أنا بقدر فيدك أخي جراسيموس .. معلوماتي مؤكدة بس مو كتير عميقة .. و بقدر اتعمق إذا بتحب :
أكتر الأمراض الوراثية بفضل الرب جيناتا متنحية ، يعني الغالبية العظمى ، فا إذا كانت الجينة الي بدا تسبب المرض بالأب بس ، بتغلب الجينة السليمة تبع الأم .. و نفس الشي إذا الجينة الممرضة بالأم بتتنحى ادام الجينة السليمة تبع الأب .. و هيدا شي منو كتير و ما منحس عليه .. يعني الشخص بيكون مانو عرفان حالو .. و آخد الجينة الممرضة من الأب و السليمة من الأم و الممرضة متنحية غالبا ً فا هو سليم لأنو جينة الأم الي ظاهرة .. و أي حدا مننا ممكن يكون ناقل لجينة ممرضة و ما بيعرف .

توضيح :
الشخص من ناحية كل جينة ممرضة هو احتمال من تلاتة : 1 - سليم . 2 - ناقل . 3 - مريض .
رح احكي عن غالبية الأمراض الوراثية الي بتكون الجينة الممرضة متنحية .

السليم : Oo ، و الناقل : Ot ، و المريض : Tt .
الشخص بياخد حرف من الأب و حرف من الأم . ( الحرف رمز لجينة الصفة الي بدا تطلع سليمة أو ممرضة ) .

السليم ما عليه مشاكل / الناقل ظاهريا ً سليم لأنو t بتتنحى ادام o بس مشكلتو انو النطفة أو البويضة تبعو بتاخد o أو t حسب الحظ / المريض مبين .

رح أعطيك مثال عائلة ما :
الجد ot ، الجدة oo
عالحظ الجيل الي بعدن طلع هيك فرضا ً :
1 - oo
2 - ot
3 - ot

ما ظهر المرض بفضل أنو أمن ما بتقرب الأب .
هلأ الجيل الي بعدن بالنسبة لـ 2 و 3 :
أولاد 2 شريكو oo طلعو :
1 - oo
2 - oo
3 - ot

و أولاد 3 اجو هيك :
1 - ot
2 - ot
3 - oo

لهلأ كلن عم ياخدو من برا و مع هيك ، المورثة عم تمشي بالحظ ، يعني بدك حظ نادر كتير ليطلعوا كلن سليمين . كلن ما عم ياخدوا قرايبين بس الجينة الممرضة عم تمشي من جيل لجيل بشكل خفي . بس لأنن عم ياخدوا من برا عم يكون احتمال tt مستحيل طالما الي من برا ما عندو ياها .

هلأ إذا ابن 2 أصغر واحد ot أخد بنت عمو بنت 3 الي ترتيبا التانية ot

صار احتمال الأولاد :
25 % oo (سليمين)
50 % ot (هيدول ناقلين للمرض بس ظاهريا ً سليمين)
25 % tt (الي مصابين بالمرض الوراثي)
فا أربع أولاد مثلا ً : بيجي واحد سليم ، و تنين ناقلين ، و واحد مريض .

يمكن دوختك بس انشالله تكون وصلت الآلية .