تذكرة لجهنم <قصة طويلة بقلم الصياد>

[مدحت الصياد]

مقابلة مع أبليس
_______________________

وقبل أن يهبط شمروخيل بى الى الساحة الثالثة سمعتة يتحدث مع نفسة ....وبعدها دار بى دورة كاملة وهبط بطريقة رأسية سريعة جعلتنى أتجمد من شدة الرعب وهرب الدم فى عروقى من هذا المتهور ...ثم صرخت فية بكل قوة وأنا متشبث بأكتافة بكل ما أتيت من عنف لم أعرفها فى نفسى من قبل....نقول أية ...حب الحياة والخوف من الموت..ولكننى ميت فعلاً ..قلت لهذا الصاروخ الهابط بى لارض جهنم بكل قوتة وكأنة سيحفر نفق برأسة بها :...ياعم شمروووخييييل...انت اتجننت والا نمت على نفسك....هدى السرعة شوية أرجوك...أتوسل اليك...أنا قلبى هيقف من الهبوط الرهيب دة

ضحك شمروخيل صارخاً بى: متخفش ...أنت خايف من أية؟؟؟يعنى لو وقعت هتموت...مانت ميت ياحبيبى ....
الصياد: طب أنت رايح على فين كدة بالصلاة على أبليس؟؟

شمروخيل: معلش الرحلة أتغيرت ...أصل جانى
message

نظرت فى ذهول لشمروخيل قائلاً : أية ياخويا ؟؟..جتلك رسالة؟؟...هو المحمول نزل هنا كمان؟؟...طب أنت تليفونك كرت والا خط...هاهاهاها

شمروخيل: أنت بتتريق على ...هنا الرسايل من الدماغ للدماغ طوالى مش محتاجين أجهزة نقل ياحلو

قال هذا ثم أقترب بشدة..وأصبح قاب قوسين أو أدنى من الارض فأغلقت عينى من هول مشهد الارض وهى تقترب منى بشناعة...ولكننى بعد ثوانى لم أشعر بأى أرتطام ففتحت عينى لاجد نفسى فى أسفل سافلين ...نظر لى شمروخيل قائلاً : خلاص الرحلة وصلت للمحطة أنزل بقى

نزلت بهدوء قائلاً لة : أحنا فين ياشوشو

رد شمروخيل قائلاً : أحنا على أبواب قاعة الرئاسة الجهنمية

فزعت من هذة الاجابة صارخاً فى شيطانى: أية...أية اللى جابك هنا دلوقتى ؟؟

رد بسرعة وهو يسرع الخطى وأنا طبعاً الهث خلفة: مش قلتلك من شوية جاتلى رسالة

الصياد : من مين الرسالة دة ؟؟

شمروخيل: < وقف عن الهرولة وأستدار نحو وأقترب من رأسى > قائلاً فى شماتة أحسستها فى لهجتة: رسالة من الريس ...من كبير القعدة....من رئيس الهاوية...من أبليس نفسة...

صعقت ...بشدة وتسمرت فى مكانى وكأننى تمثال شمعى ...أو قطعة من الحجر ...ثم نفضت عن نفسى بعد ثوان هذة البلاهة التى أصابتنى من هول الموقف الذى أنا فية الان قائلاً : يعنى...أحنا...دلوقتى...هنقابل. ..أب..أبل..أبلي...أب ليس!!

رد شمروخيل فى قوة وهو يهزنى قائلاً فى مرح مش معهود فية بالمرة : أية ياصياد ...أنا كنت فاكرك أشجع من كدة...وأية يعنى لما تتقابل مع الريس بتاعنا؟؟؟ ما أنت كنت كدة كدة هتقبلة ....يعنى دلوقتى أحسن ...وكمان الريس بتاعنا ذى الفل وأنسان جدع قوى

نظرت لهذا الاهبل قائلاً لة : أنسان ؟؟...مين دة الانسان ياعم شمروخيل؟؟؟ أبليس؟؟؟

هز شمروخيل رأسة فى قوة قائلاً بسرعة : أسف ..أسف ...قصدى هو شيطان حلو خالص ...شيطان جدع وصاحب صاحبة

أبتسمت أبتسامة الغريق الذى أضحى بينة وبين الغرق والموت شعرة قائلاً لهذا الشيطان الانجليزى اللى مش عايز يسبنى فى حال سبيلى..... وأنا فى كامل اليأس والقنوط : صاحب صاحبة؟؟؟..ياساتر يارب

