تذكرة لجهنم <قصة طويلة بقلم الصياد>

**مدحت الصياد** · 2009-12-26, 07:05 PM

أومىء أبليس لشمروخيل برأسة ..فأكمل شوشو قائلاً : عظمتك ..الصياد لسة واصل النهاردة بس ..وطبعاً

نظام المكان هنا يتطلب الاول أنة

رد أبليس بسرعة: أيوة..أيوة..خلاص ...فسحة فى جهنم الاول وعرفة كل الساحات وطبقات جهنم وبعديها

يرجعلى هنا علشان ننظر فى الدوسية بتاعة ونقيس خطاياة من كتاب حياتة

تنفست الصعداء كما يقولونى <ماأننى لاأعرف معنى الصعداء اللى هتنفسها دة>...بس كلمة فسحة شوية دة

مريحتنيش خالص ..ذى أفلام السيما المضروبة

رد شمروخيل قائلاً : سيادتكم تأمرنى بشر دلوقتى

أبليس : لا..لا...خد الصياد وكمل الزيارة

ثم التفت لى قائلاً : عايز تعرف حاجة منى ياصياد قبل ما أنهى المقابلة؟؟؟

قلت فى رهبة : لو سمح شرك وخساسة طبعك...ووضاعة أصلك أنى أعرف حاجة من جنابك

ضحك أبليس بشدة ثم قال : قول ..قول...بيتك وجهنمك

الصياد : معليش لو فيها تناحة ووضاعة وسماجة منى أنى أعرف ..شكل وهيئة حضرتكم ...هى كدة والا

عامل عملية كذب وتجميل لخلقتك الشنيعة..؟؟

هنا نظر لى شمروخيل ورأيت الدموع تنساب من عيناة..دموع تغلى بشدة وكأنها تخرج من سخان للمياة .

<.ياخبر أسود أنا باين على عكيت الدنيا فى بعضها>

قال أبليس : أنا أول مرة حد يسألنى السؤال دة !!!..ماشى هجوبك..المرادى بس ..ذى ما تقول كدة

دسكاوند..أو

أوكازيون...طبعاً دة مش شكلى الحقيقى..أنت ياصياد أو غيرك لو شاف هيئتى وشكلى الحقيقى..مش هيستحمل

يعيش تانى...هيتحرق عالطول...بس أنا ممكن أوريك شكلى من ورا ستارة

وفعلاً قام أبليس ونزلت بيننا أنا وشمروخيل من ناحية وأبليس من الناحية المقابلة ستارة وكأنها حائط من

الفولاد...ولكننى رأيت أبليس من خلفها أو لنقل بدقة رأيت خيالة ..وهو يتحول الى..الى ..وحش رهييييب

غاشم ضخم من النيران فأحسست أن قلبى سيقف ..فصرخت بشدة: كفاية كدة..وحش أقوى كدة...أستودعك

جهنم ياريس وبئس المصير....ثم التفت لشمروخيل قائلاً لة ..ياعم يالا بينا قبل ما يهدم الحيطة دة ..ويهجم علينا

جرى شمروخيل وأنا خلفة وهو يقول : مانت أفعالك كلها تودى الدرك الاخير ياصياد..حرام عليك...أنت

ناوى تخلص على وأنا لسة فى عز شبابى...ياأبنى أنا عندى عيال عايز أربيهم

قلت لة ونحن نخرج مسرعين من الباب : أعذرنى ياشوشو..الواحد مبيتعلمش بالساهل..وأوعدك ...وعد خاطى

..لشطانة ..أنى مش هسأل فى أى حاجة تخص صاحبنا دة تانى أبدأ

نظر لى شمروخيل بعدما واقف وهو ينهج بشدة حتى أنتظم تنفسة ..وخرجت من منخارية صحابة سوداء مهببة فقال : طب ياللى بينا...أركب عالكتافى

وفعلاً ركبت وجلست رجل على رجل وقلت : سوق ياسواق

ضحك شمروخيل وقال : ماشى..حاضر جنابك

أمسك كويس

هيلا...هووووووووب

________________

وغداً مع جديد الاحداث

محبتي

الصياد

**مدحت الصياد** · 2009-12-27, 05:33 PM

أستراحة خمس نجوم
______________

التفت لى صاحبى وهو محلق فى ضباب سماء الجحيم بعدما خرجنا من الدرك الاسفل قائلاً:

بقولك أية ياصياد

نظرت لة فى تسائل ..فأكمل كلامة : الساعة دة ساعة غدا...وراحة لى....ماتعمل فى معروف وننزل شوية نقعد قعدة طرية كدة ونأكل لقمتين...علشان كمان يكون بيننا عيش وملح ومحدش يخون التانى فى أى وعد..موافق؟؟...ولو مش موافق نكمل الرحلة...قلت أية؟؟

