تذكرة لجهنم <قصة طويلة بقلم الصياد>

[مدحت الصياد]

أنت فاكر الموضوع سهل كده أن حد يجى هنا غلط والا دوسيهه يضيع....دي حاجه مستحيل تحصل أبداً

قلت له : طب مالمستحيل أهو حصل ..وسيدتك مشلاقى كتابى ولا دوسيه أعمالى....ومن الاخر كده...أنا أيه هيكون وضعى بقى ...هكمل هنا والا تسبونى أذهب لحال سبيلى؟؟

هرش أبليس مفكراً لبضع دقائق ثم قال : مافيش غير حل واحد وهنعرف بيه أنت مكانك فين بالظبط

قلت لة بسرعه: طب لايمنى عالحل دة..سيدتك مقولتهوش مالاول ليه!!؟

رد أبليس بعدما تنهد بقوة أحسست معها أنه سينفجر من شدة التنهيدة قائلاً : هو حل بس بيكون أخر حاجة نلجيء لها ..لما يكون الموضوع معقد ذى موضوعك ياصياد

تكلم شمروخيل قائلاً : ياسيدى ...مانصبر شويه قبل الحل الاخير ده...

نظرت لشمروخيل فى دهشة ...يادى المصيبه ..باين الحل الاخير ده... مش ولا بد....ياهلترا الحل ده مصيبة جديدة على نفوخى والا يكون مصيبة على نفوخ شمروخيل.!؟!؟؟!

تكلم أبليس : لا...لالا...الموضوع أتأخر قوى ..وأول مرة يحصل كده...شمروخيل ..هات السفر...أقصد نسخة السفر بسرعة

رد شمروخيل فى رعب قائلاً : ياسيدى...أنا مش من حقى الاعتراض..بس سيادتك فاكر أخر مرة فتحنا النسخة دي هنا حصل أيه

أشاح أبليس بيده قائلاً : مش مهم...كل حاجة وليها تمنها اللى لازم يندفع...أذهب ..وبسرعة

[مدحت الصياد]

الحياه البرزخية
__________

وفعلاً أختفى شمروخيل من أمامنا فتنحنحت قائلاً : أحم...هو شمروخيل خايف كدة لية؟؟...وممكن لوتكرمت توضحلى اللى حصل قبل كدة...كلامكم دة الغاز ؟؟

أقترب منى أبليس ناظراً لوجهى قائلاً فى شناعة ملحوظة :أصل نسخة الكتاب دى عمللنا مشكلة ..فى كل مرة تنفتح هنا ينفتح معاها ....الخط الوهمى اللى بيفصل حياة مابعد الموت عن الحياة عالارض ...وبيرجع الانسان اللى بيكون فى اللحظة دة مابين الحياة والموت للارض ....ودة بقى بيكون أسمها أنقاذ الروح ...

قلت لة فى دهشة : طب الانسان دة بيكون فين ...يعنى ما بين الحياة والموت بتكون روحة فين؟؟

رد : طبعاً لا هو عالارض عايش حياة طبيعية...ولا هو هنا فى الجحيم بيتعذب ...بيكون فى الطريق أو رحلة الانتقال...ودى أسمها الحياة البرزخية...يعنى أنت ياصياد ماسمعتش قبل كدة عن الناس اللى بتموت وبعد ساعات من توقف القلب والموت بيرجع تانى للحياة؟؟

قلت لة : فعلاً ...الموضوع دة سمعتة كتير ..بس ماكنتش مصدقة

أبليس : أهو اللى بيرجع دة بيكون بسبب أننا هنا بنكون فاتحين الكتاب ...فى نفس وقت أنتقالة من الارض لهنا...فبيرجع مسحوبة روحة لجسدة...

نظرت لة قائلاً : أهو أنا بقى نفس أعرف كتاب أية دة اللى مخللى شمروخيل خايف منة كدة..وبيخللى الاموات يرجعوا ؟؟؟

أبليس : دى نسخة من كتاب <سفر الحياة >

قلت لة وأنا غير مصدق : أية؟..سفر الحياة؟..أنت قاصدك سفر حياة الخروف... بتاع المؤمنين....اللى مكتوب فية أسماء الناس المختارين واللى هيكونوا فى الفردوس مع المسي....