رفع شمروخيل أصبعة فى وجهى ..<أذا كان هذا الذى رفعة فى وجهى يسمى أصبع> محذراً : هس.....بس...أنت بتقول أية...<وتلفت حولة فى خوف شنيع ...لم أشاهد شوشو خائف قبل ذلك أبداً...ثم أكمل كلامة بصوت يصعب على الكافر: أوعى...حسك عينك تقول أى لفظ أو كلمة فيها اللة أو يسوع أو المسيح أو أى شىء يخص السما ...فاهم..أوعى ..لحسن تكون نهايتى.... ونهايتك قبلى كمان...أوعى ياصياد ..أرجوك

ضحكت من هذا الرعب الذى أرتسم على قسمات....< أو حفر> وجة شمروخيل ثم قلت لة فى تسائل : طب وأية اللى هيحصل يعنى...ماحنا متأندلين..وقعدين هنا فى جهنم...على رأى المثل اللى قال....قالوا للقرد هنصخطك...رد وقال ..أكتر من كدة أية...هتخلونى غزال..هاهاهاها

هل رأيت يوماً شيطان يلطم ويولول ذى الولايا...دة اللى حصل لصاحبنا ..أقصد صاحبى شوشو الذى بدء فى وصلة ولولة رهيبة مع دخول موسيقى قوية مؤثرة من اللطم على كهوف خدودة ثم قال : أنت كدة مش هتجبها البر معانا...أحنا هنا فى الدرك السابع من جهنم ..عارف يعنى أية؟؟؟
الصياد : لا...مش عارف؟؟

شمروخيل: يعنى دة أشنع وأبشع طبقة من طبقات جهنم ...دة حتى الشياطين بتهرب من الخدمة هنا ..واللى أهلة دعين علية...يتسجن هنا.... مننا..أو منكم

ولو لا قدر القدر وسمع الريس كلمة من هذة الكلمات هتروح ورا

الصياد: أية هنا كمان ..هروح ورا الشمس..هو الموضوع دة ورايا ورايا..فى الدنيا والاخرة كمان..دة أية الحزن الازلى دة والنحس اللى مش عايز ينزل من فوقى..خلاص يابا...خلاص كفاية ولولة ذى الحريم كدة ...أمسك نفسك شوية..وأنا أوعدك أنى مش هجيب سيرة حد يعكنن مزاج الباشا الكبير بتاع جهنم...أوعدك

شمروخيل : طب ياللى بينا

وهنا فتح شمروخيل باب كبير جداً...فخم ....باب ذى أبواب مكاتب كبار رجال الدولة...أو الكون.. ثم دخل فى أحترام وأنا طبعاً خلفة وكأننى تلميذ بليد رايح عند ناظر أو مدير مدرستة ومعاة ولى أمرة...

كانت المفاجأة كبيرة على نفسى مما وقعت علية عيناى..لقد كنت منتظر أن أرى مكتب أبليس عبارة عن بركان وحمم وهو يجلس فوق هذة الحمم ويمسك فى يدة بشوكة هائلة الحجم لزوم الغز والضرب وأن أجد جماجم تتدلى من سقف هذا المكان ودخان يملاء الهواء من حولى ...وأشياء كثيرة من هذا القبيل مثلما نشاهدة فى الافلام السينمائية...ولكن ما شاهدتة أبعد ما يكون عن كل هذا بمراحل ...أقصد عكس كل ذلك...نعم لقد وجدتنى فى قاعة فسيحة جداً ..على أحدث صيحة فى الديكورات .وسجادة حمراء فخمة مفروشة على أرضية هذة القاعة بالطول وفى نهاية القاعة ونهاية السجادة كان هناك رجل يجلس خلف مكتب بيضاوى الشكل مثل مكتب البيت الابيض الامريكى...وهذا الرجل شديد الاناقة يلبس بدلة لها الف لون ولون...مموجة لا تعرف لها أستقرار على لون معين...ورباط عنق على ما أظن أشتراة من أفخم بيوت الازياء الايطالية....ولة هذا الرجل وجة غاية فى الرقة والجمال ذو عيون زرقاء اللون وذو شعر أحمر قانى ناعم الملمس...ومع كل حركة منة كانت خصلات شعرة تقع على عيناة فيرفعهم بكل وسامة ورقة متناهية....نظرت لشمروخيل قائلاً لة: مين دة ؟؟؟

رد وهو يتقدم بأحترام : دة الريس بتاعنا هنا ..دة أبليس

فزعت من أجابة شمروخيل...ثم أجبتة بسرعة : الحليوة دة ...أبليس !!!!!!!...ياعم قول كلام تانى..

نظر لى شمروخيل ثم رفع وجهة للرجل قائلاً فى قوة وأحترام كبيرين: مساء الزفت واللهاليب ياريس

نظر أبليس لنا وقال فى هدوء وبصوت غاية فى العزوبة وكأننى أسمع مقطوعة موسيقية للسداسى شرارة أو الاخ بتهوفن: مساء القطران عليك ...مين دة ياشمروخيل؟؟

تنحنح شمروخيل وقال بكل كياسة :دة اللى سماحتك وشيطانتك طلبتة الان..دة الصياد

وقف أبليس فى سرعة ثم قال : دة...هو صائد الذباب؟!!!!

