حكي متفلسفين

**مارى** · 2008-10-08, 09:52 AM

حكي متفلسفين

بقلم: لين ورد

بالصدفة في إحدى الجامعات التقى "متفلسف" مع حبيب قلبو و رفيقو "هزاز راسو" و جلسوا يتحدثون في أحد المقاصف....

متفلسف: بتعرف أنو مشكلة من مشاكل جيلنا الكثيرة هي "التعليب".
هزاز راسو: صح الحق معك.
متفلسف: فهمت شو قصدي و لاّ أشرحلك أكثر؟...
هزاز راسو: فهمت فهمت. بس إذا بدّك اشرحلي معلش...
متفلسف: قصدي بالتعليب أنو نمط حياتنا معلّب!.. كيف؟ أنا بقلك... يعني معظم الشباب قصة حياتهم هي هي : دراسة مدرسية و بعدها دخلة عالجامعة بطلوع الروح و بعدين ركض للحصول على شغل، هذا طبعاً إذا ما كان البابا مدبر كل شي من عندو...
هزاز راسو: إم م م م ... كلامك صح...
متفلسف: هذه يا صاحبي معادلة مؤمنة، تأتي مع تأمين موقّع بأنك لن تصبح يوماً مشرداً و لا منبوذاً (طبعاً إذا مشيت عاقل)، و لكنها تحرمك من كل أمل بأن تشق طريقاً في الحياة لم يشقها أحد قبلك.. إن هذه المعادلة التي تجمع عدداً كبيراً من الشباب، تئد فيهم حياة المغامرة، و وهب النفس و الحياة لإثبات الذات بما يتلاءم مع ميولها... إنها تجعلهم يعانون من شدة التعليب الذي يفرض عليهم، مع كل رسالة مقصودة أو غير مقصودة من الأهل و المجتمع، تدعوهم إلى نمط من الحياة معلّب و مشترك بين الجميع، و هذه الرسائل لا تساعدهم في شيء إلا في التخلّي عن شخصياتهم الفريدة و لو جزئياً للاتحاد بالنموذج التقليدي العام، خانقين معظم مواهبهم و فرادتهم ...هيك فهمت شو قصدي بالتعليب؟...
هزاز راسو: طبعاً طبعاً فهمت.
متفلسف: و إذا بدك فكر بالمشاهير الكبار في العالم، تجد أنهم تعذبوا و هوجموا بشدة قبل أن يبلغوا ما وصلوا إليه، منهم عدد كبير من الفنانين في كل العصور أمثال فان كوخ، موليير، جبران خليل جبران، و في عالم الأعمال نجد والت ديزني، جيرالد فورد.... كلهم ــ طبعاً ما عدا أليسا و نانسي عجرم ــ لم يقدّم لهم النجاح على طبق من فضة.
هزاز راسو: كل شي عم بتقولو صح.. بس مانك ملاحظ أنو زدتها شوي... يعني ما معقول أنو عم تطلب من الناس يتركوا جامعاتهم و شغلهم و يروحوا يدوروا على مغامرة حياتهم... بتخرب الدنيا هيك... و بعدين، الوضع مانو سيء كتير هيك مثل ما عم تقول...
متفلسف: صحيح شفت كلامي ثقيل كتير عليك، بس هو بيحصل مع كل الناس و لكن بدرجات متفاوتة، البعض يشعر به و يتألم منه، و البعض الآخر محظوظ لأنه نجا منه. بس هو موجود موجود... لأنو، عدّ لي كم مخترع عنا، و لاّ كم مبدع أو كم فنان حقيقي في ببلدنا، نسبتهم ما بتعمل شي من تعداد السكان، و مقارنة مع بلدان أخرى!!..
هزاز راسو: يا أخي ..طب شو الحل برأيك؟؟؟
متفلسف: برأيي المطلوب هو عدم الخوف من التحدي... بالطبع إذا كنت سعيداً و متوازناً في حياتك كما هي، لا داعي لأن تغيّرها و تذهب للبحث عن مغامرة لا تناسبك. أما إذا كنت تشعر بأن عمرك يمر بدون معنى فإنه بحق لجبن و كسل بقاؤك على حالك... أنا قصدي أن أشجع كل شخص يمر بهذا الوضع على البدء بالبحث عن مغامرته الفريدة خارج القوالب المعلبة، و أن يتحرر من النماذج السعيدة الوهمية التي يعد بها المجتمع، بنظري هي كلها كذب بكذب، ما في شي بيجي بالساهل ..و الشغلة بدها تعب...
هزاز راسو: و الله حكيك كله عالراس و العين... بدي أعتذر منك هلق عندي محاضرة...
متفلسف: مع السلامة...
هزاز راسو (بقلبو): أف.. صحيح متفلسف!!!