صفقة مع أبليس { بقلم الصياد }

[مدحت الصياد]

رد رجائى : مش عارف...ممكن يكون العفريت ده خلاص هرب ومش هيرجعلى تانى

اقترب الصياد من صديقه قائلاً فى غموض: طب لو رجع تانى..هتعمل معاه أيه ياحلو؟

طقطق رجائى برأسه للارض وهو يقول : مش عارف..بجد ياصياد مش عارف...أنت تعرف ممكن أعمل مع المصيبة دى أيه..وأتصرف مع عفركوش ده أذاى؟؟

نظر الصياد لرجائى بشدة وهرش ثم قال : أسمعنى أنت بقى ياصاحبى..وأفهم الكلام اللى هقولهولك كويس

أنتبه رجائى لصديقه بشدة ..فقام الصياد من مكانه وفتح باب الحجرة ونظر خارجها حتى تأكد من عدم وجود أحد فى المنزل ..فأغلق الباب ثم أقترب من صديقه قائلاً له بلهجة جاده ونبرة هادئة :يارجائى..الراجل الغريب اللى طلعلك أمبارح باليل ده مش عفريت ولاحتى عفركوش بتاع فيلم أسماعيل يس
وقبل أن ينطق رجائى أسكته الصياد بيده مكملاً : سيبنى أكمل أرجوك ياصاحبى..سيبنى أكمل
اللى طلعلك يارجائى ..هو..هو ذى ما قلك بالظبط...رئيس هذا العالم...صوت الغريب...سلطان الهاوية...حاجات كتييير قوى...اللى طلعلك من الاخر كده هو فعلاً أبليس ذات نفسه

أضحى رجائى كالتمثال لا يتحرك بتاتاً..وبعد فترة من الوقت والصديقان صامتان يحدقان فى السراب ..حتى كسر الصمت رجائى الذى تنهد قائلاً : ياصياد..أرجوك..مش عايز تريقه ولعب بأعصابى..هو أنت علشان مش مصدقنى فى حكايتى وفاكرنى بسرح بيك أو بهتش عليك تقوم تسرح أنت كمان بعقلى وتقوللى .... اللى المجنون ده قاله

أبتسم الصياد قائلاً : أولاً ..أنا قلتلك أنى فعلاً مصدقك...هتقوللى ليه أنت مصدقنى كده علطول؟..هقولك علشان أنا كانت لى حكاية قريبة من حكايتك...بس مش وقته تعرفها دلوقتى..ثانياً..أنت ليه مش عايز تقتنع بأنه أبليس مش عفريت؟...

رد رجائى بسرعة : علشان مستحيل أبليس يكون بالشكل ده.!!.ده لو أبليس حقيقى كان شكلة أكيد حاجة متتبلعش مش راجل وبدله وجرافته..ده عامل ذى رجال الاعمال بتوع السيما..مش تقولى أبليس؟

رد الصياد وهو يضحك : أنت يعنى عارف شكل أبليس الحقيقى أيه؟..والا شفت شكله قبل كده علشان تحكم على اللى طلعلك ده؟؟....

رد رجائى : ويعنى أنت اللى شفت شكل والا عارف لابليس شكل قبل كده..تكنش ضارب معاه صحوبية وأنا معرفش ياواد ياصياد

ضحك الصديقان بشدة ...وفى قمة الضحك والقهقهة قال الصياد لصديقه : أنا فعلاً شفت أبليس بوشه المزيف وكمان لمحته بشكله وهيئته الحقيقية

صمت رجائى من تلك الكلمات التى أرعبته ثم أنفجر فى صديقه الصياد: ماشى ياصياد..أنت مش ناوى تجبها البر معايا ..!!خلاص ياعم أنت أنسى أى كلام أنا قلتهولك..وأتفضل أطلع شقتك فوق ومش عايز أشوف وشك لمدة أسبوع..قاصدى لمدة يومين..

الصياد : شفت ..أهو أنت هو اللى مش مصدقنى دلوقتى...بص يارجائى..أخر كلام أقدر أقولهولك ياصاحبى أنك لو لا قدر القدر على رأى واحد صاحبى أسمه شمروخيل وطلعلك تانى العفريت أو أبليس أو قول ذى ما تحب..أهم حاجه تخاللى بالك من كل كلامه معاك..وأوعى يارجائى يضحك عليك ولو تقدر تقوللى ساعتها ..نقدر نتصرف

خرج الصياد من عند صديقه رجائى الذى ركبه الرعب والرهبة..وأصبح يتلفت حوله كالمجنون ...ومع مرور الايام نسى رجائى كل ماحدث..بل وأقتنع بأنه كان يحلم أو يهلوس متأثراً بالحاله النفسية التى يحياها

حتى كانت ليله من ليالى الصيف الحارة.. وكان رجائى يجلس فى نفس موضعه على كورنيش النيل بعد منتصف الليل