لماذا أحسست بالمهانة والاهانة من هذا الرد ...لا أعرف...ثم نظر لى أبليس قائلاً : أهلاً...أهلاً...

×××××××××××××××××××××



وغداً مع جديد الاحداث

محبتي

الصياد

[مدحت الصياد]

الحقيقة الشنيعة
__________

تقدمت من الذات الابليسية تقدم المجنون المقدم على الموت تحت عجلات دبابة ثم قلت فى شىء من الرهبة :

مساء الخير يافندم

لكزنى شمروخيل بكوعة المدبب فى جنبى فصرخت من شدة الضربة وكأنها قرون لثور أسبانى

عفى....ولكننى عرفت مغزى هذا الضربة عندما صرخ فى أبليس: أنت بتقول مساء الخييررررر..

تلفت حولى أبحث عن مخرج أو هروبة من هذا الموقف وتلك الزنقة المفاجأة ثم قلت : أية ؟؟..حصل ..أية

ياعم...هو أنا عملت حاجة لاسمح الل ....فمسكت الكلمة قبل أن تخرج من لسانى ..لسانى دة اللى مش هيجبها

البر معايا...وبلعت الكلمة ..أكيد عرفتم أنا كنت هقول أية

نظر لى أبليس من تحت لفوق ثم هدء قليلاً وقال: بص ياصياد...هنا ممنوع منعاً باتاً تقول الفاظ مش محبوبة

ولا مقبولة هنا..يعنى أنت لما تقولى مساء الخير ..كأنك بتشتمنى وبتلعن سلسفيل جدودى ..دة لو لى جدود أصلاً...

نظرت لشمروخيل فى حيرة ثم قلت لابليس: طب لما أحب

رجع للصراخ تانى وقال : يادى النيلة ...أية يابنى..قبل ما تتكلم أى كلمة ..فكر فيها الاول ...وشوف

تنفع هنا والا لا...لاخر مرة...لا عايزك هنا تقول أحب ولا خير ولا أى شىء من الكلام دة ...مفهوم

قلت فى رعب : مفهوم

أبليس : طب لما تكرة تسلم على حد تقولة أية ؟؟

الصياد : أقولة أية...أقولة أية؟؟؟...أيوة أيوة ..أقولة مساء الفل

صرخ أبليس فى وجهى وتلون وجهة باللوان الغضب : أية ...تانى؟؟

الصياد : سبنى أكمل ...هو جنابك وقفلى عالوحدة...هقولة...مساء الفل الدبلان...مساء الصبار اللى من الشوك

ومن المرار مليان...مساءك ياأبليس كلة قطران فى قطران

لاول مرة أرى أبتسامة أبليس ..الذى هدء وقال : أيوة كدة....البنى أدمين دول ياجدع كائنات بتتعلم بسرعة ومش

بس كدة ..دة كمان بتتفوق علينا ساعات فى المكر والخداع والشر وكل مالذ وطاب

رجع أبليس لمكتبة وقال فى حنان الاب ونعومة الحرير وصفاء الانهار: أنت أتعذبت والا لسة؟؟؟

وكأنة بيعزم على أو بيشوفنى أخذت حقى من زيادة مرتب أو مكافأة أو عيدية!!!

بلعت ريقى الذى أضحى كالصحراء القاحلة ...فتنحنح شمروخيل وبثق فى وجة أبليس فصعقت من هذا الفعل

الشنيع وأنتظرت المجهول من أبليس لى ولهذا المتخلف المدعو شمروخيل..ولكن يالا المفاجأة ..لقد نظر أبليس

قائلاً لشمروخيل: فية أية ؟؟

شمروخيل: يسمحلى شرك وخستك أنى أتكلم

__________________

[مدحت الصياد]

أومىء أبليس لشمروخيل برأسة ..فأكمل شوشو قائلاً : عظمتك ..الصياد لسة واصل النهاردة بس ..وطبعاً

نظام المكان هنا يتطلب الاول أنة

رد أبليس بسرعة: أيوة..أيوة..خلاص ...فسحة فى جهنم الاول وعرفة كل الساحات وطبقات جهنم وبعديها

يرجعلى هنا علشان ننظر فى الدوسية بتاعة ونقيس خطاياة من كتاب حياتة

تنفست الصعداء كما يقولونى <ماأننى لاأعرف معنى الصعداء اللى هتنفسها دة>...بس كلمة فسحة شوية دة

