تذكرة لجهنم <قصة طويلة بقلم الصياد>

[مدحت الصياد]

يع...يع.. يععع
__________

أنتظرنا أنا وشمروخيل بداخل أحد الكهوف التى يقول عنها شوشو أنها منازل سرية لاستراحة وأقامة الشياطين الموجودة وبتخدم هنا..فلقد كان الكهف يقع بداخل أحد الصحارى القريبة من القاهرة...تقدم منى شوشو وانا جالس افكر قائلاً لى :روحت فين ياصياد.؟!..أية كل السرحان والسكوت اللى أنت بقيت فيهم دة...لا ياعم أنا مش متعود عليك كدة..أرمى ورا ضهرك ..وكبر دماغك...وأضربها ستين صرمة ....مش هو دة كلامك..أنسى ياصاحبى بقى..وأكيد هنعرف حل للغز الغريب دة..أكيد..مش ممكن أى حاجة هتستعصى على شمروخيل..أتنين دكتوراة وأتنين دبلومة..وكمان معاة الصياد اللى ضحك على كل الشياطين وعلى أبليس نفسة

نظرت لة فى زهول قائلاً : ياشمروخيل...أنا حاسس أنى واقع فى بير غوييييط قوى ومش عارف أطلع منة..أنا قربت أقتنع أنى مش الصياد...بس حتى كل ما حاول أدخل الفكرة دى فى نفوخى ..أرجع وأفتكر شكل الراجل التانى دة..فأتأكد أن ورا الموضوع ... لعبة..

رد شمروخيل : لعبة ؟؟؟

قلت لة: أيوة ..لعبة حقيرة..بس لعبة... غاية فى الذكاء

شمروخيل :أذاى بقى ؟؟

قلت لة فى ضعف وغيظ : هى دى المعضلة اللى مش لقلها حل..أية هى اللعبة؟...مش عارف....ومين اللى هيستفاد منها؟؟...بردة مش عارف....موضوع ملخبط أخر لخبطة

جلس بجوارى شمروخيل وهو يقول : أحنا دلوقتى الصبح ..يعنى النهار طلع...وأكيد صاحبك اللى شبهك راح شغلة

نظرت لة فأكمل :فممكن أننا فى غمضة عين نكون هناك جوة شقتك ونفتشها حتة حتة

قلت لة : طب وأية اللى هنطلع بية من التفتيش دة ؟

رد وهو ينظر لى بشدة : أكيد هنلاقى حاجة تعرفنا الشخص دة أية... وهو مين ...دة على الاقل دلوقتى


قلت لة : يعنى هنلاقى أية ياشمروخيل؟؟..مأكيد ذى ما خد شكلى وأحتل بيتى ..هيكون معاة كمان بطاقتى وكل أوراقى أنا

قام شوشو وهو يشد ذراعى قائلاً : ياعم قوم وياللى بينا وهناك ممكن نلاقى حاجة ..أى حاجة مش عالبال ولاعالخاطر...قوم بس ومتتسرعش وتتعب كدة بسرعة

وفعلاً كانت كلمات شمروخيل كالترياق لسم العجز الذى أضحى بداخلى..فتشجعت وأنطلقنا لشقتى

دخلنا مثلما فعلنا ليلاً ...ولم نجد المحتل فيها مثلما قال شمروخيل

تنهدت قائلاً : هنعمل أيه دلوقتى؟؟

رد بسرعة : أحنا لازم نقلب البيت تفتيش... بس من غير ما نعرف أخينا ده أو نشككه بأن حد دخل هنا...أنا هفتش ساحة النوم والصالة..وأنت فتش ساحة المطبخ وساحة المكتب والحمام..موافق؟

