اخونا raed على كرسي الاعتراف

[Seham Haddad]

يا عيني
اجيت والله جابك
صارلنا زمااااااااااااااااااان ما استفتحنا بكمن سؤال
يله منيح اكتييييييييييييييير
انشاله تكون القعده مريحه على الكرسي
وهالكرسي لازم ليه فك كمن برغي لحتى اتكون القعده مريحه ومن الاخر
هاد بيرجع للاخوه
نستفتح بكمن سؤال مؤقتا مثل حشوه السن
اولاً
كمن كذبه كذبت على خطيبتك
ثانيا ونفس السؤال الاول
اول كذبه كذبتها على الكاهن وكم كان عمرك وليش

حرام خلي هالكرسي سليم لحتى يجي حتى تاني ويقعد محلك خلص كافي فك براغي
واذا استدعت الضروري ننظر في الامر ومنفك كمن برغي لحتى ايكون مريح اكثر

[Mayda]

طمنا كيف القعدة عالكرسي؟ في رواق بالموضوع؟ s-ool-374

أول سؤال: انشالله بس تتزوج أنت وليليان شو رح تسموا أول ولد؟ يعني من الآخر أبو ايش نندهلك؟؟
تاني سؤال: أنت مسجل بغير منتدى بغض النظر إن كان منتدى ديني أو غير ديني؟! ولا هي أول تجربة الك بالمنتديات؟؟
تالت سؤال: ما هو أفضل موضوع قرأته في المنتدى حتى الآن؟ s-ool-309
رابع سؤال: شخص لا ترفض له طلباً (عدا ليليان طبعاً) s-ool-387

بانتظار الإجابة...

[Raed Zleik]

اولا وأخيرا بشكر الاخت اسماء ع كرم ضيافتها, وبذكرها بالمثل العربي القائل: لو منّو خير ما رماه الطير............
على كل حال واحتراما للعبة الديمقراطية ومبدا المحاسبة والاستجواب رح جاوب ع الاسئلة ع قد ما بقدر من المصداقية

1- شي كنت حابب كتير تعمله وما قدرت ؟

اتعلم الطيران او اتعلم قيادة الطيارة بس انشالله بيجي وقت وبحقق هالحلم

2- اذا هلا حكولك انه فينك تغير البلد الي عم تشتغل فيها اي بلد تختار ولماذا ؟

البلد اللي اكيد رح انتقل له لو اليونان كنت عملت اختصاص هنيك واستقريت هنيك وكنت هلء عم احكيك يوناني مكسر

3- اكتر شي بيقدر يأثر على شخص رائد ويغيره ؟

بالحقيقة في كتير أشخاص بيأثروا عليي واكتر شخصين هم أبوي الروحي وخطيبتي

طبعا شكري ما بيخلص للاخت اسماء ع القعدة اللطيفة وحسن الضيافة بس بتمنى منك انو يكون مع فنجان القهوة اي ضيافة ويفضل شوكلا مشان كون مرتاح اكتر

[Raed Zleik]

انشاله تكون القعده مريحه على الكرسي
وهالكرسي لازم ليه فك كمن برغي لحتى اتكون القعده مريحه ومن الاخر
هاد بيرجع للاخوه
نستفتح بكمن سؤال مؤقتا مثل حشوه السن

شكرا كتير كتير على استفاقدكن والله يقويكن وانا الكرسي بتوقع فيي منغير فك بارغي وطق براغي ف الله يرضى عليك بلاها هالحركة

كمن كذبه كذبت على خطيبتك

انا؟؟؟؟؟؟؟؟؟؟؟؟؟؟؟ الله يسامحك ما بكزب ابدا. عيب , بعدين أبونا بيقص لساني.......!!!!!!!!!!

اول كذبه كذبتها على الكاهن وكم كان عمرك وليش

انا بصراحة ما بعد كذباتي لابونا...... بس فيني قلك انو كنت صادق مرة او مرتين.....هههههههههههه

يعني بالفعل وانا قاعد ع الكرسي عم حس بالمحبة الأخوية اللي بتجمع اولاد هالمنتدى
شكرا كتير ع محبتكن والله يقويكن
وانشالله بفرح فيكن شهداء يارب

[Raed Zleik]

اهلاوسهلا بالخت الكبيرة مايدة وعراسي استقبالك وشكرا كتير لتشريفك الي بكمن سؤال بسيطين
على كل حال اسئلتك بتزكرني بوراق امتحان الجامعة بس نشكر الله ما محدددة الوقت والعلامة واليك الأجوبة:

أول سؤال: انشالله بس تتزوج أنت وليليان شو رح تسموا أول ولد؟ يعني من الآخر أبو ايش نندهلك؟؟

هلء في كتير مشاريع: انا بحب اسم القديس سلوان, انطونيوس, يوسف الدمشقي, باييسيس,
ولكن ع الأغلب انطونيوس
طبعا ما رح سمي افرام( كالعادة) لان سميت اخوي الصغير افرام بيكفي واحد بالبيت

تاني سؤال: أنت مسجل بغير منتدى بغض النظر إن كان منتدى ديني أو غير ديني؟! ولا هي أول تجربة الك بالمنتديات؟؟

