إنغلاق أم تعصب

[Joyce]

مممم..... الحقيقة اللى بيحصل فى منطقتنا هو بالضبط اللى بتتكلموا عليه ده ......بس بالعكس ،عشان كده كنت حاسه إنى من مجرة تانية و أنا بقرا الموضوع ،
بمعنى: الحى اللى فيه كنيستى حى فيه عدد كنائس كبير من كل الطوائف و الأشكال: أقباط أرثوذكس، أقباط كاثوليك، روم أرثوذكس، روم كاثوليك، سريان كاثوليك، انجيليين، معمدانيين و كنائس أخرى......... و حتى كنيسة للأدفنتست (حى الفجالة و الظاهر يا أخت مارى). اللى حاصل انه بسبب تواجد كل هذه الكنائس على مقربة من بعضها ( و أحياناً لازقة فى بعضها لا يفصلها إلا حيطة) عملت نوع من الإنفتاح على الآخرين فكنيستنا فيها ناس كاثوليك و روم أرثوذكس و غيره و مش بس بيتناولوا عادى بل و بيخدموا معانا كمان و بالمثل فيه ناس أقباط مثلاً بعد ما ينتهى قداس العيد فى كنيستنا بيطلعوا على كنيسة الروم الأرثوذكس أو الكاثوليك يكملوا معاهم قداس العيد (بغض النظر عن رأيى فى هذا الوضع) ،
و هذا الوضع قائم فى معظم كنائس الحى باستثناء البعض ، لكن العادى إنه الواحد ممكن يدخل أى كنيسة و كاهن الرعية هيناوله بدون ميسأله هو منين....
الصراحة أنا لا أعرف أيهما أكثر ضرراً هل هو وضع الإنغلاق الكامل أم وضع الإنفتاح بهذه الطريقة ؟؟؟ حقيقة لا أعرف!!

لا ،كنائسنا ليست مستباحة للسياح بل هي بيت الله وبيت صلاة .
لهذا لن انتحب ولن يؤرق نومي ان لم يدخل كنيستي من امثال هؤلاء.
فلا نقبل ان يصير بيت ابونا بيت تجارة ولا سياحة ولا نقطة آثار ومرحلة من مراحل رحلة سياحية لجماعة لا تؤمن ولا ترى فينا إلى عرق قداسة . وحتي يخجلها ان ترسم اشارة الصليب امام الباب .

مش للدرجة دى يا أبونا
بما أن الكلام هنا عن الأقباط فأنا هأقول لقدسك أنه كذا مرة حد يتسأل قدامى حد من الأساقفة عن إيه موقفنا من الروم الأرثوذكس بالذات و تكون إجابة الأسقف أننا فى شركة تامة معهم و أنه ما يفرقنا عنهم هو القومية و الطقس و ليس أكثر (بردو مش هأعلق على مدى صحة هذه الإجابة) ... الحقيقة أنا سمعت هذا الكلام من أكثر من أسقف للدرجة اللى تخلينى حاسة أنهم متفقين على هذه الإجابة و أنها الموقف المعلن لشعبنا على الأقل.
نتيجة الترويج لهذه الفكرة أصبح هناك نوع من التعاطف مع الروم الأرثوذكس و إحترام من الأقباط لقديسى الروم طبعاً اللى ملهومش علاقة بالإنشقاق ، أنا باحكى ده لأنى كنت مع مجموعة شباب فى زيارة للبنان و سوريا و أكيد زرنا كنائس و أديرة روم أرثوذكس و شفت تصرف بقية الشباب ، الصراحة كانوا لمل بيدخلوا أى كنيسة أو دير كان أول شىء يعملوا تمجيد لوالدة الإله و القديس صاحب المكان بالألحان القبطية تماماً كمل لو كانوا فى كنيستهم،( و كمان و الحق يقال فى كل الأديرة و الكنائس اللى زرناها المسئولين عن المكان رحبوا بينا و قدموا لنا واجب الضيافة و حاولوا يريحونا بكل الطرق الممكنة . )
القصد أنه أنا شايفة انه السلوك العام تجاه الروم الأرثوذكس وسط الأقباط هو الاحترام أو على الأقل التعاطف أحياناً عن جهل بالفروق الحقيقية بين الكنيستين و أحياناً عن احترام مبنى على حقائق





أخت مارى،
اتكلمت على أنه الأقباط ميعرفوش أنه فيه أرثوذكس غيرهم، و بصراحة انت فتحت على فتحة أنا مكنتش عايزة أتكلم فيها بس حسيت الكلمتين دول محشورين فى زورى و عايزة أقولهم (معذرة مقدماً للى هيضايقه كلامى لكن ديه حقائق زى ما أنا شفتها):
ليه يا ترى الأقباط (نسبة منهم) معندهاش فكرة عن وجود ناس تانيين اسمهم الروم الأرثوذكس؟
طبعاً إحنا أغلب الشعب و الحمد لله مبيقراش و بالتالى كل المعلومات اللى بياخدها بتكون عن طريق الاحتكاك و طائقة الروم الأرثوذكس فى مصر لها وضع خاص
فأولاً عددهم حالياً قليل جداً بعد هجرة الكثير من اليونانيين و الشوام من مصر بعد ثورة 52 و بالتالى كثير من كنائسهم اتباعت لطوائف أخرى أو حتى أشخاص غير مسيحيين.
ثانياً الطائفة مغلقة على نفسها إلى حد بعيد جداً، يعنى الناس كلها فى الرعية عارفة بعض و لا يتقبلوا أى شخص غريب فى وسطهم، يعنى بتبقى صعبة جداً عليهم و على الشخص الغريب ناهيك عن المعاملة اللى بيتلقاها الشخص لما بيدخل كنيسة روم لأول مرة من بعض أبناء الرعية الذين لا يروقهم هذا الوضع و يفضلوا أن تبقى كنيستهم لهم فقط، و بالتالى ده بيخوف ناس كتيرة من إنها تروح و تتعرف و تسأل كما يحدث مع بقية الطوائف الكاثوليكية أو البروتستانتية. يعنى أنا اتقالى بالضبط: " انتو مش عندكم كنيسة تصلوا فيها؟؟ جاية تعملى إيه؟" بالرغم إنى كنت رايحة أسأل على كتاب معين و لكن مسلمتش! و ده من الروم العرب فما بالك باليونانيين ؟؟؟؟؟؟
دائماً فيه خوف من الشخص الغريب .......

و بالتالى العاملين دول (بالإضافة لعوامل أخرى) بيساعدوا على الجهل بوجود الناس دى إلا لو حد بقى بيقرا شوية أو غيره عند عامة الشعب، و اللى بيعر ف بيبقى من بعيد لبعيد....

معلش آسفة جداً مرة أخرى بس كان لازم أقول الكلمتين دول عشان، حقكم عليا