أنطلقت وأنا أقول له: موافق ...بس دول أسمهم هنا حجرة مش ساحة

وبدأنا التفتيش الدقيق جداً جداً ....دخلت الحمام وفتشت كل شبر فيه وحتى الحنفيات فتحتها يمكن يكون مخبى حاجة فيها..وبعدها دخلت المطبخ..فوجدت رأئحة المطبخ لا تطاق رائحة عفن..شىء متحلل..كأنة جثة قد مر عليها على الاقل أسبوع هنا..أنطلقت أفتش المطبخ وأبحث عن مصدر تلك الرائحة الرهيبة التى ازكمت أنفى حتى وأنا متنكر فى هيئة صياديل ..وعندما وصلت ببحثى الحثيث للثلاجة ..وفتحتها حتى هب على نفحات رهيبة من تلك الرائحة الشنيعة فمسكت أنفى بقوة ونظرت بداخلها ..وهنا لم أستطع أن أفعال شىء أمام ما أشاهدة فى الثلاجة غير شىء واحد ..أنى تقيأت بشدة وهربت لخارج المطبخ وأنا أجرى وأصرخ فى شمروخيل الذى ما أن سمع صراخى حتى أتى مسرعاً وهو يقول لى : مالك ؟؟..حصل أية ؟...أنت عيان والا أية؟؟
__________________
قلت لة وأنا أحاول الا أتقيأ ثانياً: يع...أخييييى..يع يعععع ..

رد قائلاً : أية اللغة العجيبة اللى أنت بتكلمنى بيها دى؟!

صرخت فية : لغة أية ياشمروخيل ..دة أنا قرفان جداً من المنظر اللى شفتة جوة الثلاجة اللى فى مطبخى...دة أنا حاسس أن معدتى هتخرج هربانة من مكانها

رد وهو يسرع ناحية المطبخ وأنا منتظرة بالصالة : يعنى شفت أية ؟..وأية الحاجة اللى تخليك كدة

أنتظرت بضع ثوانى حتى سمعت شمروخيل يحدث لة مثلما حدث معى وسمعتة يتقيأ..وخرج هو الاخر وهو يصرخ قائلاً : يع..يع..أف..يع

قلت لة : أهو أنت كمان أتعلمت اللغة بسرعة..هاهاها

صرخ فى قائلاً : أنت بتضحك كدة لية؟؟.أنت فاكرنى قرفان علشان الحاجات اللى جوة الثلاجة؟..لا طبعاً ..أنا حصلى كدة من شكل العلبة اللى برة الثلاجة

قلت لة بأندهاش: علبة؟..أى علبة؟؟

رد قائلاً فى أشمئزاز : علبة مكتوب عليها جبنة بيضاء..وأول ما قربت من العلبة وشميت ريحتها حصلى اللى حصل

أندهشت بشدة من هذا الشيطان الاحول حقاً قائلاً لة : يانهارك اللى ذى وشك!!..يعنى اللى فى الثلاجة عادى وعلبة الجبنة هى اللى عملت فيك كدة!!!

رد قائلاً : طبعاً..أحنا منعرفش الاكل الرهيب المقرف دة اللى أسمة الجبنة دى..وكمان لونها أبيض يع..يع...يععع

قلت لة : ماشى ..مش وقتة دلوقتى ..المهم أنت شفت القرف..أقصد الحاجات اللى فى الثلاجة؟

رد وقد سال لعابة وكأنة يتكلم عن أكلة كباب أو أكلة لحم ضانى:طبعاً ..دى حاجة لذيذة قوى..دى ضنين لما حد يكلها عندنا..دى أكلة رهيبة ..لذيذة...بالاخص لما تتعمل ومعاها التوابل والبهارات

قلت لة : أنا بتكلم على اللى جوة الثلاجة ؟

رد بسرعة : طب مانا كمان بتكلم على اللى جوة الثلاجة..يكش فاكرنى غبى والا أحول

قلت لة بهدوء ظاهر: يعنى أنت قاصدك أن الجثة المعفنة اللى جوة الثلاجة دى بتكلوها عندكم..فى جهنم؟

قال: لا..طبعاً ..بس مش علشان هى وحشة ..لا..علشان مستحيل نلاقيها عندنا الا فى ساحة خطية القسوة..ذى مانت شفت هناك..بس اللى بيخدم هنا على الارض ..لو أستطاع يقتل واحدة منها بيأكلها..كلها

