اخونا raed على كرسي الاعتراف

[Georgette Serhan]

اخي رائد اهلا وسهلا فيك نورت
انت ملاحظ انو بس الجنس اللطيف مبلش فيك اسئلة ونبش بالخفايا ؟ ولا حدا من الجنس الخشن قرب لهلق. برأيك ليش هالطفرة بس من الصبايا؟
بالنسبة لما قلته عن سيدنا افرام معك 100000 حق ، شو آخر مقال او اصدار لسيدنا افرام قريتو؟



بالنسبة لطبيب اسنان هل صحيح انو طبيب الاسنان اول ما يتخرج ويشتغل بيقعد فترة طويلة صايم عن الاكل؟
وهيدا شوكولا من كل الانواع هدية المنتدى صحتين وعافية

[Raed Zleik]

برأيك ليش هالطفرة بس من الصبايا

انا برأيي انو السبب بيعود لان القط ما بيحب إلا خناقه..........هذا اولا
ثانيا موضوع وجودي ع الكرسي المحترم مؤامرة مدبرة من قبل هالصبايا لهيك ما مصدقين انهم عم يسألوا وياخدوا راحتهن

شو آخر مقال او اصدار لسيدنا افرام قريتو

حقيقة انا موجود بالمملكة العربية السعودية(وما تقرف) لهيك موضوع الكتب شوي صعب تابعه عم اكتفي حاليا بالمواضيع المتوفرة ع النت وخاصة مجلة الكرمة اللي بتصدر عن مطرانية طرابلس ومنشورات حركة الشبيبة و.......

بالنسبة لطبيب اسنان هل صحيح انو طبيب الاسنان اول ما يتخرج ويشتغل بيقعد فترة طويلة صايم عن الاكل؟

مو بس صايم, ومصدوم ومكتئب وتعيس وبيحس انو لو درس اي شي تاني كان احسن الو, وخاصة انو بسوريا في شي اسمو خدمة ريف يعني وين في ضيعة تعيسة وتعبانة لازم تروح تفتح فيها, واذا ما حبيت خدمة الريف لازم خدمة جيش , واذا ما حبيبت خدمة جيش عندك خدمة بالسعودية وكلو اتعس من بعضه
وخاصة وقت بيكون التعامل مع هيك ناس ممكن بينضف اسنانه من العيد للعيد وبس بتحس حالك عم تشتغل زبال اكتر من انك عم تشتغل دكتور اسنان
ميرسي ع الشوكلا.......
ضيافة الشباب غير شكل
مو متل ضيافة الأخت اسماء بدنا نشحدها شحادة

[asma]

مو متل ضيافة الأخت اسماء بدنا نشحدها شحادة

هلا ضيافتي صارت متل الشحاده
وجنت على نفسها براقش


بالنسبه للاكل وما اكل شو اطيب اكله بتحبها
واكثر اكله ما بتحبها (ما بطيقها )

مشان نعرف المره الجايه شو بدنا نضيفك

[Elias]

الله يكون بعونك يا أخ رائد علقت وماعرفت مع مين أسما .لا تخاف اسما طيوبة اادمية

وليش صحي مافي شباب هاي أنا شب شي شغلة

1-شو بيعنيلك وجود شخص آخر بحياتك "من برا العيلة صديق يعني"

2-من طفولتك وانت ناوي على طب الاسنان كمهنة؟ ولو صرلك تغير شو بتختار

3-اذا حبينا ناخدك سفر وين تحب تروح على سبيل السياحة فقط.

