تذكرة لجهنم <قصة طويلة بقلم الصياد>

[مدحت الصياد]

ساحة خطايا القسوة
_______________

طار بى شمروخيل مسافة غير بعيدة من مكان أنطلاقنا ..وبعد أن نزلنا تقدم أمام باب قائلاً : هيا ياصياد..هنا بقى ساحة عذاب خطاياة القسوة

قلت لة فى أستغراب ..: خطايا!!..لية مقلتش خطية القسوة مش خطايا؟؟؟!!
رد شمروخيل قائلاً : علشان ياحبيبى ...هناك أنواع من القسوة وكل نوع هى خطية بحد ذاتها
يعنى مثلاً مش ممكن نقول أن هناك أنواع من الزنا أو السرقة.....الزنا ..فاحشة وهى نوع واحد

الصياد : بس ياشمروخيل ...فية فعلاً أنواع تانية من الزنا ..يعنى اللى بينظر لامرأة بشهوة بيكون زنا بها فى قلبة...زيها زى الزنا فعلاً

شمروخيل : طب ..ماهو دة اللى بقولة ..كل أنواع الزنا دة ..بيكون تحت نفس الحكم ..حكم الزنا يعنى نوع واحد..ونفس الشىء ..السرقة ..سرقت جنية ذى اللى سرق بنك ..ذى اللى سرق تعب وأفكار الاخرين وأعملهم ..

الصياد: طب والقسوة ؟؟

شمروخيل : ياصياد القسوة دة ..موضعها كبير..علشان فية قسوة حسية ..بدنية..وقسوة نفسية ..بتكون لها تأثير على البدن كمان ..وفية قسوة الانسان لاخية الانسان وفية قسوة الانسان لنفسة ولذاتة وحتى لجسدة ..وفية قسوة الانسان على المخلوقات التانية ..ذى الحيوانت والشجر وحتى الطبيعة

أخرجت من حنجرتى صفير المدهوش قائلاً : ياسلام..أية الكلام دة...!!يعنى اللى بيقسو على الانسان ذى اللى بيقسو على الحيون مثلاً ؟...يعنى اللى بيقتل أنسان بقسوتة ذى اللى بيقتل ذبابة مثلاً بمبيد حشرى؟؟!!!

شمروخيل : لا طبعاً..دة اللى بيعذب ويقسو على الحيوان ..بيكون عذابة أشنع من اللى بيعذب ويقسو على أخية الانسان

أنفجرت فى ذلك المعتوة الواقف أمامى : أية التخلف والجهل بتاعك دة..دة أنت نيلتها خالص..أذاى الكلام الغريب دة..يعنى على كدة كل اللى موت نملة والا اللى موت ذبابة بيكون قاتل أمام اللة؟؟!!أما حكاية غاية فى الغرابة والتحريف العجيب..دة على كدة مفيش حد هينجوا من القصاص والحساب

رد شمروخيل فى هدوء شنيع : ياعم الصياد الموضوع مش كدة خالص ....تخيل معايا ..أنت مثلاً بتعذب قطة ..وتقسو عليها ...والقطة دة بالنسبة لك حيوان أبكم..يعنى مش عارف يصرخ فيك ولا عارف يفهمك أنك قاسى القلب ولا عارف يدافع عن نفسة ..هل هيكون حسابك اقل من حسابك لو بتقسو على انسان ذيك ذيوة ..ممكن يدافع عن نفسة ووجودة ضدك حتى لو بالكلام؟؟..ها..جاوب ؟

__________________

[مدحت الصياد]

قلت فى بلاهة واضحة : لا..طبعاً...دة أنا أكون ساعتها قاسى جداً لو بعذب كائن ما كان وهو مش فى استطاعته التعبير عن قسوتى ولا التعبير عن عذابة..!! أما حكاية غريبة فعلاً ....تصدق ..أنى أول مرة أفتح

عينى على الموضوع ده

رد شمروخيل قائلاً : طب فتح عينيك كويس للى هتشوفه هنا

وفعلاً دخلنا للساحة الثالثة من ساحات الخطايا الصغرى ..ساحة عذاب القسوة
×××××××××××××××××
دخلت ويارتنى ما دخلت...شاهدت ويارتنى وما شاهدت....شاهدت حيوانات بأنواعها ..من كلا ب لقطط لافيال لحتى قرود...ولكن الغريب والمدهش أن كل هؤلاء الحيوانات لها وجة الانسان ...ليس رأس أنسان. فقط وجة الانسان وباقى أجزاء أجسامهم هى لتلك الحيوانات وكلهم يهرولون من شدة الوجع الخفى الذى يتجرعونة