أمسكت الكلمة قبل أن تقفز من بين شفتاى

رد أبليس بسرعة : أيو..أيوة هو سفر حياة الخروووووف

قلت لة : طب أية اللى جاب نسخة منة هنا..وأذاى قدرتم تحصلوا عالنسخة دى....وأية فايدتها ليكم؟؟

أبليس : دة لازم تكون هنا نسخة ..علشان هو دة التحدى ..أحنا بنحاول أننا نكسب أى روح موجودة أسمها فى سفر الحياة ....وجة هنا أذاى؟...دة سر

وهنا جاء شمروخيل وهو يحمل صندوق كبير جداً ذو شكل دائرى ..مصنوع من خشب الابانوس ...ثم وضع الصندوق أمام أبليس ..الذى ما أن شاهد الصندوق حتى رفع أصبعة وبدون أن يلمسة أنفتح الصندوق وخرج منة كتاب ضخم جداً ..كتاب أحمر اللون كلون الدماء البشرية ...ثم أنفتح السفر وهو معلق فى الهواء ومن بعيد لبعيد قال أبليس لى : أذهب للسفر

__________________

و غداً مع جديد الاحداث

محبتي

الصياد

[مدحت الصياد]

ففعلت وذهبت له ...ثم أكمل : ضع يدك بداخل صفحاته

نظرت له قائلاً : لا لا.....الا كده....أنا أش عرفنى هيحصلى أيه لما أحط أيديا هنا ..لا ياعم...يفتح الل.....

مسكت لسانى ده اللى عايز حشه

رد أبليس بغضب : ماتخافش كده ..كل اللى هيحصل أنك لو أسمك مكتوب هنا ...هينطق السفر بأسمك أول ما تحط أيديك

قلت له : طب لو منطقشى

رد : يبقى أسمك مش مكتوب فى السفر

قلت له : أكيد...أكيد هو ده بس اللى هيحصلى ؟؟؟

رد : قلتلك هو ده اللى هيحصلك بس ...خلص ...أنهى ....السفر مفتوح بقاله كتير وتلاقى ناس كتير هربت من بين أيدينا ...ورجعت للارض

قلت له فى رعب : حاضر....حلمك على شويه...

وفعلاً مددت يدى المرتعشة وكأننى سأضعها فوق نيران أو أمام أسد متوحش ...وأنتظرت وأنا يدى على سفر الحياة..أن أسمع أسمى أو حتى حرف منه..ولكن خاب ظنى..ولم ينطق سفر الحياة بشىء

طلب منى أبليس أن أرفع يدى عن السفر فقلت له : معلش أدينى شوية وقت ...فرصة تانيه...بضع دقائق لا غير....ممكن أسمى موجود بس صعب نطقه

رد أبليس بغضب : فرصه تانيه أيه يابنى!!!...أسمك لو كان مكتوب كان السفر نطقه من ساعتها...أرفع أيدك

وفعلاً رفعت يدى وأنا حزين حزن الدنيا...أقصد حزن الاخره...وبكى قلبى...لاننى أحسست أن محبة الرب لم تقبلنى ...طب هتقبلنى أذاى وانا أنسان خاطى ومنتحر !!...أنا اللى عملت فى نفسى كده

رجع السفر لموضعه بداخل الصندوق وحمله شمروخيل مختفياً به...فنظر لى أبليس قائلاً : يعنى أسمك كمان مش موجود فى سفر الحياة!!!...ولا أسمك مكتوب عندى ولا أى ورقة ليك هنا!!!

قلت له : طب أنا وضعى أيه دلوقتى...يعنى لانا فى جهنم...ولانا فى الفردوس؟؟...هروح فين دلوقتى..؟؟؟

رد أبليس : مش عارف...دي أول مره يحصل الكلام ده هنا....وأول مره يجى حد ومعرفلهوش مكان!!

