صفقة مع أبليس { بقلم الصياد }

[مدحت الصياد]

وغداً مع جديد الاحداث

وشكر من كل قلبي على كل من شارك و رد في هذا الموضوع

وبمشيئة الرب سأـكون عند حسن الظن بي

محبتي

الصياد

[مدحت الصياد]

أخوتي الاعزاء ...لقد حدث خطأ غير مقصود ...هنا ستجدون فقرة لم يتم كتابتها من القصة و سقطت سهواً

القطعة الناقصة هي بعد مشاركتي رقم 8 وهي موجود الان أسفل تقبلوا أعتذاري :

_____________________________________

أفاق رجائى ..بعد فترة ليست بقصيره ليجد أمامه أمه..وصديق عمره الصياد..وهم يبتسمون له فى أرتياح ..فقام جالساً من رقدته فوق فراشه وهو يتلفت حوله فى خوف ظاهر قائلاً : هو..هو راح فين؟؟

ربت الصياد على أكتاف صديقه قائلاً له: مين ده يارجائى اللى بتدور عليه هنا؟!..مافيش غيرى أنا وولدتك؟
أقتربت أمه من رأسه وهى تمسحها بزيت قد جلبته معها فى أخر زيارة لها لدير السريان...ورشمت بالزيت علامة الصليب على جبهته...ثم قالت له:مالك يابنى..مالك ياحبيبى ؟؟..أنا أول مرة أشوفك كده؟؟

ضحك الصياد وهو يقول لها: معلش ياخالتى...أحنا نسيبه دلوقتى..علشان ينام ..ده أحنا الفجر ..والدنيا لسه ضلمة..ولما يصبح الصبح..بأذن يسوع هجيله وأقعد معاه شوية

التفت رجائى للصياد قائلاً لة : أنت جيت الساعادى ليه ياصياد؟؟..حصل حاجه ؟؟

أبتسم الصياد وهو يخرج من باب حجرة رجائى قائلاً فى مرح:أصل أنا شفتك وأنت راجع قبل الفجر بتجرى..فخفت يكون فيه حاجه..وأشكر ربنا ..أنى نزلت ولقيت أمك بتستنجد بى علشان حضرتك كنت مغمى عليك..سلام دلوقتى

وفعلاً خرج الصياد..وأغلق الباب

التفتت الام لابنها قائلة له: أنت كويس دلوقتى يابنى؟؟

رد قائلاً : أشكر ربنا..أصل أنا باين على كنت بهلوس والا حاجه..روحى ياأمى نامى..وأنا هنام كمان

وفعلاً ذهبت الام..وأغلقت باب الحجرة ..ونام رجائى وهو ينظر للسقف..ويفكر عما حدث له..وهو يتلفت حوله في الظلام
وسؤال يعتمر في نفسه سؤال واحد
هل هذا كله كان حلم.أم كان حقيقة؟..أم..أم...أم...وأستولى على رجائى التعب والارهاق فسبح فى بحر الاحلام وغرق فى النوم بسرعة

[Nahla Nicolas]

16NG1_~1.jpg

WONDER~1.jpg
GOD_BL~1.jpg

بإنتظار التكمله

[مدحت الصياد]

تحت نهر النيل
_________

أفاق رجائى ليجد نفسه فوق أحد المقاعد الاسمنتية الموجودة على الكورنيش...وقبل أن يلتفت حوله وجده....وجد أبليس وهو يقف أمامه واضعاً كلتا يديه فى وسطه ..وكأنه منتظر هذا الراقد حتى يفيق.. قائلاً له فى قوة وغيظ :أحنا مش هنخلص بقى من موضوع الاغماء ده كل مرة...يادى النيلة..هو أنت أيه يابنى مستودع رعب ...مخزن أغماء....