نظرت لشمروخيل قائلاً لة : مين دول ؟؟؟

رد شوشو قائلاً : دول المعذبون ..الخطاة ...اللى كانوا بيعذبو الحيوانات على الارض..كل واحد فيهم بيتحول لنفس جنس وطبيعة الحيوان اللى عذبة ...مش بقولك خطايا القسوة...يعنى مثلاً ...الاخ المقلوب فيل دة ..كان عملة على الارض أصطياد الافيال وقتلهم من أجل أنيابها العاج ... والاخ اللى بيجرى وهو بيهوهو دة كان فى حياتة بيعذب أى ك لب يقع تحت رحمتة...

أشرت بدهشة لقط تخين جدأ قائلاً لشمروخيل : أية دة ..القط التخين دة يشبة جارى اللى مات السنة اللى فاتت؟؟

أخرج شمروخيل دفتر هائل الحجم من جيب سحرى قائلاً : طب أسمة أية ..أو كان أسمة أية جارك دة ؟؟

ضحكت قائلاً : لية..هو أنت هتعملة فيش والا هتشوف مخالفاتة على الارض ؟؟؟

هز شمروخيل رأسة قائلاً : لا ياحلو هنشوف أن كان هو جارك والا يخلق من المعذب أربعين

قلت بسرعة: طب شفهولى أصلى أنا كنت مفروس منة ....أكمنة كان راجل تنح وبارد ..كان أسمة أية ياواد ياصياد كان أسمة أية ياواد ياصياد..أة كان أسمة عم أحمد

نظر شمروخيل فى الدفتر باحثأ عن عم أحمد : تعالى ياأحمد... روح ياأحمد... تعالى ياأحمد.. روح ياحمد...هو كان أسمة أحمد محمد الدهل؟؟؟

قفزت قائلاً : أيوة..هو

نظر لى شمروخيل : هو القط دة..هو بعينة أحمد الدهل

رجعت أشاهد عم أحمد فى أنسجام شديد وكأنى أنظر لبرترية أو لوحة الموناليزة قائلاً : ياسلام على الدنيا!!!..جة اليوم انى أشوفك فى الاخرة ياعم أحمد ياحلو وكمان أية مقلوب قط تخين و بتنونو من العذاب...بس قوللى ياشوشو ياخويا ؟؟!!

شمروخيل : أقولك أية ؟؟

قلت لة : هو بيتعذبوا هنا أذاى أنا مش شايف حاجة بتعذبهم..ولا وحوش بتجرى وراهم...ولا هم مربوطين ولا حاجة خالص !!؟؟

رد شمروخيل قائلاً : العذاب فى الساحة دة عذاب بدنى بتحولهم الى حيوانات ...ودة بيخاللى الانسان يحس بالعذاب والمهانة دة من الناحية النفسية والروحية.....أما من الناحية الجسدية فتحولة دة بيكون بتمن على أجسمهم علشان مش متعودين على أجسمهم اللى من الخارج تكون كدة...مش بتاعتهم ولا حتى تنتمى للجنس البشرى فدة بيخاللى أعضائهم الداخلية الانسانية تتهاوى وتتدمر وأفرازات الغدد المختلفة لكل أنحاء أجسامهم أما تتعطل أو تنشط وبطريقة رهيبة فيشعرو أيضاً بالعذاب الغير منظور ودة عذاب أقوى من عذاب الساحتين اللى قبل ساحتنا هنا
أنا : يعنى أعضائهم اللى جوة أنسانية ذى ماهى؟؟

[مدحت الصياد]

شمروخيل : طبعاً ...طبعاً ....أمال هتكون الحكمة أية والعذاب هيجى أذاى لو كانوا أتحولوا برة وجوة لحيوانات...كان لازم ولابد أنهم يكونوا الاتنين مع بعض أعضاء داخلية وروح لانسان وجسد خارجى وطباع حيوان علشان العذاب يكون عادل والتمن يندفع لاخر فلس..فاهم يافسل؟؟

نظرت لة بشدة وأنا هايم فى متاهة عقلية داعياً للة أنة يحافظ على البقية الباقية من ثبات عقلى ..ثم قلت لة بهدوء : ياااة..أية دة ...دة عذاب ماحدش يتخيلة أبداً...ولا كان عمرى أفكر فى شىء ذى دة بتاتاً البتة