مريحتنيش خالص ..ذى أفلام السيما المضروبة

رد شمروخيل قائلاً : سيادتكم تأمرنى بشر دلوقتى

أبليس : لا..لا...خد الصياد وكمل الزيارة

ثم التفت لى قائلاً : عايز تعرف حاجة منى ياصياد قبل ما أنهى المقابلة؟؟؟

قلت فى رهبة : لو سمح شرك وخساسة طبعك...ووضاعة أصلك أنى أعرف حاجة من جنابك

ضحك أبليس بشدة ثم قال : قول ..قول...بيتك وجهنمك

الصياد : معليش لو فيها تناحة ووضاعة وسماجة منى أنى أعرف ..شكل وهيئة حضرتكم ...هى كدة والا

عامل عملية كذب وتجميل لخلقتك الشنيعة..؟؟

هنا نظر لى شمروخيل ورأيت الدموع تنساب من عيناة..دموع تغلى بشدة وكأنها تخرج من سخان للمياة .

<.ياخبر أسود أنا باين على عكيت الدنيا فى بعضها>

قال أبليس : أنا أول مرة حد يسألنى السؤال دة !!!..ماشى هجوبك..المرادى بس ..ذى ما تقول كدة

دسكاوند..أو

أوكازيون...طبعاً دة مش شكلى الحقيقى..أنت ياصياد أو غيرك لو شاف هيئتى وشكلى الحقيقى..مش هيستحمل

يعيش تانى...هيتحرق عالطول...بس أنا ممكن أوريك شكلى من ورا ستارة

وفعلاً قام أبليس ونزلت بيننا أنا وشمروخيل من ناحية وأبليس من الناحية المقابلة ستارة وكأنها حائط من

الفولاد...ولكننى رأيت أبليس من خلفها أو لنقل بدقة رأيت خيالة ..وهو يتحول الى..الى ..وحش رهييييب

غاشم ضخم من النيران فأحسست أن قلبى سيقف ..فصرخت بشدة: كفاية كدة..وحش أقوى كدة...أستودعك

جهنم ياريس وبئس المصير....ثم التفت لشمروخيل قائلاً لة ..ياعم يالا بينا قبل ما يهدم الحيطة دة ..ويهجم علينا

جرى شمروخيل وأنا خلفة وهو يقول : مانت أفعالك كلها تودى الدرك الاخير ياصياد..حرام عليك...أنت

ناوى تخلص على وأنا لسة فى عز شبابى...ياأبنى أنا عندى عيال عايز أربيهم

قلت لة ونحن نخرج مسرعين من الباب : أعذرنى ياشوشو..الواحد مبيتعلمش بالساهل..وأوعدك ...وعد خاطى

..لشطانة ..أنى مش هسأل فى أى حاجة تخص صاحبنا دة تانى أبدأ

نظر لى شمروخيل بعدما واقف وهو ينهج بشدة حتى أنتظم تنفسة ..وخرجت من منخارية صحابة سوداء مهببة فقال : طب ياللى بينا...أركب عالكتافى

وفعلاً ركبت وجلست رجل على رجل وقلت : سوق ياسواق

ضحك شمروخيل وقال : ماشى..حاضر جنابك

أمسك كويس

هيلا...هووووووووب

________________


وغداً مع جديد الاحداث

محبتي

الصياد

[مدحت الصياد]

أستراحة خمس نجوم
______________

التفت لى صاحبى وهو محلق فى ضباب سماء الجحيم بعدما خرجنا من الدرك الاسفل قائلاً:

بقولك أية ياصياد

نظرت لة فى تسائل ..فأكمل كلامة : الساعة دة ساعة غدا...وراحة لى....ماتعمل فى معروف وننزل شوية نقعد قعدة طرية كدة ونأكل لقمتين...علشان كمان يكون بيننا عيش وملح ومحدش يخون التانى فى أى وعد..موافق؟؟...ولو مش موافق نكمل الرحلة...قلت أية؟؟

نظرت لة بشدة غير مصدق لهذا الهراء <مثلما يقولون فى المسلسلات العربية التعبانة >>..فقلت لة : ماشى ياعم شوشو...بس مش كان أحسن ..قصدى أوحش تقول ..متعمل فى متلوف مش معروف....وكمان أية هيى القعدة الطرية اللى ممكن أستناها هنا!!!!....وكمان عيش وملح.!!!!...طب قول ...ظلط ولهليب والا ولعة وشياط..هاهاهاها

ضحك شمروخيل قائلاً : يعنى موافق...طب ياللى بينا على أستراحة لهليبو

وفعلاً عرج بى الى مكان غاية فى الشناعة ...عبارة عن منطقة صحراء جرداء لازرع فيها ولا ماء...ودلفنا الى مغارة تتوسط هذا المكان...وفوق المغارة توجد كتابة بالنيران المشتعلة تقول

<< أهلاً ومرحباً بكم ياأوباش .. فى أستراحة ومطعم وكافر شوب ...لهليبو >>

ضحكت بشدة وأنا أقرأ تلك الكلمات قائلاً لصديقى: حلوة...حلوة كلمة كافر شوب دة

نظر لى شمروخيل قائلاً فى ود : ممكن منتكلمش دلوقتى خالص لحد مانطفح ..