نظرت لة بشدة غير مصدق لهذا الهراء <مثلما يقولون فى المسلسلات العربية التعبانة >>..فقلت لة : ماشى ياعم شوشو...بس مش كان أحسن ..قصدى أوحش تقول ..متعمل فى متلوف مش معروف....وكمان أية هيى القعدة الطرية اللى ممكن أستناها هنا!!!!....وكمان عيش وملح.!!!!...طب قول ...ظلط ولهليب والا ولعة وشياط..هاهاهاها

ضحك شمروخيل قائلاً : يعنى موافق...طب ياللى بينا على أستراحة لهليبو

وفعلاً عرج بى الى مكان غاية فى الشناعة ...عبارة عن منطقة صحراء جرداء لازرع فيها ولا ماء...ودلفنا الى مغارة تتوسط هذا المكان...وفوق المغارة توجد كتابة بالنيران المشتعلة تقول

<< أهلاً ومرحباً بكم ياأوباش .. فى أستراحة ومطعم وكافر شوب ...لهليبو >>

ضحكت بشدة وأنا أقرأ تلك الكلمات قائلاً لصديقى: حلوة...حلوة كلمة كافر شوب دة

نظر لى شمروخيل قائلاً فى ود : ممكن منتكلمش دلوقتى خالص لحد مانطفح ..

أنا : أوكى

دخلنا لقاعة غاية فى الروعة البشعة...أو بشاعة الروعة...لو كان هناك وصف لها غير هذا...ولكن هى الحقيقة لما أشاهدة بعينى...قاعة فسيحة ذات أضواء شيطانية تغلب عليها روح المجون والالام من كثرة الالوان الحمراء بكل درجاتها التى نعرفها والتى لانعرفها من قبل....الحوائط عبارة عن أمعاء لوحش أو حوت أو لمخلوق ضخم...وتسيل من تلك الامعاء دماء كالشلال...ولكن للصدق تسيل بنعومة وذوق غاية فى العبقرية....مع وجود لبعض العيون المتفرقة هنا و هناك على تلك الحوائط...عيون شديدة الحمار والقسوة ..وتتحول بين الوقت والاخر الى عيون تبكى بمرارة وندم...فنظرت لصديقى الصدوق شوشو قائلاً لة : أية دة ياعم..هى دة الكافر شوب بتاعتكم...حرام عليك وعلى اللى...

قاطعنى ساحباً يدى بقوة الى أقرب طاولة وأجلسنى فوق كرسى...وللصدق ..لا أعلم بالظبط هل الذى أجلس فوقة كرسى..أم..أم خازوق؟؟ ..لقد أحسست بلهيب شديد فى ....فى...لمؤخذة فى.....مؤخرة قفايا..<أفهموها أنتم بقى>

المهم..حضر الينا من العدم وحش شديد البشاعة ..طويل القامة نحيف الجسد يمسك فى يدة بفوطة أذا كان هذا الشىء الممسك بة يسمى فوطة هنا..شىء أشبة أو أقرب ما يكون من حتة خرقة بالية أو هى قطعة من ملابس لشخص قد حدثة لة حادثة ودهسة قطار..فالقطعة كانت تسيل منها الدماء

نظر لنا هذا الجرسون المتوحش قائلاً فى تناحة يحسد عليها : أف...أية الزباين العرر دة...نهاركم أسود ويومكم أغبر مطلعتلهوش شمس...وليلكم ضباب بينقط أسمنت وجبس..طلبات الاباعد أية ياحوش منك لة ..طلبتكم أية يا أكسلنس

أنفجرت فى التنح الرخم دة صارخاً فية : دة ليلتك أنت ويومك أنت ونهار أهلك أنت اللى باين علية مش طلعالة شمس ولا حتى قمر...يابايخ...ياكالح... ياسابح فى بحور الرخامة

..ياواخد كاس جهنم فى الغلاسة ...والتناحة...والتلامة

ولكن هذا الدهل ضحك و بكل سماجة ورذالة رد : أشكر سيدى على هذا الاطراء وهذة الكلمات العزبة ..أرجوا لك طعام بالسم الهارى أنت والمدعوك اللى جنبك