رجع شمروخيل للرعب عندما قال: أمال لما تشوف الباقى ..هتقول أية ياصياد..سيب الاندهاش دلوقتى ..كل اللى أنت شفتة مايجيش حاجة أو كأنة عرض أسماء أبطال الفيلم ..يعنى لسة الفيلم مابدأشى...ولسة الاثارة والاندهاش ماجاش وقتها...دة احنا لسة بنقول ياهادى...تحب تعرف حاجة هنا قبل ما نطير لحتة تانية وساحة جديدة؟؟
أنا : أيوة.....طب اللى كان بيقسو على البشر اللى ذيوة هم فين؟؟؟

هو : ..أهم هناك أهم
نظرت للمكان الذى أشار الية فوجدت أناس مربوطين فى أشجار غاية فى الشناعة ...أشجار لها أيادى كثيرة وكل شجرة تحتضن أنسان وكأنهم يرقصون رقصة شاعرية على الحان رومانسية...وأمام كل أنسان يقف شيطان صغير بوجة أنسان ويمسك فى يدة بسوط يعنى <كرباج ورا ياسطة>...وطبعاً الكرباج نازل يزغرت على ظهر المعذب المعبوط من الشجرة ...لكن الشىء المريع بجد أن الكرباج وهو نازل بقوة مش بيمزق ظهر الانسان ...لا..دة...دة بيقسمة نصفين ...أيوة بيقسم المعذب نصفين وكل نص فى أيد من أيادى الشجرة ...اللى بعد كدة بتجمع نصفى الانسان دة فيرجع من تانى صحيح يعنى حتة وحدة...الاشنع أنة حتى وهو مقسوم بيكون صاحى ...يعنى حاسس بأنة بقى أتنين ويرجع الشيطان الصغير دة اللى هو جلادة للضرب بالسوط وهلم جرا

قلت لشمروخيل وأنا بين العقل والجنون مما اشاهدة : أية دة ياشمروخيل...دة مش عذاب ...دة أشنع من العذاب نفسة...دة حاجة ملهاش أسم...دة أية القسوة دة!!!!

رد شمروخيل فى هدوءة المعتاد وكأنة ميكانكى أمام عربة خربانة أو جزار أمام الدبيحة : طبعاً ...مش هنا عذاب خطايا القسوة والشر الحيوانى اللى موجود بداخل الانسان الخاطى دة..أنت عارف ضربة السوط دة قوتها ممكن تعمل أية؟؟؟.

قلت فى أشمئزاز : لا طبعاً هو أنا خبير جلد

رد فى فرح وكأنة بيبشرنى بالخلاص: دة الضربة الوحدة منها لو نزلت على جبل تفلقة أتنين

حاولت بكل أستطاعتى وقوة مخيلتى أنى أتخيل ولو بصيص المشهد فصعقت بشدة وأحسست أننى فى تلك اللحظة فى أحتياج لدخولى بيت الراحة

أفاقنى شمروخيل قائلاً : حاجة تانية عايز تعرفها قبل ما نمضى الى حال سبيلنا

قلت لصديقى الرهيب شمروخيل محاولاً أن أغير موضوع الكرباج والانقسام دة: أيوة.. عايز حاجة..لو تكرمت وتعطفت على العبد المسكين اللى هو أنا ... تفتح دفترك الشنيع المريع دة وتقوللى أنا بأذن اللة أقصد بأذن أبليس مكانى هيكون فين؟؟؟

رد شمروخيل قائلاً وهو يشير بأصبعة علامة الرفض: لا طبعاً مستحيل

قلت لة فى ضعف تمثيلى زائف : علشان خاطرى ..وخاطر العيش والملح ..أقصد وخاطر كوارع القرد وأسباكيتى التعابين اللى طفحناهم مع بعض تعرفنى مكانى هيكون فين ياعمى وتاج رأسى من فوق

رجع لنفس الرد : لا..والف لا

أنفجرت كالبركان فى هذا الشمروخيل الباذنجان صارخاً فية بكل ما أعطتنى عوامل الطبيعة الجهنمية من غيظ وأحباط :هو أنت أية... مش حاسس بالمصيبة اللى أنا واقع فيها..ولا عامل أعتبار للصداقة ولا الكوارع ولا حتى للصحبة بتاعتنا أبداً