أنا : أوكى

دخلنا لقاعة غاية فى الروعة البشعة...أو بشاعة الروعة...لو كان هناك وصف لها غير هذا...ولكن هى الحقيقة لما أشاهدة بعينى...قاعة فسيحة ذات أضواء شيطانية تغلب عليها روح المجون والالام من كثرة الالوان الحمراء بكل درجاتها التى نعرفها والتى لانعرفها من قبل....الحوائط عبارة عن أمعاء لوحش أو حوت أو لمخلوق ضخم...وتسيل من تلك الامعاء دماء كالشلال...ولكن للصدق تسيل بنعومة وذوق غاية فى العبقرية....مع وجود لبعض العيون المتفرقة هنا و هناك على تلك الحوائط...عيون شديدة الحمار والقسوة ..وتتحول بين الوقت والاخر الى عيون تبكى بمرارة وندم...فنظرت لصديقى الصدوق شوشو قائلاً لة : أية دة ياعم..هى دة الكافر شوب بتاعتكم...حرام عليك وعلى اللى...

قاطعنى ساحباً يدى بقوة الى أقرب طاولة وأجلسنى فوق كرسى...وللصدق ..لا أعلم بالظبط هل الذى أجلس فوقة كرسى..أم..أم خازوق؟؟ ..لقد أحسست بلهيب شديد فى ....فى...لمؤخذة فى.....مؤخرة قفايا..<أفهموها أنتم بقى>

المهم..حضر الينا من العدم وحش شديد البشاعة ..طويل القامة نحيف الجسد يمسك فى يدة بفوطة أذا كان هذا الشىء الممسك بة يسمى فوطة هنا..شىء أشبة أو أقرب ما يكون من حتة خرقة بالية أو هى قطعة من ملابس لشخص قد حدثة لة حادثة ودهسة قطار..فالقطعة كانت تسيل منها الدماء

نظر لنا هذا الجرسون المتوحش قائلاً فى تناحة يحسد عليها : أف...أية الزباين العرر دة...نهاركم أسود ويومكم أغبر مطلعتلهوش شمس...وليلكم ضباب بينقط أسمنت وجبس..طلبات الاباعد أية ياحوش منك لة ..طلبتكم أية يا أكسلنس

أنفجرت فى التنح الرخم دة صارخاً فية : دة ليلتك أنت ويومك أنت ونهار أهلك أنت اللى باين علية مش طلعالة شمس ولا حتى قمر...يابايخ...ياكالح... ياسابح فى بحور الرخامة

..ياواخد كاس جهنم فى الغلاسة ...والتناحة...والتلامة

ولكن هذا الدهل ضحك و بكل سماجة ورذالة رد : أشكر سيدى على هذا الاطراء وهذة الكلمات العزبة ..أرجوا لك طعام بالسم الهارى أنت والمدعوك اللى جنبك

نظرت لشمروخيل ..علشان يرد على الداهية دة الواقفة أمامنا..ولكن لا مجيب فالاخ شمروخيل كان منهمك بكل جوارحة وكل عيونة التى تعدت الخمسة فى لاستة الطعام الموضوعة أمامة..فلم يلقى بالاً لمهاتراتنا أنا وهذا الجرسون قليل الادب ..غير أنة تكلم بعدما سألة الجرسون عن الطفح الذى يريدة فقال : أنا عايز أطفح طبق معكرونة وزود السم شوية...وكمان صحن كوارع بالفتة...وطاجن نخاع بالبصل والتوم

نظر لى الجرسون قائلاً : وحضرتك..تطفح أية؟؟

قلت بغباء مستحكم : نفس الطلبات

الجرسون: والحلو أية؟؟..والا يكون مشروب؟؟

رد شمروخيل بسرعة : الحلو ..الحلو...ياريت يكون مهلبية ملهلبة...وزجاجة مياة فوارة بالشياط من الدرك السابع

__________________

[مدحت الصياد]

نظر لى الجرسون سائلاً : وحضرتك؟؟
قلت بكل سذاجة: شرحة
وهنا أنحنى الجرسون وأختفى ..مثلما جاء من العدم مثلما ذهب
نظرت لصديقى شمروخيل قائلاً : طب ياصاحبى ..هو هنا الحساب بيكون أذاى؟؟
رد شمروخيل فى غباء: الحساب..؟؟..أى حساب؟؟؟
قلت لة فى هدوء : حساب الطلبات دة...والا يكونش هنا نظام سفلئة..والا كريدى كرت..والا على الفاتورة بتاعة جهنم؟؟؟

