أخونا الحبيب ألكيسوس
من خلال كلام الأخ رافي، اتضح لي بأنك تحب ونعمل في خدمة الكنيسة.. فهل بتعتقد أنك من خلال الكهنوت رح تعمل شي مابتقدر تعملو وانت من عامة الشعب؟
أخي الحبيب مو بس بحب العمل والخدمة في الكنيسة لأ، إذا بدك عندي هوس أو هاجس أو ولع بهالموضوع.
أما بالنسبة للكهنوت فأمر طبيعي أنو تعمل شي ما بتقدر تعملو إنت ومن عامة الشعب، وما قصدي أنو عامة الشعب ما بيقدروا يخدموا أو يعملو شي، بيقدروا بس ضمن إمكانيات وظروف معينة والكاهن نفس الشي بيقدر يعمل كتير شغلات هوي وكاهن وما بيقدر يعملها هوي وعلماني.
في خطط في ذهنك حول ممارستك الكهنوتية؟
أكيد في كذا خطة وكذا محور بذهني. ومن فترة تناقشة مع مطراني فيهم، أبدا إعجابو بالبعض والبعض ما عجبوه. بتخيل أنو أي شخص رح يجرب يشتغل عالإشيا يلي هوي شايفها ناقصة أو ضعيفة، وأنا كتيييييير بآمن بالمواهب يعني برأيي كل شخص لازم يسخر مواهبو بخدمتو.
بكل الأحوال بعد بكير شوي عالموضوع.
شو رأيك بالكاهن البتول الذي يعيش ضمن الرعايا؟
إن كنت ضد وجود كاهن بتول في الرعية، فهل تعتقد أننا سنواجه ماتواجهه اليوم الكنيسة الكاثوليكية بسبب وجود كهنة بتولين في الرعية وضمن عامة الشعب؟
وخلينا نكون صريحين.. عنا علامات تدل على ان الوضع سيتفاقم... فشو رأيك بكونك تحلم بالكهنوت؟
ممممممم موضوع صعب
أنا لاني مع ولاني ضد الكاهن البتول بالرعية ورح جرب وصل فكرتي.

برأيي الكاهن البتول وشخصيتو هني عوامل أساسية بهالموضوع. يعني بالمختصر المفيد إذا كان الزلمة قد حالو وقلبو بالكامل لله فأكيد رح يعمل شغل رائع ورح يوصل كلمة الله لأكبر عدد ممكن، وبيقدر يكون مثال حي للشعب على أنو حتى بهالأيام في ناس نادرة نفسها لله بالكامل لأنو للأسف بهالأيام صارت البتولية بنظر الناس هيي الهروب من المشاكل بالعالم أو من شي عقدة نفسية ومو عارفين أنو أكبر تجارب هيي يلي بيتجرب فيها المتبتلين.
وجود كاهن بتول برعية ما لحالو بدون كاهن متزوج أنا شخصيا مو معها. وبتخيل هي طريقة مطران اللاذقية ومطران عكار يلي بيحطو كاهن بتول وكاهن متزوج مع بعض بنفس الكنيسة، وبهالطريقة بيتنظم الموضوع بترتيب. يعني مو ضروري للكاهن البتول أنو يبرم بيوت الرعية حتى يكرس. الكاهن البتول بتخيل ببلادنا متفرغ لقراياتو وصلواتو أكتر من المتزوج يعني أغلب الآباء الروحيين عنا بالرعايا هني متبتلين، وهيدا ما يعني أنو المتزوج ما بيقدر يكون أب روحي بالعكس، في مشاكل الشخص ما بيقدر يحكيها إلا لأب كاهن متزوج. يعني بالمختصر بيكملو بعضن.

هلق إذا كان الكاهن مو متل ما حكينا فأكيد ما رح يمشي حالو. بس ما بتخيل نواجه (بهالفترة) نفس مشاكل الكاتوليك لأنو التأثير الغربي بعدو ما وصلنا متلهن. يعني لهلق عنا إسا الكاهن إلو صفات وهيبة معينة غير موجودة عند الكاتوليك.


الوضع سيتفاقم؟؟؟؟
أخي الحبيب أنا شايف أنو بلش يتفاقم من هلق وكل مانو الوضع لورا. وما بخفي عليك كذا مرة دب فيني الخوف أنو أنا شو بدي بهالشغلة وبخدم أنا وعلماني وبرجع لجامعتي بسوريا. بس حب الكنيسة سوسة بيربا عليها الشخص وما بيقدر يتركها.
مرة في شاب عم يدرس لاهوت سأل سيدنا سلوان مطران الأرجنتين (كان عم يعطي محاضرة عن بولس الرسول)
قلو يا سيدنا كيف شخص متلنا بيقدر يتخذ من بولس الرسول مثال بخدمتو قام ببساطة قلو سيدنا سلوان كتير منيح إنك عم تفكر تتخذو مثال وقلو هيدا الشي نحنا ربينا عليه ببيت أهلنا.
يعني الكل بيعرف أنو وضع الكنيسة عم يتراجع وفي كتيييير تجاوزات عم تصير، بس إذا الكل شال إيدو مصيبة. لذلك الواحد بيصلب إيدو عوجهو وبيتكل عالله. وأكيد أنو بالنهاية مشيئة الله هيي يلي رح تمشي بالكهنوت أو بغيرو.