رد فى هدوء يغيظ : أولاً ..المصيبة اللى أنت بتقول عليها لسة مجتلاكش ولا شفتها ..ثانياً ..أنت اللى حطيت نفسك بتهورك وشربك للسم وأنتحارك..يعنى بيدى لا بيد عزرائيل...ثالثاً ودة الاهم أنى مش فى أستطاعتى أنى أعرفك مكانك

أنا : لية..هو فية قانون يمنعك بكدة ؟؟

هو : لا طبعاً ...وحتى لو فية أنا معفى من القانون دة

أنا فى أستغراب : طب لية مش عايز تعرفنى مكانى فين ؟؟؟!!

وهنا..وهنا فقط أنفجر فى شمروخيل أنفجار الف قنبلة نواوية صارخاً : علشان أنت لسة متحاسبتش ولا قاس أبليس خطاياك ولا فتح كتابك ...فهمت ..يعنى لسة أسمك مانكتبش عندى

هدء بالى وأرتاحت أعصابى وقلت لة : يعنى ممكن يعنى..أنى أطلع براءة..أو حتى بملحق ؟؟؟؟

أبتسم شمروخيل قائلاً : ممكن..جايز...يجوز...بس الكلام دة ماحصلش أبداً هنا ... يعنى مستحيل حد يجى هنا غلط...وغير كدة تعالى وقوللى...هو أنتحارك دة كان نكتة والا فاكر أنك هتخش السما وهناك هيعملولك غسيل معدة...وهيقولولك حمدللة عالسلام ....وتقوم لينا بالعافية...وشد حيالك كلنا لها...ياسلام على عقلك

قلت لشمروخيل فى غيظ : خلاص ياعم بقى...أنت هتتسلى على وتعملنى حكوتك...خلاص عرفنا أننا جينا هنا صح مش غلط

شمروخيل : طب كفاية كدة وياللى بينا على الساحة اللى بعدها ..أركب على أكتافى و...

قلت فى نرفزة مقلداً هذا الدهل: وأمسك كويس

شمروخيل : ياساتر على لسانك ...<وطار فعلاً قائلاً قولتة الشهيرة>:هيلا هووووووب
_______________________

وغداً مع جديد الاحداث

محبتي

الصياد

[Mayda]

رائع جداً جداً جداً

موضوع يستحق وسام التميز

بانتظار المزيد

صلواتك أخي العزيز

[مدحت الصياد]

رائع جداً جداً جداً

موضوع يستحق وسام التميز

بانتظار المزيد

صلواتك أخي العزيز

أخجلتم تواضعنا

شكراً على تشجيعك الدائم لي

وشكراً على متابعتك لعملي البسيط هذا

محبتي

الصياد

[Nahla Nicolas]

ربنا يباركك ويبارك موهبتك اكتر و اكتر
مستنيين اكتر و اكتر من اعمالك

[مدحت الصياد]

ربنا يباركك ويبارك موهبتك اكتر و اكتر
مستنيين اكتر و اكتر من اعمالك

أشكرك أختي الغالية على هذه الكلمات المشجعة

وصدقيني أن قلت لك هذه الكلمات كتير على ...أنا لا أستحق كل هذا الاطراء

أشكرك لثاني مرة

محبتي

الصياد

[مدحت الصياد]

نزل شمروخيل بعدما طار قليلاَ ثم أنزلنى من فوق أكتافة قائلاً لى : معليش ياصياد هنمشى شوية

قلت لة فى تعجب : لية يعنى ؟؟؟

شمروخيل : علشان المكان دة ممنوع الطيران فية

ضحكت بشدة قائلاً لة فى تريقة واضحة: أية يعنى ...هى منطقة سكنية والا قاعدة عسكرية سرية ؟؟؟!!!

