أخي الحبيب رافي
بغض النظر عن دراستك فإنك تعتبر" مغترب"، ماذا أثرت فيك الغربة؟ وماذا أضفت على حياتك من سلبيات أو إيجابيات؟
الغربة؟؟؟؟؟ إنت أكتر واحد بيعرف شو يعني الغربة. شو بدي أحكيلك لأحكيلك. بالبداية أنا كتير بكره الغربة بس كان في شي أقوى من عاطفتي وتفكيري جبرني إقبلها وهوي دراسة شي بحبو.
حاليا دخلت بالسنة الرابعة من غربتي يعني بالعربي المبلطح فتت بجوها وتعودت عليها، طبيعي استفدت من الغربة بشكل كبير. مثلا بسببها زاد عندي الحس بالمسؤولية، بسببها صرت أعرف شو يعني شخص ما عندو أهل وما عندو حدا جمبو. وهون اسمحلي أخي الحبيب سدد شوي من الدين يلي عليي لأحد الآباء يلي اسمو أفرام ووجهلو شكر لأنو كان بفترة من الفترات أهلي باليونان وما تركني أبدا من أول إلي بهالبلاد.
بعتبر أنو كان للغربة عليي سلبية وهيي أنو صار عندي حذر كبير من التعامل مع الناس يعني زيادة عن اللزوم بس مو بإيدي (يعني أنت متهم حتى تثبت برائتك)
السلبية التانية هيي أنو الغربة ساهمت بشكل من الأشكال بتقليص دور العاطفة بحياتي وهون بعتذر ما بقدر أشرح أكتر.

هل تتمنى بعذ ذلك أن تعود لتخدم في سوريا بنفس منطقتك؟ هل لديك رغبة مستقبلاً بالبقاء في اليونان؟
أول شي بغض النظر عن تحقق حلمي أو لا فأنا أكيد راجع على سوريا (حتى لو تأخرت الرجعة شوي) بس بالنهاية راجع. لو الله اختارني لكون من خدامو فأنا بتمنى من كل قلبي كون بمنطقتي لكتير أسباب.
البقاء في اليونان فكرة مو واردة نهائيا عندي.
هون فرصة حتى خبركن أنو بلادنا أحسن من 10000000 يونان. ووضع كنيستنا أحسن بكتيييييير من اليونان. تخيل أنو هون يوم الأحد بالقداس بكنيسة الرعية بكون أنا وبلا منازع أصغر شخص بالكنيسة والأكبر مني مباشرة يمكن عمرو 50 سنة. يعني شريحة الشباب مختفية. وهالحكي مو برعية وحدة لا ب 99,99من الرعايا، ومنشان كون عم أحكي الحق كلشي صرلي باليونان شفت كنيسة وحدة بتهتم بالشباب والسبب أنو الاشمندريت يلي فيها كتيير نشيط.
أنت زرت الجبل المقدس، باختصار" وبعرف أنو صعب الإختصار"، ما هو الشعور الأول الذي انتابك عندما نزلت الجبل أول مرة؟ وما هي الإنطباعات النهائية للزيارة؟
وقت كنت رايح عالجبل لأول مرة وكنت عالطريق ما بعرف شو كنت حاسس، كنت فكر طول الطريق بالشغلات يلي منقراها بالكتب وحس بالرهبة أنو هلق رح شوفها بعيني، وأول مرة ركبت فيها بالباخرة يلي رايحة عالجبل (كان فترة عيد الميلاد) كانت الدنيا صقيع وظنطاري وشو ما بدك وع هيك كنت مقرر ضل على ضهر الباخرة منشان ضلني شايف الجبل وأديار الجبل وهيي موزعة.
الجبل يا أخ رافي هوي أفضل مكان باليونان لأنك تفرغ نفسك من همومك وتقرب من الله.
ما رح أنكر أنو طلع الجبل مغير عن الصورة يلي كنت حاططها براسي ويلي كنت مكونها من قراءاتي عنو أو من القصص يلي كانوا يحكوها الآباء يلي زاروه. مثلاً الجبل فيه كل أشكال الحضارة (سيارات- إنترنت- تليفون- فاكسات- شرطة..) وطبيعي أنو كل هالإشيا عم تتسخر لخدمة الجبل وهيي كتييييييير ضرورية.
ماذا تعني الأناشيد للأخ بندلايمون؟
المخيمات؟... المسيح نوري وخلاصي
يا أخ رافي حطيت إيدك عالجرح....
أول شي فكرة مدارس الآحاد فكرة كتير راقية مع أنو عم تحيد عن اهدافا. أنا التعليم بالكنيسة شقفة مني وما بتخيل حالي بدونو. ولمداراس الأحد فضل عليي بتوعيتي ويمكن هيي السبب إني باليونان.
الأناشيد يا أخ رافي...... ممممممم شو بدي قول
أنا بحس بقمة الفرح وقت منوقف مجموعة ومنقول نشيد وبيكون طالع من القلب والكل مبسوط. للأسف الأناشيد بلشت تموت وماحدا وقف بالعزى.
المخيمات؟؟؟؟؟ بتذكر بسنة 2002 طلعت 7 مخيمات وكلت علقة ماكنة بالبيت وكنت كل مخيم قول لأهلي هيدا آخر واحد. يعني باختصار عندي ولع بالمخيمات وبعتبرها وسيلة كتير مهمة لتبشر فيها. وهون كمان رح أتأسف أنو المخيمات بلشت تنهار وبتوقعلا الانقراض (يمكن إنت لأنو صرلك فترة ما طلعت مو حاسس مع إني بعرف إنك حاسس)، وعلى فكرة تراجع المخيمات سببو مدراس الأحد يلي ما عم تتطور مع تطور الدنيا وأنا ما قصدي بالتطور أنو تبيع أهدافا ومبادئها.
بس هلق إذا بتلاحظ سواء خلال السنة أو بالمخيم نفس الشغلات بتصير: يعني موضوع (عالأغلب ممل) ونشاط (صرنا حافظينو عن الغايب) شيلك عن أنو لازم مركز المخيمات يتغير كل فترة كنوع من تغيير الشكل.
المسيح نوري وخلاصي كان من أحلى المخيمات يلي طلعت فيها وأكيد عارف ليش ما بدك مين يخبرك.
أحب أن أعايدك معايدة خاصة جداً، وأتضرع للطفل المتجسد أن يعطيك سلاماً، ويملئ حياتك من نعمته، لتكون للكنيسة الأرثوذكسية منارةً كما كنت لمدارس الأحد، وما زلت
وأنا بدوري بعايدك من كل قلبي وبتمنالك يكون قلبك مغارة يسكنها يسوع طول الأيام. وبشكرك عالإطراء بس أنا بعمري ما بقدر كون منارة (هيدا مو تواضع) وأكتر شي بقدر كونو هوي شخص عم يحاول يقدم شي من وزناتو.
أخي الحبيب أشتاق أن تعود يوماً تلك الأوقات الجميلة التي قضيناها معاً. والأحسن القول: أشتاق إلى تلك الأيام الجميلة، وأصلي لكي تجمعنا الحياة في القريب أو في البعيد وإن اختلفت الأدوار...المهم أن يكون الهدف واحد والغاية هي ...الكنيسة
هي الأمنية مشتركة وأتمنى إنها تتحقق بأقرب فرصة