__________________

[مدحت الصياد]

قلت له : طب يعنى هعيش سواح كده والا هكون رحال مليش مكان ولا موضع

دخل شمروخيل فى تلك اللحظة قائلاً : سيدى ...فيه حل مؤقت

قل له أبليس : حل؟...حل أيه ده ؟؟

شمروخيل : الصياد يكمل الرحلة ويزور جهنم كلها ..وساعتها هيكون ظهر له مكان أو عرفنا مصيره أيه أو يظهر الدوسيه بتاعه..أكيد هيحصل حاجه منها...أكيييد

زفر أبليس قائلاً : باين فعلاً أن مقدمناش غير الحل ده ...مؤقتاً ..لحد لما نعرف حكايته أيه الانسان الغريب ده اللى أسمه الصياد ...ولو ماحصلش ولا جد جديد ...يبقى ماقدمناش غير....رجوعه للحياة البرزخية...وهناك هيعيش بروحه تائه هائم...حتى البوق الاخير

[مدحت الصياد]

مين أنا ...عايز أعرف ؟ مين أنا؟؟
_____________________

أنطلق شمروخيل بعدما خرجنا من أمام أبليس ...ذاهباً بنا الى ساحة جديدة وعذاب جديد...اصبحت لا أفكر الا فيما ينتظرنى ..ولا أعرف ما أنا مقبل اليه ..والى أين أنا ذاهب فى النهاية...فلم اعد حتى متأكد من كونى الصياد...ولم أعد مؤمن بأننى أستحق نار جهنم أو أستحق حياة الفردوس...حاله غريبه عجيبه ..ان تجد نفسك وذاتك التى عشت بها سنوات عمرك كلها وكأنك لست متأكد من كونك كنت أنت موجود فعلاً أو أنت هو أنت ولا أحد غيرك....أحساس رهيب ..أن تحس وتشعر بغربتك عن ذاتك وضياع شخصيتك فى لا شىء...من أنا؟؟..هل أنا روح الصياد فعلاً ؟؟..أم حدث خلط مع روح أنتقلت فى نفس وقت أنتحار الصياد..لقد أشرفت عالجنون ..اننى فى مأزق وحاله معقدة مجنونة ...أفكارغريبة لا تدعنى استريح ولا تدعنى لاى مصير معروف ...فراحتى هى ان اعرف من انا ؟ وما انا مقدم اليه حتى وان كان اتون النار ...فهذا اسهل من الغموض والانتظار الرهيب الغير معلومة نهايته ..فأنتظار الموت أشنع الف مره من الموت ذاته

هبط شمروخيل بى الى الساحة الجديدة وهو يقول : مالك ياصياد ؟؟ شكلك مش طبيعى خالص...في أيه ؟؟ جرالك أيه؟؟

نظرت له وأنا مشتت الافكار لا أعرف أين أبدأ ...فتنهدت قائلاً : يعنى أنت مش حاسس بالوكسة اللى أنا فيها؟

قال: وكسة؟..وكسة أيه دي ؟؟؟

قلت : وكسة ضياعى...وكسة تشردى بين سما و نار ..لا عارف أنا هروح فين ولا عارف أنا مكانى فين...ولا حتى بقيت عارف أنا فعلاً مين...هل أنا روح الصياد..وفيه غلط حصل؟؟..والا أنا روح هائمة غريبة تقمصت روح الصياد ؟؟؟مين أنا؟؟؟مين أنا؟؟؟ مين أنا ياشمروخيل؟؟؟ تعرف تقوللى أنت مين أنا؟؟

رجع أخينا لموضة جهنم فى الهرش الغريب بتاع التفكير هنا...وبعد وقت قصير أشاح بيده قائلاَ : يامانت مش عارف...هاعرف أنا!!!!....وحتى لو مش أنت الصياد ولا مكانك هنا...هتكون مين يعنى..أكيد واحد تانى ومكانك هنا بردك

أنفجرت فى شمروخيل : أسكت أحسن..أرجوك أسكت ..أنت جي تكحلها أهو نيلتها زياده

[مدحت الصياد]