قلت لة : أنت عارف اللى جوة الثلاجة دة أية؟؟

رد بغضب : مالك ياصياد..أنت بتختبر ذكائى والا أية حكايتك معايا ..أية الاسئلة الغريبة دى؟؟

قلت لة : ياعم مش قاصدى..بس عايز أتأكد من اللى شفتة فى الثلاجة

رد بسرعة : طبعاً عارف ..دة..دة كلب مشوى على نار هادية ...مشوى عالفحم

رجعت لليع من جديد ..وبعد أن أمسكت نفسى قلت لة : طب أنتم.... وواخدين على الاكل الرهيب دة..بس أحنا معندناش حد بأكل كلاب أبداً...غير بلد أو أتنين ..بتوع شرق أسيا.ذى الفلبين ..والراجل اللى هنا مش منها..أذاى بقى ..دة لو حتى مجنون وأبن ستين مجنون مستحيل ..يع.يعععع..<وبلعت ريقى مكملاً>: يعمل العملة الرهيبة دى..مستحيل حد يفكر يأكل كلب..عارف يعنى أية كلب مشوى ومحطوط جوة تلاجة.؟!!.دة كمان مش كلب..دة بقى نص بس..لانة أكيد خلص على النص اللى تحت الاول..والاخ الغريب دة ساب النص الفوقانى وطبعاً مع رأس الكلب..

رد شوشو : ,اية يعنى؟..هو أكيد أشتهى أنة يأكل من الحيوان دة..فعمل كدة

هززت رأسى بشدة قائلاً : ياعم بقولك مستحيل يعنى مستحيل حد يعمل كدة أبداً

سكت شمروخيل بضع دقائق ثم قال لى فى غموض : بقولك أية ياصياد..دلوقتى نمشى علشان ممكن الغريب دة يجى هنا فى أى وقت..وكمان علشان أنا جتلى فكرة من اللى جوة الثلاجة وأنت بتأكد أنة مستحيل حد ياكل كلب عندكم وعايز أتأكد من الفكرة دى..ولو طلع اللى فى نافوخى صح ..يبقى أحنا قربنا من حل لغز الراجل دة..وعرفنا مين هو..على الاقل

نظرت لة قائلاً : فكرة..؟؟ فكرة أية دى؟؟..ممكن أعرفها؟

رد وهو يسحبنى بسرعة من الشقة :مش دلوقتى..أصبر لما نروح المشوار دة الاول وبعد لما أتأكد..هتعرف كل حاجة..و لو اللى فى دماغى صح..مش غلط..هنكون وصلنا للحل وفى نفس الوقت هتكون المشكلة أكبر بكتير مما كنا نتخيل ...أو نتصوووور

وزادت الالغاز لغزاً أخر

الدفترخانة

××××××××*

أنطلق بنا شمروخيل لصحراء شبة جزيرة سيناء...ودخل بنا الى أعماق صحرائها ..ولم نهبط للارض وتنتهى هذة الرحلة الا مع غروب شمس ذلك اليوم..وبعد أن هبطنا سألتة قائلاً : نفسى بقى أعرف حضرتك كدة مشحططنى وراك لغاية هنا لية؟؟..وأية اللى ممكن يكون هنا ..وهيساعدنا فى اللى أحنا فية

رد وهو يسرع الخطى : حلمك على ياصياد شوية..أهو أحنا خلاص وصلنا للهدف

قال هذا وهو يصعد جبل رهيب لة ألوان غاية فى الروعة وأنا طبعاً خلفة ..حتى وصل لجوف حفرتة أنامل الطبيعة فى قلب هذا الجبل.