نظرت لشمروخيل ..علشان يرد على الداهية دة الواقفة أمامنا..ولكن لا مجيب فالاخ شمروخيل كان منهمك بكل جوارحة وكل عيونة التى تعدت الخمسة فى لاستة الطعام الموضوعة أمامة..فلم يلقى بالاً لمهاتراتنا أنا وهذا الجرسون قليل الادب ..غير أنة تكلم بعدما سألة الجرسون عن الطفح الذى يريدة فقال : أنا عايز أطفح طبق معكرونة وزود السم شوية...وكمان صحن كوارع بالفتة...وطاجن نخاع بالبصل والتوم

نظر لى الجرسون قائلاً : وحضرتك..تطفح أية؟؟

قلت بغباء مستحكم : نفس الطلبات

الجرسون: والحلو أية؟؟..والا يكون مشروب؟؟

رد شمروخيل بسرعة : الحلو ..الحلو...ياريت يكون مهلبية ملهلبة...وزجاجة مياة فوارة بالشياط من الدرك السابع

__________________

**مدحت الصياد** · 2009-12-27, 05:36 PM

نظر لى الجرسون سائلاً : وحضرتك؟؟
قلت بكل سذاجة: شرحة
وهنا أنحنى الجرسون وأختفى ..مثلما جاء من العدم مثلما ذهب
نظرت لصديقى شمروخيل قائلاً : طب ياصاحبى ..هو هنا الحساب بيكون أذاى؟؟
رد شمروخيل فى غباء: الحساب..؟؟..أى حساب؟؟؟
قلت لة فى هدوء : حساب الطلبات دة...والا يكونش هنا نظام سفلئة..والا كريدى كرت..والا على الفاتورة بتاعة جهنم؟؟؟

ضحك شمروخيل ..فخرجت حممة فى وجهى فوقعت على الارض صارخاً فية: ..حاسب..حاسب ياعم ..أنت بتنسى بسرعة لية؟؟..هو دة كان وعدك لية بردة؟؟؟
رفعنى شمروخيل بعدما أغلق فوهة بركان فمة قائلاً : معليش ..أصلك فكاهى جداً ياصياد وبتفكرنى بأخر واحد أستقبلتة هنا فى جهنم...الشيطان يمسية بالشر..كان جدع ذيك كدة ..بس ياخسارتة..
نظرت لة ..متسائلاً ..فأكمل : خلاص أنتهى ياحبة قلبى علية....راح فى الوبا...أتبخر فى الهاوية

