حبيبنا Elias على كرسي الاعتراف ..

[Elias]

شو أجمل مقليب أكلتو

في موقف كتير كوميديا صار معي من فترة قريبة بإحدى الاجتماعات تعرفت على وحدة من الصبايا وصار في إلفة بعد كم يوم سألت عنا أكتر من مرة على مدى أكتر من يوم وداااااااارت الأياااااام وإجت اللحظة يللي التقينا فييا ساعة اللي شافتني قالت خي كتير منيح شفت حدا بعرفو بس أنا ماعرفتا هديك الساعة وكنت كمان نسيان اسما فرجعت تعرفت عليا عن جديد

1- مين أكثر شخص بعنيلك بحياتك وليش كتير بعنيلك ؟

صراحة ما بعرف ما بظن اني رح فكر بهالطريقة كتير أشخاص بيعنولي لدرجة عالية أهل بيتي لأنو كل حياتي معهن وبيعرفوني كتير كويس وبيساعدوني حتى بخصوصيات حياتي ,أصدقائي لأنو بحياتي معهن ما بعرف الضجر ,وأكيد أبي الروحي بيعنيلي كتير عطاني أمل بالحياة
وعشان تحديد اسم عذرني لأنها عنجد صعبة

2- هل اذا فكرت تتجوز بنت فهل شرط أنها تكون أرثوذكسية ؟

مبدئيا أي مش لأنو أنا عنصري لاء لأنو اذا كانت مش اورثوذكسية رح واجه صعوبة الى حد ما بالحياة معا, بالأخص تربية الأولاد الإبن بكنيسة أرثوذكس وللا كنيسة غير الأرثوذكس بدو يتعلم فيا ,انا رح كون واضح تماما, أنا مش ناضج كفاية لحتى أقدر عيش براحة وسعادة مع وجود هيك نقطة بحياتي ماعندي حكمة كفاية للتعامل مع هيك وضع.
بس بعتقد أنو الزوجين اذا كل واحد من كنيسة شكل من بداية حياتهن الزوجية يتفقو ويقرروا وبعدين يعيشوا سوا بنفس الكنيسة أفضل مايوقع الأبن بخلاف كبير ويتفتح على مشاكل نتيجة انتماؤه لأكتر من كنيسة ويضيع بين هون وهنيك و يمكن يطلع خارج الكنيسة نظرا لعدم وجود استقرار

وبيجوز كون أنا غلط "بالنهاية كللنا مسيحيين وممكن الزواج من غير طوايف"
كللنا أبناء أبينا الذي في السموات

3- كيف بدأت طريقك بالإيمان وتمسّكك بالمسيح ؟

مريت بأكتر من مرحلة جوهرية بحياتي كانسان يحيا الايمان
أول نقطة كان ابي ياخدني أيام زماان عالكنيسة بهديك الأيام لسه يادوب وعيان شو عم يصير حوليي
نقطة تانية دخلت لمركز التعليم الديني وتعلمت كتييير وتعلمت انو ندخل عالكنيسة ونصوم ونحيا حياة مسيحية
بعد فترة طلعت أول مخيم بحدود سنة 2005 كان نقطة تحول بحياتي ومن وقتا بللشت فكر جديا بالخلاص وتعلقت أكتر بالكنيسة
وبعدين بللشت عيش حياة مع أب روحي عطاني أمل بالحياة وعيت وقتا على نقطة انو الانسان فعلا قادر على التغلب على أهواءه
وفقط.

سامحني على الإطالة وربنا يباركك

أسئلتك مش طويلة على عيني وراسي انتا وأهالي حارتك. أنت عذرني إجاباتي طويلة

[Chrestina]

سلام الرب يكون معك اخي الياس
كيفك انشالله منيح
انا رجعت ومعي اسئلة صعبة شوي بس بتمنى تجاوب بكل صراحة
سؤالي الاول شو بتعنيلك كلمة الحب؟؟؟ بكافة جوانب الحياة
2 في كلمة طلعت منك وبتتمنى انو يرجع الزمن وتسحبا ؟؟
3 انت لمين بتفتح قلبك لاختك ام اخوك ؟؟
4 اذا فتحنا قلب الياس وطلعنا شو ممكن نشوف ؟؟
5 شو اكتر غنية بتحبا ولمين بتهديا؟؟
اسفة اذا طولت الاسئلة
بصلواتك
ملاحظة اذا في اي ازعاج بالاسئلة فيك لا تجاوب

[Elias]

سلام الرب يكون معك اخي الياس
كيفك انشالله منيح

نشكر الله أحسن من هيك بنتزع

سؤالي الاول شو بتعنيلك كلمة الحب؟؟؟ بكافة جوانب الحياة

اذا كان بعيد عن مفهوم المحبة يللي وصانا فييا الرب فهو شكل معاق من أشكل العلاقة بين الناس لأنو هديك الساعة بيكون حب للذات مش حب للإنسان الآخر
وحسب ماأوصانا الرب فهو بيكون اسلوب راقي وجميل للعلاقة بين الناس أنا لمما بحب شخص يعني هووي بحياتي مرفأ الأمان والاستقرار بوجودو بلاقي حالي وبكتشف وجودي وبكسب من وجودو قوة لمواجهة الحياة ومصاعبها
*وبالنسبة لحب ماهو غير كائن بشري فهداك أمر مختلف تماما أنا بحب هالشي لأنو بيخدمني بحياتي بشرط استخدمو بشكل صحيح وأبقى أنا سيد عليه مش هووي سيد عليي

2 في كلمة طلعت منك وبتتمنى انو يرجع الزمن وتسحبا ؟؟

خلال آخر كم شهر ما بظن بوجود كلمة طلعت من تمي وبتمنى يرجع الزمن تأسحبا ما بشعر بأني بندم على كلام قلتو لأنو بعمل حسابو مظبوط
بالنهاية كل انسان عندو أفعال بيندم علييا مافي انسان بريء من الخطأ

3 انت لمين بتفتح قلبك لاختك ام اخوك ؟؟

اذا بدي كون صريح مظبوط أنا بفتح قلبي لأختي شيم أكتر من باقي أقراد العيلة بشعر أنها بتفهمني وبما أني شب وهيي بنت وبتعرف كيف البنت بتفكر أنا بلاقي أنو هاي نقطة حلوة وجيدة وقوية لصالحي

4 اذا فتحنا قلب الياس وطلعنا شو ممكن نشوف ؟؟

دم بشري +شاي +يانسون +قلوب ناس طيبة

5 شو اكتر غنية بتحبا ولمين بتهديا؟؟

بصريح العبارة أكتر غنية بحبا وبحبا عالتقيل عالتقيل "مدينة الحب" لكاظم الساهر وبصراحة أكتر لمما ببسمعا مابفكر بحدا
واذا بدي أهديا بهديها لرفيقي نورس اللي مسافر من تلت سنين لأميركا وبقلو بلدنا كتير حلو رجاااااع كل سوريا مشتاقة
والله سوريا بتجنن الله يحميها