دخلنا فوجدت طريق طويل يشع أضواء باهتة كأنها شموع..ومشى شوشو وأنا جوارة فى ذلك الطريق بداخل ذلك الكهف الرهيب الصامت فى جلال ..حتى وجدت نفسى أمام شيطان عجوز جداً ...لة وجة متشقق باهت يكاد أن يكون كلوحة ليس بها غير اللون الابيض والاسود..تقدم شوشو من هذا الشيطان فى أجلال ..وجثى على ركبتية..ساحباً العبد الضعيف معة فجثوت أنا أيضاً أمام ذلك العجوز الجالس القرفصاء وأمامة كتاب ضخم قديم جداً يعشش فوق صفحاتة العنكبوت ويغلب علية اللون الاصفر

تكلم شمروخيل قائلاً : التحية والاجلال ..لشيطان الدفترخانة ....شيطان العصور وعفريت القبور...الشيطان حاشوم

نظر لة هذا الشيطان الاثرى ثم نظر لى قائلاً : التحية والعنة الشيطانية عليك أيضاً ياشمروخيل ياولدى...مين دة ياشمروخيل ؟

رد شوشو : دة أخى فى العفرتة وتوءم روحى فى الشيطنة..صياديل الذبابى

ضحكت فى سرى من هذا الهبل وكأنى أشاهد لقطة فيلم عن المماليك

أكمل شوشو : أنا عايز من جنابك خدمة بسيطة جداً

قال لة هذا الشيطان : أذا كان فى مقدورى

قل لة شوشو : عايزك تفتح كتاب < تمام الشياطين> اللى فى مصر وتقوللى لو فية حد منهم غايب ..والا لا..؟؟

نظر لة هذا العجوز ثم هرش< ياحلاوة...دة موضوع الهرش شغال هنا كمان> وفكر ثم أجاب : على عينى وقرونى من فوق

وفعلاً وببطىء السلحفاة بدء هذا الميت البحث حتى منتصف الليل لدرجة جعلت أعصابى تحترق من هذا الشيطان البارد ..وأخيراً تكلم رافعاً نظرة لنا قائلاً : أينعم...فية بلاغ من حكمدار العاصمة الشياطينى ...من حوالى أسبوعين عن أختفاء أو لنقل هروب وأختفاء شيطان من موقع خدمتة

تكلم شمروخيل بلهفة : ولحد النهاردة مظهرش ؟

رد ببرود الاموات وبلهجة أحسست أنة سيموت بين أيدينا فى أى لحظة : أيوة ...فعلاً..لحد الساعادى مافيش أى أخبار عنة !

قال لة شمروخيل بسرعة : طب أخر سؤال..لو سمحت خستك ووضاعة منشأك.. تقوللى أسمة أية وكان مكان خدمتة فين ؟؟

رد : أسمة أية؟؟..أسمة أية؟..أهو..أيوة..أسمة حونشائيل أبن الجن الخطاف...وكان بيخدم فى منطقة شبرا مصر بالعاصمة..القاهرة

التفت لى شمروخيل وهو يبتسم أبتسامة الظفر والنصر ..ثم ودع هذا الشيطان العجوز وخرجنا طيران عالقاهرة...وبعد أن وصلنا للشارع اللى فيها شقتى حتى نظرت لشوشو وقلت لة: من الاخر كده..عايز أعرف كل حاجة

رد قائلاً : طبعاً..طبعاً....أسمعنى كويس ياصياد...وأمسك أعصابك من الكلام اللى هتسمعه



الحل
_____
تكلم شمروخيل قائلاً : أنا لما شفت شبيهك دة...أتلخبطت فى الاول وكنت ذى الضايع...وبعد لما عرفت منك أن حتى جسمة نفس تفاصيل جسمك...زادت الحيرة..وبقت الحكاية مضلمة خالص فى عقلى ولما أتأكدنا أننا كمان نزلنا للارض بعد أنتحارك..أتعقدت أكتر وضلمت أكتر....يعنى مافيش شك واحد فى المليون أن الشبية دة مش أنت قبل الانتحار...ولكن أبتدى النور يظهر فى طريق الالغاز دى لما عرفت موضوع الاكل اللى مش ممكن البنى أدمين ياكلوة..ولا حتى المجانين منهم....وجاتلى فكرة عن حدثة حصلت أكتر من مرة ..فى عصور مختلفة..فحبيت أتأكد منها الاول..وكان مشوار الدفترخانة وهناك ذى ماسمعت ...عرفت اللى عايز أتأكد منة....
قلت لة بلهفة : أيه هو ده..كفايه الغاز وكلام مبهم كده؟؟

