أنا والغفران ...

[فيرينا]

ساعات كتير لما حد بيغلط فينا بنغضب جامد ودا وارد لأنه ساعات بنحس بالخيانه والغدر والخداع ... وللأسف في اللحظات الصعبه دي لما حد بيجي يقول أغفر أو سامح علشان ربنا يسامحك ويغفرلك .... ممكن للأسف نرد ونقول انا مش عايز ربنا يسامحني لو وقفت على غفراني للشخص دا انا موافق عايز اروح جهنم ....

صحيح بيبقى كلام في لحظه غضب وصحيح بنندم عليه ونعتذر لربنا بس المشكله اننا قلناه لأننا حاسين بيه جوانا مراره وبغضه صعبه ... من الاخر مش قادر أغفر
أيوه مقتنع أنه لازم وأنه صح ولو أني مسيحي يبقى لازم أغفر بـــــــــــس مش قادر ....

وعارف أني لو طلبت مساعدة ربنا ليا مش هيتأخر وهيساعدني بكمال لأنه وعدني أنه

" استطيع كل شيء في المسيح الذي يقويني " ( في 4 : 13 )

بس كمان انا عليا دور أني أساعد نفسي وأحاول أعمل ضبط لمشاعري وأنفعلاتي وفي عدة طرق ممكن تساعدني ...

1 – وجد فيه أمور صالحه ::

حاول تدور في الشخص اللي انت مش قادر تسمع اسمه على اي أمور صالحه أو أي خير زي ما الرب عمل مع يهوشافاط

" ورجع يهوشافاط ملك يهوذا الي بيته بسلام الي أورشليم , وخرج للقائه ياهو بن حناني الرئي وقال للملك يهوشافاط أتساعد الشرير وتحب مبغضي الرب فلذلك الغضب عليك من قبل الرب , غير أنه وجد فيك أمور صالحه لأنك نزعت السواري من ألأرض وهيأت قلبك لطلب الله " ( 2 أخ 19 : 1 – 3 )

يهوشافاط هنا كان مصاهر أخاب الشرير وخرج للحرب مجامله لأخاب مع انه الرب حذره على يد ميخا النبي .. أخدت بالك ربنا قاله ايه ... تحب مبغضي الرب ..... فلذلك الغضب عليك من الرب

كلنا بنوصل للنقطه دي ونقف نركز على الأذيه اللي حصلت لينا وعلى غضبنا بس مش بنقدر نشوف الخير والجمال اللي في الطرف التاني

ممكن تسألني هو فلان دا فيه خير هقولك دا خلق على صورة الله ومثاله !!!!

عارف مين أكتر شخص رائع بعد الرب طبعا في انه يفتكر الخير اللي الناس عملته معاه ؟؟؟

أحشويروش الملك في سفر أستير ( أس 6 : 1 – 11 )

الشاهد بيقول بما معناه أنه في أحد الايام أحشويروش كان قلقان فطلب انه يقراء أمامه سفر تذكار أخبار الايام اللي بيحكي كل الاحداث اللي حصلت ومنها احشويروش أفتكر الخير اللي صنعه معاه مردخاي وأنقذ حياته ..

.... أيه المانع أنك تبقى زي المللك العظيم دا وتعمل لكل شخص ملف أبيض جوا دماغك ممكن تقول انه ملف حمايه وفيه تحتفظ بكل المواقف الجميله اللي الشخص عملها معاك .... وعلى رأي المثل الملف ألأبيض ينفع في اليوم ألأسود (( اللي هتتخانق معاه فيه ))

أفتكر انه اتصل بيك وانت عيان وخرج معاك وانت زهان وقدم ليك نصيحه مفيده حتى ولو من باب المجامله .....

2 – بالكيل الذي به تكيلون يكال لكم ويزيد ::

" و قال لهم انظروا ما تسمعون بالكيل الذي به تكيلون يكال لكم و يزاد لكم ايها السامعون " (مر 4 : 24 )

ممكن تفكر في أكتر أنسان أنت بتحبه وبتهتم بيه ... تخيل انك غلطت فيه جامد .. من الاخر بهدلت الدنيا .... أيه رأيك لو الشخص دا رفض يسامحك .... ودا من حقه طبعا ومن الاخر مش عايش يشوفك تاني انا بس بهدي النفوس

أيه رايك هتبقى مبسوط لو أتعمل فيك نفس اللي انت بتعمله في اخوك ...... لو مصمم اسمحلي اقولك انك هتقع في التجربه دي قريب علشان تستوعب سوري بس دا الواقع

3 – نفعل نفس الامور بعينها ::

" لذلك انت بلا عذر ايها الانسان كل من يدين لانك في ما تدين غيرك تحكم على نفسك لانك انت الذي تدين تفعل تلك الامور بعينها " ( رو 2 : 1 )

أنا بدين تصرف لأخويا او أختي وعليه برفض الغفران وفي نفس الوقت أنا بعمل نفس الغلطه بس بصوره أوقح لأني مش بس بعملها لكن كمان بعملها في حق ربنا شخصيا...

