هجاوب على قد ما اقدر من الاسئله وربنا يستر

هل تمارس الأرثوذكسية بشكلها الصحيح الآن ؟؟
للأسف لاء واحيانا اكتر مكان بيبقى معثر هو الكنيسه ابليس للأسف واخد راحته في الكنيسه

أين التوعية المنشودة ؟؟؟
ضعيفه ومنفره احيانا كتيره

كمان احب اقول حاجه انا مش هسيب بيتي وادور على راحتي في مكان تاني الا لو ملقتهاش في بيتي يبقى اول علاج لو كنيستي بجد عايزاني انها تلبي احتياجاتي الروحيه لاني جعانه ومن كتر جوعي خرجت ادور برا على الاكل

:" البروتستانت عندهم روحانية و حاجات حلوة و ترانيم جميلة ، و الأورثوذكس (من الآخر يعني) دمهم تقيل"
ممكن من غير زعل اوضح بعض النقط في الموضوع دا هبتدي بالترانيم

1 - كلمات الترانيم في الكنيسه الانجليه غالبا في معظم الاوقات بتبقى تأملات وتسابيح عن اختبار زي ترنيمة انا ساكن في حصون الصخر لماهر فايز واعتقد ان كلنا عارفين قصتها .............. انا قصدي انها اختبارات جديده بتمجد ربنا وكلام من القلب فطبيعي بيمس القلب

دا مش معناه اني بقول ان الترانيم الارثوذكسيه مش من القلب اطلاقا بس من يوم ما وعيت على الدنيا وهي هي نفس الترانيم في كل المناسبات الترانيم واحده لحد اما حسيت اني بقولها وانا مش مركزه فيها

انا مش ضد تراثنا الرائع من الترانيم بس ايه المانع انه يبقى جنبه ترانيم جديده مش الكتاب بيقول سبحوا الرب بترنيمه جديده

موضوع كلمات الترنيمه دا ابسط حاجه ومش مهم بالنسبه للي جاي

2 - توظيف الترانيم وطريقه الترنيم كلنا عارفين ان الكتاب بيقول ادخله الي حضرته بترنم وطول عمر الكنيسه الارثوذكسيه بتعمل فترة تسبيح قبل اي اجتماع بس ........................

ولنفرض ان الاجتماع عن التوبه

** فريق الترانيم في الكنيسه الانجليه هيصلي قبل ما يختار الترانيم اللي هتترنم قبل العظه كمان احد الخدام هياخد كلمه يقول فيها تأمل بسيط بين كل ترنيمه وترنيمه

&& قبل الوعظه في الكنيسه الارثوذكسيه واللي اعرفها القبطيه اي خادم بيقود فترة الترانيم من غير تحضير او صلا وبيطلب من الشباب ان كل واحد يختار الترنيمه اللي تعجبه

** فريق الترانيم الانجيلي هيختار ترانيم مثلا زي راجع للأب الحنان و أيها الفخاري الاعظم و هل اطرق بابك بعد ضياع الكل

@@ حبيبي الخادم الارثوذكسي الولاد هيختاروا ترنيمة كنيستي كنيستي كنيستي هي بيتي و كمان طوباكي يا عدرا يا امي و يا سائح للقاء يسوع

لاحظوا ان الموضع كان عن التوبه الاخوه الانجليين اجتماعهم هيبدأ وهما مهيأين للتوبه ولادنا الارثوذكس اجتماعهم هيبدا وابليس مش محتاج يحاربهم بحرب التشتيت لانهم اتشتتوا في فتره التسبيح بما فيه الكفايه

انا مش بقول ان كل كنايسنا الارثوذكسيه كدا بس 90% كدا لكن برضوا فيهم ناس واعيين لفتره التسبيح بس للأسف هما قله قليله مندسه

قلت كمان ان بعض الشبا ب بيقولوا ان الانجليين عندهم حاجات حلوه ودا بصراحه صح

اصحابي اللي اتربيت معاهم في الكنيسه الارثوذكسيه حاليا هما خدام وامناء خدمه ولما بنشارك بعض عن القراءات في الكتاب المقدس نشبه مش قليله ومش عايزه اقول كبيره بيقولوا انهم بيحضروا الدرس اللي هيقلوه في مدارس الاحد وخلاص

لكن بصراحه الخدام الانجليين بياكلوا الكتاب المقدس أكل

كمان في حاجه مهمه واضحه جدا في الكنيسه الانجليه والكنيسه الارثوذكسيه قبول الاشخاص عارفه انه ملوش علاقه بالعقيده بس الناس ليها الاسلوب اللي بتتعامل بيه ولو عايزيين دليل اقتراح بسيط جدا ممكن اي حد ينفذه