هنا قام رجائى وجمع كل شجاعته أو ما تبقى من وهم الشجاعة لديه وهجم على ذلك التنح الدائم الظهور له بدون أستأذان..ولكن يالا المفاجاءة المخزية ...لقد قبض رجائى على سراب ..فسقط من أعلى سور الكورنيش ليقع فى النهر..نهر النيل
ولولا أنه يعرف العوم فى النيل لغرق من وقته..فماء النيل بلا أمواج مثل البحار فالعوم فيه أصعب بمراحل والماء ثقيل بشده وهناك أيضاً دوامات مائية من الممكن أن تبلع فيل وتغرقه لاسفل سافلين فى قاع النيل....سبح رجائى..كثيراً ..ولكنه كلما سبح كلما أبتعد عن الشاطىء..او السور ..حتى ضربه الاعياء والاجهاد.. فترك نفسه برهة من الوقت حتى يستريح ..وكانت اللحظة المنتظرة من أبليس ..هيج عليه واحدة من أكبر الدوامات النيلية الخطرة...فأسرعت اليه تلك الدوامة فاتحه فمها لتبتلع صاحبنا رجائى ..الذى ما أن شاهدها حتى بدء فى ضرب الماء بكل قوة بيديه وأقدامه ولكن كانت تلك الدوامة أسرع وأقوى وأكبر من كل محاولات هذا المنحوس رجائى..الذى أقتربت منه الدوامة بشدة وسرعة..وهو يحاول ويحاول ويجاهد حتى لا تبتلعه..يضرب الماء وكأنه يضرب ويحفر فى الصخر ولكنه أحس أنه يسحب للخلف ويدور ويدور ويدور بقوة وسرعة ...حتى أصبح فى منتصف الدوامة وفى مركزها بالضبط ..وهنا شاهد الماء يعلو ويعلو حتى أختفت مشاهد المبانى والسماء أمام عينيه وحاول أن يستجمع ما تبقى من ذخائر قوته ..ولكنه فشل فشل ذريع..وغرق رجائى فى الماء..

___________________________


قام الصياد من نومه فى فزع على صوت دقات متصلة ملتاعة متسرعة ..وما أن فتح الباب حتى وجد أم رجائى تصرخ فى الصياد قائلة له:
الحقنى ياصياد يابنى...
رد عليها الصياد فى فزع ودهشة : فى أيه ياخالتى؟؟..حصل أيه ؟؟

قالت له وهى تئن وتبكى وترشم الصليب بأستمرار: أبنى رجائى من ساعة ما خرج ذى كل يوم باليل ولحد النهارده مارجعش ..دي أول مرة يعملها..بسم يسوع..أنا خايفه قوى عليه..خليكى معاه ياأم النور..خليك معاه يامارجرجس...خليك معاه يايسوع ورجعهولى..أعمل أيه ياصياد يابنى..أعمل أيه دلوقتى ..أروح فين وأدور عليه أذاى..ده أحنا ملناش حد هنا خالص ...<وبكت الست مريم >
شجعها الصياد وهو ينتعل حذائه قائلاً : ماتخفيش كده ياخالتى..أبنك عامل ذى القط بسبع ترواح..أنت أنزلى فى شقتك وسبينى أنا هعرف أدور عليه ..وبأذن يسوع هرجع وهو فى أيدى

وفعلاً نزل مدحت الصياد يبحث عن صديقه رجائى فى كل مكان....ومرت الساعات ولكن الصياد لم ينجح فى معرفة مكان صديقه رجائى حتى أنتصف ليلة ذلك اليوم..ورجع الصياد فى حزن ودهشة لا يعرف ماذا سيقول لام رجائى ؟؟!!

دق الصياد جرس باب شقة رجائى ففتحت الست مريم باب الشقة..وهي تقول للصياد بكل توسل وسرعة: أيه يابنى..؟أيه اللى أخرك كدا ؟؟.وفين رجائى ياصياد يابنى؟..أنت عرفت مكانه فين؟؟.طب هو مجاش معاك ليه؟؟.يكنش واقف بره؟؟
وفعلاً خرجت الست مريم تبحث خارج باب الشقة عن أبنها ولكنها رجعت قائلة للصياد الذى جلس محبط متعب : فين رجائى ياصياد؟؟
تنهد الصياد قائلاً وهو يحاول أن يجعل صوته طبيعى : ياخالتى...أكيد هيظهر
أكيد..يعنى هو عيل صغير؟..

سقطت الام فوق أقرب مقعد وهى تنوح قائلة: يعنى معرفتش مكانه فين؟؟!..يعنى أبنى ضاع منى ؟؟
ربت الصياد على أكتافها قائلاً : أيه الكلام ده اللى أنتى بتقوليه ياخالتى؟..أنتى ست مؤمنة...خللى عندك أيمان بيسوع

رفعت الام عيناها لصوره للراعى الصالح معلقة عالحائط أمامها وهى تقول:

أيوه أنا أيه اللى بقوله ده..؟؟سامحنى يايسوع..أنت الراعى الصالح اللى بيهتم بكل خرفانه..أنت أحن لرجائى حتى منى أنا أمه ..أنت...