أبتسم شمروخيل فى ضيق واضح وهو يقول : لا ياسيدى...أصل المكان دة خطر الطيران فية علشان ممكن تصطدم وأنت طاير بقذائف لهب أو شرارات هكربائية قاتلة..أو نفحات شيطانية حارقة خارقة

أنا فى ذهول : قصدك تقول شرارات كهربائية مش هكربائية....و أية دة كلة هو المكان دة بتاع أية ...فية أية بالظبط؟؟؟؟؟

شمروخيل : أنا قلتلك قبل كدة أنا واضح ودقيق فى كل كلمة وحرف فقولة...هى أسمها هكربائية مش كهربائية....علشان هنا قوتها رهيبة لا تقاس بقوة أكبر مولد للطاقة الكهربائية أو حتى الذرية عندكم على الارض ..فعلشان كدة شقلبنا الحرفين الكاف والهاء وكمان أصل المكان هنا فية مزبلة التاريخ الانسانى كلة

قلت فى تردد: مزبلة التاريخ !!أنا سمعت عن المكان دة على الارض بس كنت فاكرة شىء معنوى مش حقيقى...مش فاهم حاجة...وأول مرة أسمع منك أى شىء يخص المكان دة ..طب هو تبع أى خطايا..الصغرى والا الكبرى وفى أى طبقة ؟؟؟؟

شمروخيل : براحة على ...واحدة واحدة....أولاً المكان دة مش محسوب من ضمن الساحات التقليدية هنا لا هى فى الساحات الصغرة ولا هى فى الكبرى ..دة مكان خاص جداً علشان اللى فية من خطاياهم وأجرامهم وتغيرهم لمجرى التاريخ الانسانى بأفعالهم الشنيعة ملهمش مكان ولا يقاس أفعالهم بأى ساحة ولا أى طبقة..والحاجة المدهشة بجد أن الحكم عليهم هنا بيجى من البشرية نفسها...يعنى اللى بيتعرف عنة على الارض أنة فى مزبلة التاريخ بيتقاس كتابة وافعالة فلو اتضح أنة فعلاً مكانة فى المزبلة ....بيكون عذابة فيها....ثانياً ..الموضوعات المعنوية عندكم بيكون ليها هنا فى الاخرة مكان ...فى جهنم أو الفردوس والسما....وأنا مقلتلكش على المكان دة علشان مش مسموح لينا لزيارتة الا بتصريح من أبليس نفسة...فهمت

قلت لة فى تسائل : طب أشمعنى المكان دة بتصريح ياشمروخيل .؟

نظر لى قائلاً : علشان لو أحنا دخلنا هناك من غير تصريح ممكن منعرفش نخرج ولو ضعنا فى مزبلة التاريخ هتتلخبط أحداث كتير فى التاريخ ويحصل نفس اللخبطة على الارض فتكون الطامة الكبرى...وبدل ما يكون شخص ذى هتلر مثلاً هنا فى مزبلة التاريخ ...هنلاقية بقدرة قادر فى الفردوس يتنعم ويرتل

قلت لة فى رعب : ياليلة ملهاش لون ولا طعم...يعنى واحد ذى الدلعدى سى هتلر يكون فى الفردوس مع القدسين والانبياء والملائكة وأنا الغلبان أضيع فى مزبلة التاريخ !!!...حاجة تجن الجن

شمروخيل : علشان كدة ...مستحيل نزور المكان دة.من غير ترخيص أو تصريح...بس أوعدك لما نخلص كل الساحات والطبقات هنجيب تصريح زيارة ...وهناك هتشوف عجب العجاب

أنا : طب أحنا رايحين فين دلوقتى؟؟؟

شمروخيل : رايحين ساحة عذاب الطمع...ودة موجودة على بعد خمسة كيلو متر من هنا

أنا : يانهار...لسة هنمشى خمسة كيلو!!!

شمروخيل : ياعم ولا يهمك ..أهو أحنا بنتكلم لحد ما نوصل ...عندك أى أستفسار عن أى شىء شفتة لحد دلوقتى؟؟

أنا : طبعاً ...حاجات كتير ...أولاً ..أكيد كل واحد فى الدنيا وعلى الارض عمل خطايا كتير..وطبعاً اللى بيكذب أكيد عمل خطايا تانية غير الكذب ..ذى مثلاً ممكن يكون قتل أو سرق أو نصب أو عندة الطمع أو حتى زنا بالفكر ..وذى ما بيقولوا <وهذا أضعف الايمان >...طب الناس دة هتتعذب أذاى كدة وهتروح أى ساحة؟؟؟

شمروخيل : طبعاً هيتعذبوا أو هيدفعوا حساب أشد خطية الاول ...يعنى مثلاً أنة قتل وكذب وسرق ...هيدفع تمن خطية القتل الاول ولما يتعلم من خطيتة هيترفع درجة ويروح لتانى ساحة أو الاقل من القتل وهى السرقة وبردك يدفع تمن سرقاتة ولما يتعلم يرتفع درجة ويروح للساحة الاقل منها وهى الكذب وهلم جرا