وكان مشغول وغائص بكل كيانه مع أفكاره القاتمة ..كان فى دنيا وعالم تانى ..يفكر فيما هو يستطيع أن يفعله للخروج من حالة الفشل المزمن والمستمر فى حياته..هائم مع أحلام اليقظة وكيف أنه يتمنى أن يريح والدته وأن يرد الديون المتراكمة عليهم منذ سنوات....وحتى هذه الشقة كانت تحتاج للتجديد..لا..ليس التجديد بل تحتاج للهدم والبناء من جديد ..فكر فى كل شىء...ونظر بعين خياله فى كل موضوع
ولكنه لم يفكر فى هذا القادم اليه بهدوء وثقة ودهاء شنيع

لم يلمح الغريب ..أو يشعر به الا عندما أصبح فوق رأسه بالضبط

وهنا رفع رجائى نظره للخلف حتى ينظر عما يقف خلفه..فشهق عندما وقع نظره على ذلك العفريت..

شهق شهقة الرعب والمفاجاءة

وسقط مغمى عليه.
فوق كورنيش النيل وبعد منتصف الليل

[مدحت الصياد]

وغداً مع جديد الاحداث

وشكر من كل قلبي على كل من شارك و رد في هذا الموضوع

وبمشيئة الرب سأـكون عند حسن الظن بي

محبتي

الصياد

[مدحت الصياد]

أخوتي الاعزاء ...لقد حدث خطأ غير مقصود ...هنا ستجدون فقرة لم يتم كتابتها من القصة و سقطت سهواً

القطعة الناقصة هي بعد مشاركتي رقم 8 وهي موجود الان أسفل تقبلوا أعتذاري :

_____________________________________

أفاق رجائى ..بعد فترة ليست بقصيره ليجد أمامه أمه..وصديق عمره الصياد..وهم يبتسمون له فى أرتياح ..فقام جالساً من رقدته فوق فراشه وهو يتلفت حوله فى خوف ظاهر قائلاً : هو..هو راح فين؟؟

ربت الصياد على أكتاف صديقه قائلاً له: مين ده يارجائى اللى بتدور عليه هنا؟!..مافيش غيرى أنا وولدتك؟
أقتربت أمه من رأسه وهى تمسحها بزيت قد جلبته معها فى أخر زيارة لها لدير السريان...ورشمت بالزيت علامة الصليب على جبهته...ثم قالت له:مالك يابنى..مالك ياحبيبى ؟؟..أنا أول مرة أشوفك كده؟؟

ضحك الصياد وهو يقول لها: معلش ياخالتى...أحنا نسيبه دلوقتى..علشان ينام ..ده أحنا الفجر ..والدنيا لسه ضلمة..ولما يصبح الصبح..بأذن يسوع هجيله وأقعد معاه شوية

التفت رجائى للصياد قائلاً لة : أنت جيت الساعادى ليه ياصياد؟؟..حصل حاجه ؟؟

أبتسم الصياد وهو يخرج من باب حجرة رجائى قائلاً فى مرح:أصل أنا شفتك وأنت راجع قبل الفجر بتجرى..فخفت يكون فيه حاجه..وأشكر ربنا ..أنى نزلت ولقيت أمك بتستنجد بى علشان حضرتك كنت مغمى عليك..سلام دلوقتى

وفعلاً خرج الصياد..وأغلق الباب

التفتت الام لابنها قائلة له: أنت كويس دلوقتى يابنى؟؟

رد قائلاً : أشكر ربنا..أصل أنا باين على كنت بهلوس والا حاجه..روحى ياأمى نامى..وأنا هنام كمان

وفعلاً ذهبت الام..وأغلقت باب الحجرة ..ونام رجائى وهو ينظر للسقف..ويفكر عما حدث له..وهو يتلفت حوله في الظلام
وسؤال يعتمر في نفسه سؤال واحد
هل هذا كله كان حلم.أم كان حقيقة؟..أم..أم...أم...وأستولى على رجائى التعب والارهاق فسبح فى بحر الاحلام وغرق فى النوم بسرعة

[Nahla Nicolas]

16NG1_~1.jpg

WONDER~1.jpg
GOD_BL~1.jpg

بإنتظار التكمله

[مدحت الصياد]

تحت نهر النيل
_________

أفاق رجائى ليجد نفسه فوق أحد المقاعد الاسمنتية الموجودة على الكورنيش...وقبل أن يلتفت حوله وجده....وجد أبليس وهو يقف أمامه واضعاً كلتا يديه فى وسطه ..وكأنه منتظر هذا الراقد حتى يفيق.. قائلاً له فى قوة وغيظ :أحنا مش هنخلص بقى من موضوع الاغماء ده كل مرة...يادى النيلة..هو أنت أيه يابنى مستودع رعب ...مخزن أغماء....