رد بصوت هادىء وخرجت الكلمات من بين شفتيه ببطىء رهيب قائلاً :بص ياصياد...الاكل اللى لقيته فوق مش بتاع بنى أدمين...يعنى مستحيل أنسان يأكل منه...ذى مانت بتقول...صح؟

قلت له :صح

رد: والانسان اللى شفناه عندك هو هو أنت بكل تفصيل جسمك كمان ..صح؟

قلت لة بسرعة .: صح..الصح

رد قائلاً : الشيطان اللى أختفى من خدمتة كان من حوالى أسبوعين...صح ؟

قلت :ذى ماسمعنا...صح

رد: ومكان خدمة الشيطان دة هى هى مكان سكنك ياصياد....صح؟

قلت فى ضيق: صح..صح..صح

رد بقوة وبطىء : ولما سمعنا الشبية دة وأنا قلتلك أن مستحيل أى أنسان يشفنا أو حتى يسمعنا...صح؟

صرخت فية : أيوة ياعم شمروخيل...صح

وأخيراً القى على بقنبلتة الشنيعة فى وجهى قائلاً : معنى كل كلامى دة أية؟؟

قلت لة : ..أوعى تقول أنة......لا...لامش ممكن..مستحيل يكون كدة..مستحيل!!!

رد : لا..ياحبيبى..أنا فى الاول قلتلك أن الموضوع بتاعك دة...حصل قبل كدة..وفى عصور وأزمنة مختلفة...يعنى مش مستحيل ولا حاجة

قلت لة وأنا غير مصدق وكأننى بحلم : قصدك تقول أن شبيهى دة....

رد مكملاً كلامى: أيوة...شبيهك دة...شيطان......شيطان من الخدام اللى هنا

قلت لة وأنا بين اليقظة والاغماء : طب هو لية عمل كدة..وتقمص شخصيتى؟؟

قال شمروخيل النحس : دة مش متقمص شخصيتك بس...دة لبس قميصك الجسدى...دخل جوة جسدك ..أحتلها بالقوة

أصبحت لا أقوى على الوقوف من هول تلك الصواعق التى يقزفها على هذا المتعوس شمروخيل
فجلست على رصيف الشارع ثم قلت لة: طب أذاى؟..أذاى حصل كدة؟؟

رد شارحاً : من دراستى الجامعية وخبرة العصور وبعد تدوير الحوادث المشابهة لنفس حدثتك دى فى نافوخى...أقدر أقولك بكل ثقة هو عمل أية معاك وأذاى عمل كدة وكمان هدفة كان أية...تخيل معايا ياصياد...

أن الخادم دة زهق وتعب من شغلتة ودى بتحصل عندنا وحب يغير طريقة ونمط حياتة وكمان حب حياة البشر...فدرس كل الناس اللى فى نطاق خدمتة..لحد ماوجد شخص فية كل الشروط المطلوبة علشان يتقمصة...
واحد مقطوع من شجرة عرجة ذى مانت بتقول..يعنى لا أهل ولا أسرة ولا حتى أصدقاء..واحد فى حالة..غريب...غامض...منطوى على نفسة...وكمان أيمانة أصبح ضعيف وهش جداً من الظروف اللى عايش فيها...فحاول يخش جسدك دة...ويعيش فية ..فمعرفش.لان روحك كانت أقوى منة....فحاول أنة يخليك تنتحر ووسوس أكيد كتيرليك بفكرة الانتحار... وكنت أنت كل مرة وفى أخر لحظة ترجع عن الانتحار...لحد ما أستولى على أفكارك..وعلى حتى الارادة اللى جواك..وعملك حاجة ذى التنويم المغناطيسى اللى معروف عندكم هنا عالارض...وهيئلك كل الظروف لحد ما ..هب شربك بأيديك أنت السم ...وبعد ما خرجت روحك اللى أنا بكلمها دلوقتى ...سحبك وأنت مش شايفة لحد طريق جهنم..ولحد بابها كمان