قلت لة فى دهشة : أية الحلاوة دة ..دة أنتم هنا مش ناسين حاجة خالص....طب فية حد مبيقدرش يرتفع للدرجة التانية؟؟؟

شمروخيل : على ما أظن ..لا..الكل هنا بيتعلم...بس كل حسب أجتهادة...يعنى مثلاً ..واحد بيقعد فى ساحة ألف سنة وبعدها يتنقل للدرجة الاعلى وواحد يقعد فى نفس الساحة الف الف سنة وواحد يقعد فى نفس الساحة أقل ...يعنى ياصياد صوابعك مش ذى بعضها....الكل حسب الطبيعة اللى جواة والعطية المعطاة لة منذ مولدة على الارض

قلت لة فى ضيق واضح : بصراحة كدة ياشمروخيل ..أنا مش عارف فايدة اللعبة دة كلها أية؟؟..حياة وخلق وناس بتقتل وناس بتتقتل وناس بتسرق وناس بتتعذب وناس وناس وناس والكل فى الاصل مخلوق من عند اللة وهو اللى خلق جواة الطبيعة اللى بسببها رايح السما والفردوس أو بسببها رايح جهنم والجحيم؟؟..تيجى أذاى دة؟؟..مادام اللة عارف أنى أنا الصياد من قبل ما أتولد مكانى جهنم ..لية طب سبنى لعذاب الارض ولية أصلاً كان من الاول وجدنى أذا أنا كنت مشروع فاشل من قبل ما أتوجد...عمرى ما شفت حد بيخش مشروع وهو عارف أنة مشروع فاشل الا لو كان بيتسلى ...مش عارف ياشمروخيل ؟؟..هل اللة بيتسلى بينا كدة وأحنا كلنا فى الاخر ما الا مباراة أو قصة معروفة نهايتها المؤلمة...وكمان الطبيعة اللى موجودة فى الانسان الشرير الخاطى من صنع اللة يعنى الانسان بيتحاسب على أعمال كانت وراها طبيعتة الفاسدة اللى أتخلق بيها ولا كان لية يد فى وجودها؟؟

شمروخيل : لا ياصياد لا...ربنا عمر ما كانت أعمال يدية فاسدة أو مشروعاته فيك فاشلة ..أبداً ده بالعكس

[مدحت الصياد]

الخدعة
______

شمروخيل : أنت عارف قصة شجرة معرفة الخير والشر؟؟

أنا : طبعاً ..لما الحية اللى كانت امكر المخلوقات أغرت حواء لتأكل من شجرة المعرفة وحواء أغرت أدم ليأكل هو كمان من نفس التفاحة وربنا طردهم من الجنة ...طبعاً قصة معروفة

ضحك شمروخيل قائلاً فى قوة : أهو القصة دة مش بالظبط كدة

صرخت فية وأنا أقول : أية؟..بتقول مش كدة؟؟!!..أنت أذاى بتقول كدة...أنت مش عارف أنها...مكتوبة فى سفر التكوين الاصحاح التالت ..يعنى كلام الكتاب المقدس فى عهدة القديم مش مظبوط؟؟؟

شمروخيل : ياعم الصياد ..أنت هتودينى فى الوبا...أنا مقلتش كدة ولا كان قاصدى كدة....تحب تعرف التفاصيل الدقيقة للقصة دة؟؟؟

قلت لة فى قوة : أيوة طبعاً ..نفسى أعرف التفاصيل كلها من أول طقطق لحد سلامو عليكم..

شمروخيل : طب ....تعالى ورايا

قلت لة فى أستغراب: على فين العزم كدة؟؟؟؟

شمروخيل : هنروح كهف التاريخ الانسانى كلة

قلت لة فى أستغراب : كهف التاريخ الانسانى!!!

رد شمروخيل وهو يسرع الخطى : أحنا حظنا حلو أن الكهف قريب من هنا...وكمان اللى ماسك الكهف دة صاحبى من أيام الدراسة فى جامعة أبليس الكبرى

أنا : أية الحلاوة دى ..دة أنت خريج جامعة وأنا ماعرفش!!!