أنفجرت فى شمروخيل : أسكت أحسن..أرجوك أسكت ..أنت جيت تكحلها أهو نيلتها زياده

أبتسم شمروخيل فى ود حقيقى قائلاً : أنا عندى فكرة ...هى فكرة شنيعه شويه..ومش سهله خالص ...بس هى تنفع فى الحاله بتاعتك دى....وهتكون بالنسبة لك ..طوق النجاة

أسرعت بالقول له : أتحفنى بفكرتك عالله يطلع مالمخ بتاعك ده اللى ذى مخ البقر حاجه تنفع

أستشاط شمروخيل غضبا صارخاً فى العبد الضعيف الواقف أمامه : يعنى أنا بفكر علشانك وأنت نازل فيا دبح وتريقه..خلاص ...بح ...مافيش أفكار ولا غيره ..أصلك وش نحس ومينفعش فيك المعروف ولا الخدمه يابنى أدم أنت ..أف عليك وعلى لسانك ده اللى عامل ذى الفرئلله

أستعطفت شمروخيل قائلاً له : ياعم شوشو أنت عمرك ماهتفهمنى...أصل أنا لما أحب حد لازم أتريق عليه..وأنت بقيت بالنسبالى ..أخ وصديق...ذى ماتقول كده...روحين فى جسد واحد...

أبتسم شمروخيل قائلاً : وأنا علشان عارفك كويس وعارف أنك طيب ومتستحق جهنم ولا تستحق حتى أقل ساحه فيها هقولك على الفكره..أسمع كويس ..ومتقاطعنيش لحد لما أخلص كلامى...موافق؟؟؟

قلت له بسرعه : طبعاً ...موافق

التفت لى وهو يقول : أنت دلوقتى عايز تعرف مين أنت....وعايز تعرف اللى مات ده هو الصياد والا ..لا...وعايز تعرف لو هو مات ..هل هو روحك دى اللى واقف أنا دلوقتى وبكلمها.... ولا حصل لبس وأنت روح حد تانى...صح؟؟

قلت له بسرعة : صح

قال : طب ؛احنا ..دلوقتى عندنا أجتماع كل خمس سنين بعمر الارض ..أجتماع موسع بيحضره كل الشياطين وجنود أبليس ..اللى هنا فى جهنم..واللى هناك شغاله عالارض...تقوللى الاجتماع ده ليه؟؟...أقولك ليه....علشان بنشوف عملنا أيه خلال الخمس سنين اللى مرت مع البنى أدمين ووقعنا كام نفس لهنا...وضاع من بين أيدينا كام نفس ...وكمان بنشوف الافكار الجديده والخطة الخمسية الجديده بتاعة جهنم وشياطنها

ضحكت من كل معميعى قائلاً : بتقول خطة خمسيه!!!...أنتم هنا كمان عندكم حرمية؟؟

رد قائلاً : مش فاهم ؟..أنا أقولك خطة خمسية وأنت تقول عندكم حرميه ؟..أيه كلامك العبيط ده

قلت له وأنا مش قادر أسكت من الضحك: أصل عندنا عالارض أو بمعنى أدق عندنا فى مصر ..معروف أن مادام هناك خطة خمسيه للحكومة هيبقى فى البلد سرقة خمسيه للشعب ...يعنى الخطة الخمسية تساوى سرقة خمسيه للبلد

أبتسم شمروخيل قائلاً : ده أنت مفقوع قوى من حكومتك اللى فى بلدك!!

أنا : طبعاً ..ده شىء مفروغ منه..مش أنا وبس اللى مفقوع منهم ..ده الشعب كله..وكلنا عارفين أنهم حرمية ولاد ستين والا بلاش ...والحاجه الغريبه أننا مستحملين؟؟..ليه؟..ماعرفش

شمروخيل : صياد ..أنت كده توهتنى خالص..لو سمح شرك تسكت وتكتم لحد لما أخلص الخطة بتاعتى..أنا كنت بقول أيه؟؟..كنت بتقول أيه ياواد ياشمروخيل ؟.كنت بتقول أيه ياواد ياشوشو ؟؟؟..أيوه أفتكرت ..أنا كنت بقولك عالاجتماع اللى كل خمس سنين ده