بلعت ريقى الذى أضحى كالخشبة وقلت فى تردد ورعب: يعنى أية راح فى الوبا؟؟...يعنى أية أتبخر ؟؟؟
أبتسم شمروخيل وهم أن يجيب ولكن جاء الجرسون وهبد الاطباق فوق الطاولة وأختفى فنظر شمروخيل لى
قائلاً : بقولك أية ..كفاية دلوقت الكلام ونخش على الاكل واللغ والطفح
أذا جاء الطعام ...سكت الكلام
قلت لة فى غيظ مكبوت : حاضر..أتفضل أطفح ..بالسم الهارى
رد لى من خلال فمة الذى أمتلىء بالطعام : ..بونى باتى
قلت فى عقل بالى ..ياسلام ...أما شيطان مثقف ..كمان بيتكلم لغات حية وميتة !!!
نظرت للاطباق المرصوصة أمامى ..وتقدمت بيدة الممسكة بملعقة رهيبة هى اقرب لمقلاع منها لملعقة وغرزت المقلاع أقصد الملعقة فى أول طبق وقعت علية عيناى..وأذا بها تخرج الملعقة من هذا المدفن المسمى طبق بأرجل حيوان أو للدقة كارع قرد مسلوخ ..فرميت المقلاع من بشاعة المنظر وقلت لشوشو : أية القرف دة ؟؟
رد بدون أن ينظر لى وهو منهمك فى اللغ: دة الكوارع
قلت لة : كوارع؟؟..كوارع أية دة؟؟
قال بكل هدوء : كوارع الجحيم ...هى حيوانات تصطاد من بحر الظلمات
أنا : حيوانات أية دة..مائية ..ذى الاسماك عندنا على الارض؟؟؟
هو: لا..لالا..دة كائنات بتكون أنتهت صلاحياتها فى تعذيب المعذبون فلا تستطيع الحياة وتسقط فى أعماق بحر الظلمات..فعلشان ننضف البحر من الزيادة بيصطدوها وتتاكل هنا...كفاية كدة وسبنى اتسمم
أنا فى رعب: ياساتر أستر على عقلى
هو فى ضيق : مش عجباك الكوارع.. ..أطفح من الطبق التانى
أنا فى يأس : حاضر..حاضر
وفعلاً تقدمت يداى بالملعقة وحفرت فى الطبق الثانى وخرجت ب....ب....أية دة!!!مش عارف أية الشىء اللى بيسيل من الملعقة دة ..كأنة شربة لزجة جداً او هى أقرب للجيلى..فقلت لصاحبى: معليش أستحملنى شوية..أية اللى فى الطبق التانى دة ؟؟
رد شمروخيل بعدما نظر نظرة غاضبة خاطفة لطبقى ورجع ينظر للطعام الموضوع أمامة وكأنة حارس على الطعام خوفاً من سرقتة قائلاً لى بكل بساطة : يعنى مش عارف أية دة؟؟...دة طبخة شيطانية من نخاع وحوش برية جهنم..ممزوجة ببعض الزفت الحار
تركت مقلاعى أقصد ملعقتى فى أسى واضح فنظر لى شمروخيل قائلاً : طب كل من المعكرونة دة..دة هتعجبك قوى ...صدقنى
أنفرجت أساريرى<مع أنى لا أعرف معنى كلمة أساريرى ..بس أنا بسمعها كدة فى الراديو أو المذياع >>
وتقدمت بشوكة رهيبة الشكل وكأننى سأدخل بها حرب طروادة أو سأغز بها فيل وليس معكرونة..أخذت أأكل من هذا الطبق بحذر ثم فى نهم واضح وأنا منسجم بشدة..فالمعكرونة للحق كانت فى غاية الروعة واللذاذة ..وبعد أن نسفت أكثر من نصف الطبق أحسست بأشياء تلعب فى قولونى المستعرض..كأن هناك سباق رالى فى معدتى ..فقلت بكل حذر..وخوف : شمروخيل...شمروخيل ياخويا..هى المعكرونة دة معمولة من العجين ذى عندنا؟؟..والا حاجة تانية؟؟ها....شمروخيل رد على ارجوك ..أنا حاسس أنى أكلت حاجة صاحية وبتلعب فى بطنى ..لا..لا..دة مش بتلعب دة بتجرى رايحة جاية فى بطنى..أية الى أنا أكلتة دة؟؟ماتكذبشى على ..رد أرجوك
هبد شمروخيل الطبق اللى كان مسكة بأيدية الاتنين ورد وقال : بص بقى..لو عايز تكمل معايا المشوار..أنسى كل حاجة عن الارض ..وسيرة الارض..<على رأى الست أم كلثوم >..دة أولاً ..أما ثانياً ..لو عايز تعرف أنت أكلت أية أو المعكرونة دة معمولة من أية ...فمتخافشى كدة..دة شىء موجود عندكم كمان
فرحت وقلت: أية..ها..معمولة من أية.؟.من القمح مثلاً؟..والا من الشعير ؟
رد شمروخيل فى غموض : لا ياسيدى..دة معكرونة أسباجيتى..عارف يعنى أية معكرونة جهنم الاسباجيتى؟؟
قلت فى رعب : لا..محصليش الشرف قبل كدة....يعنى أية ؟؟ها...
نظر لى شمروخيل مقترباً من وجهى قائلاً : معمولة من ...من ثعابين بحر السعير اللى فى الدرك الخامس من جهنم
لا أعرف كم المدة التى وقعت فيها مغشى على ..ولا كيف أستطاع شمروخيل أن يفيقنى من الصدمة العصبية التى هجمت على بعدما فتحت عيونى ولاأعرف كيف هجمت علية..ولولا تدخل القدر لكان شمروخيل فى عداد الشياطين الاموات .

______________________

و غدا مع جديد الاحداث

محبتي

الصياد

**مدحت الصياد** · 2009-12-28, 04:50 PM

صفعنى شمروخيل بشدة حتى أترك زمارة رقبتة ...فطرت لمسافة كيلو متر أو أكثر قليلاً.من شدة الصفعة..وبعدها أوقفنى شمروخيل من سقطتى قائلاً فى غيظ: بجد ..حرام عليك اللى أنت بتعملة فى !!..بجد أنت أشنع أنسان وأجن مخلوق قبلتة وأستقبلتة هنا...أنا حاسس وأحساسى عمرة ما يخيب..أنى هروح فى الوبا من تحت رأسك ...أعقل أرجوك كدة وأركز شوية..أية يعنى لما تاكل ثعابين بحر السعير!!!
امال لو بختك وأفعالك ودوسيهك رموك هناك فى قلب بحر السعير

نظرت لة فى رعب فأكمل:..عارف ساعتها ..مش هتاكل ثعابين بحر السعير..لاياحلو دة أنت اللى هتكون الوجبة الرئيسية بتاعتها ..هاهاها..ووحوشها الرهيبة وحتى

أعشابها المرجانية الفتاكة

دارت بى الدنيا من حولى ..أو بدقة أكثر..دارت بى جهنم من حولى فسقطت مما ينتظرنى

نظر لى شمروخيل مشجعاً نفسى: ياعم ..أمسك نفسك شوية..دة أنت ياريت يكون مكانك بحر السعير ..دة الطف من بحر الظلومات بمراحل..دة فى ناس هنا بتعمل المستحيل علشان تتنقل لبحر السعير دة

قلت لهذا المجنون بالعذاب : يانهار أسود ..هو فية أشنع من بحر السعير كمان؟؟!!