ضحك شمروخيل ..فخرجت حممة فى وجهى فوقعت على الارض صارخاً فية: ..حاسب..حاسب ياعم ..أنت بتنسى بسرعة لية؟؟..هو دة كان وعدك لية بردة؟؟؟
رفعنى شمروخيل بعدما أغلق فوهة بركان فمة قائلاً : معليش ..أصلك فكاهى جداً ياصياد وبتفكرنى بأخر واحد أستقبلتة هنا فى جهنم...الشيطان يمسية بالشر..كان جدع ذيك كدة ..بس ياخسارتة..
نظرت لة ..متسائلاً ..فأكمل : خلاص أنتهى ياحبة قلبى علية....راح فى الوبا...أتبخر فى الهاوية

بلعت ريقى الذى أضحى كالخشبة وقلت فى تردد ورعب: يعنى أية راح فى الوبا؟؟...يعنى أية أتبخر ؟؟؟
أبتسم شمروخيل وهم أن يجيب ولكن جاء الجرسون وهبد الاطباق فوق الطاولة وأختفى فنظر شمروخيل لى
قائلاً : بقولك أية ..كفاية دلوقت الكلام ونخش على الاكل واللغ والطفح
أذا جاء الطعام ...سكت الكلام
قلت لة فى غيظ مكبوت : حاضر..أتفضل أطفح ..بالسم الهارى
رد لى من خلال فمة الذى أمتلىء بالطعام : ..بونى باتى
قلت فى عقل بالى ..ياسلام ...أما شيطان مثقف ..كمان بيتكلم لغات حية وميتة !!!
نظرت للاطباق المرصوصة أمامى ..وتقدمت بيدة الممسكة بملعقة رهيبة هى اقرب لمقلاع منها لملعقة وغرزت المقلاع أقصد الملعقة فى أول طبق وقعت علية عيناى..وأذا بها تخرج الملعقة من هذا المدفن المسمى طبق بأرجل حيوان أو للدقة كارع قرد مسلوخ ..فرميت المقلاع من بشاعة المنظر وقلت لشوشو : أية القرف دة ؟؟
رد بدون أن ينظر لى وهو منهمك فى اللغ: دة الكوارع
قلت لة : كوارع؟؟..كوارع أية دة؟؟
قال بكل هدوء : كوارع الجحيم ...هى حيوانات تصطاد من بحر الظلمات
أنا : حيوانات أية دة..مائية ..ذى الاسماك عندنا على الارض؟؟؟
هو: لا..لالا..دة كائنات بتكون أنتهت صلاحياتها فى تعذيب المعذبون فلا تستطيع الحياة وتسقط فى أعماق بحر الظلمات..فعلشان ننضف البحر من الزيادة بيصطدوها وتتاكل هنا...كفاية كدة وسبنى اتسمم
أنا فى رعب: ياساتر أستر على عقلى
هو فى ضيق : مش عجباك الكوارع.. ..أطفح من الطبق التانى
أنا فى يأس : حاضر..حاضر
وفعلاً تقدمت يداى بالملعقة وحفرت فى الطبق الثانى وخرجت ب....ب....أية دة!!!مش عارف أية الشىء اللى بيسيل من الملعقة دة ..كأنة شربة لزجة جداً او هى أقرب للجيلى..فقلت لصاحبى: معليش أستحملنى شوية..أية اللى فى الطبق التانى دة ؟؟
رد شمروخيل بعدما نظر نظرة غاضبة خاطفة لطبقى ورجع ينظر للطعام الموضوع أمامة وكأنة حارس على الطعام خوفاً من سرقتة قائلاً لى بكل بساطة : يعنى مش عارف أية دة؟؟...دة طبخة شيطانية من نخاع وحوش برية جهنم..ممزوجة ببعض الزفت الحار
تركت مقلاعى أقصد ملعقتى فى أسى واضح فنظر لى شمروخيل قائلاً : طب كل من المعكرونة دة..دة هتعجبك قوى ...صدقنى
أنفرجت أساريرى<مع أنى لا أعرف معنى كلمة أساريرى ..بس أنا بسمعها كدة فى الراديو أو المذياع >>
وتقدمت بشوكة رهيبة الشكل وكأننى سأدخل بها حرب طروادة أو سأغز بها فيل وليس معكرونة..أخذت أأكل من هذا الطبق بحذر ثم فى نهم واضح وأنا منسجم بشدة..فالمعكرونة للحق كانت فى غاية الروعة واللذاذة ..وبعد أن نسفت أكثر من نصف الطبق أحسست بأشياء تلعب فى قولونى المستعرض..كأن هناك سباق رالى فى معدتى ..فقلت بكل حذر..وخوف : شمروخيل...شمروخيل ياخويا..هى المعكرونة دة معمولة من العجين ذى عندنا؟؟..والا حاجة تانية؟؟ها....شمروخيل رد على ارجوك ..أنا حاسس أنى أكلت حاجة صاحية وبتلعب فى بطنى ..لا..لا..دة مش بتلعب دة بتجرى رايحة جاية فى بطنى..أية الى أنا أكلتة دة؟؟ماتكذبشى على ..رد أرجوك
هبد شمروخيل الطبق اللى كان مسكة بأيدية الاتنين ورد وقال : بص بقى..لو عايز تكمل معايا المشوار..أنسى كل حاجة عن الارض ..وسيرة الارض..<على رأى الست أم كلثوم >..دة أولاً ..أما ثانياً ..لو عايز تعرف أنت أكلت أية أو المعكرونة دة معمولة من أية ...فمتخافشى كدة..دة شىء موجود عندكم كمان
فرحت وقلت: أية..ها..معمولة من أية.؟.من القمح مثلاً؟..والا من الشعير ؟
رد شمروخيل فى غموض : لا ياسيدى..دة معكرونة أسباجيتى..عارف يعنى أية معكرونة جهنم الاسباجيتى؟؟
قلت فى رعب : لا..محصليش الشرف قبل كدة....يعنى أية ؟؟ها...
نظر لى شمروخيل مقترباً من وجهى قائلاً : معمولة من ...من ثعابين بحر السعير اللى فى الدرك الخامس من جهنم
لا أعرف كم المدة التى وقعت فيها مغشى على ..ولا كيف أستطاع شمروخيل أن يفيقنى من الصدمة العصبية التى هجمت على بعدما فتحت عيونى ولاأعرف كيف هجمت علية..ولولا تدخل القدر لكان شمروخيل فى عداد الشياطين الاموات .

