قلت لة : ياسلام...أنا أول مرة فى حياتى كلها حتى اللى كنت عايشها على الارض أحس بالفرح والامان والايمان مالى قلبى وفكرى وروحى وكل كيانى...وفين؟!! هنا.!!.هنا فى قلب جهنم..شوف الدنيا ..شوف الزمن..عمايل الدنيا فعلاً غريبة وطرق ربنا فعلاً عجيبة!!!

ضحك شوشو قائلاً : طب مش كفاية كدة ويالا بينا على البعثة اللى هتنزل عالارض ...خلاص الوقت جة ..ولازم نعرف أنت مين


__________________________________________________ __
البعثة
_____

 مثلما أرتفعت لجهنم مثلما هبطت منها...ولكن بفارق بسيط..هو ذلك الحشد من الشياطين الذى نزل معى..فى أول رهط وأول طليعة جديدة على الارض...نزلنا الى صحراء شاسعة ..وبعد أن أتم شمروخيل التأكد من وجود كل الشلة الشياطينى حتى قسم العمل بخطتى الجديدة بتاعة الزبون دايماً على حق ...هناك من ذهبوا لاوربا..وبلادها....لاعطاء الشياطين الساكنين هناك الخطة الجديدة...وهناك من ذهب لاشياطين أسيا وبلادها ...وهكذا ..تم تقسيم كل الارض ...حتى أختفى من أمامنا هؤلاء السفهاء من أبناء أبليس ...ولم يبقى غيرى أنا الصياد وشمروخيل الذى تنهد قائلاً فى راحة: أخيراً..أنتهى التقسيم...ووزعت العيال المهابيش عالارض ...بس سبت بلدك مصر لينا ياصياد

قلت لة فى قوة : حلو قوى كدة...أحنا بقى لا هنبلغ الشياطين اللى هنا بالخطة ولا غيرة

نظر لى شوشو قائلاً : يعنى أية كلامك دة؟..يعنى هنطنش

أنا : أينعم ياغبى ...هو يعنى الناس هنا ناقصة خطط شيطانية جديدة علشان تكفر...ما هو الناس هنا كفرنين لوحدهم...وكفاية عليهم الخطط بتاعة الحكومة ..دى لوحدها تكفر أبليس و جنودة ...وأنت يعنى هتعيش فى الدور دة كتير..أنت ناسى أحنا نزلين هنا لية؟؟؟

تكلم هذا الشيطان الغريب قائلاً : تصدق ياصاحبى أنا مش عارف اليومين دول عقلى مالة؟؟..ذاكرتى بقت ضعيفة جداً ...لدرجة أنى ساعات بحاول أفتكر أول مرة شفتك فين مش عارف؟؟

أنفجرت فية : ياليلتك البمبى...هو أنا أخلص من جهنم وأبليس تطلعلى أنت وأمراضك العقلية وذاكرتك اللى هتودينا فى ستين داهية؟..لا...أحنا جينا للجد هنا..مش عايزين أى غلط ياصاحبى..ماشى؟

ضحك شوشو قائلاً : ماتخفشى

قلت لة : أهو أنا مابخفشى الا من كلمتك دى..وكل ما بتقولهالى بلاقى قدامى مصيبة

يالا بينا على عنوانى هنا..وحاول تركز شوية ياشوشو

وفعلاً وفى لمح البصر أنطلقنا أنا وشوشو الى سماء القاهرة وكانت ليلاً ..نظرت من فوق للمبانى والبيوت والميادين ..دة ميدان رمسيس ..ودة ميدان التحرير..ودة الكورنيش بتاع منطقتى وهنا بقى قلت لشوشو : هنا بيتى ياعم..أيوة العمارة دى

نزلنا فى منتصف الشارع وكانت الساعة تقترب من الثانية بعد منتصف الليل ..فقلت لشوشو: هو أحنا الناس ممكن تشفنا كدة؟

رد وهو منبهر بالارض والطرقات وحتى القطط التى بتسرح بالليل : لا..لا طبعاً ...أحنا مش منظورين لحد... الا للشياطين اللى ذينا بس

قلت لة : طب أية اللى فى عقلك ومخ دة ...يعنى هنعمل أية دلوقتى؟؟
رد : هنطلع عندك الشقة وهندخل ..ومن منظر شقتك أنا هعرف أن كان فية حد.... والا لسة مقفولة ذى ماهى من بعد أنتحارك...ومن نفس مكان أنتحارك...هنشمشم على الطريق اللى أنت مشيتة..أو مشيتة روح الصياد لحد أخر محطة وصلتلها

قلت لة : بس أنا حتى معرفتش أنا غبت عن الارض قد أية؟؟..يعنى غبت شهر والا أتنين والا سنتين والاحتى قرن؟؟
ضحك شوشو : لا طبعاً ياصياد ..أنت ماغبتش غير أسبوعين بس

قلتلة : أذاى الكلام دة؟؟..اللى أنا عارفة وأنت كمان قولتهولى كذا مرة ..أن اليوم فوق بالف الف عام بعمر الارض؟؟..وأنا اللى أعرفة أنى أنحبست عندكم فى الرحلة المئندلة بتاعة الطبقات وجهنم حوالى أسبوعين بردة....فهمنى بقى تيجى أذاى دى؟؟

قال لى : يعنى أنت بمخك دة وعقلك هتتصور أنى هنزل أو هننزل فى الوقت الحاضر بعمر جهنم...ياحبيبى كان لازم يرجع الزمن بينا عالارض كتييير قوى علشان يكون نزولنا بعد أسبوع أو أتنين من أنتحارك...علشان بردة نعرفلك مصير..لاننا لو نزلنا بالزمن الحاضر بتاع جهنم هنكون هنا بعد الاف الاف السنين من موتك...أنت عارف أن الاسبوعين اللى أنحبستهم عندنا فات على الارض قد أية...ها..عارف..أقولك أنا..فات على الارض حوالى الف الف عام وأضربهم فى 14 يعنى أربعتاشر مليون سنة ياحلو
قلت لة : أية دة؟؟..الكلام بتاعك دة هو كلام قانون النسبية؟..وكمان حلم الانسان فى أختراع ألة الزمن..اللى ترجع الانسان للماضى أو تقزف بية للمستقبل؟

شمروخيل : هو أنا مش قلتلك قبل كدة أن النظرية دى بتاعتنا...وكمان أحنا سهل علينا نرجع للماضى...بس مش كل الماضى..دة أولاً..أما ثانياً..مش ممكن نغير حاجات حصلت فى الماضى أو هتحصل فى المستقبل...بس الفايدة أننا بنعرف هيحصل أية للخطط اللى أحنا بنعملها للبشر...المهم..يالا بينا نطلع عندك

وفعلاً دخلنا من باب العمارة فلم يرانا عم عثمان بواب العمارة< طبعاً لازم فى أى قصة أو فيلم يكون البواب أسمةعثمان...لية ماعرفش>