يعني بلا احراج: بالحقيقة انا ما بحب المنتديات , بعتبرها انو فوضوية, بس هون لقيت من الترتيبو الفائدة الشي الكتير بالاضافة للكنز الروحي الموجود بالمنتدى من خلال المواضيع الكبيرة والكتيرة اللي عم تنطرح وكانت من قبل مطروحة لهيك فيني قول انو رح يكون هالمنتدى هو أول منتدى وآخر منتدى بسجل فيه.................كيفك فيّا؟؟؟

تالت سؤال: ما هو أفضل موضوع قرأته في المنتدى حتى الآن؟

بالحقيقة كل المواضيع تتراوح بين الجيد والرائع, في بعضها مألوف او مطروق من قبل بالنسبة الى, ولكن ما فيني قول انو في موضوع مميز بحد زاته لاني ما قريت كل ما هو موجود ولكن بعتبر انو اللي عم ينكتب ب الليتورجيا والروحانيات كتير مهم ومميز

رابع سؤال: شخص لا ترفض له طلباً (عدا ليليان طبعاً)

الشخص اللي ما برفضله طلب ابدا هو ابوي الروحي, شو ما قال وشو ما صار ((((((((((ثقة كاملة))))))))))))

[asma]

بكونه اخونا رائد جاوب على الاسئله بكل صراحه حرام خطي هلا صار لازم نعطيه قطعة قاتو يغير فيها طعمة تمه images.jpg
صحه وعافيه
ولكن لنا عوده بعد ذلك بدك طول بالك علينا شوي

[Georgette Serhan]

اخي رائد اهلا وسهلا فيك نورت
انت ملاحظ انو بس الجنس اللطيف مبلش فيك اسئلة ونبش بالخفايا ؟ ولا حدا من الجنس الخشن قرب لهلق. برأيك ليش هالطفرة بس من الصبايا؟
بالنسبة لما قلته عن سيدنا افرام معك 100000 حق ، شو آخر مقال او اصدار لسيدنا افرام قريتو؟



بالنسبة لطبيب اسنان هل صحيح انو طبيب الاسنان اول ما يتخرج ويشتغل بيقعد فترة طويلة صايم عن الاكل؟
وهيدا شوكولا من كل الانواع هدية المنتدى صحتين وعافية

[Raed Zleik]

برأيك ليش هالطفرة بس من الصبايا

انا برأيي انو السبب بيعود لان القط ما بيحب إلا خناقه..........هذا اولا
ثانيا موضوع وجودي ع الكرسي المحترم مؤامرة مدبرة من قبل هالصبايا لهيك ما مصدقين انهم عم يسألوا وياخدوا راحتهن

شو آخر مقال او اصدار لسيدنا افرام قريتو

حقيقة انا موجود بالمملكة العربية السعودية(وما تقرف) لهيك موضوع الكتب شوي صعب تابعه عم اكتفي حاليا بالمواضيع المتوفرة ع النت وخاصة مجلة الكرمة اللي بتصدر عن مطرانية طرابلس ومنشورات حركة الشبيبة و.......

بالنسبة لطبيب اسنان هل صحيح انو طبيب الاسنان اول ما يتخرج ويشتغل بيقعد فترة طويلة صايم عن الاكل؟

مو بس صايم, ومصدوم ومكتئب وتعيس وبيحس انو لو درس اي شي تاني كان احسن الو, وخاصة انو بسوريا في شي اسمو خدمة ريف يعني وين في ضيعة تعيسة وتعبانة لازم تروح تفتح فيها, واذا ما حبيت خدمة الريف لازم خدمة جيش , واذا ما حبيبت خدمة جيش عندك خدمة بالسعودية وكلو اتعس من بعضه
وخاصة وقت بيكون التعامل مع هيك ناس ممكن بينضف اسنانه من العيد للعيد وبس بتحس حالك عم تشتغل زبال اكتر من انك عم تشتغل دكتور اسنان
ميرسي ع الشوكلا.......
ضيافة الشباب غير شكل
مو متل ضيافة الأخت اسماء بدنا نشحدها شحادة

[asma]

مو متل ضيافة الأخت اسماء بدنا نشحدها شحادة

هلا ضيافتي صارت متل الشحاده
وجنت على نفسها براقش


بالنسبه للاكل وما اكل شو اطيب اكله بتحبها
واكثر اكله ما بتحبها (ما بطيقها )

مشان نعرف المره الجايه شو بدنا نضيفك

[Elias]

الله يكون بعونك يا أخ رائد علقت وماعرفت مع مين أسما .لا تخاف اسما طيوبة اادمية

وليش صحي مافي شباب هاي أنا *شب شي شغلة

1-شو بيعنيلك وجود شخص آخر بحياتك "من برا العيلة صديق يعني"

2-من طفولتك وانت ناوي على طب الاسنان كمهنة؟ ولو صرلك تغير شو بتختار

3-اذا حبينا ناخدك سفر وين تحب تروح على سبيل السياحة فقط.

4- لو رحنا لعالم الأحلام شو هووي الجو اللي بيرغبلوا أخونا رائد أكتر من غيرو

5-رأيك الشخصي بالمرحلة العمرية من 14 لـ 20 سنة

وحاجة هدول لهلأ بلكي بعد يومين منتابع سلخ فيك سلخ أسئلة موشي تاني