وهنا رن جرس الباب فأسرع الصياد بفتحه واجداً شرطى من قسم الشرطة فقال له هذا الشرطى :هنا منزل الست مريم عبد المسيح صليب
رد الصياد بسرعة : أيوه هو العنوان ...فيه أيه؟
قال له الشرطى: الست المذكورة مريم عبد المسيح مطلوبة قدام حضرة ظابط القسم
رد الصياد بدهشة : دلوقتى فى نص الليل كده؟؟..هو فيه أيه وعايزنها دلوقتى ليه..أنتم لقيتم أبنها الغايب ؟

رد الشرطى : أنا معارفش حاجة أنا كل اللى أعرفة أنها لازم ولابد تروح دلوقتى

قامت الست مريم وهى تقول للشرطى : أروح القسم يابنى؟
رد الشرطى : لا ياحاجه..قاصدى لا يامقدسه..تروحى مستشفى الساحل

صرخت أم رجائى وهى تسقط على الارض : يبقى أبنى حصله حاجة...ياحبيبى يابنى..ياحبيبى ياضنايا
__

[مدحت الصياد]

الدموع
________

وفعلاً ذهبت أم رجائى هى والصياد لمستشفى ساحل روض الفرج ..ودخلا ليستقبلهم ضابط القسم قائلاً : مين فيكم ألست أم رجائى
نظر له الصياد نظر الغيظ والقهر قائلاً له : يعنى حضرتك شايف أيه قدامك؟..هكون أنا أم رجائى يعنى؟؟
صرخت الست مريم : أنا يابنى..أنا أم رجائى..في أيه يابنى..أبنى حصلتله حادثه والا حاجه وحشه لاسمح الله..رد يابنى..رد أرجوك

تكلم الضابط بنبرة عطف وحزن قائلاً : تعالى ورايا ياأمى
وذهب الجميع خلف الضابط الذى ترك كل حجرات الاستقبال ووقف فى منتصف ردهه طويلة وهو يعطى لام رجائى بطاقة شخصية قائلاً فى حنان: هى دى بطاقة أبنك رجائى ..خطفت الست مريم من الضابط البطاقة وهى تقبل الصورة الموجودة لابنها قائلة: أيوه هى..
قدم لها أيضاً حافظة نقود قائلاً لها: والمحفظة دى بتاعته كمان؟
أخذت المحفظة وقالت : أيوه يابنى حتى صورة العدرا فيها أهى
أنفجر فيه الصياد قائلاً : ماتعرفنا في أيه؟؟.وقولنا حصل أيه لرجائى أرجوك..كفايه لعب بأعصابنا
نظر له الضابط فى قوة ثم خفض وجهه قائلاً : طب تعالوا ورايا

مشى الصياد والست مريم وراء الضابط الذى أنهى الردهة وفتح باب لحجرة مكتوب عليها

< مشرحة المستشفى>

رفع الصياد نظره لليافطة وعندما وقع عيناه عليها وقرأ ما بها حتى جلس على الارض .فى شناعة وكأنه منزل قد ضربه زلزال رهيب
حتى اللحظة لم تعرف الست مريم ماهى تلك الحجرة التى دخلت فيها..وفى خارج الحجرة أنتظر الصياد وهو ساقط على الارض لحظات حتى سمع صرخة حزن رهيبة..صرخه لم يسمعها حتى وهو فى جهنم مع شمروخيل
قام الصياد من سقطته وتماسك بقدر ما أستطاع ودخل تلك الحجرة المرعبة وهنا وجد أمامه أم رجائى ساقطة على جثة ...أقترب منها ناظراً بتردد لتلك الجثة فوجدها لصديق عمره..وزميل الوكسة الازلية فى البحث عن مستقبلهم..ولكن ضاع عمر رجائى..مثلما ضاع من قبله مستقبله
بكى الصياد بحرقة بكاء ملتاع شديد البأس ..بكاء من فقد الدنيا كلها ..بكى بدموع ساخنة بدموع القهر والعجز والاحباط...بكى لفقده أخر من أحب ...بعدما فقد فى الماضى البعيد أبيه وأمه فى حادثة قديمة..فلم يبقى معه غير رجائى الذى أصبح هو كل من يعرف فى الدنيا..وحتى هذا الوحيد الذى يستريح معه فقده هو الاخر فى لحظة مرعبة صعبة حتى على أقسى القلوب والافئده
__________________

