طفل يسأل

[مارى]

عايزة أعرف معنى كلمة طروياريات بالعربى ، و بالتحديد الجمل اللى ممكن توصل فكرة الثالوث صح لطفل فى السن ده

انا عايزة كمان حوار يكون بين شخص كبير و طفل فى السن ده بيحاول يفهم كل شىء عن الثالوث ، ممكن يكون شكل الحوار إزاى ، لأن لو طفل سأل السؤال ده لأحد والديه فى البيت أكيد لازم يردوا ، لازم يتكلموا معاه ، مش هيكتفوا انهم يقولوا له أحضر القداس و أفهم المعنى من خلال الطروباريات

مع الشكر

[مارى]

أما الكنيسة الكاثوليكية فانشغلت ببعد آخر فرّغ الليتورجية اللاتينية من محتواها

عايزة أعرف معنى الجملة دى بالتحديد ، لأنى مش فاهماها ، أشرحها من فضلكانا كل اللى بقدر اميزه بين القداس اللاتينى و القداس الأورثوذكسى هو ثراء التانى عن الأول و تنوع الصلوات و مدى عمقها
و معلش اذا كان حد كاتوليكى بيقرا كلامى بلاش يزعل ، صدقونى انا نصى كاتوليكى

[سليمان]

ومع روحك أيضاً أختي ماري

أود أن أضيف إلى ما ذكرته في مشاركتي الأولى أن عقيدة التثليث عقيدة سامية ترتفع فوق الإدراك البشري ولا يدركها العقل مجرداً، لأنها ليست وليدة التفكير البشري فهي إعلان سماوي من الوحي المقدس، ويدعمه الإختبار المسيحي. في سبيل قبول هذه العقيدة واعتناقها لا بد من الإختبار العميق للحياة المسيحية.

أقول لطفلك الحبيب
حبيبي أنت
"لا تتبع راحة الجسد ولكن صلّ. وصلّ بجد واهتمام حتى ولو كنت طول النهار تكد وتتعب. لا تكن مهملاً في الصلاة المقدسة ... (لا أصعد على سرير فراش ولا أعطي لعيني نوماً أو لأجفاني نعاساً ولا راحة لصدغي إلى أن أجد موضعاً للرّب). (مز131)
(القديس اسحق السرياني)

لي عودة بعون المسيح لنكمل الإجابة

صلّ معي أختي صلّ.. يا أحلى الخيّيات

[Minas]

يا عم سليمان وصف غير لائق إيه بس يا سيدي ... كلمة عفرييييييييييييت دي عادي في مصر ، بلاش كدة
ملهاش عربي يا ماري ، هي طروباريات بعد التعريب و الإنجليزي Troparions
هو مش هيسأل صدقيني ، دي حاجة Basic أوي في القداس

بالنسبة لموضوع الفرق بين القداس اللاتيني و الأورثوذكسي ممكن نفرد له موضوع في قسم الحوارات المسكونية بس مش قبل أسبوعين عشان أنا مش فاضي دلوقتي ،

يا أخ سان مينا كل شيء في الدنيا يمكن استخدامه صح أو غلط ، لذلك لا يوجد تشبيه معين نلقيه فقط ، بل طبعاً لازم نشرح الموضوع في ضوئه. مثل موضوع الشمس.

الأنبا شنودة في عظة له سنة 1977 في كنيسة مارجرجس هليوبوليس قال إن الآب هو الذات أو الجوهر و الإبن و الروح القدس صفات لهذا الجوهر ، و طبعاً ديه سابيلية ، و رد عليه ساعتها الدكتور جورج حبيب بباوي بمقالة ضخمة عن خطأ تفسير الثالوث بذات و عقل و حياة . و كنا نشرناها هنا بس مش فاكر فين.