______________________


و غدا مع جديد الاحداث

محبتي

الصياد

[مدحت الصياد]

صفعنى شمروخيل بشدة حتى أترك زمارة رقبتة ...فطرت لمسافة كيلو متر أو أكثر قليلاً.من شدة الصفعة..وبعدها أوقفنى شمروخيل من سقطتى قائلاً فى غيظ: بجد ..حرام عليك اللى أنت بتعملة فى !!..بجد أنت أشنع أنسان وأجن مخلوق قبلتة وأستقبلتة هنا...أنا حاسس وأحساسى عمرة ما يخيب..أنى هروح فى الوبا من تحت رأسك ...أعقل أرجوك كدة وأركز شوية..أية يعنى لما تاكل ثعابين بحر السعير!!!
امال لو بختك وأفعالك ودوسيهك رموك هناك فى قلب بحر السعير

نظرت لة فى رعب فأكمل:..عارف ساعتها ..مش هتاكل ثعابين بحر السعير..لاياحلو دة أنت اللى هتكون الوجبة الرئيسية بتاعتها ..هاهاها..ووحوشها الرهيبة وحتى

أعشابها المرجانية الفتاكة

دارت بى الدنيا من حولى ..أو بدقة أكثر..دارت بى جهنم من حولى فسقطت مما ينتظرنى

نظر لى شمروخيل مشجعاً نفسى: ياعم ..أمسك نفسك شوية..دة أنت ياريت يكون مكانك بحر السعير ..دة الطف من بحر الظلومات بمراحل..دة فى ناس هنا بتعمل المستحيل علشان تتنقل لبحر السعير دة

قلت لهذا المجنون بالعذاب : يانهار أسود ..هو فية أشنع من بحر السعير كمان؟؟!!

ضحك شمروخيل قائلاً : أشنع ...هو أنت لسة شفت الاشنع..دة بحر السعير وبحر الظلومات والبحار السبع السفلية ..ميجوش حاجة أو كأنهم نزهة نيلية بجانب الدرك الخامس والسادس والدرك الاخير.والهاوية..

هرشت فى يافوخى بشدة قائلاً : بقولك أية..مابلاش نظام التعذيب بالقطارة دة وقولى هنا..وجوبنى بسرعة..أية هو أشنع وأقبح وأفظع حتة عندكم؟؟؟

رد بهدوء وحذر شديد وبصوت ضعيف وكأنة خايف من شىء ما : أشنع مكان هنا ...هو مكان أسمة ....حديقة الخطايا

أنا : بتقول أية !!!أذاى هى حديقة وفى نفس الوقت أشنع مكان ..تركب أذاى دة ؟؟!!