روح اي كنيسه انجليه مش في منطقه سكنك ومتعرفش فيها حد وشوف هتتعامل ازاي وهيستقبلوك ازاي

وروح برضوا كنيسه ارثوذكسيه بعيده عن بيتك وشوف هيطنشوك ازاي و ولا حد هيسأل عنك ومحدش هيتعرف عليك الا لو انت اللي ابتديت تتعرف بيهم
ومضمنش اذا قبلوك ولا لاء

( ملحوظه انا قلت لفظ كنيسه على الكنيسه الانجليه بأعتبار انها جماعة مؤمنين )

من ضمن الحاجات الحلوه اللي عندهم الافتقاد هل احنا عندنا افتقاد جاد فعلا من الخدام ممكن اعذر شويه الاباء الكهنه لانهم مشغوليين لكن الخدام ونرجع نلوم الاولاد المطروحين برا الكنيسه بدون راعي انهم راحوا كنيسه تانيه

هل تعي أصلاً ماهية البروتستانتية ، و ماهية الأورثوذكسية؟ أليس من الجدير إنه عندما تقارن بين شيئين ، يجب أن تكون على علم بهما؟ فما بالك عدم علمك بحقيقة الأورثوذكسية!!؟"
لاء طبعا معاك حق الشباب دول معندهمش فكره خالص عن اي فرق بين الطوائف بسسسسسسسسسسسسسسسس

هما عندهم مشكله كبيره وكارثه اكبر انهم محتاجين ربنا ومش عارفين يوصلوله

ضميرهم بيوجعهم على خطاياهم والروح القدس بيبكتهم في نفس الوقت لما بيروحوا كنيستهم كأنهم دخلولوا متاهة حجا :smilie (137):

إن كان الأمر كذلك ، أليس من الجدير أن نعرف من المسئول عن غياب التعريف بحقيقة الأورثوذكسية للناس و خاصةً الشباب؟ أم المطلوب إن كل واحد ينزل من بطن أمه عارف الروحانية
وصلت لحقيقة المشكلة الكنيسه للاسف اختزلت الارثوذكسيه من انها حياه نحياها الي فرع واحد منكرش انه مهم وهو الاهوت المقارن بس

انا نفسي نعلم اولادنا وشبابنا ازاي يعيشوا الحياه الارثوذكسيه ويفهموها صح وبعد ما يبقى ليهم علاقه مع ربنا نبتدي نكلمهم عن الفروق حتى علشان يقدروا يستوعبوا

المسئول في رأي كلنا الكنيسه من كهنه وخدام وكمان الشعب مفروض يوصلوا الايمان اللي استلموه من ابائهم لأولادهم

** طبعا لينا دور ناحية اخواتنا غير الارثوذكس بس الاول لازم نعرفهم صح ونحاول نفهم طريقه تفكيرهم واسلوبهم علشان نقدر نتفاهم سوا بدل ما الواقع هو حوار طرشان

هل من يطبق العقائد الكاثوليكية او سواها من العقائد الأخرى يخلص؟
في رأى طبعا ايوه لعدة اسباب

اولا انا مؤمنه جدا بالقديسين الكاثوليك مقدرش انكر شفاعة سانت تريز وسانت ريتا اللي بيشكرهم عليها غير المسيحين اصلا بسبب العجائب اللي بتحصل ببركة شفاعتهم

ثانيا هفترض ان انسان ارثوذكسي بالمولد بس ولما بقى شاب بقى مدمن مخدرات وبيستعمل مطوه وبتاع مشاكل وكل الشر اللي انت ممكن تتخيله

والشخص دا قابله خادم مش ارثوذكسي وارشده لطريق الكنيسه اللي مش ارثوذكسيه وعلمه ازاي يقرا ويفهم الكتاب المقدس والشخص دا اتغير بشهادة كل الناس ................ هل ممكن اقول ان دا عمل ابليس

على فكره انا قلت انه مثل بس دا كان اختبار شفته على قناة معجزه وام الشخص دا مبقتش مصدقه ان دا ابنها

ثالثا متنصر قبل المسيح وعرف انه بيعبد ابليس وراح يحاول انه يتعمد في الكنيسه الارثوذكسيه وابونا الارثوذكسي رفض لخوف منه او لآي سبب والشخص دا فضل يدور لحد ما راح كنيسه غير ارثوذكسيه وعاش حياته كمسيحي غير ارثوذكسي وهفترض الاسواء ان اهله لقوه وقتلوه هل ممكن حد يتخيل ان ربنا ممكن يرفضه
ـــــــــــــــــــــــــ ـــــــــــــــــــــــــ ـــ

هو مطلعش رد هو طلع مقال لوحده بس انتوا قلتوا جابوا على اللي بتفكروا بيه

ولو حد زعل مني او من كلامي ادي ورده هديه