الإصطلاحات الثالوثية نفسها أخذت في التطور من أجل شرح المفهوم الواحد ، فمثلاً الجوهر والأقنوم كانوا نفس المعنى و لذلك كانوا يقولوا الله جوهر واحد و أقنوم واحد ، حتى جاء اللاهوت الشخصاني الرائع على يد غريغوريوس النزينزي و باسيليوس الكبير ، و تم التمييز من أجل التوضيح ، ثم اعتمدها القديس العظيم أثناسيوس الكبير في مجمع 369 بالإسكندرية ،
الله ببساطة و بدون دخول في أمور لا نعرفها يحمل كل المتناقضات التي تتخيلها ، و هذه المتناقضات سببها هي إننا لا نستطيع أن نعبر عن حقيقته مهما بلغ بنا الأمر من فصاحة و رجاحة ... يبقى الله سراً ،
الله واحد و هو ثالوث ، ثلاثة أشخاص متمايزة و جوهر واحد ، كلها تحيا في بعضها و ببعضها بشكل دائري لا يمكن أن نفسره.
الآب يولد منه الإبن و الروح القدس ينبثق من الآب ليسكن في الإبن ، في ثالوثية محبة ، راجع مدونتي هتلاقي فيها حبة معلومات مفيدة
minas.orthodoxonline.org
--------------------------------------------------------
و سنتابع البحث سوياً ، فلست أنا هنا معلم و الآخر تلميذ ، بل كلنا نتحاور و نبحث سوياً ...
تحياتي للجميع
ميناس

[مارى]

دي حاجة Basic أوي في القداس

انت يمكن يا ميناس معملتش حوار مع طفل قبل كده ، الطفل ممكن يسأل أسئلة متخطرش على بالك

لما تروح القداس ابقى تابع الأطفال فى السن ده مرة ، تفتكر هتلاقيهم مركزين مع كلام الكاهن ، أو حتى ماسكين كتاب القداس بيقروا فيه ، لأ هتلاقيهم بيتفرجوا على الصور مثلا" فى الكنيسة او سرحانين او بيتلفتوا يمين و شمال ، عشان كده بقول لازم يكون فى حوار معاهم لما يسألوا السؤال ده

انا عارفة ان سؤالى صعب ، اصلى سألته لنفسى قبل ما اطرحه عليكم ، لقيت ان لو طفل سألنى السؤال ده مش هعرف اعمل معاه حوار على قدر مستوى السؤال

و كمان شفت أطفال بتسأله و الإجابات بتبقى دايما" غير كافية ليهم

[Minas]

لأ هو السؤال مش صعب ، لكن يبدو إنك لسة مأدركتيش ما أقول
في القداس الله هو اللي بيعطي استنارة
و مسألة الثالوث بسيطة و مش محتاجة شرح لأي طفل بيحضر و بيسمع
السؤال ملوش لازمة أساساً لو الطفل نشأ في بيئة أورثوذكسية بس

انت يمكن يا ميناس معملتش حوار مع طفل قبل كده ، الطفل ممكن يسأل أسئلة متخطرش على بالك

مش حقيقي

[مارى]

لأ هو السؤال مش صعب ، لكن يبدو إنك لسة مأدركتيش ما أقول

لأ مدركة اللى انت بتقوله ، بس الطفل فى السن ده مش هيدرك ده زى ما انت فاكر
هيطرح سؤال ، لو مرديتش عليه بأسلوب عقله يستوعبه ، النتيجة بتكون سلبية

السؤال ملوش لازمة أساساً لو الطفل نشأ في بيئة أورثوذكسية بس

طب لو أعتبرنا ان الطفل لم ينشأ فى بيئة أورثوذكسية بس ، ممكن نرد نقوله أيه ؟

[Minas]

لأ مدركة اللى انت بتقوله ، بس الطفل فى السن ده مش هيدرك ده زى ما انت فاكر
هيطرح سؤال ، لو مرديتش عليه بأسلوب عقله يستوعبه ، النتيجة بتكون سلبية