قلت له : طب وأنا مالى ومال أجتماع كله ناس شياطين ذيوكم؟؟!!!...ومال الاجتماع ومال مشكلتى هنا

شمروخيل : أصبر على ياصياد شويه..ولتانى مره بقولك متقاطعنيش أرجوك

أمسكت شفتاى بيدى علامه الكتم والسكوت فأكمل : اللى أنت متعرفهوش هو ..فى الاجتماع ده ..اللى هيكسب رضا وأستحسان أبليس هيكون على رأس الحمله الجديدة عالارض ..وشوف أنت بقى لو أستطعت أنا وأنت أننا نجيب أفكار أو فكرة وحده لخداع البنى أدمين تكون فكرة جديدة هننزل للارض ..وبرضا أبليس وهناك بقى ياحلو...هنعرف سيادتك أو اللى أسمه الصياد ده مات فعلاً والا موجود وساعتها روحك هى اللى هتدلنا على مكان جسدك الحقيقى وهنعرف ساعتها أنت روح مين؟؟

قلت له بتريقة ونرفزه : ياروحي على أفكارك ..أنت عايزنى أدخل أجتمعكم ده وأتكلم وكمان أخترع فكرة جديدة وأغلب شياطين الكون فى الافكار الشريرة وأضحك كمان على أبليس نفسه ؟..أنت شيطان عبيط والا أهبل والا شكلك هو اللى كده؟!!!..أيه الذكاء والعبقرية اللى بتشر من مخك

شمروخيل : أيه اللى مزعلك من فكرتى..أنت خايف أبليس يعرفك؟

قلت له : ..مش أبليس بس اللى هيعرفنى ياغبى..ده من أصغر عيل فى الاجتماع لاكبر نطع عندكم هيعرفنى ياذكى..

__________________

[مدحت الصياد]

ضحك شمروخيل قائلاً : اللى سيادتك متعرفهوش عنى ..أنى أكبر شيطان فى الخداع

أنا : عارف..عارف ..أتنين دكتوراه فى خداع البشر..أتشرفنا قبل كده يادوك....طوووور

شمروخيل: مش كده وبس..ده الظاهر..ياعبد الظاهر..
أما الباطن والمخفى من تجاربى هى كيفية خداع الشياطين وجنود أبليس ..وأبليس ذات نفسه ياحلو

نظرت فى وجه الدكتور شمروخيل قائلاً له فى دهشه حقيقيه : أيه ده..يخرب مطنك....دة أنت..دة أنت مصيبة مسيحة..ده أنت عبقرى زمانك..ده أنت هتودينى الهاويه حدف..أنت فاكر أن عقلى ياشمروخيل النحس أنت هيصدقك ويصدق تخريفك دى..تبقى بتحلم لو فاكرنى همشى ورا هبلك وكلامك اللى ملهوش عنوان غير<العبيط أهو..العبيط أهو>

شمروخيل : بقولك أيه..أنت وخدنى مقاوله فى التريقه ياصياد الغم أنت..أنت تسمع وتنفذ بس ..وصدقنى أنا علشان بحبك..أقصد علشان حبيتك وبقيت ذى الشريك المخالف معايا هتشجع وهساعدك..هو أنا يعنى هاخد حاجه والا هكسب حاجه من وراك؟؟..ها...رد

هرشت ولاول مره أهرش مثل شياطين جهنم..ثم قلت : طب أنت هتساعدنى ومتبرع بالمساعده دي ليه؟

شمروخيل : أولاً بصراحة كان نفسى من زمان أعرف أختباراتى وتجاربى على خداع الشياطين ناجحه والا ..لا...وكمان حظى الحلو أن الكل بما فيهم أبليس شخصياً هيكون موجود..يبقى حجر هصطاد بيه مش عصفور واحد دول ملايين العصافير والغراب بتاعهم كمان

أنفجرت فى شمروخيل قائلاً : ياليلتك السوده..أنت عايز تجرب تجربك معايا ياشمروخيل ؟؟..هو أنت أول مره تعمل اللى بتقول عليه ده ؟

شمروخيل : لا..لا طبعاً أنا عملت خدع كتير فى الكل بس المرادى هتكون اللعبه الكبيره..أو الخدعه الكبره..وكمان فيه سبب تانى مخاللينى أساعدك..عارف ليه؟؟

أنا : مش عارف يادكتور؟

شمروخيل : علشان أنت ياصياد علمتنى من غير ما تحس الشجاعة ..أنا فعلاً بعترفلك بكده..أنا كنت ناقصنى الشجاعه قدام أبليس وأى موضوع بكون فيه بتلخبط وتضيع منى نفسى وبكون ..