4- لو رحنا لعالم الأحلام شو هووي الجو اللي بيرغبلوا أخونا رائد أكتر من غيرو

5-رأيك الشخصي بالمرحلة العمرية من 14 لـ 20 سنة

وحاجة هدول لهلأ بلكي بعد يومين منتابع سلخ فيك سلخ أسئلة موشي تاني

[Raed Zleik]

وجنت على نفسها براقش

بالنسبة لهذا التشبيه الله يسامحك لو ما بتعرفي من هي براقش, اما لو بتعرفي مين براقش ف الله لا يسامحك(مزح)

بالنسبه للاكل وما اكل شو اطيب اكله بتحبها
واكثر اكله ما بتحبها (ما بطيقها )

اكتر اكلة بحبها هيي صفيحة اللحمة,
والاكلة اللي ما بطيقها هي كل مكونات الملفوف المطبوخ اي شي فيه ملفوف مطبوخ ما بحبه( وفهمك كفاية)

[Raed Zleik]

1-شو بيعنيلك وجود شخص آخر بحياتك "من برا العيلة صديق يعني

بعتبره اكبر انجاز بحياتي الشخصية لانه بيتحول الى قريب اختياري ممش مفروض عليك بالدم والعائلة والنسب وانما انت بتختار شخص ليكون كل الاشياء اللي زكرتهن وبعتبر انو وجود اصدقائي بحياتي شي كتير مهم لدرجة انهم بيصيروا اكتر من اخوتي

2-من طفولتك وانت ناوي على طب الاسنان كمهنة؟ ولو صرلك تغير شو بتختار
هلء من انا وصغير ميولي طبية , بحب هالمجال كتير بغض النظر عن التخصص
ولكن لو اخترت شي تاني لكنت اخترت هندسة العمارة والتصميم لاني بحبهن كمان وبعتبرهن علم كتير حلو

3-اذا حبينا ناخدك سفر وين تحب تروح على سبيل السياحة فقط.

هلء مادمت انت رح تاخدني بقبل منك اي شي , انشالله مشوار ع بصرى الشام
بس انا بفضل سياحة ع اليونان لاني بعتبرها البلد اللي مستحيل تمل منها , ديما بتكتشف شي جديد

5-رأيك الشخصي بالمرحلة العمرية من 14 لـ 20 سنة

هلء بالنسبة الي ما بتعبرها كانت موفقة لان كان في كتير تغيرات وتقلبات وتشويش فكر وعدم استقرار عاطفي و وجداني ونفسي بس بعتبر انو ربنا رتب وجود بعض اشخاص معي وخاصة اصدقاء كان الهن دور كبير لحتى تجاوزت هالمرحلة بالاضافة طبعا ل وجود ابوي الروحي اللي ساعدني ع قد ما حسنت انا اشتغل
بشكل عام تقييم هالمرحلة كان متوسط او اكتر بشوي صغير
نشكر الله على كل شي وبعتبر انو اكبر واهم شي عملته بهالمرحلة انو حافظت على وجودي بالكنيسة نشكر الله وبصلوات القديسين

طبعا في سؤال ما فهمته لهيك مارح جاوب عليه
بيكفي 80% المهم النجاح
وشكرا كتير لاسئلتكن
شو بدكن يا عمي اسئلة الشباب الها طعمة غير, بتحسيها مهمة, مو اكل وطبخ ونفخ وشوكولاته.....
شكرا كتير ع الاسئلة وانشالله تكون الاجوبة مقنعة نسبيا الكن
صلواتكن

[asma]

شو بدكن يا عمي اسئلة الشباب الها طعمة غير, بتحسيها مهمة, مو اكل وطبخ ونفخ وشوكولاته.

هلا هاد الي طلع منك انا سألتك عن الطبخه الي ما بطيقها او ما بتحبها مشان اعرف شو بدي اضيفك

اما بالنسبه لبراقش انا ما بقصد فيها اي اساءه لا الك وبعتذر منك اخي رائد كتيير بس كتير بيحكوه هاد المثل لانه وقت الي حدا بيكون متحلف لحدا

وهاي ازكى طبخة ملفوف لعيونك ولو انت عندنا بطبخة ملفوف
9468020791011796825.jpg

[MM]

له يا أسماء!!!! لك ليش هيك مضيفتيه صحن صغير؟؟ ولو...
لا تواخذنا يا رائد... تفضل هذا صحن أكبر مشان عينك تستمع أكتر