هنا قام رجائى وجمع كل شجاعته أو ما تبقى من وهم الشجاعة لديه وهجم على ذلك التنح الدائم الظهور له بدون أستأذان..ولكن يالا المفاجاءة المخزية ...لقد قبض رجائى على سراب ..فسقط من أعلى سور الكورنيش ليقع فى النهر..نهر النيل
ولولا أنه يعرف العوم فى النيل لغرق من وقته..فماء النيل بلا أمواج مثل البحار فالعوم فيه أصعب بمراحل والماء ثقيل بشده وهناك أيضاً دوامات مائية من الممكن أن تبلع فيل وتغرقه لاسفل سافلين فى قاع النيل....سبح رجائى..كثيراً ..ولكنه كلما سبح كلما أبتعد عن الشاطىء..او السور ..حتى ضربه الاعياء والاجهاد.. فترك نفسه برهة من الوقت حتى يستريح ..وكانت اللحظة المنتظرة من أبليس ..هيج عليه واحدة من أكبر الدوامات النيلية الخطرة...فأسرعت اليه تلك الدوامة فاتحه فمها لتبتلع صاحبنا رجائى ..الذى ما أن شاهدها حتى بدء فى ضرب الماء بكل قوة بيديه وأقدامه ولكن كانت تلك الدوامة أسرع وأقوى وأكبر من كل محاولات هذا المنحوس رجائى..الذى أقتربت منه الدوامة بشدة وسرعة..وهو يحاول ويحاول ويجاهد حتى لا تبتلعه..يضرب الماء وكأنه يضرب ويحفر فى الصخر ولكنه أحس أنه يسحب للخلف ويدور ويدور ويدور بقوة وسرعة ...حتى أصبح فى منتصف الدوامة وفى مركزها بالضبط ..وهنا شاهد الماء يعلو ويعلو حتى أختفت مشاهد المبانى والسماء أمام عينيه وحاول أن يستجمع ما تبقى من ذخائر قوته ..ولكنه فشل فشل ذريع..وغرق رجائى فى الماء..

___________________________


قام الصياد من نومه فى فزع على صوت دقات متصلة ملتاعة متسرعة ..وما أن فتح الباب حتى وجد أم رجائى تصرخ فى الصياد قائلة له:
الحقنى ياصياد يابنى...
رد عليها الصياد فى فزع ودهشة : فى أيه ياخالتى؟؟..حصل أيه ؟؟

قالت له وهى تئن وتبكى وترشم الصليب بأستمرار: أبنى رجائى من ساعة ما خرج ذى كل يوم باليل ولحد النهارده مارجعش ..دي أول مرة يعملها..بسم يسوع..أنا خايفه قوى عليه..خليكى معاه ياأم النور..خليك معاه يامارجرجس...خليك معاه يايسوع ورجعهولى..أعمل أيه ياصياد يابنى..أعمل أيه دلوقتى ..أروح فين وأدور عليه أذاى..ده أحنا ملناش حد هنا خالص ...<وبكت الست مريم >
شجعها الصياد وهو ينتعل حذائه قائلاً : ماتخفيش كده ياخالتى..أبنك عامل ذى القط بسبع ترواح..أنت أنزلى فى شقتك وسبينى أنا هعرف أدور عليه ..وبأذن يسوع هرجع وهو فى أيدى

وفعلاً نزل مدحت الصياد يبحث عن صديقه رجائى فى كل مكان....ومرت الساعات ولكن الصياد لم ينجح فى معرفة مكان صديقه رجائى حتى أنتصف ليلة ذلك اليوم..ورجع الصياد فى حزن ودهشة لا يعرف ماذا سيقول لام رجائى ؟؟!!

دق الصياد جرس باب شقة رجائى ففتحت الست مريم باب الشقة..وهي تقول للصياد بكل توسل وسرعة: أيه يابنى..؟أيه اللى أخرك كدا ؟؟.وفين رجائى ياصياد يابنى؟..أنت عرفت مكانه فين؟؟.طب هو مجاش معاك ليه؟؟.يكنش واقف بره؟؟
وفعلاً خرجت الست مريم تبحث خارج باب الشقة عن أبنها ولكنها رجعت قائلة للصياد الذى جلس محبط متعب : فين رجائى ياصياد؟؟
تنهد الصياد قائلاً وهو يحاول أن يجعل صوته طبيعى : ياخالتى...أكيد هيظهر
أكيد..يعنى هو عيل صغير؟..