شمروخيل : أصل المشكلة مش فى الحديقة نفسها....المشكلة فى الشجرة اللى فى منتصف الحديقة

أنا : شجرة..شجرة أية دة ؟؟

شمروخيل : الشجرة دة اللى بيتعذب فيها فيشوف اللى مش هيشوفة حد لا قبلة ولا بعدة...بأختصار كدة...الشجرة دة أسمها شجرة الخطايا..يعنى بتتجمع فيها كل أنواع الخطايا...وشوف أنت بقى...كل أنواع الخطايا لما تتجمع فى أنسان هيكون العذاب أذاى بقى!!!

قلت وأنا فى كامل رعبى وفزعى وأنهيار أعصابى : لا..لالالا..هو فية حد من البشر عمل كل الخطايا.؟؟؟

شمروخيل : طبعاً طبعاً..دة فية أربعة موعودين بيها

أنا : أربعة ..مين دول؟؟!!

شمروخيل : بقولك أية ..مت.

أنا : عارف ..عارف ..ماتسباقش الاحداث وياللى بينا وأركب عالكتافى..صح

شمروخيل : صح

وفعلاً ركبت على أكتاف شمروخيل ..وللحق لقد تعودت على الطائرة الشمروخية دة

وطار صاحبى وهو يقول قولته الشهيرة: أمسك كويس ..هيلا..هوووووووب

[مدحت الصياد]

ساحة خطايا القسوة
_______________

طار بى شمروخيل مسافة غير بعيدة من مكان أنطلاقنا ..وبعد أن نزلنا تقدم أمام باب قائلاً : هيا ياصياد..هنا بقى ساحة عذاب خطاياة القسوة

قلت لة فى أستغراب ..: خطايا!!..لية مقلتش خطية القسوة مش خطايا؟؟؟!!
رد شمروخيل قائلاً : علشان ياحبيبى ...هناك أنواع من القسوة وكل نوع هى خطية بحد ذاتها
يعنى مثلاً مش ممكن نقول أن هناك أنواع من الزنا أو السرقة.....الزنا ..فاحشة وهى نوع واحد

الصياد : بس ياشمروخيل ...فية فعلاً أنواع تانية من الزنا ..يعنى اللى بينظر لامرأة بشهوة بيكون زنا بها فى قلبة...زيها زى الزنا فعلاً

شمروخيل : طب ..ماهو دة اللى بقولة ..كل أنواع الزنا دة ..بيكون تحت نفس الحكم ..حكم الزنا يعنى نوع واحد..ونفس الشىء ..السرقة ..سرقت جنية ذى اللى سرق بنك ..ذى اللى سرق تعب وأفكار الاخرين وأعملهم ..

الصياد: طب والقسوة ؟؟

شمروخيل : ياصياد القسوة دة ..موضعها كبير..علشان فية قسوة حسية ..بدنية..وقسوة نفسية ..بتكون لها تأثير على البدن كمان ..وفية قسوة الانسان لاخية الانسان وفية قسوة الانسان لنفسة ولذاتة وحتى لجسدة ..وفية قسوة الانسان على المخلوقات التانية ..ذى الحيوانت والشجر وحتى الطبيعة

أخرجت من حنجرتى صفير المدهوش قائلاً : ياسلام..أية الكلام دة...!!يعنى اللى بيقسو على الانسان ذى اللى بيقسو على الحيون مثلاً ؟...يعنى اللى بيقتل أنسان بقسوتة ذى اللى بيقتل ذبابة مثلاً بمبيد حشرى؟؟!!!

شمروخيل : لا طبعاً..دة اللى بيعذب ويقسو على الحيوان ..بيكون عذابة أشنع من اللى بيعذب ويقسو على أخية الانسان

أنفجرت فى ذلك المعتوة الواقف أمامى : أية التخلف والجهل بتاعك دة..دة أنت نيلتها خالص..أذاى الكلام الغريب دة..يعنى على كدة كل اللى موت نملة والا اللى موت ذبابة بيكون قاتل أمام اللة؟؟!!أما حكاية غاية فى الغرابة والتحريف العجيب..دة على كدة مفيش حد هينجوا من القصاص والحساب

رد شمروخيل فى هدوء شنيع : ياعم الصياد الموضوع مش كدة خالص ....تخيل معايا ..أنت مثلاً بتعذب قطة ..وتقسو عليها ...والقطة دة بالنسبة لك حيوان أبكم..يعنى مش عارف يصرخ فيك ولا عارف يفهمك أنك قاسى القلب ولا عارف يدافع عن نفسة ..هل هيكون حسابك اقل من حسابك لو بتقسو على انسان ذيك ذيوة ..ممكن يدافع عن نفسة ووجودة ضدك حتى لو بالكلام؟؟..ها..جاوب ؟

__________________