[مدحت الصياد]

مقابلة مع الماضى
___________

مرت الايام والشهور....وجاءت أول ذكرى سنوية لرحيل رجائى من الحياة المتعبة وأنتقالة الى السماء..وبعد أن جلس الصياد ساعة مع أم رجائى الذى أنهكها طول حزنها على ولدها...حتى خرج الصياد وهو يشعر بتعب شديد جداً ..فصعد لشقتة ورمى نفسة فوق فراشة ونام فى لحظات سريعة

لم يدم ظلام النوم المحيط بعيون الصياد غير لحظات خاطفة وبعدها أحس بنور يسطع بقوة ففتح جفناه ..ويالا المفاجاءة المدهشة...وجد أمامة شمروخيل

نعم شمروخيل...ذلك الشيطان المشرف بجهنم..وصديق الصياد اللدود مثلما كان يحب أن يقول ...نظر لة الصياد بشدة قائلاً: أية دة ..هو أنا رجعت تانى لجهنم وبئس المصير ؟؟

ضحك شمروخيل وهو يقترب من الصياد قائلاً : أنت وحشتنى بجد ياصياد

رد الصياد بمرح : ماتشفش وحش ياوحش ..بجد بجد أنا رجعت جهنم تانى والا أيه الحكاية؟

رد شمروخيل فى هدوء : لا..متخافش ..أنت مش فى جهنم ولا بئس المصير..بس أنت دلوقتى فى الحياة البرزخية

أرتعب الصياد قائلاً : ياليلتك اللى ذى وشك..أنا مت يعنى وبقيت سواح فى الحياة البرزخية دى؟
ضحك شمروخيل وهو يقول : أنت ذى مانت فكاهى ودمك عسل..مش عارف أنا مستحمل جهنم من غيرك أذاى ياصياد؟؟
رد علية الصياد فى غيظ : لا ياعم أنا فى عرضك ..أستحمل جهنم من غيرى.أرجوك .أنا لسة مدخلتش دنيا علشان أطلع منها كده...وكفايه على اللى أنا شفته معاك فى قصتنا الاولنية
هرش شمروخيل ..فضحك الصياد قائلاً : أنت لسه فيك الداء الرخم ده!!!..

ضحك شمروخيل قائلاً : أنت عامل أيه فى الدنيا تحت؟...مع أن كل أخبارك وصلالى بس كان نفسى أشوفك من فتره..ولما جه الوقت أهو أنت معايا وشايفك..ده أنت وحشنى بشكل

هرش الصياد وهو يقول : بقولك أيه..أنت برده مقولتليش ..هو أنا مت خلاص ؟

رد شمروخيل : لا.ياعم الصياد لا..أنا اللى خليتك تنام وسحبت روحك هنا فى الحياة البرزخية علشان فيه موضوع خطير عايزك فيه

أنفجر فية الصياد قائلاً : يادى النيلة..هو أنت كده ورايا ورايا..وكل عمايلك كده متسرش عدو ولا حبيب..ربنا يخدك ياشيخ أكتر ماهو وخدك..وتتوكس مترح ماتروح ..طب أنت لية يابو مخ كوتش منزلتليش تحت وعرفتنى موضوعك ده
بدل ما أضيع ولا أعرف أرجع لتحت تانى ؟؟!!...يارب أرحمنى من ده شيطان
تكلم شمروخيل قائلاً : وأنت كده علطول كاسر نفسى وظلمنى معاك..ولا عمرك قلتلى كلمة حلوه أبداً

نظر له الصياد فى تعجب قائلاً : أيه..حيلك حيلك..تكنش فاكرنى جوزك وأنا معرفش...أصحى من اللى أنت فيه..