المشكلة - و ديه حاجة معروفة في الدراسات الغربية - إننا نستهين بعقول الأطفال و نتهمهم بعدم الإدراك و هذا غير حقيقي ، بل غير علمي
الطفل إمكانياته العقلية أقوى من الإمكانيات العقلية للرجل الكبير ، و هذا ممكن نتكلم فيه علمياً ، المشكلة إننا نربيه بطريقة مش مظبوطة ، بندلع فيه و نداعبه بأسلوب " هايف " ، أضف إلى ذلك الإعلام المستنير في التلفزيون من برامج أطفال و كارتون يصيبهم بالتخلف ، ثم نتساءل عن مدى إدراكهم
أنا أعرف أطفال ليسوا بأذكياء ( معدل الآي كيو بتاعهم أقل من 125 ) و بيحلوا معادلات من الدرجة الثانية
و مصفوفات كمان Matrices ، لأنهم ببساطة نشأوا في بيئة علمية نقية ،
نفس الحال عند الطفل الذي ينشأ في مجتمع أورثوذكسي ، يصير من طفولته فاهم إنه ممكن يكون الله ثلاثة أشخاص و جوهر واحد . مفهاش مشكلة يعني ، المشكلة فينا إحنا اللي بنربيه و بنجيبله تأخر بسبب تأخرنا إحنا . بل و نحاول أن نقنعه بأمور بسيطة جداً مش محتاجة أساساً إقناع.

أنا مش عاوز أتكلم عن طفولتي عشان محدش يقول لي إني فشار ، أو مغرور ... لكن أنا أعي ما أقوله

[Minas]

طب لو أعتبرنا ان الطفل لم ينشأ فى بيئة أورثوذكسية بس ، ممكن نرد نقوله أيه ؟

في الحالة دي يبقى يروح يسأل الغير أورثوذكسي ، لأن المسألة محتاجة تنشئة على أسلوب تفكير معين ، مش هنقدر نعطيه لواحد تاني في مجتمع و كنيسة تانية ... دا بقى ربنا يعينه

مرة كنت مع بعض الزملاء البروتستانت ، فسألتهم سؤال بيوجع أي بروتستانتي ، ماذا يشكل لك الثالوث في حياتك ... فأخذوا يبتعدون عن هذا السؤال المحرج و انتقلوا إلى موضوع الصليب والدين و الترضية و الكلمتين اللي حافظينهم .
في النهاية سألتهم و ما هو الثالوث ، و كانوا شباب عندهم حاجة و عشرين سنة ، كانت الإجابات رائعة ، توضح شيء لطيف جداً و هو إن التنشئة على ترانيم البروتستانت الفاضية منذ الطفولة أنتجت لنا سابيليين و نساطرة !
المشكلة مش هنا ، المشكلة هي إني لو حبيت أوضح الصح ، سأواجَه بأسلوب تفكيرو منطق أعوج لا يمكن أن يدرك الحقيقة...

يبقى الناس دول برة دائرتنا

[مارى]

في الحالة دي يبقى يروح يسأل الغير أورثوذكسي ، لأن المسألة محتاجة تنشئة على أسلوب تفكير معين ، مش هنقدر نعطيه لواحد تاني في مجتمع و كنيسة تانية ... دا بقى ربنا يعينه

أفرض انه سألك انت ، انا عايزة أعرف ايه هو الحوار اللى ممكن يعمله شخص أرثوذكسى فكره ناضج مع طفل اتربى فى بيئة مش ارثوذكسية أو ارثوذكسية و كاتوليكية معا" أو بروتستانتية

أنا عايزة الحوار ده ، حوار شخص مدرك مع طفل ، انا إجاباتك كلها فاهماها ، لكن انا عايزة إجابات يفهمها طفل

يبقى الناس دول برة دائرتنا

أيه المقصود بالجملة دى ، مش فاهمة ، اصل حتى الطفل الأرثوذكسى أب و أم بيبقى ساعات من خلال مدرسته او عائلته محاط بغير الأرثوذكس ، يعنى ممكن تلاقيه يسأل سؤال خارج المنهج ..... ههههههههه