ضحك شمروخيل قائلاً : أشنع ...هو أنت لسة شفت الاشنع..دة بحر السعير وبحر الظلومات والبحار السبع السفلية ..ميجوش حاجة أو كأنهم نزهة نيلية بجانب الدرك الخامس والسادس والدرك الاخير.والهاوية..

هرشت فى يافوخى بشدة قائلاً : بقولك أية..مابلاش نظام التعذيب بالقطارة دة وقولى هنا..وجوبنى بسرعة..أية هو أشنع وأقبح وأفظع حتة عندكم؟؟؟

رد بهدوء وحذر شديد وبصوت ضعيف وكأنة خايف من شىء ما : أشنع مكان هنا ...هو مكان أسمة ....حديقة الخطايا

أنا : بتقول أية !!!أذاى هى حديقة وفى نفس الوقت أشنع مكان ..تركب أذاى دة ؟؟!!

شمروخيل : أصل المشكلة مش فى الحديقة نفسها....المشكلة فى الشجرة اللى فى منتصف الحديقة

أنا : شجرة..شجرة أية دة ؟؟

شمروخيل : الشجرة دة اللى بيتعذب فيها فيشوف اللى مش هيشوفة حد لا قبلة ولا بعدة...بأختصار كدة...الشجرة دة أسمها شجرة الخطايا..يعنى بتتجمع فيها كل أنواع الخطايا...وشوف أنت بقى...كل أنواع الخطايا لما تتجمع فى أنسان هيكون العذاب أذاى بقى!!!

قلت وأنا فى كامل رعبى وفزعى وأنهيار أعصابى : لا..لالالا..هو فية حد من البشر عمل كل الخطايا.؟؟؟

شمروخيل : طبعاً طبعاً..دة فية أربعة موعودين بيها

أنا : أربعة ..مين دول؟؟!!

شمروخيل : بقولك أية ..مت.

أنا : عارف ..عارف ..ماتسباقش الاحداث وياللى بينا وأركب عالكتافى..صح

شمروخيل : صح

وفعلاً ركبت على أكتاف شمروخيل ..وللحق لقد تعودت على الطائرة الشمروخية دة

وطار صاحبى وهو يقول قولته الشهيرة: أمسك كويس ..هيلا..هوووووووب

**مدحت الصياد** · 2009-12-28, 04:52 PM

ساحة خطايا القسوة
_______________

طار بى شمروخيل مسافة غير بعيدة من مكان أنطلاقنا ..وبعد أن نزلنا تقدم أمام باب قائلاً : هيا ياصياد..هنا بقى ساحة عذاب خطاياة القسوة

قلت لة فى أستغراب ..: خطايا!!..لية مقلتش خطية القسوة مش خطايا؟؟؟!!
رد شمروخيل قائلاً : علشان ياحبيبى ...هناك أنواع من القسوة وكل نوع هى خطية بحد ذاتها
يعنى مثلاً مش ممكن نقول أن هناك أنواع من الزنا أو السرقة.....الزنا ..فاحشة وهى نوع واحد

الصياد : بس ياشمروخيل ...فية فعلاً أنواع تانية من الزنا ..يعنى اللى بينظر لامرأة بشهوة بيكون زنا بها فى قلبة...زيها زى الزنا فعلاً

شمروخيل : طب ..ماهو دة اللى بقولة ..كل أنواع الزنا دة ..بيكون تحت نفس الحكم ..حكم الزنا يعنى نوع واحد..ونفس الشىء ..السرقة ..سرقت جنية ذى اللى سرق بنك ..ذى اللى سرق تعب وأفكار الاخرين وأعملهم ..

