إنغلاق أم تعصب

[سمعان اللاهوتى]

أسمحولى أتكلم بصفتى قبطى و الموضوع اللى طرحته الأخت مارى موضوع ملائم اللى هأقوله
كنيسة العذراء و القديس أثناسيوس بمدينة نصر (كنيستى) عملت رحلة لسوريا و لبنان و الأردن و نظمت مقابلات مع بطريرك السريان و الأرمن ، فأنا سألت أصحابى الخدام : ليه مينفعش نزور دير الحمطورة ولا كنيسة سمعان العمودى؟ بصوا فى وشى و قالولى:مين؟ قولتلهم: كنائس بتاعت روم الأرثذوكس قالولى: وحياتك متجبش سيرة لأبونا أنطونيوس أنت مش ناقص.(كأنه هيضربهم ولا هيزعق!)
كانت الصدمة ، صدقونى بيجيلى أحلام يقظة أنى بعد ما أتخرج أروح البلمند و أدرس لاهوت و بحلم أنى أزور كنائس سوريا و لبنان و الأردن لكن كون أن كنيستىى عاملة أنغلاق على التعرف على كنايس أخرى حتى بالزيارة ده أمر عجيب بس فى نفس الوقت فى قساوسة محترمين بيقولوا أحضر عند الروم.
ساعات انا بحضر فى كنيسة مارمرقس بمصر الجديدة للأقباط الأرثذوكس و بعدى من جانب كنيسة العذراء للروم الأرثذوكس اللى قدامها ، بفكر و بسأل نفسى: ليه متحضرش القداس عندهم؟ طب أتناول؟ بس انا مش مؤمن بمجامعهم؟ و أقرر بعديها أنى أروح القداس يوم الأحد و لكنى أفتكر واحد صاحبى قالى لما بتروح عندهم بتحس أنك غريب و ممكن يطردوك و بقول بلاش مش ناقص بهدلة
اللى قالته الأخت جويس ده صحيح ، الروم بقوا واخدين موقف من الأقباط و ناس كتير نبهونى على كده ، كونى أنى خايف انى أروح كنيسة الروم ده بسبب كلام الناس اللى زاروها و كلام القسس
نفسى مثلاً الكهنة الروم ينبهوا الشعب بتاعهم بلاش يغلسوا على الأقباط أو انت بتعمل أيه هنا؟ عايز مين؟ لما بتيجى تبوص على الكنيسة من برة يبصولك الناس بأستغراب كأنك حرامى
أقدر اقول ان الحاجز اللى بينا بسبب الجهل و عدم أحترام قدسية باقى الكنائس أقدر أقول أن فى أكتر من 60% من الأقباط مش عارفين يعنى أيه روم أرثذوكس؟ الصدمة الكبيرة الأقباط الأرثذوكس هما اللى هيخلصوا بس!!
نفسى أدخل كنيسة روم و أستمتع بالقداس مش ألاقى كل الناس بصالى كأنى كائن فضائى