قلت له وأنا قربت على الجنون: طب والصوت اللى سمعته على باب جهنم ...بتاع مين؟

رد ببساطة: طبعاً صوته هو

قلت له : طب لما دخلتلك ..أقصد لما رمانى جوه جهنم ودخلتلك أنت عرفت أسمى وحكاية أنتحارى أذاى بقى؟

رد: من وظايف أى خادم عالارض أنه ساعة لما حد من الناس اللى فى منطقة خدمته يموت ..ويعرف أن اللى مات ده طريقه عندنا..بيبعت أشارة بكده..وطبعاً فيها أسمه وظروف موته يعنى مات فى حادثة أو موت طبيعى أو أنتحر ذى مابعت عنك بالظبط

شهقت بقوة وأنا غير مصدق تلك الكوارث التى تخرج من بين شفتى شمروخيل ثم قلت لة :يعنى هو اللى بعت الرسالة ليك؟

قال: طبعاً..بحكم خدمتة فى نفس منطقة سكنك...وطبعاً علشان أنت تعتبر مخطوفة روحة ..أقصد مطرودة روحة من جسدة ...غصب عنة...بيكون حالتك دى حالة بنى أدم مقتول أو منصوب علية ومش أنتحار...علشان كدة ماجاش دوسيهك لابليس...ولا حتى أى ورقة

قلت لة فى قوة وغيظ مكبوت : وطبعاً الخسيس دة من ساعتها وهو مرحرح فى جسمى ومرحرح فى بيتى وسرق حتى أسمى

رد : طبعاً...أخد كل حاجة تخصك ياصياد

جلس شمروخيل جوارى ثم أكمل قائلاً: وطبعاً لما أستولى على جسمك وأحتل مكانك...أختفت كل شىء عن الخادم اللى هنا وأصبح مفقود أو هربان..وكان مستحيل يعرفوا أنة جوة جسد أنسان تانى...لانة بقى لوحدة جوة جسدك..فمحصلش أى حاجة غير طبيعية من الصياد...هى حاجة واحدة اللى خلتنى أشك فية

قلتلة : عارف...حكاية الثلاجة والاكل اللى جواها

رد : أيوة...وكمان موضوع أن أنسان يسمعنا...أو حتى يشعر بينا

قلت لة وأنا كالغريق : طب دلوقتى أية العمل؟؟...هقدر أرجع لجسمى تانى ...طبعاً دة لو عرفنا نخرجة منها الاول ..والا ....؟

لم أستطع أن أكمل والا...نظر لى شمروخيل وهو يربت على أكتافى قائلاً : طبعاً ممكن..وهو دة اللى لازم يحصل

قلت لة : أذاى؟...أذاى هنقدر نقنعة بخروجة من جسمى؟؟

رد بقوة وهو يقف قائلاً : اللى ذى جنس ونوع الشيطان الخطاف دة ماينفعش معاة الاقناع ولا المنطق...مافيش غير حل واحد...واحد بس

__________________

و غدا مع جديد الاحداث

محبتي

الصياد

[مدحت الصياد]

كابوس أم حقيقة

____________

صمت شمروخيل قليلاً ثم أكمل : مافيش غير طريقة عزازيل

قلت لة متسائلاً : أى طريقة دى..ومال عزازيل ومال الموضوع دة؟

رد وهو يذهب ناحية شقتى وأنا خلفة :أنت كدة نسيت بسرعة...نفس اللى عملناه مع عزازيل

أنبهرت بشدة قائلاً : أيه...أنت قاصدك أطرده بأسم رب المجد يسوع المسيح

قال : مش مكتوب فى العهد الجديد...<حتى الشياطين تخضع لنا بأسمك>....وكمان الشيطان ده من قبيلة بعلزبول ....ودي من أكتر القبائل اللى تعبهم ووقف حالهم أسم الرب

وفعلاً تقدمنا من باب شقتى ودخلنا وهنا...وجدنا هذا الشيطان واقف كأنه منتظرنا...واقف فى منتصف الصاله ...تقدم منه شمروخيل قائلاً له : عامل أيه ياحونشائيل فى بيتك الجديد..وهيئتك الجديدة...وكله جديد فى جديد...