الصياد: طب والقسوة ؟؟

شمروخيل : ياصياد القسوة دة ..موضعها كبير..علشان فية قسوة حسية ..بدنية..وقسوة نفسية ..بتكون لها تأثير على البدن كمان ..وفية قسوة الانسان لاخية الانسان وفية قسوة الانسان لنفسة ولذاتة وحتى لجسدة ..وفية قسوة الانسان على المخلوقات التانية ..ذى الحيوانت والشجر وحتى الطبيعة

أخرجت من حنجرتى صفير المدهوش قائلاً : ياسلام..أية الكلام دة...!!يعنى اللى بيقسو على الانسان ذى اللى بيقسو على الحيون مثلاً ؟...يعنى اللى بيقتل أنسان بقسوتة ذى اللى بيقتل ذبابة مثلاً بمبيد حشرى؟؟!!!

شمروخيل : لا طبعاً..دة اللى بيعذب ويقسو على الحيوان ..بيكون عذابة أشنع من اللى بيعذب ويقسو على أخية الانسان

أنفجرت فى ذلك المعتوة الواقف أمامى : أية التخلف والجهل بتاعك دة..دة أنت نيلتها خالص..أذاى الكلام الغريب دة..يعنى على كدة كل اللى موت نملة والا اللى موت ذبابة بيكون قاتل أمام اللة؟؟!!أما حكاية غاية فى الغرابة والتحريف العجيب..دة على كدة مفيش حد هينجوا من القصاص والحساب

رد شمروخيل فى هدوء شنيع : ياعم الصياد الموضوع مش كدة خالص ....تخيل معايا ..أنت مثلاً بتعذب قطة ..وتقسو عليها ...والقطة دة بالنسبة لك حيوان أبكم..يعنى مش عارف يصرخ فيك ولا عارف يفهمك أنك قاسى القلب ولا عارف يدافع عن نفسة ..هل هيكون حسابك اقل من حسابك لو بتقسو على انسان ذيك ذيوة ..ممكن يدافع عن نفسة ووجودة ضدك حتى لو بالكلام؟؟..ها..جاوب ؟

__________________

**مدحت الصياد** · 2009-12-28, 04:55 PM

قلت فى بلاهة واضحة : لا..طبعاً...دة أنا أكون ساعتها قاسى جداً لو بعذب كائن ما كان وهو مش فى استطاعته التعبير عن قسوتى ولا التعبير عن عذابة..!! أما حكاية غريبة فعلاً ....تصدق ..أنى أول مرة أفتح

عينى على الموضوع ده

رد شمروخيل قائلاً : طب فتح عينيك كويس للى هتشوفه هنا

وفعلاً دخلنا للساحة الثالثة من ساحات الخطايا الصغرى ..ساحة عذاب القسوة
×××××××××××××××××
دخلت ويارتنى ما دخلت...شاهدت ويارتنى وما شاهدت....شاهدت حيوانات بأنواعها ..من كلا ب لقطط لافيال لحتى قرود...ولكن الغريب والمدهش أن كل هؤلاء الحيوانات لها وجة الانسان ...ليس رأس أنسان. فقط وجة الانسان وباقى أجزاء أجسامهم هى لتلك الحيوانات وكلهم يهرولون من شدة الوجع الخفى الذى يتجرعونة

نظرت لشمروخيل قائلاً لة : مين دول ؟؟؟

رد شوشو قائلاً : دول المعذبون ..الخطاة ...اللى كانوا بيعذبو الحيوانات على الارض..كل واحد فيهم بيتحول لنفس جنس وطبيعة الحيوان اللى عذبة ...مش بقولك خطايا القسوة...يعنى مثلاً ...الاخ المقلوب فيل دة ..كان عملة على الارض أصطياد الافيال وقتلهم من أجل أنيابها العاج ... والاخ اللى بيجرى وهو بيهوهو دة كان فى حياتة بيعذب أى ك لب يقع تحت رحمتة...

أشرت بدهشة لقط تخين جدأ قائلاً لشمروخيل : أية دة ..القط التخين دة يشبة جارى اللى مات السنة اللى فاتت؟؟

أخرج شمروخيل دفتر هائل الحجم من جيب سحرى قائلاً : طب أسمة أية ..أو كان أسمة أية جارك دة ؟؟

ضحكت قائلاً : لية..هو أنت هتعملة فيش والا هتشوف مخالفاتة على الارض ؟؟؟

هز شمروخيل رأسة قائلاً : لا ياحلو هنشوف أن كان هو جارك والا يخلق من المعذب أربعين

قلت بسرعة: طب شفهولى أصلى أنا كنت مفروس منة ....أكمنة كان راجل تنح وبارد ..كان أسمة أية ياواد ياصياد كان أسمة أية ياواد ياصياد..أة كان أسمة عم أحمد

نظر شمروخيل فى الدفتر باحثأ عن عم أحمد : تعالى ياأحمد... روح ياأحمد... تعالى ياأحمد.. روح ياحمد...هو كان أسمة أحمد محمد الدهل؟؟؟

قفزت قائلاً : أيوة..هو

نظر لى شمروخيل : هو القط دة..هو بعينة أحمد الدهل

رجعت أشاهد عم أحمد فى أنسجام شديد وكأنى أنظر لبرترية أو لوحة الموناليزة قائلاً : ياسلام على الدنيا!!!..جة اليوم انى أشوفك فى الاخرة ياعم أحمد ياحلو وكمان أية مقلوب قط تخين و بتنونو من العذاب...بس قوللى ياشوشو ياخويا ؟؟!!