قلت له : أيوه أيوه ..معلوم..وبتكون مدهول وجبان

شمروخيل : علشان كده أنا هساعدك...ودلوقتى بلاش تضييع وقت ..اللى هقولك عليه أعمله من غير سؤال ماشى؟

رجعت للموضه بتاعة جهنم..وهرشت ثم قلت : ماشى

شمروخيل : غمض عنيك ياصياد وأوعى تفتح الا لما أقولك

وفعلاً غمضت وأحسست بلهيب نار يحتوينى من أعلى رأسى لاخمص قدمى...وبعدها أرتفعت شدة هذا اللهيب وكأننى دخلت فى فرن للخبز البلدى...نار رهيبه لا تحتمل ولكننى أحتملتها..كيف ؟ لا أعلم.!!...أستمر الموضوع أكثر من عشر دقائق وأنا مولع ...ومغمض عينى ..ولم أستطع أن أفتحهم لاننى خفت أن أنظر لنفسى فأجدنى ملهلب بالنار...وبعد عشر دقائق أخرى صرخت فى شمروخيل وأنا مغمض العينان : ياعم شمروخيل مش كفايه..أنا حاسس أننى جوه فرن عيش بلدى وأنى بقيت ذى العيش المحمص..أرجوك مش عايز أبقى عيش محروق...أرجوك كفايه ..أنا ورمت وفئفئت..أنا أستويييييييت


وفجاءه أختفى اللهيب الذى كنت أشعر به وأحسست بطراوى جهنم الحلوه ونسمة هواها العليل اللى يرد الروح..وسمعت شوشو وهو يقول لى : خلاص الخدعه كملت ..فتح عنيك بقى ياصياد..أقصد ياشيطان صياديل

فتحت عيناى ..وأنا أحس بشىء غريب عجيب قد حدث لى..أى هو..؟؟؟معرفش

نظرت لشمروخيل : أنت بقى عملت فى أيه؟..وأيه هى الخدعه اللى هتنطلى عالجميع فى الاجتماع المهبب بتاعكم ده و..

قاطعنى شمروخيل وهو يعطينى مرايا قائلاً : بص على نفسك أيها المشرف الجهنمى صياديل

أمسكت المرايا بصعوبه ونظرت على سطحها....فلم أجد الصياد ...بل ...بل وجدت

وهنا أغمى على من هول ما شاهدت على سطح تلك المرايا الملعونة

____________________________

وغداً مع أحداث جديدة

تحياتى

الصياد

__________________

[Rawan Abu-Aita]

فكرتك غريبة كتير و كتيير حلوة شكرا على القصة و الى الامام

[مدحت الصياد]

فكرتك غريبة كتير و كتيير حلوة شكرا على القصة و الى الامام

أشكرك أختي على مرورك و متابعتك للقصة

أسفل جديد من الاحداث

محبتي

الصياد

[مدحت الصياد]