رفع شمروخيل جبهتة الرهيبة قائلاً لى فى غرور واضح : ياحبيبى اللى قدامك دة معاة أتنين دكتوراة أباليسى فى كيفية خداع البشر ..وأتنين دبلومة فى المعالجة الوسواسية للمؤمنين...و

قاطعت هذا الثرثار المغرور قائلاً لة: خلاص يادكتور شمروخيل...خلاص ...حصلنا الشرف والقرف

وفعلاً وصلنا لكهف على شكل علامة أستفهام ودلفنا <يعنى دخلنا> من باب الاستفهام هذا.... لاجد نفسى وسط قاعة كبيرة جداً لدرجة أننى لم أستطع أن أرى نهايتها..وكأنها عشر ملاعب كرة قدم أو بلدة متوسطة الحجم...وهذة القاعة تذخر بكل أنواع الكتب والمعرفة الانسانية ..فتقدمت من أحد الارفف وقرأت عنوان كتاب يقول ..القنابل الذرية المتوسطة..وبجوارة كتاب عنوانة القنابل النظيفة وأخر بعنوان القنابل فائقة السرعة...وغيرها كثيراً

نظرت للدكتور شمروخيل قائلاً لة: أية دة ..الكتب دة سرقنها من الارض والا أية الحكاية بالظبط؟؟؟

نظر لى شمروخيل فى غضب وهو يقول : أخرس....أحنا مش تافهين ذى الجنس البشرى علشان نسرق الاختراعات دة.........دة ياحبيبى أختراعتنا أحنا من الاف السنين

ضحكت بشدة وأنا أقول : ياحلاوتك ..حرامى وبجح كمان..معظم أنواع القنابل دة أختراعات أنسانية ...ياحلو

ضحك وهو يقول: ياصياد الاختراعات دة أحنا عرفنها من زمان جداً واحنا بردك اللى وسوسنا فى دماغ الناس اللى عملوها على الارض..أمال هنجيب ناس هنا أذاى وهنملا المكان دة أذاى..يعنى فكرك هنقعد نوسوس فى عقل وقلب كل واحد على الارض علشان يعمل خطية ونتعب نفسنا ونهد حلنا علشان خطايا سذجة وصغيرة..لا ..كان لازم ولابد أننا نساير التاريخ والتقدم الانسانى..أحنا وبلا فخر اللى عرفنا الانسان أذاى يعمل أول ولعة نار فى التاريخ وأحنا اللى عرفنا الانسان قانون النسبية اللى أنتسبت لانسان اسمة البرت أينشتاين....وكمان أحنا اللى عرفنا الانسان الطيارة وتركبها من أيام الرسام دافينشى...وغيرها وغيرها

نظرت لة غير مصدق هذا الكلام الصعب تصديقة فعلاً فقلت لة : يعنى كدة الانسان كان بيغش من الاول ..يعنى الانسان ولا هو متحضر ولا هو اللى صنع الحضارة والتقدم ..طب لو كلامك مظبوط ياشمروخيل...لية كنتم بتعرفوا الانسان على الحاجات المفيدة دة؟؟..أنا اللى أعرفة عنكم أنكم مستحيل تعملو خير أو تساعدو فى الخير الانسانى أبداً؟؟؟

شمروخيل : ومين قالك أن الاختراعات دة خير من أساسة...هى شكلها خير بس مع الايام بتتحول للهدف من أخترعها اللى هو تدمير البشرية

قلت لة فى شك : مش قادر أصدقك ياشوشو أبداً

شمروخيل : طب هقولك حاجة تانية ..عارف نيوتن؟؟

قلت لة فى قوة : طبعاً دة كان مخترع لحاجات كتير قوى وكمان هو مكتشف الجاذبية الارضية..وقانونها

ضحك شمروخيل وهو يقول : أهو موضوع الجاذبية دة كان لعبة عملها شيطان أسمة أوسيسيل....راح لنيوتن وهو نايم تحت شجرة وراح حدف علية تفاحة ونط وسوس فى عقل نيوتن بقانون الجاذبية...أنت فاكر أن تفاحة تعمل فى نيوتن كدة..طب بعقلك كدة ياذكى...كام واحد على أيامة وقبلها شافو تفاح بيقع من الشجر؟؟؟

قلت لة فى بلاهة: أكيد كتير

رد فى أستهزاء : طب يعنى الكتير دول محدش فيهم فكر فى الجاذبية لية؟؟؟وكمان نيوتن نفسة مش أول مرة تقع على نفوخة تفاحة ..الاخ كانت هويتة النوم تحت الشجر وطبعاً اتعرض لضرب التفاح كتير ..أشمعنى مافكرشى الا دلوقتى..عارف لية؟؟علشان مساعدة صاحبنا أوسيسيل...وبعد الموضوع دة أوسيسيل أخد نيوتن مقاولة من بابة كدة... ذى ما بتقولو على الارض...أختراعات ونظريات ....قولى أى أختراع عندكم وأنا أقولك على الخدمة اللى بيقدمها لنا ؟؟