شمروخيل : أقولك أية ؟؟

قلت لة : هو بيتعذبوا هنا أذاى أنا مش شايف حاجة بتعذبهم..ولا وحوش بتجرى وراهم...ولا هم مربوطين ولا حاجة خالص !!؟؟

رد شمروخيل قائلاً : العذاب فى الساحة دة عذاب بدنى بتحولهم الى حيوانات ...ودة بيخاللى الانسان يحس بالعذاب والمهانة دة من الناحية النفسية والروحية.....أما من الناحية الجسدية فتحولة دة بيكون بتمن على أجسمهم علشان مش متعودين على أجسمهم اللى من الخارج تكون كدة...مش بتاعتهم ولا حتى تنتمى للجنس البشرى فدة بيخاللى أعضائهم الداخلية الانسانية تتهاوى وتتدمر وأفرازات الغدد المختلفة لكل أنحاء أجسامهم أما تتعطل أو تنشط وبطريقة رهيبة فيشعرو أيضاً بالعذاب الغير منظور ودة عذاب أقوى من عذاب الساحتين اللى قبل ساحتنا هنا
أنا : يعنى أعضائهم اللى جوة أنسانية ذى ماهى؟؟

**مدحت الصياد** · 2009-12-28, 04:57 PM

شمروخيل : طبعاً ...طبعاً ....أمال هتكون الحكمة أية والعذاب هيجى أذاى لو كانوا أتحولوا برة وجوة لحيوانات...كان لازم ولابد أنهم يكونوا الاتنين مع بعض أعضاء داخلية وروح لانسان وجسد خارجى وطباع حيوان علشان العذاب يكون عادل والتمن يندفع لاخر فلس..فاهم يافسل؟؟

نظرت لة بشدة وأنا هايم فى متاهة عقلية داعياً للة أنة يحافظ على البقية الباقية من ثبات عقلى ..ثم قلت لة بهدوء : ياااة..أية دة ...دة عذاب ماحدش يتخيلة أبداً...ولا كان عمرى أفكر فى شىء ذى دة بتاتاً البتة

رجع شمروخيل للرعب عندما قال: أمال لما تشوف الباقى ..هتقول أية ياصياد..سيب الاندهاش دلوقتى ..كل اللى أنت شفتة مايجيش حاجة أو كأنة عرض أسماء أبطال الفيلم ..يعنى لسة الفيلم مابدأشى...ولسة الاثارة والاندهاش ماجاش وقتها...دة احنا لسة بنقول ياهادى...تحب تعرف حاجة هنا قبل ما نطير لحتة تانية وساحة جديدة؟؟
أنا : أيوة.....طب اللى كان بيقسو على البشر اللى ذيوة هم فين؟؟؟

هو : ..أهم هناك أهم
نظرت للمكان الذى أشار الية فوجدت أناس مربوطين فى أشجار غاية فى الشناعة ...أشجار لها أيادى كثيرة وكل شجرة تحتضن أنسان وكأنهم يرقصون رقصة شاعرية على الحان رومانسية...وأمام كل أنسان يقف شيطان صغير بوجة أنسان ويمسك فى يدة بسوط يعنى <كرباج ورا ياسطة>...وطبعاً الكرباج نازل يزغرت على ظهر المعذب المعبوط من الشجرة ...لكن الشىء المريع بجد أن الكرباج وهو نازل بقوة مش بيمزق ظهر الانسان ...لا..دة...دة بيقسمة نصفين ...أيوة بيقسم المعذب نصفين وكل نص فى أيد من أيادى الشجرة ...اللى بعد كدة بتجمع نصفى الانسان دة فيرجع من تانى صحيح يعنى حتة وحدة...الاشنع أنة حتى وهو مقسوم بيكون صاحى ...يعنى حاسس بأنة بقى أتنين ويرجع الشيطان الصغير دة اللى هو جلادة للضرب بالسوط وهلم جرا

قلت لشمروخيل وأنا بين العقل والجنون مما اشاهدة : أية دة ياشمروخيل...دة مش عذاب ...دة أشنع من العذاب نفسة...دة حاجة ملهاش أسم...دة أية القسوة دة!!!!

