بصوا بقى يا جماعة السيناريو اللي هيحصل
المفتي هيطلع مع البابا شنودة و يبوسوا بعض و يتكلموا عن عنصري الأمة و الهلال و الصليب
و يكش يولع الناس اللي ماتوا من الأقباط ، و مش مهم إنهم يطالبوا بتعويض ... عادي يعني

زي قصة حادثة العياط لما الأقباط اتعذبوا و اتضربوا في الشوارع و اتكسرت محلاتهم و بيوتهم ، و لما طالبوا بتعويض و الدولة كانت مستعدة لدفع التعويض ... المجمع المقدس للكنيسة القبطية أرسل لهؤلاء المساكين يطالبهم بالتراجع ، الأقباط اليوم بين مطرقة الإخوان و سندان قيادات الكنيسة القبطية اللي بتدخل في كل شيء و بتبوظ أي تحرك علماني ينقذ أو يطالب بإيجاد مكان للأقباط تحت الشمس ، خارج وصاية الجلبية السودة ، و أي تحرك قبطي مدني من أي فرد ، يجعل هذا الرد زنديقاً يتبنى أفكار الروم الأورثوذكس و اللاهوتيين الروس الوحشين و يطلع أنجليكاني و أمه يهودية و أبوه من تنظيم القاعدة و بيطالب بالشذوذ الجنسي ... و زملكاوي .

و كل عام و أنتم بخير ، و في انتظار السيناريو المذكور أعلاه
تحياتي
ميناس