" فقال الرب لصموئيل حتى متى تنوح على شاول وأنا قد رفضته عن أن يملك على اسرائيل " ( 1 صم 16 : 1 )

ساعات كتير في حياتنا بنعمل زي صموئيل لما نمر بمشكله أو نكون مرتبين أمر ما في حياتنا والامر دا ميحصلش زي ما كنا عايزيين ......سفر مثلا او شغل او دراسه او ارتباط او ..............

ساعتها بنقفل على نفسينا ونفضل ننوح زي ما عمل صموئيل بالظبط ونسيب كل حياتنا وكل عطايا ربنا لينا وكل ترتيب ربنا لحياتنا ومنشوفش غير شاول ...... كأن الدنيا كلها ماتت ومفيش غير شاول نفكر فيه ونحزن عليه

صحيح مش هقدر انكر انه شاول كان

" فوقف بين الشعب فكان أطول من كل الشعب من كتفه فما فوق , فقال صموئيل لجميع الشعب أرأيتم الذي أختاره الرب انه ليس مثله في جميع الشعب فهتف كل كل الشعب وقالوا ليحي الملك " ( 1 صم 10 : 23 – 24 )

(( ملحوظه الرب أختاره للشعب من كتر الزن بتاع الشعب لكن مشيئة ربنا ليهم انه هو اللي يكون ملكم ))

أنا معاك ومقدره جدا ان شاول اللي تعبك كان أطول من في الشعب وانه فيه صفات وامكانيات وخير كتير كنت شايفه في شاول وممكن تفكر زي صموئيل انه ليس مثله في جميع الشعب ...............

بس عارف انت شايفه كدا ليه ... لانك مش شايف غيره ولو فضلت مركز عليه مش هتقدر تستوعب خطة ربنا ليك اللي هي داودا تخيل المقارنه بقت بين مين ومين بين شاول وداودا
صحيح وقت ما صموئيل رشم داود كان داود لسه فتى وصموئيل مكنش مقتنع بيه في الاول بس لما أطاع صوت ربنا قدر يفرح بداود

بس كمان صموئيل كان عليه دور عمله قبل ما كان يشوف داود وهو أنه بطل ينوح على شاول ...

وأحنا علشان نقدر نبطل ننوح على أي أمر تعبنا لازم نهرب نهرب من أي حاجه بتفكرنا بشاول
يعني لو كنت مقدم على هجره واترفضت اكتر من مره وأتأكدت انه صوت ربنا بيقولك لاء انا مش عايزك تهاجر أعتقد أنه مش من المنطقي انك تحتفظ بكل الاورارق بتاعة الهجره وكل ما تقرب من مكتبك تفضل تتضايق ..... في أختراع عبقري في المطبخ اسمه سلة المهملات

ولو شاول دا كان ارتباط وانتهي اعتقد انه برضوا ممكن تتخلص من الهدايا والتذكارات اللي عندك ولا أنت بتحب تعذب نفسك ......

شفت فيلم لصوص لكن ظرفاء فاكر ماري منيب كانت بتقول ساعته نظارته ( كانت بتتكلم على حاجات زوجها المتوفي )

لو تحب تبقى زي ماري منيب خلي الدباديب والاوتوجرافات والصور والميداليات و ........

بس انا خلصت ضميري وقلتلك اللهم بلغت اللهم فاشهد هههههههههه

كمان معتقدش انك هترمي الهدايا وتفضل تطلع للشخص دا زي عفريت العلبه ..... مش بقول اختفي من الكون بس مثلا لو خطيبك السابق بيروح اجتماع معين وامين الخدمه أغبو ( نسبه الي الغباء ) وطلب منك تخدمي معاه اعتذري بأي سبب مش لازم تكذبي قوليله هروح اشتري حاجه وأتشتري اي حاجه وروحي .....

من الاخر اهربي وعلى رأي تيمون في فيلم الاسد الملك الجزء التاني لو هتقلب بعكننه الجري نص الجدعنه

وخلي بالك الكتاب بيقول اهرب من الشر وحسب اعتقادي ان دا بالنسبه ليكي شر

نرجع للجد ..

" فقال الرب لصموئيل حتى متى تنوح على شاول .......... أملاء قرنك دهنا وتعال أرسلك الي يسى البتلحمي لأني قد رأيت لي في بنيه ملكا " ( 1 صم 16 : 1 )

أكيد انت عارف\ه انه الدهن بيرمز للروح القدس وانت اكيد في الوقت دا محتاج لربنا جدا ومحتاج فيض من النعمه يملا قلبك وصدقني الرب مش ممكن يتخلى عنك او يحرمك من روحه بس علشان تتملي من روحه لازم تتناول وتواظب على المناوله وتواظب على كلمه ربنا وتحضر على الاقل اجتماع اسبوعي تسمع فيه صوت ربنا

وتعرف ايه هي الخطوات اللي ربنا هيرسلك فيها خلي بالك صموئيل مشي مسافه عقبال ما وصل لداود وفي مشواره دا ربنا كان بيقوده ...... وعلشان يقوده يبقى اكيد صموئيل كان بيسمع صوت ربنا ويخضع ليه

فاكر ام النور قالت ايه للخدام في عرس قانا الجليل

" مهما قال لكم فافعلوه " ( يو 2 : 5 )

مهما قال .... مهما قال ...... ممكن يقولك ارجع الخدمه في الكنيسه الفلانيه او مثلا يقولك رتب مكتبك ....

من الاخر اللي ربنا يقولهولك اعمله وبعد فتره هتلاقي نفسك نسيت شاول وقابلت داود... داود الشغل داود السفر داود الامكانيات الماديه داود ................ داود اللي نفسك فيه

ـــــــــــــــــــــــــ ـــــــــــــــــــ

القرار ::

أنا هفرح بيك علشان أنت بتكفيني
أنا هاهتف ليك علشان أنت بتحميني

1 – مش مستني يا ربــــي موقف راح يفرحني
أو مســـتني كـــلام هيطـــمني ويســــعدني
أو مــسنود على نــاس تتــغير و تجرحـني
وارجع لك من تاني علشان تشفي وتشبعني

2 – مش راح أنزل عيني من على شخصك وجمالك
وأتــذكر ضــعفاتي وخيانتــي وكســـر كلامــك
وياك يـتـجدد عــــهدي تـــــغمرني بنهر سلامك
وتفيض فيا بروحـك بشهاده لمــــجد جــــــلالك


(( أسفه كان نفسي اجيب الرابط بتاع الترنيمه لانها تحفه بس فضلت ساعتين ادور معرفتش لما جالي احساس النمله المكسحه لما تتشل ))