نظرت لوجهى فى تلك المرايا بعدما أفاقنى شمروخيل ...وحاولت أن أتماسك ..وحاولت أيضاً أن أمسك نفسى حتى لا أقتل ذلك الشيطان السادى ...الذى يعشق التعذيب ويحب تشوية خلق الة....فلم أتمالك أعصابى مما أشاهدة بعين رأسى ..رأسى التى تحولت لرأس غول رهيب ...كثيف الشعر ذو أنياب بارزة ...ومدت نظرى أقصد نظر الغول هذا لكامل جسدى..جسدى الذى أصبح مثل جسد طائر خرافى يسمى الرخ...فكل جسدى مملؤبالريش الكبير...لقد أصبحت مريش ....أما أطرافى..يدأى وأرجلى...فلقد حدث لهم تشوة رهيب فأحسست أنهم لشيطان من طراز الشياطين الحمر<طبعاً مش النادى الاهلى ...>وكل هذا مغلف بصوت غاية فى النفووور ..وكأننى قد ركب لى زمارة ضفدع بدل من زمارة الصياد....أعطنى الصبر والسلوان يارب الكون....هذا الاعمى المدعو شمروخيل ..تلاعب بى وتفنن فى لخبطة خلقتى ...أة ياوجهى الجميل فيما مضى...أة ياجسدى النحيل فيما مضى...أة ياأطرافى الرشيقة أيضاً فيما مضى ...قمت من سقطتى وهجمت على هذا السفاح المجنون ولاول مرة أستطعت أن أرفعة من على الارض بيد واحدة ثم صرخت فية بصوتى الغريب الذى يشبة ضفدع عالمعاش قائلاً لة :

ربنا يخدك أكتر ماهو وخدك...الهى تتلعن أكتر مانت ملعون ياغبى...يا...يا...يا

__________________

فلم أستطع أن أكمل كلامى بهذا الصوت الشنيع فتركت المخبول شمروخيل وجلست فوق أقرب صخرة ...ووضعت يداى على

وجهى ..بضع ثوانى..ولكننى أكشعر بدنى من ملمس يداى فصرخت كالمجنون وأنا أجرى خلف شمروخيل..الذى وللحق قد

صبر على كثيراً فلم يتكلم أو تخرج منة أى عيبة فى حقى ...وهل كان فى مقدورة حتى أن يتنفس أمام ذلك الغول الرهييييب

الذى هو أنا...وبعد أن تعبت من الجرى حتى وقفت وهو ينظر لى من بعيد لبعيد ...حتى تأكد أننى قد أصبحت عاقل مثل

الشياطين..فأقترب منى وهو يقول بخوف ورعدة: أنا مش هقولك أي حاجة فى البهدلة وقلة القيمة اللى أنت عملتهم

فى...وكمان أنا عذرك على كل حاجة..أنا كنت عامل حساب كل دة...بس متاخفش كدة..دى حاجة بسيطة خالص ...وبعد

موضوعك ما يخلص صدقنى هترجع لشكلك القديم ...وغير كدة وكدة ..أنت هنا هتعرف قيمة شكلك دلوقتى
قلت لة بصوت الضفدع : ياسلام!!!!...يعنى أنت ملاقتش أشنع ولا أبشع ولا أتنح من الشكل دة وتحطنى جواة؟؟

ضحك شوشو قائلاً : دة أنت شكلك دة فية كل المواصفات الكاملة لاجمل شيطان...دة أنت يابنى اللى هيشوفك هيقع فى حبك من أول غزة...سبحان من صور...كامل من مجميعة...أحلى وجة...على أرشق جسم...على أقوى أطراف ودة كلة متوج بصوت الارق والنعيق...تصدق بأية ياصياديل؟؟
قلت لة فى غيظ : أصدق باللة طبعاً
شكلك دة اللى مش داخل دماغك...الشياطين كلها هتحسدك علية..دة فية شياطين بتعمل عمليات تجميل كتير علشان يملكوا ولو عشر اللى عندك فى هيئتك دى.... ياسلام....ما أبشعك...ما أفزعك...ما أرهبك...رهيب واللة رهيب

قلت لة وأنا بين العقل والجنون : أنت هتغنهالى كمان...ماعرفنا أنى بقيت أشنع من شكل أمنا الغولة...وأبو رجل مسلوخة

أقترب أكثر قائلاً : أيوة أهو شكلك دلوقتى واخد من الاتنين..يعنى أنت كوكتيل أمنا الغولة وأبو رجل مسلوخة حتة وحدة...شفت أنا عملت فيك معروف قد أية

وفجاءة نظر لسماء جهنم ثم قال فى لهفة: ياةة ياصياد ..أحنا أتأخرنا عالمؤتمر..والاجتماع قرب يكمل أعضاءه...ياللا بينا ...

__________________