رد شمروخيل فى هدوءة المعتاد وكأنة ميكانكى أمام عربة خربانة أو جزار أمام الدبيحة : طبعاً ...مش هنا عذاب خطايا القسوة والشر الحيوانى اللى موجود بداخل الانسان الخاطى دة..أنت عارف ضربة السوط دة قوتها ممكن تعمل أية؟؟؟.

قلت فى أشمئزاز : لا طبعاً هو أنا خبير جلد

رد فى فرح وكأنة بيبشرنى بالخلاص: دة الضربة الوحدة منها لو نزلت على جبل تفلقة أتنين

حاولت بكل أستطاعتى وقوة مخيلتى أنى أتخيل ولو بصيص المشهد فصعقت بشدة وأحسست أننى فى تلك اللحظة فى أحتياج لدخولى بيت الراحة

أفاقنى شمروخيل قائلاً : حاجة تانية عايز تعرفها قبل ما نمضى الى حال سبيلنا

قلت لصديقى الرهيب شمروخيل محاولاً أن أغير موضوع الكرباج والانقسام دة: أيوة.. عايز حاجة..لو تكرمت وتعطفت على العبد المسكين اللى هو أنا ... تفتح دفترك الشنيع المريع دة وتقوللى أنا بأذن اللة أقصد بأذن أبليس مكانى هيكون فين؟؟؟

رد شمروخيل قائلاً وهو يشير بأصبعة علامة الرفض: لا طبعاً مستحيل

قلت لة فى ضعف تمثيلى زائف : علشان خاطرى ..وخاطر العيش والملح ..أقصد وخاطر كوارع القرد وأسباكيتى التعابين اللى طفحناهم مع بعض تعرفنى مكانى هيكون فين ياعمى وتاج رأسى من فوق

رجع لنفس الرد : لا..والف لا

أنفجرت كالبركان فى هذا الشمروخيل الباذنجان صارخاً فية بكل ما أعطتنى عوامل الطبيعة الجهنمية من غيظ وأحباط :هو أنت أية... مش حاسس بالمصيبة اللى أنا واقع فيها..ولا عامل أعتبار للصداقة ولا الكوارع ولا حتى للصحبة بتاعتنا أبداً

رد فى هدوء يغيظ : أولاً ..المصيبة اللى أنت بتقول عليها لسة مجتلاكش ولا شفتها ..ثانياً ..أنت اللى حطيت نفسك بتهورك وشربك للسم وأنتحارك..يعنى بيدى لا بيد عزرائيل...ثالثاً ودة الاهم أنى مش فى أستطاعتى أنى أعرفك مكانك

أنا : لية..هو فية قانون يمنعك بكدة ؟؟

هو : لا طبعاً ...وحتى لو فية أنا معفى من القانون دة

أنا فى أستغراب : طب لية مش عايز تعرفنى مكانى فين ؟؟؟!!

وهنا..وهنا فقط أنفجر فى شمروخيل أنفجار الف قنبلة نواوية صارخاً : علشان أنت لسة متحاسبتش ولا قاس أبليس خطاياك ولا فتح كتابك ...فهمت ..يعنى لسة أسمك مانكتبش عندى

هدء بالى وأرتاحت أعصابى وقلت لة : يعنى ممكن يعنى..أنى أطلع براءة..أو حتى بملحق ؟؟؟؟

أبتسم شمروخيل قائلاً : ممكن..جايز...يجوز...بس الكلام دة ماحصلش أبداً هنا ... يعنى مستحيل حد يجى هنا غلط...وغير كدة تعالى وقوللى...هو أنتحارك دة كان نكتة والا فاكر أنك هتخش السما وهناك هيعملولك غسيل معدة...وهيقولولك حمدللة عالسلام ....وتقوم لينا بالعافية...وشد حيالك كلنا لها...ياسلام على عقلك

قلت لشمروخيل فى غيظ : خلاص ياعم بقى...أنت هتتسلى على وتعملنى حكوتك...خلاص عرفنا أننا جينا هنا صح مش غلط

شمروخيل : طب كفاية كدة وياللى بينا على الساحة اللى بعدها ..أركب على أكتافى و...

قلت فى نرفزة مقلداً هذا الدهل: وأمسك كويس

شمروخيل : ياساتر على لسانك ...<وطار فعلاً قائلاً قولتة الشهيرة>:هيلا هووووووب
_______________________

وغداً مع جديد الاحداث

محبتي

الصياد