زمجر هذا الحونشائيل فى وجه شوشو وكأنه حيوان مصعور...وعندما أصبح شوشو وجهاً لوجه مع هذا المصعور ...حتى وجدت شمروخيل ينقض عليه ويمسك به ...ويطرحه أرضاً....جالساً فوقه..ولكن هذا الشيطان كان قوى جداً...لدرجة أنه أطاح بشوشو الذى أرتطم جسده بالحائط من قوة هذه الدفعه الشيطانية....والتفت لى واقفاً ..مقترباً منى وأنا كالطفل...أمام بعبع رهيب..ظهر لة فى الظلام ...مع أن هيئتة وشكلة لانسان عادى وضعيف كمان اللى هو أنا...وأنا هذا الجبان فى شكل وهيئة شيطانية رهيبة تسقط من بشاعتها أقوى القلوب..ومن يشاهد تلك الصورة لا يصدق...أنسان ضعيف الجسد يهجم ببطىء وثقة وأيضاً تلذذ على شيطان رهيب يفوقة حجماً ثلاث مرات على الاقل...وعندما أصبح أقرب ما يكون منى حتى أستجمعت شجاعتى وتذكرت ما تسبب فية هذا الشيطان من لخبطة حياتى وقذفى فى قلب جهنم...وكيف أنة أهدانى تذكرة لجهنم و كنت سأضيع للابد فى أحد الساحات أو أضيع متشرداً أشحذ فى شوارع الحياة البرزخية....كل هذا جعلنى أنفجر أنفجار رهيب فى وجة هذا المنحوس الذى وقف أمامى ...أنطلقت يداى بلا تفكير وبقوة الغضب والقهر من هذا الشيطان اللص أضرب وجهة ..الذى هو فى حقيقتة وجهى...ضربات متتالية ولوى الذراع مع الحمل على الاكتاف مع الدوران بة ..وهب أطحت بة أرضاً وهاتك ياضرب فى نافوخة وهو مع كل هذا يضحك..بل ويقهقة...لم أفيق من غضبى الامع صراخ شمروخيل الساقط بجوار باب الشقة : كفاية ضرب ياصياد أنت كدة هتأذى جسمك..هو مش حاسس بأى حاجة من كل ده...أنهى الموضوع...خطة عزازيل

وفعلاً أفقت من دور المصارعة الحرة اللى كنت فيها...وأنطلق لسانى وقبلها قلبى يطلب من هذا الشيطان الخروج بأسم رب الجنود....

أستمر هذا الغبى يتلوى كالحية مرة... وأخرى كالمجنون حتى بدء الاستسلام...وعندما طلب منى أن يخرج من عين الصياد...حتى صرخ شمروخيل: أوعى تسمحلة بكدة...دة عايز يخزق عينيك..لو خرج منهم

قلت لة : أخرج من صباع رجلى اليمين..الصباع الصغير

ولكنة كان ذو نفس طويل.....وهات أخد ورد معايا..ومداولات ومناورات..لحد ماسلم..وفعلاً خرج وهو يصرخ.....
رأيت هيئة هذا الشيطان الخسيس ..وهو يحلق ويخترق سقف شقتى....هيئة بشعة....تفننت أنامل جهنم فى رسم

أبشع صورة لهذا الشيطان

تقدم منى شمروخيل وهو يقول: خلاص ياصياد مشورنا أنتهى مع بعض

قلت لة فى حزن: معلش بقى ...أشوف وشك بخير....أقصد بشر

نهرنى شمروخيل بقوة: لا..لالاياصياد أنا مش عايز أشوف وشك تانى..مش عايزك ياصاحبى أشوفك فى

