامل احترامي ، و كلنا بنقع - كنتي بتصدقي في ميرنا سنفور و للا زنور دي.

شوف يا أخى .... ظهور العذراء فى أماكن كتير و لناس مختلفة لو ظهور حقيقى .... فدا بسماح من ربنا .... هنقوله ايه ؟ لأ بلاش ... الظهور ملوش لازمة لنا يا رب ... مش كل الناس بتستفيد منه..... و مين قالك ان كل الناس رد فعلها بيبقى تشويش و صغر نفس .... لأ ناس كتير رد فعلها مش بيبقى اكتر من فرحة و تبجيل للعدرا و لمن سمح بظهورها .

أما بقى بخصوص ميرنا .... فأنا سبق و قلت انى كنت حيادية تجاه موضوعها .... كنت بقول وارد انه يحصل ... و لما صدقت مصدقتهاش هى .... لأ .... صدقت الكنيسة اللى صدقت على أقوالها بعمل زياح لأيقونتها ..... هقول للكنيسة كمان لأ ؟

و برغم ان انا مستوى ثقافتى عادية جدا" ..... اول ما قريت رسائلها .... فهمت أن الموضوع خرافة مش اكتر ..... و حالى هو حال الأغلبية ..... يبقى فى النهاية مين المسئول عن توعية الناس .... غير الكنيسة ..... و ناس زيكم ممكن يبقى لهم دور فعال بجانب الكنيسة .
اللى لازم توعى الناس ...... ايوه العدرا بتظهر و هتظهر .... بس مش ظهورها هو سبب إيماننا .

انا شايفة ان المناقشة شكلها بقت تساؤل لربنا ليه بيسمح بظهور العدرا ..... و الظهور الحقيقى لمين للأرثوذكس و لا الكاتوليك ....و الظهور فى نظر البعض تشويش .... يبقى بلاش منه .... لأ الموضوع بدايته كانت هايلة و شكله بينتهى نهاية بعيدة عن الهدف المرجو منه و هو أن الناس تعرف أن مش أى ظهور بيبقى حقيقى و بيؤدى لفرحة الناس .

[Minas]

نقول تاني

يأتي السؤال اللي سألته لثناسيس ، هل أنا ظهرت لي العدرا أو المسيح لو قلتلك إن المسيح ظهر لي و قال لي عقيدة سليمة زي مثلاً الثالوث؟
الإجابة أحد اثنين :
1- نعم : ساعتها هقولك : هي هي هي ، ضحكت عليكي و مظهرليش
2- لأ : هقولك اشمعنا انا يعني اللي مصدقتنيش و صدقتي واحد تاني ؟

إيه رأيك في الكلام دا ؟


منتظر الإجابة.

--------------
أنا في تقديري الشخصني إنه لأ مفيش حاجة اسمها فرحة و تمجيد لله في أمر مشكوك في صحته و كل ما يقف خلفه مجرد ادعاء بأن التعليم اللي فيه سليم ، و دا بيرجعني للسؤال اللي سايبهولك و منتظر رد ...

اللي يفرح من حاجة مفيش دليل واحد عليها إنها حصلت يبقى شخص غلطان و فاقد للأهلية ... دا رأيي الشخصي بردو