سقطت الام فوق أقرب مقعد وهى تنوح قائلة: يعنى معرفتش مكانه فين؟؟!..يعنى أبنى ضاع منى ؟؟
ربت الصياد على أكتافها قائلاً : أيه الكلام ده اللى أنتى بتقوليه ياخالتى؟..أنتى ست مؤمنة...خللى عندك أيمان بيسوع

رفعت الام عيناها لصوره للراعى الصالح معلقة عالحائط أمامها وهى تقول:

أيوه أنا أيه اللى بقوله ده..؟؟سامحنى يايسوع..أنت الراعى الصالح اللى بيهتم بكل خرفانه..أنت أحن لرجائى حتى منى أنا أمه ..أنت...

وهنا رن جرس الباب فأسرع الصياد بفتحه واجداً شرطى من قسم الشرطة فقال له هذا الشرطى :هنا منزل الست مريم عبد المسيح صليب
رد الصياد بسرعة : أيوه هو العنوان ...فيه أيه؟
قال له الشرطى: الست المذكورة مريم عبد المسيح مطلوبة قدام حضرة ظابط القسم
رد الصياد بدهشة : دلوقتى فى نص الليل كده؟؟..هو فيه أيه وعايزنها دلوقتى ليه..أنتم لقيتم أبنها الغايب ؟

رد الشرطى : أنا معارفش حاجة أنا كل اللى أعرفة أنها لازم ولابد تروح دلوقتى

قامت الست مريم وهى تقول للشرطى : أروح القسم يابنى؟
رد الشرطى : لا ياحاجه..قاصدى لا يامقدسه..تروحى مستشفى الساحل

صرخت أم رجائى وهى تسقط على الارض : يبقى أبنى حصله حاجة...ياحبيبى يابنى..ياحبيبى ياضنايا
__

[مدحت الصياد]

الدموع
________

وفعلاً ذهبت أم رجائى هى والصياد لمستشفى ساحل روض الفرج ..ودخلا ليستقبلهم ضابط القسم قائلاً : مين فيكم ألست أم رجائى
نظر له الصياد نظر الغيظ والقهر قائلاً له : يعنى حضرتك شايف أيه قدامك؟..هكون أنا أم رجائى يعنى؟؟
صرخت الست مريم : أنا يابنى..أنا أم رجائى..في أيه يابنى..أبنى حصلتله حادثه والا حاجه وحشه لاسمح الله..رد يابنى..رد أرجوك

تكلم الضابط بنبرة عطف وحزن قائلاً : تعالى ورايا ياأمى
وذهب الجميع خلف الضابط الذى ترك كل حجرات الاستقبال ووقف فى منتصف ردهه طويلة وهو يعطى لام رجائى بطاقة شخصية قائلاً فى حنان: هى دى بطاقة أبنك رجائى ..خطفت الست مريم من الضابط البطاقة وهى تقبل الصورة الموجودة لابنها قائلة: أيوه هى..
قدم لها أيضاً حافظة نقود قائلاً لها: والمحفظة دى بتاعته كمان؟
أخذت المحفظة وقالت : أيوه يابنى حتى صورة العدرا فيها أهى
أنفجر فيه الصياد قائلاً : ماتعرفنا في أيه؟؟.وقولنا حصل أيه لرجائى أرجوك..كفايه لعب بأعصابنا
نظر له الضابط فى قوة ثم خفض وجهه قائلاً : طب تعالوا ورايا

مشى الصياد والست مريم وراء الضابط الذى أنهى الردهة وفتح باب لحجرة مكتوب عليها

< مشرحة المستشفى>

رفع الصياد نظره لليافطة وعندما وقع عيناه عليها وقرأ ما بها حتى جلس على الارض .فى شناعة وكأنه منزل قد ضربه زلزال رهيب
حتى اللحظة لم تعرف الست مريم ماهى تلك الحجرة التى دخلت فيها..وفى خارج الحجرة أنتظر الصياد وهو ساقط على الارض لحظات حتى سمع صرخة حزن رهيبة..صرخه لم يسمعها حتى وهو فى جهنم مع شمروخيل
قام الصياد من سقطته وتماسك بقدر ما أستطاع ودخل تلك الحجرة المرعبة وهنا وجد أمامه أم رجائى ساقطة على جثة ...أقترب منها ناظراً بتردد لتلك الجثة فوجدها لصديق عمره..وزميل الوكسة الازلية فى البحث عن مستقبلهم..ولكن ضاع عمر رجائى..مثلما ضاع من قبله مستقبله
بكى الصياد بحرقة بكاء ملتاع شديد البأس ..بكاء من فقد الدنيا كلها ..بكى بدموع ساخنة بدموع القهر والعجز والاحباط...بكى لفقده أخر من أحب ...بعدما فقد فى الماضى البعيد أبيه وأمه فى حادثة قديمة..فلم يبقى معه غير رجائى الذى أصبح هو كل من يعرف فى الدنيا..وحتى هذا الوحيد الذى يستريح معه فقده هو الاخر فى لحظة مرعبة صعبة حتى على أقسى القلوب والافئده
__________________