أيه أسواء غلطه الكل بيكرها .... الخيانه الزوجيه ..... طب ما أنا لما بعبد أله أخرى غير الرب ( مال , أشخاص , علم , ..... ) مش دي برضوا خيانه لربنا

طب والسرقه ..... فلان دا نصاب وسرق تحويشة العمر ..... أمتى أخر مره أنا دفعت العشور بأمانه ... عشور وقت او عشور فلوس

يمكن الكذب .... فلانه غشاشه وكل كلامها كذب ..... يا رب كان نفسي اصلي بس انت عارف التهاب اللوز والحنجره مش قادره اصلي ............ بقول كدا وانا بفصفص بزر ( بقزقز لب ) قدام فيلم ...

الــــــــــــــــــخ

بس

الغفران مش معناه انه العلاقات اللي اتهدت ينفع ترجع تاني او اني ألغي عقلي وكأن محصلش حاجه

المحبه والغفران رائعه بس في بعض الاحيان بيفضل المحبه والغفران من بعيد لبعيد بمعنى

شفت حلقه لبرنامج دكتور فيل عن شابه عايزه ترتبط بالرجل اللي قتل اخوها الوحيد وهو حاليا مسجون وبيحاول ياخد افراج لان سلوكه اتحسن هي مكنتش تعرفه من قبل كدا واتعرفت عليه في السجن لما حاولت هي ومامتها يقدموا طلب افراج عنه لأنهم سامحوه

عجبني جدا دور الام والاخت اللي غفروا للي قتل ابنهم لدرجه انهم بيساعدوه ياخد حريته لكن كمان مش قادره أفهم أزاي بنت عايزه تتزوج قاتل أخوها ........ وعجبي

ـــــــــــــــــــــــــ ــــــــــــــــــــــ
كل أساءه ل تغتفر وجرح في القلب اتحفر
حتى لو كان بقاله سنين ايماني فيك انت يا معين

( بجلدتك شفيت بجلدتك شفيت ) 2

[Fr. Boutros Elzein]

http://www.enjeel.com/bible.php?bk=46&ch=13&vr=13#ver13

عزيزتي فيرينا
اف 4: 26 اغضبوا ولا تخطئوا.لا تغرب الشمس على غيظكم .
الغضب ،يمكننا أن نحوله إيجابياً ، ومدخلاً لخلاص الآخر
المغفرة ليست فرضاً نقدمه أمام الآخر او استحقاقاً علينا التقيد به .

الله له المجد ، إذا فهمنا أن وصاياه هي أوامر وأحكام مبرمة علينا تنفيذها أو يأتي عينا غضب الله . فيكون عندها أننا نعبد إلهاً لا يُحَبْ بل إلهاً نخافه ونرتعب من غضبه .
بل نحن نحب الله ونعبده لأنه يستحق المحبة والعبادة .
وعندما نسمع نشيد المحبة لمعلمنا بولس الإلهي. في الرابط أعلاه .

ندرك أن الغفران ومسامحة الآخر ، لايمكن أن يكون مثمراً ومقبولاً من الله إن لم يكن دافعه محبة الآخر ،
والغيرة عليه لخلاصه من فخاخ الشرير. أنا اسامح الآخر بلا شروط
قَبِلَ أم لم يقبل ، أنا اسامحه لأني أغار على صورة المسيح فيَّ . على مايقال ( كل إبريق ينضح ما فيه ) فالصالح ينتج صلاحاً والسيئ ينتج سوءاً .

كلماتكِ تعبر عن واقع البشر حقيقةً ، وأما نحن فلنا فكر المسيح .
( نحنا غير شكل !) حاجة تانية

[فيرينا]

نقبل الايادي يا ابي

كلماتكِ تعبر عن واقع البشر حقيقةً ، وأما نحن فلنا فكر المسيح .
( نحنا غير شكل !) حاجة تانية

هي كلماتي للأسف تعبر عن الواقع اللي انا بعيشه لأنه أنا عندي مشكله كبيره مع الغفران فبحاول أعمل اي حاجه تساعدني أني أغفر لأخواتي

بس بجد شكرا لقدسك على رسالة المحبه لبولس الرسول ربنا يساعدني أني أقدر أحب اخواتي مهما حصل

" وتحتمل كل شيء وتصدق كل شيء وترجو كل شيء وتصبر على كل شيء. 8 المحبة لا تسقط ابدا."

يا رب سامحني وساعدني

شكرا يا قدس ابونا ربنا يبارك تعب قدسك معانا وشكرا ان قدسك فوقتني

أذكرني يا أبي في صلاتك