جهنم تانى أبداً..دة كان درس لازم تتعلم منة...ويكون أيمانك بربك أقوى وأعمق من كدة

قلت لة : اللى عايز أعرفة....أنت بتتكلم معايا من أول ماشفتك كلام ناس حكيمة ومؤمنة ..بصراحة مش عارف أذاى أنت شيطان..وحافظ الكتاب؟؟

رد وهو يضحك: طب ماهو أبليس ممكن يوعظ ولا أحلى وأقوى واعظ..وبردة حافظ الكتاب....بس مش المهم الكلام...المهم الافعال والايمان

قلت لة : طب أنا دلوقتى هدخل جسمى أذاى ؟

رد بسرعة قائلاً : قرب من جسمك وأقف فوقة

وفعلت مثلما قال

رد قائلاً : أيوة كدة

وفى لمحة خاطفة...ضربنى هذا الشمروخيل على أم رأسى بقوة ...لم أحس بعدها بالدنيا من حولى

[مدحت الصياد]

وجاء صباح جديد...وفتحت عيناى..لاجد نفسى نائم فوق فراشى ...جلست أكثر من ساعة لا أستطيع أن أفكر فى شىء وأن

أحاول أن أتذكر كل ما مر بى...أكيد كل دة كان حلم...لا..دة كان كابوس رهيب

أشكرك ياربى يسوع على أنة كان كابوس...وخرجت منة بسلام

رن جرس التليفون ..فأسرعت بالرد...وكان على الخط الاخر زميل العمل مجدى..الذى ما أن سمع صوتى حتى قال: أيه ياعم الصياد...أنت مش ناوى تيجى المكتب النهارده كمان والا أيه حكايتك؟..أنت لسه عيان؟؟

قلت له : مش عارف... أه..طب..حاضر..حاضر ..أنا هلبس ونازل عالطول...


قمت من فوق فراشى وذهبت للحمام وبعد أن أغتسلت...دخلت مطبخى..أبحث عن زجاجة ماء لاشرب...وفتحت

الثلاجة...وعندما هممت أن أمد يدى لزجاجة الماء...وقع نظرى لبقايا لحم مشوى فى أعلى رف ...وبجوارها..رأس


رأس لكلب مرسوم فوق وجهة أشنع أيات الرعب والفزع

تمت بنعمة الرب

وغداً مع أحداث جديدة

عفواً

وغداً مع قصة جديدة

أذا أردتم

محبتى و الي لقاء أخر

الصياد

[شيم]

الله يعطيك العافية اخي العزيز وأنا عن نفسي أحببت طريقتك الجميلة في الكتابة وأتمنى أن تضيف لنا المزيد من قصصك ورواياتك..
ما بعرف إذا الأخوة الباقين بيوافقوني بهالحديث..

صلواتك

[Georgette Serhan]

وأنا أيضا'' أحببت أسلوبك في الكتابة أخ صياد
بارك ألله تعبك
في انتظار الجديد
محبة ألله تضللك وتكون معك

[Muna]

...Its Really nice story Keep on

.Waiting more from you my brother
May the Lord bless you
Muna

[Mayda]

يعني من أكثر القصص التي شدتني للقراءة في حياتي هي هالقصة! وبصراحة زعلت كتير لأن القصة انتهت!! بس عم واسي حالي لقصة جديدة من عندك.

صلواتك

[Mayda]

وينك يا أخونا الصياد؟

اشتقنا لكتاباتك

[Maximos]

معك حق مايدا ..

وينك يا صياد القلوب ؟؟ .. اشتقنا .. ما على أساس :

وغداً مع قصة جديدة

أذا أردتم

محبتى و الي لقاء أخر

الصياد

اخي نحنا أردنا .. و أردنا مزبوط يعني .. بس انتا وينك ؟؟ !!!!!

[Georgette Serhan]

مضبوط خينا مدحت
بعدنا ناطرين قصصك الحلوة المتميزة بالاسلوب الضاحك
وهيدا اسلوب كتير فريد