شمروخيل : أنا مكانش ممكن أنزلك الارض ...علشان ساعتها أبليس كان هيشم خبر وهيعرف كل اللى هيدور بينا..وهنا هو

ا المكان الوحيد اللى أبليس ممنوع يخطيه ولا حتى يقدر يعرف فيه أيه ..ذيوه ذى الفردوس بالظبط
____

[مدحت الصياد]

نظر الصياد لشمروخيل قائلاً : طب أيه الموضوع ده اللى خلاك تجازف وتدخل الحياة البرزخية وتشدنى هنا أنا كمان؟؟

رد شوشو : أولاً أنا من اللى ممكن يعيشو هنا..علشان أنا..والا مش وقته ..المهم..الموضوع ياسيدى ..يخص صاحبك رجائى

دمعت عين الصياد وهو يتنهد قائلاً : الله يرحمه

ضحك شمروخيل : ويرحمك كمان ياصياد

رد الصياد: طب بقولك أيه..هو رجائى موجود عندكم والا بخته وكتابه ومجموعه بعتوه للسما والفردوس؟

رد شوش : لا..هو مش فى الفردوس

رد الصياد فى حزن : يعنى عندكم..طب هو عامل أيه..لسه بيزور الاول طبقات جهنم؟

رد : لا..لا ياصياد

قال الصياد: يعنى أبتدى عذابه..طب هو فين..أكيد فى أول طبقه..مانا عارفه كان خاطى بس على قده

قال شمروخيل : لا ياصياد مش فى أول طبقه

رفع الصياد حاجباه فى دهشة : ياخبر أبيض ..يعنى هو فى الطبقة التانية من جهنم..للدرجادى كتابه كان زفت؟!!

رد شوشو : ياصياد صاحبك مش فى الطبقة التانية ولا حتى السبعة اللى هى الاخيرة

فغر الصياد فاه فى رعب قائلاً :ياليلتك السوده يعنى صاحبى فى الهاوية
أيه.... هو كان رئيس عصابه وأنا معرفش؟!!!

رد شمروخيل بنفاذ صبر: ياصاحبى ..رجائى مش فى الهاوية كمان

أنفجر الصياد فيه : أيه اللى أنت بتقوله ده..يعنى ولا فى أى طبقة ولا فى حتى الهاوية ..ياخبر ..يعنى هو من الاربعه الموعودين بشجرة الخطايا..طب ليه..هو عمل فى حياته أيه للدرجادى علشان ينحط فى المكان ده؟؟!

صرخ شمروخيل قائلاً : أنت تعبتلى أعصابى ..أنت أنسان لا تطاق ياشيخ...صاحبك مش فى جهنم كلها..ماتفهم بقى..

رفع الصياد يداه فى تساؤل ودهشة : أمال فين..يعنى لا هو فى الفردوس يتنعم..ولا هو فى جهنم يتعذب..ولا هو هنا فى الحياة البرزخية تائه..أمال فين..فين صاحبى ياشمروخيل النحس أنت..فين؟؟؟

رد شمروخيل بعدما هدء قائلاً : فى الارض..عندكم فى الارض ياصياد

أشرئب الصياد بعنقة قائلاً : بيعمل أيه بروحه عالارض ياشمروخيل ...؟؟

رد شمروخيل قائلاً : لا .ده مش بروحه بس..ده بروحه ونفسه وجسده كمان

صرخ الصياد : يعنى أيه كلامك ده..معناه أيه؟؟

صرخ أيضاً شمروخيل فيه : يعنى صاحبك رجائى ياصياد مامتش من أساسه...فاهم... مامتشى

وهنا أصبح الموقف لا يحتمل غير أن يصبح الصياد كالتمثال الصامت العاجز حتى على الحركة أو الكلام

[مدحت الصياد]

وغدا مع جديد الاحداث

محبتي

الصياد

[شيم]

يا دي النيلة تاني شمروخيل هههههههههه

أنا حاسة ان المنتدى كلو هيتكلم مصري بعد شوية من ورا حكاياتك يا صياد هههههههههههه


أسلوب رائع..

بانتظار المزيد أخي العزيز

صلواتك

[شيم]

يا دي النيلة تاني شمروخيل هههههههههه

شكلو المنتدى كلو هيتكلم مصري بعد شوية من ورا حكاياتك يا صياد هههههههههههه


عم قول هيك لاني حاسة رح صير احكي مصري بعد شوي هههههههه

أسلوب رائع..

بانتظار المزيد أخي العزيز

صلواتك