فكرت ..وقلت ..طب الطيارة ..أية اللى كان هدف أخترعها؟؟..دة سهلت ياشوشو ياخويا الانتقال وخالت السفر بسيط لابعد الحدود؟؟

أبتسم شمروخيل قائلاً فى مكر شديد : ياصياد لولا الطيارة كانوا البشر هيحربوا ويقتلوا بعض أذاى فى العصر الحديث..لولا الطيارة ..كانوا ضربوا مدينة ناكازاكى وهروشيما وحصل أحلى يوم فى التاريخ لما أتباد ملايين من الناس والبشر ولحد دلوقتى مفعلها شغال فى الحروب..دة سهلت الحصاد وكترتة قوى

فزعت بشدة من هول الاعتراف دة ...لكنى قلت لة : بس ياشمروخيل..الطيارة خلت الكل يسافر بسرعة ..أهو هى كمان ليها فايدة

شمروخيل : ماشى ليها فايدة..بس بردك فية حوادث لسقوط الطائرات دة...ولو خدت بالك ..كل فترة أو بضع سنوات بتكتر حوادث السقوط ...ودة أسمة عندنا ضريبة الاختراع...يعنى مش اختراع بلوشى حتى لو احنا المستفيدين الاوائل منة.

صرخت فية : يادهية دقى...دانتم كفرة ياشيخ!!!...

شمروخيل : ياصياد ياحبيبى...دة شغلنا..ودة أكل عشنا...هو مافيش عندكم ناس شغلتها تعدم ناس؟؟...وناس شغلتها تدفن ناس...وناس شغلتها تكفر سيأت ناس...دة أحنا تلامذة قدام أنسان العصر الحديث...دة أحنا قربنا نكون عاطلين مش قادرين نجارى شر الانسان.....دة حتى أكتشاف الجينات الوراثية كان الهدف منها أننا نخلى الانسان يغتربذاتة فيكفر بالخالق..واللى حصل أن الانسان وصل لابعد من كدة....

قلت لة فى زهول مهول: أذاى الكلام دة؟؟!!!

قال فى أسى واضح: وصل أنة يلعب فى الجينات دة ويخلق أشباة لة ...وصل أنة يغير حتى فى الطبيعة وحتى ثمار الارض... يخاللى مثلاً التفاح بطعم البرتقال..والبطيخ بدون بزر والخوخ بطعم المنجو..الخ الخ..أصبح الانسان بيلعب بالنار اللى أكيد هتحرقة وهتكون نهاية الارض على أيدية هو

قلت لة : طب وأية اللى مزعلك كدة!!!..مش دة اللى أنتم عايزينة؟؟

شمروخيل: لا طبعاً.....مش بالطريقة المجنونة دة....أحنا ذى الحنوتى بالضبط ..هو بيفرح لما يكون فية اموات كتير علشان يشتغل ويكسب رزقة...صح؟

قلت لة : مع التشبية الغريب دة ..لكنة صح

رد قائلاً : طب لو حصل والبلد او المدينة اللى فيها الحنوتى دة ولعت وكل حى فيها مات...هيكون عمل الحنوتى اية؟؟

اسقط فى يدى: مش عارف...على ما أظن ملهوش لزوم ساعتها لشغلتة

أكمل شمروخيل: طبعاً ...مش ممكن ولا فى أستطاعتة أنة يدفن بلد بحالة وحتى لو أستطاع ..مين بقى هيدفع للحنوتى دة؟؟..أهو أحنا كدة..لو الانسان دمر نفسة ودنياة كلها ..أكيد ساعتها هتكون العلامات الاخيرة للنهاية..وساعتها ياحلو..أحنا كمان مش راح ننجوا من قصاص العدل الالهى

زفرت بشدة ثم قلت: طب لما أنت عارف أنك مش هتهرب من وجة ولا حكم اللة لية ماشى ورا أبليس وبتخدمة؟؟

شمروخيل: دة موضوع يطول شرحة...المهم خاللى بالك أهو صاحبى شدراخيل أهو ..المسئول عن الكهف__________________